LIKUMBI limwe, Laveka apwile nakuya ungeji wausuku, kaha mujila ayilenga amwenenga milandala yamalolwa. Hakuwana nge ungeji kana autambukile havyalumingo vyavivulu, ejililile jino kutambukila hangamela. Asezele limbo lyenyi kwakusuku kumututuko waHalane. Kashinganyekele ngwenyi vausoko wenyi mwakavamona chekako. Kaha nawa atela alizakaminyine hachiyoyelo chenyi, chikumanyi omu apwile kwakamwihi nakuheta okwo apwile nakuya.

Chendo chavo chapulasanyine muKanane nakwingila jino mungalila yayipi yaNengeve. (Kuputuka 24:62) Omu Laveka ahetele kuze, atela amwene mikoko. Ngalila kana kayapwile yamwaza chikuma kuyilimako, oloze yapwile namwila wauvulu wakulya vimuna. Yapwile yawenyembo kuli mukulwane walunga umwe uze ayilenga nenyi ungeji. Ou lunga afwililile kuheta washi akalweze kaka yenyi Isaka mujimbu wamwaza ngwenyi namunehela mwenga. Oloze pamo Laveka alizakaminyine numba nge mwayoya kanawa mungalila kana nyi chiku. Kaha nawa pamo alizakaminyine vyalunga mwaya nakusombokako uze kanda amonengaho lyehi. Nyi ngachilihi Isaka? Kutala mwawahilila hakumona Laveka tahi? Uno Laveka naikiye mwamuzanga tahi?

Mumafuchi amavulu makumbi ano, vatu vamona kusakwila mutu pwevo wakumbata kupwa chakuhingama. Oloze mumafuchi eka malo angana alisala chikuma. Numba mwatwama mumafuchi muze mwalisala malo kana chipwe chiku, oloze munahase kwitavila ngwenu Laveka naikiye kejivile omwo naupwa ulo wenyiko. Pwevo kana apwile wakumika, walufwelelo. Shikaho nayetu twatela kupwa navilinga kana nge chiyoyelo chetu chinalumuka. Chipwe ngocho, kuli nawa vilinga vyeka vyakafwile Laveka apwenga nalufwelelo lwangana.

“NANGUSWICHILA NAVANGAMELA JOVE NAWA MEYA”

Kuli chuma chimwe alingile Laveka chize chasolokele nge chakuhemesa chize chalumwine kuyoya chenyi chosena. Laveka akolelele munganda yaHalane muMesopotamya. Visemi jenyi vapwile navilinga vyakulihandununa navilinga vyavatu vamunganda kana. Kavalemeselenga kalunga wakakweji vavulukilenga ngwavo Sin. Valemeselenga kaha Kalunga kavo Yehova.—Kuputuka 24:50.

Laveka apwile mwanapwevo wamwaza chikuma, oloze kazachishile kuwaha chenyi mujila yakuhengako. Apwile nyamalikita kaha nawa wavilinga vyamwaza. Numba tuhu mutanga yavo vapwile navangamba, oloze visemi jenyi kavamulelele ndendekako. Vamunangwile kuzata milimo yakulisezaseza, yakufwana nge kuswita meya ngana muze valingilenga vakwavo mapwevo. Chingoloshi hichingoloshi ambachilenga mulondo wenyi hachifwiji nakuya nakuswita meya kulishima.—Kuputuka 24:11, 15, 16.

Likumbi limwe nachingoloshi omu alingile naswichi lyehi meya mumulondo wenyi, amwene mukulwane walunga ali nakumulahila. Uze lunga alombele Laveka ngwenyi: “Nguhaneko meya mumulondo wove ngunwenga.” Laveka amwene ngwenyi ou lunga nafumu kwakusuku. Ngocho atulile washiwashi mulondo wenyi nakumuhana meya. Amwene nawa vangamela jauze lunga 10 vanautama kwakamwihi nachizau chakunwina vimuna muze kamwapwile meyako. Laveka amwene ngwenyi uze lunga ali nakumushishika, ngocho afwililile kumusolwela chisambo. Ambile ngwenyi: “Nanguswichila navangamela jove nawa meya palanga nomu navamanyisa kunwa.”—Kuputuka 24:17-19.

Nyingililenu ngwenu Laveka aswichililile vangamela 10 meya palanga nomu vamanyishile kunwa. Ngamela umwe nahase kunwa jilita jameya jakuzomboka 95 nge  nevu lipwila chikuma. Nge vaze vangamela 10 vapwile nalipwila chikuma, kachi Laveka ambachile tando yayisuku hakuvaswichila meya. Oloze mujimbu wasolola nge vaze vangamela kavevwile lipwila chikumako. * Uno Laveka atachikijile ngwenyi kavapwile nalipwila chikumako tahi? Nduma. Afwililile kusolwela uze ngeji chisambo hakulisuulula nakuzata nangolo aswichile meya vimuna jenyi. Kaha uze lunga etavilile. Ashishikilenga lika Laveka omu alahililenga kulishima mapapa kakavulu nakuswita meya mumulondo nakuwahingunwina muchizau.—Kuputuka 24:20, 21.

Laveka apwile nyamalikita kaha nawa wachisambo

Chakutalilaho chaLaveka nachitukafwa chikuma makumbi ano. Tuli nakuyoyela mulwola luze vatu vavavulu valizanga kaha vavene. Ngana muze yahanjikile chimweza Mbimbiliya, makumbi ano vatu vapwa “vaka-kulizanga vavene,” kaha kavasaka kulisuula kukafwa vakwavoko. (WaChimoteu 2, 3:1-5) Vaka-Kulishitu vaze navasaka kuhonesa muchima kana vatela kushinganyeka hachakutalilaho chamuMbimbiliya chamwanapwevo Laveka uze alahililenga kulishima mapapa kakavulu nakuswita meya.

Laveka atela amwenenga uze mukulwane walunga ali nakumushishika. Uze lunga kapwile navishinganyeka vyakuhenga hali ikiyeko, oloze alikomokelele nakusuuluka navyuma apwile nakukilikita. Omu Laveka akumishile, uze lunga amuhanyine vimbilingwa vyandando yayinene. Kufumaho amuhulishile ngwenyi: “Ngulweze, ove umwaneya? Kutala kuzuvo yaiso tunahase kuwanako kwakusavala tahi?” Omu amulumbunwinyine kutanga afumine, uze lunga awahililile chikuma. Kufumaho, Laveka afwelelesele uze lunga ngwenyi navamuhana kwakusavala hamwe namalunga vaze ejile navo. Ambile ngwenyi: “Tuli namwila nakulya cheka chachivulu chavangamela, kaha tuli nawa noku kwakusavala.” Kaha Laveka ayile jimbushi nakulweza naye vyuma vyasolokele.—Kuputuka 24:22-28, 32.

Echi chasolola hatoma nge Laveka vamulelele kanawa nakupwa namuchima wachisambo. Vatu vavavulu makumbi ano kavatwama namuchima kanouko. Shikaho twatela kulondezezela lufwelelo lwayou mwanapwevo walikoji. Kufwelela Kalunga chikiko nachitulingisa tupwenga namuchima wachisambo. Yehova apwa wachisambo chipwe ngwetu wazumbu mwomwo eji kuhananga vatu vosena vyuma vasaka. Kaha asaka nayetu vaka-kumulemesa tulingenga mwomumwe. Nge natusolwelanga chisambo vatu vaze kaveshi kuhasa  kutulingila vyuma vimweko, kaha natwivwisa Setu wamwilu kuwaha.—Mateu 5:44-46; WaPetulu 1, 4:9.

‘UKAMBACHILE MWANAMI PWEVO’

Uno uze mukulwane walunga alihumanganyine naLaveka halishima apwile iya? Apwile ngamba yaApalahama. Apalahama apwile ndumbu yakaka yaLaveka. Ngocho uze lunga vamutambwile nachisambo kuli Mbetwele ise yaLaveka. Lijina lyayou ngamba pamo apwile ikiye Eliyeze. * Vamunehelele vyakulya, oloze akanyine. Asakile kuvangila kuvalwezela vyuma akatukilile. (Kuputuka 24:31-33) Uze lunga atela apwile nakuhanjika oku nawahilila mwomwo amwene hatoma ngwenyi Yehova Kalunga nakisula ungeji wenyi waulemu. Mujila muka?

Achishinganyekenu Eliyeze ali nakutela Mbetwele naLavane ndumbu yaLaveka mujimbu wavyuma akatukilile, kaha vakiko vali nakumwivwilila kanawa. Avalwezele ngwenyi Yehova nakisula Apalahama muKanane. Kaha nawa naseme mwana walunga Isaka kuli puwenyi Sala, uze mwakaswana vyuma vyosena. Apalahama ahanyine ou ngamba yenyi mulimo waulemu chikuma wakumbachila Isaka pwevo kuli vausoko waApalahama muHalane.—Kuputuka 24:34-38.

Apalahama ashingishile Eliyeze ngwenyi kanda mwakambachila Isaka pwevo wakuli vaKananeko. Mwomwo ika? Mwomwo vaKanane kavavumbikilenga Yehova Kalunga nakumulemesako. Apalahama atachikijile ngwenyi Yehova mwakazangamisa vatu kanava vavilinga vyavipi halwola atongola. Ngocho kasakile mwanenyi azanga Isaka alikate navatu kana nakukavangiza vilinga vyavo vyavipiko. Atachikijile nawa ngwenyi mwanenyi apwile namulimo waulemu wakutesamo jishiko jaKalunga.—Kuputuka 15:16; 17:19; 24:2-4.

Eliyeze atwalilileho kulweza Mbetwele naLavane ngwenyi omu ahetanga kwakamwihi nalishima lyamuHalane alombanga kuli Yehova Kalunga. Alombele kuli Yehova amusakwile pwevo uze mwambachila Isaka. Mujila muka? Amulwezele amukafwe ambachile Isaka weshowo pwevo mweza nakuswita meya kulishima. Kaha weshowo pwevo mwamuhana meya akunwa, atela nawa kuhana navangamela jenyi meya. (Kuputuka 24:12-14) Uno mwanapwevo muka alingile vyuma kana? Laveka. Mujimbu atele Eliyeze atela wamwivwishile kuwaha nge awivwile.

Mbetwele naLavane vawahililile chikuma namujimbu waEliyeze, ngocho vambile ngwavo: “Chuma kana chinafumu kuli Yehova.” Kweseka nachisemwa chavo, valikashile jino lushiko lwaulo, kufumaho vahangishile Laveka kuli Isaka. (Kuputuka 24:50-54) Uno echi chalumbununa nge Laveka etavililile kaha chakuzeneka kuhanjikaho tahi?

Shimbu kanda Eliyeze ayenga ungeji kana, ahulishile kaka yenyi Apalahama ngwenyi: “Nyi ngachilihi nge owo pwevo mwakakana kwiza nayami kulifuchi lino?” Apalahama amukumbulwile ngwenyi: “Echi nachikakusokola kulushingo elu naulishinga kuli ami.” (Kuputuka 24:39, 41) Echi chasolola hatoma nge Laveka naikiye apwile nangolo jakwitava kusomboka chipwe chiku. Omu Eliyeze amwene ngwenyi vyuma akatukilile vinawahe, evwile kuwaha chikuma, ngocho alombele vamwitavise akinduluke kuKanane naLaveka lichako nachimene. Oloze vausoko vasakile vachitwame naLaveka makumbi 10. Kaha hakusaka vavatule echi chihande, vambile ngwavo: “Mana tusanyike livene mwanapwevo, twivwenga mukanwa kenyi.”—Kuputuka 24:57.

Aha hakiko jino chalumukilile chiyoyelo chaLaveka. Uno akumbulwile ngwenyi ika? Kutala alembelele ise nayayenyi vamukanyise kuya nauze lunga mwomwo yakuvevwila keke hachinyengo vapwile nacho tahi? Nyi amwene chuma kana kupwa hikutokwa chize chafumine kuli Yehova? Vyuma akumbulwile Laveka vyasolwele vyuma apwile nakushinganyeka hachihande kana chize chalumwine chiyoyelo chenyi. Ambile ngwenyi: “E mwane nanguya.”—Kuputuka 24:58.

Chikupu vene ou mwanapwevo apwile namuchima wamwaza. Tunahase kulinangula vyavivulu kumujimbu waLaveka numba tuhu visemwa vyetu vyamakumbi ano kutalisa kuulo vyalihandununa navisemwa vyavo. Chuma chapwile chachilemu kuli ikiye shina kulinga vyuma vize asakile Kalunga kenyi Yehova keshi vize asakile iveneko. Namakumbi ano, Mazu aKalunga eji kutukafwanga mwakusakwila mutu wakulimbata nenyi, namwakupwila lunga chipwe pwevo wamwenemwene. (Wavaka-Kolinde 2, 6:14, 15; Wavaka-Efwesu 5:28-33) Ngocho twatela kukavangiza chakutalilaho chaLaveka nakufwila kulinga vyuma mujila yize asaka Kalunga.

 “LUNGA MUKA UZE?”

Omu lyahetele likumbi lyakukatuka, tanga yaMbetwele yakiswile Laveka. Kufumaho, akatukile nandeji yenyi Ndevola, navangamba jenyi vamapwevo nakuya naEliyeze namalunga vaze ejile navo. (Kuputuka 24:59-61; 35:8) Nakushimbu chiku, vasezele Halane. Vatambukile tunda yajikilomita 800 kafwe havyalumingo vitatu numba vahete. Twafwelela vazeyele hakutambuka ungeji kana. Laveka amwenenga vangamela vavavulu mukuyoya chenyi, oloze katweshi kuhasa kwamba ngwetu atachikijile kutambukila hangamelako. Mbimbiliya kayavuluka nge vaka-tanga yaLaveka vapwile vaka-kusekasana vaze vazachishilenga vangamelako, oloze yahanjika nge vahetele mikoko. (Kuputuka 29:10) Kakavulu vatu vaze veji kutambukilanga hangamela lwola lwatete veji kuyayavalanga mwomwo yakuzeya numba vene nge vanatambuka tunda yayindende.

Chipwe ngocho, Laveka atela omikile nakwihwojola Eliyeze amulweze vyavivulu hali Isaka natanga yenyi. Achishinganyekenu ou mukulwane walunga natwame kulijiko naufuku, ali nakulweza Laveka vyuma vize Yehova ashikile Sepa lyenyi Apalahama. Amulwezele vyuma ashikile Kalunga ngwenyi mwakakisula vatu vosena kuhichila muli muka-tanga uze mwakafuma kutanga yaApalahama. Achishinganyekenu omu Laveka evwile hakutachikiza ngwenyi lushiko lwaYehova nalukatesamo kuhichila muli ikiye naIsaka uze mwapwa lunga lyenyi.—Kuputuka 22:15-18.

Laveka apwile wakulinyisa chikuma

Ngana muze twahanjikanga kumaputukilo achihande chino, Laveka ahetele jino muNengeve. Hakulembalemba chalikumbi omu chendo chavo chahetele muNengeve, Laveka amwene lunga umwe ali nakutambuka muchipapa. Ou lunga apwile nakusoloka nge apwile nakushinganyeka havyuma vimwe. Ngocho Laveka “asulukile washiwashi hangamela,” chakuzeneka kuvandamina ngamela achiutame, kaha ahulishile Eliyeze ngwenyi: “Lunga muka uze ali nakutambuka muchipapa nakwiza nakutusesa?” Omu amulwezele ngwenyi apwile Isaka, ambachile lihina nakulifwika kumutwe. (Kuputuka 24:62-65) Mwomwo ika? Echi chapwile chinjikizo chakusolola kavumbi kuli lunga uze mwamumbata. Vatu vamwe makumbi ano vanahase kumona chuma alingile Laveka nge hikusalila. Oloze tuvosena, malunga namapwevo twatela kulinangulako chuma chimwe chachilemu chikuma. Twatela kupwa namuchima wakulinyisa ngana mwaLaveka.

Halwola kana, Isaka uze apwile namyaka yakusemuka 40, achipwile nakulishona naye Sala uze afwile kafwe myaka yitatu kunyima. Echi chasolola nge Isaka apwile lunga wamuchima wamwaza chikuma, wakeke. Ngocho atokwele chikuma kumbata pwevo wachisambo, wakulinyisa kaha nawa nyamalikita. Uno ava valunga napwevo vatwaminenga ngachilihi? Mbimbiliya yamba ngwayo Isaka ‘azangile chikuma’ puwenyi.—Kuputuka 24:67; 26:8.

Numba tuhu munahichi makulukaji amyaka 39 kufuma halwola luze apwileko Laveka, oloze nayetu hanga twamuzangila. Twamuzanga mwomwo yakumika chenyi, nachisambo, nakulinyisa, nakukilikita chenyi. Tuvosena, vanyike navakulwane, namapwevo namalunga, navaze valimbata, navajike twatela kulondezeza lufwelelo lwenyi.

^ par. 10 Mujimbu kana kawatulweza ngwavo Laveka apwile haze halishima jola jajivuluko mwomwo chapwile chingoloshi. Kawasolola nawa ngwawo hakukinduluka hembo awanyine vaka-tanga yenyi vanasavala lyehi, chipwe ngwawo kwapwile mutu umwe amukavangijile kulishima akamone ovyo ashimbwililileko.

^ par. 15 Numba tuhu Eliyeze kavamuvuluka mumujimbu kanouko, oloze chasoloka nge ikiye vene uze ngamba vatumine. Lwola lumwe Apalahama ajinyine ngwenyi nge keshi kukasema mwanako, kaha vyuma vyenyi vyosena vakaviswane kuli Eliyeze. Echi chasolola nge ikiye apwile ngamba yenyi wamukulwane uze afwelelele chikuma. Omu mukiko valumbununa ou ngamba mumujimbu uno.—Kuputuka 15:2; 24:2-4.