• MWAKA ASEMUKILE: 1960

  • MULIFUCHI ASEMUKILA: FRANCE

  • CHIYOYELO CHENYI CHAKUNYIMA: ANWINENGA MAUNDU AKUPENDESA NAKUHONA KUVUMBIKA MAPWEVO

MUJIMBU WAKUYOYA CHAMI:

Ngwasemukilile mungalila yimwe yaulyanyi chikuma yamunganda yaMulhouse yize yatwama kunote yaFrance. Kufuma vene kuunyike wami, ngwamwenenga vatu navalizungisa mujitanga. Mutanga yetu, mapwevo kavavavumbikilengako kaha nawa kakavulu kavavalwezelenga vyuma vajinyinenga kulinga malungako. Vangulwezelenga ngwavo milimo yamapwevo yapwa kaha yakuzata muchisambwe mangana vazakame malunga javo navana vavo.

Chiyoyelo chami chakaluhwile kuunyike. Tata afwile nawala te nguli namyaka yakusemuka 10. Kahomu mwahichile myaka 5, yaya walunga alijihile. Mumwaka woumwe, mutanga yetu mwepukile ndombo, kaha kausoko ketu umwe vamujihile. Echi changukomwesele chikuma. Vausoko wami vangunangwile mwakuzungila najipoko namata nge kuli ndombo. Chiyoyelo chami chapwile chaliwayanga, ngocho ngwaputukile kulichata jichato mujimba wosena nakunwanga wala.

Omu ngwapwile namyaka yakusemuka 16, ngwanwinenga mitumwa yawala kafwe 15 hakumbi hakumbi. Kutwala muze, ngwaputukile kunwa maundu akupendesa. Ngwaputukile nawa kwiva nakulanjisa vikungo vize vambila lyehi mangana nguwaneko jimbongo jakulanda wala namaundu akupendesa. Vaputukile kungukasa munjele te nguli namyaka yakusemuka 17. Vangukashile munjele mapapa 18 mwomwo yawiji naulyanyi.

Omu ngwapwile namyaka yakusemuka kafwe 20, chiyoyelo chami chapwile nakupihilako lika. Ngwanwinenga tusanga twalyamba 20 halikumbi namaundu akupendesa akulisezaseza. Kakavulu ngwaliwezelengavyo, kaha hasalilenga hahandende nakufwa. Kutwala muze, ngwaputukile kulanjisa maundu akupendesa, ngocho lwola lwosena ngwatambukilenga najipoko namata. Likumbi limwe, ngwalozele mutu, kaha chilyanga chakakwachile hachikungo chamuhya avwalile nakuchituka, ngocho kafwileko. Kahomu ngwapwile namyaka yakusemuka 24, mama afwile, kaha muchima wami wapwile nakupihilako lika. Nge tunalihumangana navatu mujila, vevwilenga woma nakungusela jila. Ngwazungilenga chikuma jindombo, ngocho tupokola vangukwachilenga mapapa kakavulu. Kaha nawa shimbu jimwe vangutumbikilenga muchipatela mwomwo yakungutwa jimbandu. Vyuma kana vyasolokelenga kusongo yachalumingo hichalumingo.

Omu ngwapwile namyaka yakusemuka 28, ngwambachile pwevo. Oloze kangwamuvumbikilengako. Ngwamutukanyinenga nakumuveta. Katwazachililenga hamweko. Ngwashinganyekele ngwami pamo mwasuuluka hakumuhananga kaha vimbilingwa vyakwiva. Oloze kwasolokele chuma chimwe chakulipwila. Puwami aputukile kulinangula Mbimbiliya naVinjiho jaYehova. Kufuma vene halikumbi lize, echele kunwa makanya, nakukana kutambula  jimbongo jakwiva ngwamuhanyinenga. Angukindulwishilile nawa vimbilingwa vyosena ngwamuhanyinenga. Ngocho ngwapihililile chikuma, kaha ngwamukanyishile kulinangula Mbimbiliya nakumufwafumwinanga wishi wamakanya kumeso. Kaha nawa ngwahitanganyinenga mungalila yosena nakumusaula.

Likumbi limwe naufuku, ngwapendele chikuma, kaha ngwochele zuvo yetu. Puwami anguyowele hamwe namwanetu wapwevo wamyaka yakusemuka 5 mumilangi yakakahya. Omu ngwapwile mumeso achanga, chivezu chami changuyanjishile chikuma. Ngwashinganyekele ngwami Kalunga keshi kukangukonekelako. Kaha ngwanukile kapilishitu umwe uze ahanjikile ngwenyi vaka-kuhuka veji kuyanga muhelo. Ndotolo umwe muka-kuka musongo wamatachi naikiye angulwezele ngwenyi: “Yove kunahu! Kaweshi kukapwa cheka umutuko.”

OMU MBIMBILIYA YALUMWINE KUYOYA CHAMI:

Omu yawemene zuvo yetu, twayile nakutwama navisemi japuwami. Kahomu Vinjiho jaYehova vatambukilile puwami, ngwavahulishile ngwami, “Kutala Kalunga nahase kungukonekela jishili jami josena tahi?” Vangutangililile chisoneka chaWavaka-Kolinde 1, 6:9-11. Chisoneka kana chavuluka vilinga vize ahunga Kalunga, kaha chavuluka nawa ngwacho: “Omu mukiko mumwapwilenga nayenu vamwe.” Mazu kana angukafwile ngumone ngwami chapwile chachashi kwalumuna vilinga vyami. Kufumaho, vaze Vinjiho jaYehova vangutangilile mukanda WaYowano 1, 4:8 nakungufwelelesa ngwavo Kalunga anguzanga. Mazu kana angukolezezele, ngocho ngwavalwezele vangunangulenga Mbimbiliya kavali muchalumingo. Ngwaputukile kuyanga navo nakukunguluka nakulombanga kuli Yehova lwola lwosena.

Ngwechele kunwa maundu akupendesa nawaIa mukakweji umwe kaha. Oloze ngwaputukile kwivwa kwijiva nge mujimba keshi wamiko. Ngwalotelenga vyuma vyavipi, nakuviza mutwe, namisongo yeka mwomwo yakwecha kunwa maundu akupendesa. Chipwe ngocho, ngwamwene omu Yehova apwile nakungukafwa nakungujikijisa. Ngwevwile ngana muze evwile kaposetolo Paulu uze vakafwile kuli Kalunga nakusoneka ngwenyi: “Ngunajikiza muvyuma vyosena kuhichila muli ou eji kunguhananga ngolo.” (Wavaka-Fwilipi 4:13) Kutwala muze, ngwalitwaminyine kunwa makanya.—Wavaka-Kolinde 2, 7:1.

Mbimbiliya kayangukafwile ngwalumune kuyoya chami kahako, oloze yatukafwile nawa mutanga tupwenga vakuwahilila. Ngwalumwine vishinganyeka vyavipi ngwapwile navyo hali puwami. Ngwaputukile kumuvumbika nakuhanjikanga ngwami “mwane,” “ngwasakwililako.” Kaha nawa ngwapwile jino nguchisemi wamwenemwene nakuzakama mwanetu. Hanyima yakulinangula Mbimbiliya mwaka wamuundu, ngwalihanyine kuli Yehova, kaha vangumbapachishile nakukavangiza chakutalilaho chapuwami.

OMU NGUNANGANYALA:

Ngunatachikiza chikupu ngwami jindongi jamuMbimbiliya jinayovola mwono wami. Navaka-tanga yami vaze kavapwa Vinjiho jaYehovako vatachikiza ngwavo kachi ngwafwa lyehi mwomwo yakunwa makanya namaundu akupendesa nakuzunga jindombo.

Vyuma yanangula Mbimbiliya kutalisa kumilimo atwama nayo lunga chipwe chisemi mutanga vinatukafwe tupwenga vakuwahilila mutanga. (Wavaka-Efwesu 5:25; 6:4) Twaputukile jino kuzachila hamwe mwatanga. Muchishishisa chakushinyinyika puwami azatenga kaha milimo yakuchisambwe, ngweji kumukundwizanga mumulimo wenyi washimbu yosena wakwambulula. Naikiye eji kungukundwizanga chikuma nguzate kanawa milimo yami yamuchikungulwilo hakupwa ngumukulwane.

Zangi nakeke nangusolwela Yehova Kalunga vinangukolezeza chikuma. Echi changulingisa ngufwile kwambulula vilinga vyaYehova vyamwaza kuvatu vaze vamona kuli vavavulu nge kaveshi kukalumukako, ngana muze vangumwenenga ami. Ngwatachikiza ngwami Mbimbiliya yatwama nangolo jakukafwa kala mutu apwenga navilinga vyamwaza nakuwahilila mukuyoya. Mbimbiliya yinangunangula nguzange vakwetu, numba vapwa malunga chipwe mapwevo nakuvavumbika. Yinangukafwe nawa ngulivumbikenga ami ivene.