Uno mwahombaho lyehi mwomwo yakuviza tahi? Pamo mwayoyele washi, kaha oholyapwa mwavulyama naukalu mwamwene. Oloze kulishona kachapwa ngochoko. Ndotolo Alan Wolfelt asonekele mumukanda waHealing a Spouse’s Grieving Heart ngwenyi, “Ushona ‘kaweshi kukumako.’” Oloze ambile nawa ngwenyi: “Mukuhita chalwola, ushona weji kukehanga hakutukafwa kuli vakwetu.”

Tutalenu omu kakuluka yetu Apalahama evwile hakufwisa puwenyi. Mbimbiliya yamba ngwayo “Apalahama alishonene nakulila Sala.” Chasoloka nge “alishonene” hatando yayisuku. * Chakutalilaho chikwavo shina chaYakova uze vongele ngwavo mwanenyi Yosefwe vanamujihi kuchisuma. Alishonene “hamakumbi amavulu,” kaha vaka-tanga yenyi kavahashile kumuvendejekako. Ashinganyekelenga lika mwanenyi hamyaka yayivulu.—Kuputuka 23:2; 37:34, 35; 42:36; 45:28.

Apalahama alishonene puwenyi Sala uze azangile chikuma

Navatu vavavulu makumbi ano veji kulishonanga chikuma nge vanafwisa mutu vazanga. Tutalenu havyakutalilaho vino vivali.

  • Gail, pwevo wamyaka yakusemuka 60 ambile ngwenyi, “Lunga lyami Robert afwile muponde mu 2008 ha July 9. Kangwashinganyekele ngwami mwapwa muponde nakufwako, mwomwo halikumbi kana omu twakumishile kulyaula, twalisweswenyele nakulipakata mukasamba, nakulilweza ngwetu ‘twalizanga’ ngana muze twalingilenga makumbi osena shimbu kanda ayenga kumilimo. Numba tuhu munahichi myaka 6 kufuma hakufwa chenyi, oloze ngweji kwivwanga lika kumuchima kukola. Kwijinganyi nge kulishona lunga lyami nachikakuma.”

  • Etienne, lunga wamyaka yakusemuka 84 ambile ngwenyi, “Numba tuhu munahichi myaka yakuhambakana 18 kufuma hakufwisa puwami, noholili ngweji kumwanukanga nakulishona. Nge ngunamono chuma chimwe chamwaza atenga Kalunga, ngweji kushinganyekanga ngwami, nge naikiye kwapwanga kachi nawahilila hakumona chuma kana.”

Chikupu vene, kulishona mujila kaneyi kachapwa chakuhengako. Vatu veji kulishonanga mujijila jakulisezaseza, kaha kachapwa chakutamo kuvahana mulonga mwomwo yajila vali nakulishonenamoko. Kaha nawa katwatela kulihana etu vavene mulonga nge tuli nakulishona chikumako. Jino tunahase kumika ngachilihi nge tuli nakulishona?

^ par. 4 Isaka mwanaApalahama naikiye alishonene hatando yayisuku. Nganomu natumona muchihande chakwamba ngwavo “Londezezenunga Lufwelelo Lwavo” mumangazini yino, Isaka alishonene hamyaka yitatu kufuma hakufwa chanaye Sala.—Kuputuka 24:67.