MAUKA amavulu mukaye, akufwana nge Chachi yaKatolika, najiChachi jaOrthodox, nakwitava chavaBuddha, namauka eka, vakasa lushimbi nge vatwamina javo vatwamenga kaha ujike. Kaha nawa vatu vavavulu vashinganyeka ngwavo elu lushimbi lwakutwama ujike lukiko lunakulingisa vatwamina vamukwitava valingenga ujila.

Ngocho chapwa chakutamo kuhulisa ngwetu, uno Visoneka vyahanjika nge vaka-Kulishitu vatela kutwama kaha ujike tahi? Hakusaka tukumbulule chihula kana, tukekesenu tuwane okwo kwafuma lushimbi kana nomu alumona Kalunga.

LUSHIMBI LWAKUTWAMA UJIKE MUKWITAVA

Mukanda waEncyclopædia Britannica walumbununa ujike kanou ngwawo “wapwa kutwama chakuzeneka kwingila muulo chipwe kulinga ujila, chikumanyi kuli vakulwane vamukwitava.” Mumwaka wa 2006 omu Popu Benedict XVI apwile nakuhanjika kulizavu lyavaka-Loma, afwanyishile kutwama ujike “kuchisemwa chize chapwileko omu vaPosetolo valingile hivanafu lyehi.”

Vaka-Kulishitu vamulikulukaji lyamyaka lyakulivanga kavapwilenga nalushimbi lwakutwama ujikeko. Kaha nawa kaposetolo Paulu, uze ayoyelelele mulikulukaji lyamyaka lyakulivanga ahuhumwine vaka-kwitava kutalisa kuvatu vaze vapwile nakuhanjika “mazu vahwima akuhungumwisa” vaze nawa “veji kukanyisanga vatu kulimbata.”—WaChimoteu 1, 4:1-3.

Jishimbi jakutwama ujike japutukile kutanda mujiChachi “jaVaka-Kulishitu” jaKumututuko mulikulukaji lyamyaka lyamuchivali. Kweseka namukanda vavuluka ngwavo Celibacy and Religious Traditions, wasolola nge “jishimbi kana jatwalileho lika mwomwo yavilinga vyaujila vize vyalisalile chikuma muWangana wavaLoma.”

Mumakulukaji amyaka akavangijileho, vatwamina vamujiChachi vetavishile lushimbi lwakwamba nge  vatwamina vamauka vatelelele kutwama ujike. Vashinganyekele ngwavo kulisavala chalunga napwevo chapwile kwenyeka nakupihisa milimo yavatwamina. Chipwe ngocho, mukanda waEncyclopædia Britannica wavuluka ngwawo “kuputuka vene kumakumishilo alikulukaji lyamyaka lyakusokesa 10 vapilishitu vavavulu navambishopu vamwe vambachile mapwevo.”

Lushimbi lwakwamba ngwavo vatwamina vatela kutwama ujike, valukashile omu kwapwile kuliwana chavakulwane vamuKatolika mu 1123 na 1139, chize chapwililile muLoma, kaha lushimbi kana valukasa nakulukavangiza kuvatwamina vamuChachi yaKatolika namakumbi ano. Lushimbi kana lwakafwa chachi yaKatolika kulama vatu vahana vihela vyavinene nakuhonesa ukalu uze weji kwizanga mwomwo yavaPilishitu vaze vambata mapwevo nakusaka kuhana vikumba vyachachi kuli vana vavo.

OMU KALUNGA AMONA KUTWAMA KAHA UJIKE

Mbimbiliya yasolola kanawa omu Kalunga amona kutwama kaha ujike. MuMbimbiliya mukiko tweji kuwananga mazu aYesu akutalisa kuvatu vaze vatwamine ujike ngana muze alingile ikiye “mwomwo yaWangana wamelu.” (Mateu 19:12) Kaposetolo Paulu naikiye ahanjikile hali vaka-Kulishitu vaze vakavangijile chakutalilaho chenyi hakutwama kaha ujike “mwomwo yamujimbu wamwaza.”—Wavaka-Kolinde 1, 7:37, 38; 9:23.

Chipwe ngocho, Yesu naPaulu kavahanyine lushimbi vaka-Kulishitu vatwamenga kaha ujikeko. Yesu ambile ngwenyi, kutwama kaha ujike chapwile “wana” kuli mutu keshi kuli vaka-kumukavangiza vosenako. Kaposetolo Paulu hakusoneka ngwenyi “vatu vaze kanda valisavaleho lyehi namapwevo chipwe namalungako,” alumbunwine ngwenyi: “kangweshi nalushimbi lwakuli Mwatako, oloze nangumilweza omu ngwashinganyeka ami.”—Mateu 19:11; Wavaka-Kolinde 1, 7:25, kwinyikila chamwishi.

Mbimbiliya yahanjika nawa hali vaka-Kulishitu vavavulu vamulikulukaji lyamyaka lyakulivanga, kuhakilako nakaposetolo Petulu ngwayo vambachilenga mapwevo. (Mateu 8:14; Mako 1:29-31; Wavaka-Kolinde 1, 9:5) Hakusaka mutu ahone kupwa navilinga vyaujila vize vyalisalile mulifuchi lyaLoma halwola kana, Paulu asonekele ngwenyi nge kalama uze apwa muka-Kulishitu ambata, kaha atela kupwa “lunga ambata pwevo umwe kaha,” kaha nawa uze ali navana vakuliluula.”—WaChimoteu 1, 3:2, 4.

Echi kachapwile nakulumbununa ujilako, mwomwo Mbimbiliya yahanjika ngwayo ‘Lunga atela kuhananga pwevo lyenyi ovyo vyatela kumuhana’ kaha nawa vaze valimbata ‘kanda navaliminanga ovyo vatela kulihana’ muuloko. (Wavaka-Kolinde 1, 7:3-5) Chikupu vene, Kalunga kahana lushimbi lwakutwama kaha ujike kuli vaka-Kulishituko.

MWOMWO YAMUJIMBU WAMWAZA

Kachi nge kutwama kaha ujike kachapwa lushimbiko, kaha mwomwo ika Yesu naPaulu vasangajekelenga vaze vatwaminenga ujike? Mwomwo ujike unahase kukafwa chikuma mutu awane lwola lwaluvulu lwakwambulula mujimbu wamwaza. Vajike vanahase kulisuula kuzata chikuma milimo yaKalunga mwomwo kavatwama navyuma vyakuvalingisa valizakamine ngana mwavaze vambatako.—Wavaka-Kolinde 1, 7:32-35.

Achitalenu hachakutalilaho chaDavid, uze echele kuzata milimo yajimbongo jajivulu muMexico mangana ayenga mujingalila jamumembo jamuCosta Rica nakunangula vatu Mbimbiliya. Uno David amwene ngwenyi kutwama ujike chikiko chamukafwile alinge chuma kana tahi? Ambile ngwenyi “Eyo, chapwile chachikalu chikuma kwijilila chisemwa cheka nakuyoya mujila yeka, oloze hakuwana nge ngwapwile ukawami chapwile chachashi kwijilila chiyoyelo kana.”

Claudia muka-Kulishitu wamujike uze nambulwilanga kuvihela kuze kweji kusakiwanga vaka-kwambulula ambile ngwenyi: “Ngunalivwisa kuwaha kuzachila Kalunga. Lufwelelo nausoko wami naKalunga vinazame chikuma hakumona omu Kalunga eji kunguzakamanga.”

“Chachilemu shina kuzachila kaha Kalunga. Mutu numba ambata chipwe apwa mujike nahase kuwahilila nge mwazachila Yehova Kalunga namuchima wenyi wosena.”—Claudia

Ujike kawatela kupwa hichiteliko. Chachilemu shina kuzachila kaha Kalunga. Claudia ambile nawa ngwenyi: “Mutu numba ambata chipwe apwa mujike nahase kuwahilila nge mwazachila Yehova Kalunga namuchima wenyi wosena.”—Samu 119:1, 2.