HA DECEMBER 26, 2004, kwapwile mundenda waunene wamulwiji mungalila yaSimeulue halitungu lyaSumatra, muIndonesia. Omu vatu vatalile kungenge yakalungalwiji, vamwene meya ali nakwiza. Kaha vaputukile kuchina oku vali nakutambakana mulilimi lyavo ngwavo “Smong! Smong!” kulumbununa ngwavo mumundenda. Mwahichile kaha minyutu 30, makimba amanene ejile nakwenyeka jizuvo navyuma vyavivulu.

Chihela kana chikiko chapwile chatete kupwa namundenda waunene. Havatu vosena 78,000 vamungalila kana, hafwile kaha 7. Mwomwo ika vavavulu vayovokelele? * Vatu halitungu kana vatwama nahanjikiso yakwamba ngwavo: ‘Kachi nge kuneza likimba lyalinene, kaha chinyina kupili mwomwo makimba akwavo ali nakwiza.’ Kufuma vene halwola kwapwile mundenda waunene, vatu vakungalila kana veji kutachikiza ngwavo nakupwa mundenda hakumona omu kalungalwiji eji kuputukanga kunganjanga chikuma. Kukavangiza mazu akuhuhumuna chikiko chavayowele.

Mbimbiliya yavuluka nawa “luyando lwalunene, luze kanda lusolokengaho lyehi kufuma kukuputuka chakaye palanga nakulelo lino, kaha chipwe kulutwe nawa kalweshi kukasoloka chekako.” (Mateu 24:21) Vyuma kana kavyeshi kukeza nakwenyeka mavu anoko, mwomwo Kalunga amba ngwenyi mavu nawapwangako lika myaka yosena. (Muka-kwambulula 1:4) Oloze luyando kana nalukeza mangana Kalunga akanongese “vaze veji kwenyekanga mavu.” Halwola kana hakiko jino upi nakuyanda chosena navikakuma hamavu. (Kusoloka 11:18; Vishimo 2:22) Chuma kana nachikawaha chikuma.

Kunongesa kanechi kacheshi kukajiha vatu vakuhenga navakwoloka ngana muze mindenda yeji kunongesanga vatu vosenako. Mbimbiliya ngwayo “Kalunga ikiye zangi.” Lijina lyenyi ikiye Yehova, kaha ashika ngwenyi: “Vaka-kwoloka navakaheta mavu, kaha navakatwamangaho haya myaka yosena.” (WaYowano 1, 4:8; Samu 37:29) Uno vyuma muka mwatela kulinga mangana mukayovoke luyando kanelu nakukalivwisa kuwaha vyuma atushika Kalunga? Mwatela kwakula kumazu vali nakutuhuhumuna!

VANGULUKENU NAVYUMA VINAKWALUMUKA MUKAYE

Katweshi kuhasa kutachikiza likumbi navakafumisako vatu vavapi nakuyanda chosenako, mwomwo Yesu ambile ngwenyi: “Kutalisa kulikumbi lize naola yize kakweshi mutu umwe natachikizako, chipwe vangelo vamwilu, chipwe Mwana, shina Tata kaha.” Echi chikiko chalingisa Yesu atukolezeze ngwenyi ‘tutonenga.’ (Mateu 24:36; 25:13) Uno tutone kuvyuma muka? Mbimbiliya yatulweza vinjikizo vize navikasoloka mukaye shimbu kanda kukuma chizenga. Ngana muze vatu vamungalila yaSimeulue vamwene vinjikizo vyamundenda nakuchina, navyuma vili nakwalumuka  mukaye vyatela kutukafwa tumone nge kukuma chakano kaye chili hakamwihi. Vyuma muka vili nakusoloka mukaye vize Mbimbiliya yahanjikile chimweza, ngana muze vanavuluka halipwata lili halifwo 12 na 13?

Vinjikizo vimwe vanavuluka mulipwata vyaputukile lyehi kusoloka. Oloze Yesu ambile ngwenyi omu namukamona “vyuma vyosena evi,” tachikizenu ngwenu kukuma chakaye chili hakamwihi. (Mateu 24:33) Lihulisenu ngwenu, ‘Havyuma vyosenevi vanavuluka (1) chuma muka chize chasolokaho lyehi mukaye kosena, (2) vyuma muka vyasolokaho lyehi halwola lumwe, (3) upi muka uli nakupihilako lika?’ Chapundu vene tuli nakuyoyela mulwola lwamakumishilo.

KALUNGA ATUSOLWELA ZANGI YENYI

Twamina umwe walifuchi lyaU.S. ambile ngwenyi: “Kulwezela chimweza vatu shimbu kanda ponde yisoloke . . . cheji kuvakafwa vayovoke.” Kufuma vene mu 2004 haze kwasolokele mundenda, vaka-fulumende vahakileko vinjikizo vyakulweza vatu nge mundenda uli nakwiza mangana vachine nakuyovoka. Namakumbi ano, Kalunga nahakeko vinjikizo vyakukafwa vatu vamone ngwavo kukuma chinapandama. Mbimbiliya yahanjikile lyehi ngwayo: “Mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.”—Mateu 24:14.

Mwakawali, Vinjiho jaYehova vambululanga jiola kafwe jimbiliyoni jivali, mumafuchi 240 mumalimi akuzomboka 700. Kuzovoloka chamulimo kanou chinakusolola hatoma nge kukuma chamyaka yino chili hakamwihi. Vangamba jaYehova veji kulisuulanga kuya kuvatu nakuvahuhumuna vyakunongesa chaYehova chize chili nakwiza. (Mateu 22:39) Hakuwana nge nayenu muli nakunganyala hakwivwilila kumujimbu vanakwambulula, chinalumbununa nge Yehova asaka nayenu mukayovoke. Anukenu ngwenu Kalunga “kazanga mutu numba  umwe akanongeko, oloze azanga vosena vapihilile nakwalumuka.” (WaPetulu 2, 3:9) Kutala namwitavila kumazu kana, mangana mukayovoke tahi?

CHINYINENU KUCHIHELA CHAKUKINGIWA!

Vatu vahalitungu lyaSimeulue vachinyinyine kuvihela vyakulunduka omu vamwene makimba anaputuka kwiza. Kwanguhwa washi nakufuma muze mungalila chayowele myono yavo. Nge nayenu muli nakusaka mukayovoke kuluyando luli nakwiza, mwatela kuputuka kuchinyina kuvihela vyakulunduka vyachifwanyisa shimbu kanda luyando kana lwizenga. Munahase kuchina ngachilihi? Kapolofweto Isaya vamuhwiminyinyine asoneke mazu akulanya vatu vosena “hamakumbi akukuminyina” tuli nakuyoyelamo. Asonekele ngwenyi: “Twayenu, tukandukenu kupili yaYehova . . . Mwakatunangula jijila jenyi, kaha natukatambukanga mujijila jenyi.”—Isaya 2:2, 3.

Kuchinyina kujipili nachimikafwa mumone kanawa vyuma vinakusoloka, nakuyovoka. Omu mukiko muyapwa naMbimbiliya. Yili nakunganyalisa vatu vavavulu mukaye kosena vaze vali nakuyitanga, kaha vali nakwalumuna chiyoyelo chavo. (WaChimoteu 2, 3:16, 17) Vali jino ‘nakutambuka mujijila jaKalunga’ nakusuuluka omu Kalunga ali nakuvakinga.

Kutala muli nakwakula kumazu akuhuhumuna aYehova, mangana vamikinge oholyapwa nakukayovoka kulutwe tahi? Tuli nakumilomba mukekese upolofweto wamuVisoneka uze unakutesamo vananoneka halipwata, uze uli nakusolola nge tuli nakuyoyela ‘mumakumbi akukuminyina.’ Vinjiho jaYehova vamungalila yenu navevwa kuwaha kumikafwa mwivwishise vyuma yahanjika Mbimbiliya nomu munahase kuvizachisa mukuyoya chenu. Munahase nawa kuwana muvakumbulwila vihula vyenu ha www.jw.org/lue. Talenu BIBLE TEACHINGS > BIBLE QUESTIONS ANSWERED.

^ par. 3 Mundenda wamu 2004 wajihile vatu vakuzomboka 220,000. Mundenda kana wajihile vatu vavavulu kuhambakana mindenda yosena yize yasolokaho lyehi mukaye.