MWAKA himwaka vatu vakuzomboka jimiliyoni 6 veji kuyanga kuzuvo yimwe yakulombela yize yatwama kungalila yaShima Peninsula muJapan. Veji kulikungulwilanga kuchihela vavuluka ngwavo Grand Shrine kuIse, kuze veji kulemeselanga kalunga wapwevo walikumbi vavuluka ngwavo Amaterasu Omikami, uze vanalemesanga hamyaka kafwe 2,000. Shimbu kanda vaputuke kumulemesa, veji kuvangila kusana kumavoko nakukanwa. Kaha veji kwimana kulutwe (haiden) mulizuvo lyalinene vatunga, nakuputuka kufukama, nakusakwilila, nakulomba kuli ou kalunga kavo. * Veji kwitavisanga navatu vamukwitava cheka vakufwana nge vaka-Buddha, navaka-Kulishitu naveka kuya nakulombela kuchihela kana.

Mauka akwitava amavulu mukaye atunga jizuvo jakulombela, * kaha vatu vavavulu veji kuyanga kujizuvo kana nakulomba. Mumafuchi amwe nawa vatungamo jichachi, najizuvo jakulombela muze veji kulemesanga Yesu, Maliya, navatu vavalemu. Jizuvo jimwe nawa vajitungila kuvihela kuze kwasolokele vyuma ‘vyakukomwesa’ vasoneka muMbimbiliya. Vatu vavavulu veji kuyanga kuvihela kana nakulomba mwomwo vafwelela ngwavo kulomba chavo navachikumbulula. Veka veji kuya kuvihela kana mangana vasolole nge vazanga chikuma kwitava chavo.

Vatu vali kuZuvo yakulemesela kuIse, muJapan, namuGrotto yamuMassabielle, Lourdes, France

Uno Kalunga eji kukumbululanga kaha kulomba chavatu vaze veji kuyanga nakulombela kuvihela kana tahi? Uno Kalunga eji kwivwanga kuwaha navatu vaze veji kutupwangilanga nakuya nakulombela kuvihela kana tahi? Uno navaka-Kulishitu vatela kuyanga kujizuvo jakulombela tahi? Chihande chino nachitukafwa tutachikize omu Kalunga amona kumulemesela kuvihela kana, nakutachikiza kulemesa eji kwivwilanga kuwaha.

KULEMESA KALUNGA “MUSHIPILITU NAMUMUCHANO”

Yesu atalishile mulihi hakwamba ngwenyi twatela kulemesa Kalunga “mushipilitu namumuchano”?

Omu Yesu ashimutwilile napwevo waka-Samaliya, asolwele hatoma omu Kalunga amona kumulemesela ‘kuvihela vyajila’ chipwe kujizuvo jakulombela. Likumbi limwe Yesu apwile nakuya kuSamaliya, kaha emanyine halishima lyakwakamwihi naSukale. Jino omu pwevo umwe ejile nakuswita meya haze halishima, Yesu aputukile kushimutwila nenyi vyomu kwitava chavaYuleya navaSamaliya chalihandunwine. Uze pwevo ambile ngwenyi: “Vakakuluka jetu valemeselelenga Kalunga hapili yino, oloze enu ngwenu, kuYelusalema kukiko vatela vatu kulemeselanga Kalunga.”—Yowano 4:5-9, 20.

Pili apwile nakuvuluka uze pwevo yapwile Pili Yavangelize yize yatwamina kunote yaYelusalema, kafwe jikilomita 50. Kuchihela kana kukiko vaka-Samaliya vatungilile tembele yakulingila vilika vyakufwana  nge Paseka. Muchishishisa chakuhanjika hachihandwa chapwile hali vaSamaliya navaYuleya, Yesu ambile ngwenyi: “Ove pwevo, ngwitavile, ola yili nakwiza omu namukazeneka kulemesela Tata hapili yino chipwe kuYelusalema.” (Yowano 4:21) Uze pwevo alikomokelele namazu akumbulwile Yesu hakuwana nge apwile kaYuleya. Mwomwo ika kulemesela Kalunga mutembele yakuYelusalema nachikakumina?

Yesu atwalilileho ngwenyi: “Ola yili nakwiza, kaha yikiko vene yino, omu vaka-kulemesa vamuchano navakalemesanga Tata mushipilitu namumuchano, mwomwo chikupu vene Tata ali nakutondatonda vatu vangana vamulemesenga.” (Yowano 4:23) Hamyaka yayivulu, vaYuleya vamwenenga tembele yamuYelusalema kupwa hichihela chakulipwila chakulemesela Kalunga. Vayilenga kuze katatu mumwaka, nakuhana wana kuli Kalunga kavo Yehova. (Kulovoka 23:14-17) Oloze Yesu ahanjikile ngwenyi vyuma vyosenevi navikalumuka, kaha “vaka-kulemesa vamuchano” navakamulemesanga “mushipilitu namumuchano.”

Tembele yavaYuleya yapwile zuvo yize vatungile hachihela chimwe. Oloze kulemesa mushipilitu namumuchano kachapwa kuya kuchihela chimwe kahako. Shikaho, Yesu apwile nakulumbununa ngwenyi vaka-Kulishitu vanahase kulemesa Kaunga kala kweshoko vali keshi kuvanga kaha Pili Yavangelize, chipwe muYelusalema, chipwe hachihela cheka chajilako.

Hakushimutwila nauze pwevo wakaSamaliya, Yesu amulwezele nawa ngwenyi, “Ola yili nakwiza” yakwalumuna vyuma kanevi hakulemesa Kalunga. Uno lwola kana lwatelele kwiza mwaka uka? Lwola kana lwejile omu Yesu alihanyine nakufwa, nakukumisa kulemesa chavaYuleya chize chazamine haJishimbi jaMose. (Wavaka-Loma 10:4) Yesu ambile nawa ngwenyi: “Ola . . . yikiko vene yino.” Mwomwo ika? Mwomwo halwola kana te naputuka lyehi kukungulula tumbaji twenyi mangana vakavangize lushimbi lwakwamba ngwavo: “Kalunga apwa Shipilitu, kaha vaze vali nakumulemesa vatela kumulemesa mushipilitu namumuchano.” (Yowano 4:24) Uno kulemesa Kalunga mushipilitu namumuchano chalumbununa ika?

Hakuvuluka vyakulemesa Kalunga mushipilitu, apwile nakuhanjika vyakututwaminyina nashipilitu yaKalunga yize yeji kutukafwanga kwivwishisa vyuma vyamuVisoneka. (Wavaka-Kolinde 1, 2:9-12) Kaha muchano apwile nakuvuluka Yesu wapwa chinyingi chakwoloka chakutachikiza vyuma yanangula Mbimbiliya. Ngachize, muchishishisa chakuyanga  nakulombela kuchihela chimwe kaha, kulomba chetu vanahase kuchitavila kuli Kalunga kala kweshoko tuli chikalu kaha nge nachilitombola namwaya kunangula chamuMbimbiliya nashipilitu yajila.

OMU VAKA-KULISHITU VATELA KUMONA JIZUVO JAKULOMBELA

Uno vaka-Kulishitu vatela kumona ngachilihi kuya nakulemesela Kalunga kujizuvo jakulombela? Kweseka namazu aYesu akuvuluka ngwenyi vatu vatela kulemesa Kalunga mushipilitu namumuchano, chasoloka hatoma nge kachapwa chakutamo kuya nakulemesela Kalunga kujizuvo kanako mwomwo kacheshi kwivwisa kuwaha Setu wamwiluko. Kaha nawa Mbimbiliya yatulweza nge Kalunga ahunga kulemesa tuponya. Yamba ngwayo: “Chinenu kulemesa makombelo” kaha nawa “lihendenunga kumakombelo.” (Wavaka-Kolinde 1, 10:14; WaYowano 1, 5:21) Shikaho, muka-Kulishitu keshi kuhasa kuya nakulemesela Kalunga muchihela chize vamba ngwavo chajila chipwe chize chatwama natuponyako. Vyuma kanevi vikiko vyatela kulingisa vaka-Kulishitu valihende kuyanga kuvihela chipwe kujizuvo jakulombela.

Echi kacheshi nakulumbununa nge Mazu aKalunga akanyisa vatu kupwa nachihela chakulikungulwilanga nakulomba nakumulemesako, nduma. Kachapwa chakuhengako vatu kupwa nachihela chamwaza haze navaliwanyinanga nakulemesa Kalunga namilimo yeka yakushipilitu. Kaha nawa kuvisemwa vimwe, kachapwa chakuhenga vatu kulikungulwila kuchihela chimwe, chakufwana nge kuchimbumbe nakwanuka mutu afwileko. Mwomwo chuma kana cheji kusolola nge mwazangile mutu kana. Oloze chuma chakuhenga kaha, shina kumona chihela kana kupwa chajila chipwe kutungako tuponya vaze namulemesanga. Echi chikiko kaha chalimbalaka nakunangula chaYesu.

Ngocho, kacheshi chakutamo kuyanga kaha kujizuvo jakulombela mangana ngwenu Kalunga evwenga kulomba chenuko, nduma. Kaha nawa keshi kuhasa kumikisula mujila yakulipwila mwomwo yakuya kuvihela kanako. Mbimbiliya yamba ngwayo Yehova Kalunga “Mwata walilu namavu, katwama mujitembele jakutunga namavokoko.” Echi kachalumbununa nge Kalunga atwama kwakusuku nayetuko. Tunahase kulomba kuli Kalunga kala kweshokwo tuli kaha nahase kutwivwa mwomwo “ikiye kapwa kwakusuku nayetu tuvosena mutu himutuko.”—Vilinga 17:24-27.

^ par. 2 Jila veji kulemeselangamo yalisezaseza kweseka navihela.

^ par. 3 Talenu lipwata lyakwamba ngwavo “ Uno jiZuvo jaKulemesela Japwa Jika?