ACHISHINGANYEKNU: Muli muzuvo valamina vyuma vyakushikulu. Vyuma kana vili nakusoloka vinashimbula chikuma, vyeka vili namenamena, kaha vyeka nawa vinakwate shingwe. Vihanda vyavyuma vimwe vyajimbala. Oloze muli chuma chimwe chakulipwila, chize chinashimbula chikuma oloze kachaliwako, hanga chape. Kaha munahase kuhulisa mutu anakumitetekela muzuvo kana ngwenu, “uno echi chuma kana, chakalinwomu tahi?” Ikiye ngwenyi, “nduma, chuma kana chikiko chinashimbula chikuma kaha nawa muchapwa vene mwamuze, kavachitungululako.” Munahase kuhulisa nawa ngwenu, “uno chuma kana vachenyekaho lyehi tahi?” Kaha muka-kumitetekela mwamikumbulula ngwenyi, “nduma, oloze chinayovoka kupeho navula yayinene. Vatu vavavulu nawa vanafwilanga kuchenyeka.” Kaha munahase pamo kuhuhwasana ngwenu, ‘uno chuma kana vachitungisa vyuma muka?’

Shikaho, chuma kana chize chakulipwila tunahase kuchifwanyisa kuMbimbiliya, yize yapwa mukanda wakushikulu kuhambakana mikanda yayivulu. Ngana mwavyuma vyakushikulu vize twavulukanga hakavanga, mikanda yayivulu yakushikulu yinalyenyeka mukuhita chalwola. Chakutalilaho, mikanda kana yalimbalaka havihande vyasayasi, mwomwo yakuzovoloka muvihande kana. Kaha jindongi jatwama mumikanda kana kutalisa kukulikangula chamujimba kajakafwako, oloze jeji kunehanga kaha ponde. Mikanda yakushikulu yayivulu yalyenyeka kaha vihanda vimwe nawa vyajimbala.

Mbimbiliya yalihandununa namikanda yeka. Numba tuhu munahichi makulukaji amyaka akuzomboka 35 kufuma haze vaputukile kuyisoneka oloze hanga yichili lika yape. Kaha nawa vatu vanafwilanga kuyenyeka, nakuyocha, nakukanyisa vatu kuyizachisa, nakuyimona kupwa yamokomoko, oloze yinayovoka. Chamokomoko nakuvula chachinyingi chakuzachisa makina makumbi ano, Mbimbiliya kayasekako kaha nawa yeji kutukafwanga.—Talenu lipwata lyakwamba ngwavo “Uno Mbimbiliya Yaseka Lyehi Tahi Nyi Yinahase Kutukafwa?

## JINDONGI JINAHASE KUTUTWAMINYINA MAKUMBI ANO

Munahase kulihulisa ngwenu, ‘Uno vyuma yanangula Mbimbiliya vinahase kutukafwa makumbi ano tahi?’ Hakusaka kukumbulula chihula kana lihulisenu ngwenu: ‘Ukalu muka waunene uze vali nakumona vatu makumbi ano? Ukalu muka uze unakwivwisa chikuma vatu woma?’ Munahase pamo kwamba ngwenu jijita, napeho yayipi, nauhwanga chipwe kutambula maswekeza. Oloze jino achishinganyekenu hajindongi jajilemu yanangula Mbimbiliya. Omu namulinga ngocho, lihulisenu ngwenu, ‘kachi nge vatu vakavangijilenga jindongi kana, kachi kaye kapwa kamwaza tahi?’

KUZANGA KUUNDA

“Vawahilila vaze veji kunehanga kuunda, mwomwo navakavavuluka ngwavo vana vaKalunga.” (Mateu 5:9) “Kachi nge chinahase, kweseka nomu namuhashila, twamenunga mukuunda navatu vosena.”—Wavaka-Loma 12:18.

KUTETELA NAKUKONEKELA

“Vawahilila vaze veji kutetelanga vakwavo, mwomwo navakiko navakavatetela.” (Mateu 5:7) “Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo. Nge muze Yehova * amikonekelele namuchima wakusuuluka, nayenu mwatela kulinga mwomumwe.”—Wavaka-Kolose 3:13.

VATU VAKUMIYACHI YOSENA NAVATWAMA MUKUUNDA

“Kumutu umwe [Kalunga] aloweleko miyachi yavatu yosena mangana ngwenyi vatwamenga hamavu hosena.” (Vilinga 17:26) “Kalunga katala vatu kumesoko, oloze muli vaka-miyachi yosena, ou eji kumwivwanga woma nakulinganga vyuma vyakwoloka, veji kumwitavilanga kuli Kalunga.”—Vilinga 10:34, 35.

VATU KAVESHI KUKENYEKA CHEKA MAVUKO

“Jino Yehova Kalunga ambachile mutu nakumuhaka mumilemba yaEtene mangana ayilimenga nakuyilama.” (Kuputuka 2:15) Kalunga ‘mwakenyeka vosena vaze veji kwenyekanga mavu.’—Kusoloka 11:18.

KULIHENDA KUCHIPULULU, NAKUUJILA

“Lilamenunga kuchipululu chosena, mwomwo numba nge mutu ali navyuma vyavivulu, vyuma aheta kavyeshi kumuhana kuyoyako.” (Luka 12:15) “Ujila, namajilo osena, nachipululu, kanda vavivulukila muli enuko, mwomwo evi kavyatela vaka-kujilako.”—Wavaka-Efwesu 5:3.

KUPWA VAKASHISHI NAKUKILIKITA

“Tuli nakusaka ngwetu tupwenga vakashishi muvyuma vyosena.” (WavaHepeleu 13:18) “Uze eji kwivanga kanda mweva chekako, oloze akilikitenga.”—Wavaka-Efwesu 4:28.

CHAPWA CHACHILEMU KUKAFWA VAZE VANAKALIKIZA

“Vendejekenunga vatu vaze vanahombo, kafwenunga vaze vanahehela, talililenunga chikoki vatu vosena.” (Wavaka-Tesolonyika 1, 5:14) “Kulamanga kanawa vanginga navatuliwe muluyando lwavo.”—WaYakova 1:27.

Mbimbiliya yavuluka jindongi, nakutukafwa tujimone kupwa jajilemu, nakujizachisa mukuyoya chetu chahakumbi hakumbi. Kachi nge vatu vosena mukaye veji kukakavangizanga jindongi tunavuluka, kachi ukalu unakehe. Jindongi jamuMbimbiliya kajasekako, japwa jajilemu chikuma namakumbi ano. Uno vyuma yanangula Mbimbiliya vinahase kumikafwa ngachilihi mukuyoya chenu?

## OMU VYUMA YANANGULA MBIMBILIYA VINAHASE KUMIKAFWA MUKUYOYA CHENU

Mutu wamangana chikuma ahanjikile ngwenyi: “Mangana eji kulijimbulanga kupwa akwoloka kumilimo yawo.” (Mateu 11:19) Uno nayenu munetavila mazu kana tahi? Chapwa chachilemu chikuma kuzachisa mangana. Munahase kulihulisa ngwenu; ‘Nge Mbimbiliya kayasekako, kutala yinahase kungukafwa mukuyoya chami tahi? Uno yinahase kungukafwa ngachilihi kulipika naukalu nguli nawo? Talenu hachakutalilaho.

Pwevo umwe walijina lyaMahongo * apwile namilimo yayivulu kaha nawa apwile wakusuuluka mukuyoya chenyi. Kutwala muze aputukile kuviza nakumona ukalu wauvulu. Kaha mwanenyi wapwevo afwile, ulo wenyi nawa wafwile, jimbongo jamukumine. Ngocho ambile ngwenyi: “Ngwashinganyekele ngwami ngunavindama hakufwisa mwana, nakunguseza kuli lunga lyami, nakuhona kupwa nazuvo. Ngwalivwile kupwa nguwamokomoko kaha nawa ngwashinganyekele ngwami kufwa chinawahe kuhambakana kuyoya.”

Mahongo amwene mazu ano kupwa amuchano, akwamba ngwawo: “Myaka yakuyoya chetu yapwa 70, chipwe 80 nge mutu apwa wakujikiza. Oloze myaka kana yazala naukalu naushona. Yeji kuhitanga washiwashi, kaha hinatunonga.”—Samu 90:10.

Mahongo apendaminyine haMbimbiliya omu apwile muukalu. Mbimbiliya yamukafwile chikuma. Vihande vitatu vinakavangizaho vinahanjika havatu vavavulu vaze vananganyala hakuzachisa jindongi jamuMbimbiliya omu vanalipikinga naukalu mukuyoya chavo. Vanamono chikupu ngwavo Mbimbiliya yapwa yakulipwila ngana mwachuma chakushikulu chize twavulukanga kumaputukilo achihande chino. Mbimbiliya yalihandununa namikanda yeka yakushikulu yize yaseka lyehi. Uno echi chinakulumbununa nge Mbimbiliya vayisoneka mujila yakulipwila tahi? Uno mwomwo vasonekamo vishinganyeka vyaKalunga, keshi vyavatuko tahi?—Wavaka-Tesolonyika 1, 2:13.

Pamo nayenu namwitavila ngwenu kuyoya chatwama namakumbi amandende kaha nawa chikwechi ukalu wauvulu. Nge ukalu naumivwisa woma nakumihombesa, kaha vyuma muka vyeji kumivendejekanga nakumikafwa?

Tukekesenu jijila jitatu jize jasolola omu Mbimbiliya yinahase kumikafwa mukuyoya chenu. Yinahase kuminangula

1. mwakulihendela kuukalu.

2. mwakukumishila ukalu.

3. mwakulipikila naukalu uze katweshi kuhasa kukumisa etu vaveneko.

Vihande vinakavangizaho navishimutwila havishina evi vitatu.

^ par. 10 Yehova lyapwa lijina lyaKalunga ngana muze vasolola muMbimbiliya​—Samu 83:18.

^ par. 24 Muchihande chino navihande vitatu vinakavangizaho, majina amwe vanawalumuna.