Kunyima vatu mulifuchi lyaEurope vazangile vyakwitava, oloze vanazange jino chikuma vyakukaye. Chipwe ngocho mijimbu yakalinwaha, yinasolola nge vatu vamulifuchi kana jino vali nakwakula kuMbimbiliya.

Kemba Eji Kulinangulanga Kuli Naye

Vaka-kuhehwojola vamwe vamulifuchi lyaMilan, naItaly, vambile ngwavo kemba uze eji kusemukanga uvisu eji kutachikizanga kanawa lizu lyanaye hakumuhaka kalikina kulivoko kakumukafwa kutachikiza kanawa naye omu achili muchipatela. Ava vaka-kuhehwojola vali nakuzachisa kalikina kana hakulondezeza muze kemba eji kutachikizanga lizu lyanaye nakulinga vyuma mwamulweza shimbu achili mujimo. Vamba ngwavo, “Nge chisemi mwahanjikisanga mwanenyi halwola luze mwemita kaha nachikafwa mwana ejive kanawa lizu lyanaye.”

VYUMA YAHANJIKA MBIMBILIYA: “Ngwapwa nguwakuunda, nguwakuhola, nge mwana uze nasumuka ali kuli naye.”—Samu 131:2.

Kulimona Ulemu

Vaka-kuhehwojola vahulishile vanyike 565 mulifuchi lyaNetherlands mangana vawane vakulinyisa navaze vakulivwimba. Vawanyine nge vanyike vaze vakwechi visemi veji kuvalwezanga ngwavo “vapwa vavalemu kuhambakana vakwavo vanyike” vapwile vavavulu chikuma. Vanyike kana vapwile namuchima wakulivwimba. Chilolo umwe ambile ngwenyi, “Vanyike veji kwivwililanga nge visemi javo navavasangejeka ngwavo ‘wapwa uwamulemu kuhambakana vakwenu,’ kusangejeka vana mujila kaneyi cheji kuvenyekanga.”

VYUMA YAHANJIKA MBIMBILIYA: “Nangwamba kuli mutu himutu ali muli enu ngwami, kanda alishinganyeka mweka mwakuhambakana omu mwatela kushinganyekako. Oloze kushinganyeka chenyi chipwenga chamangana.”—Wavaka-Loma 12:3.

Tushinakaji

Vaka-kuhehwojola vamwe vahayunivesiti yaHeidelberg muGermany vawanyine nge, tushinakaji vaze vanahete myaka 100 nakuhambakanaho vafwila kutwalaho lika kuyoya numba tuhu vali nakulipika naukalu wakufwana nge kuviza, kuhona ngolo nautonji. Tushinakaji vaze vahulishile vahanjikile ngwavo, vali nakweseka nangolo javo josena mangana vatwaleho lika kuyoya. Ngachize vatu kana vali nakutwalaho lika kulinga vyuma vize vamona kupwa vyavilemu mukuyoya nakuyanga kumauka akwitava mwomwo vamona ngwavo kuyoya chapwa chachilemu.

VYUMA WATELA KUSHINGANYEKAHO: Kweseka nomu wahanjika mukanda waMuka-kwambulula 3:11, mwomwo ika vatu vafwila kutwalaho lika kuyoya?