UKALU

Achishinganyekenu muli namwanenu wamyaka yakusemuka 6 uze katwama namuchima wakulikanyisako. Nge namono vyuma vimwe ali nakusaka, kuvanga vene mumuhanevyo hoho vene. Nge napihilila lwola lumwe eji kuzunga ndombo. Munahase kulihulisa ngwenu, ‘Uno ou mwanami ali kanawa tahi? Uno vilinga kana mwakavimbila omu mwakakola tahi nyi ngwatela kumunangula apwenga namuchima wakulikanyisa?’

VYUMA MWATELA KUTACHIKIZA

Chisemwa chamakumbi ano kachanangula vatu vapwenga namuchima wakulikanyisako. Ndotolo David Walsh asonekele ngwenyi: “Muchisemwa chetu chamakumbi ano, vakulwane navanyike veji kwivwanga mijimbu yakuvuluka nge twatela kulinga kala vyuma tunasake. Vatu vaze vasaka kukafwa vakwavo navaze vasaka kuhungumwisa vakwavo mangana vavalile jimbongo veji kutukolezezanga tulingenga vyuma vize tunasake.” *

Chapwa chachilemu kunangula vana vapwenga namuchima wakulikanyisa shimbu vachili vavandende. Vaka-kuhehwojola vahanyine kanyike hikanyike halizavu lyavanyike vamyaka yakusemuka 4 tuvyakulya tumwe tuyema nakuvalweza valyenga hahaze vene, chipwe kuvandaminako chindende numba vavahane vikwavo nge vali namuchima wakutalilila chikoki. Omu vakolele nakukumisa shikola yavo, vanyike vaze vapwile namuchima wakulikanyisa vapwilenga namuchima wamwaza, vachisambo, kaha nawa vamangana kushikola.

Nachipwa chaluvinda nge vanyike kavavanangwile kupwa namuchima wakulikanyisako. Vaka-kuhehwojola vafwelela ngwavo wongo wakanyike unahase kwalumuka navyuma vize mwahitamo. Ndotolo Dan Kindlon ambile ngwenyi: “Nge katweshi kunangula vanyike vapwenga namuchima wakuvandamina, nakuhonesa vyeseko, kaha navapwa namuchima waukalu.” *

 VYUMA MWATELA KULINGA

Vasolwelenu chakutalilaho chamwaza. Uno enu mweji kusololanga muchima wakulikanyisa tahi? Kutala mwanenu eji kumimonanga munasulakana nge vanamijikinyina kuli vakwenu, chipwe kumimona namuzombokela vakwenu nge muli mumukana chipwe kuvatuwiza vakwenu nge vali nakuhanjika tahi? Kindlon asonekele ngwenyi: “Nge yetu natupwa namuchima wakulikanyisa, kaha natukafwa vana vetu vapwenga namuchima kana.”—Lushimbi lwamuMbimbiliya: Wavaka-Loma 12:9.

Nangulenu mwanenu ukalu nahase kumona. Kweseka namyaka yakusemuka ali nayo mwanenu, mukafwenu amone nganyo yatwama hakuhonesa muchima wakufwila kulinga kala vyuma nasake, naukalu watwama hakulinga vyuma kana. Chakutalilaho, nge mwanenu napihilila mwomwo vanamupihisa kumuchima kuli mukwavo, kaha mukafwenu alihulise ngwenyi: ‘Kutala kulinga sambanjinga nachingukafwa tahi nyi nachitohwesa ukalu? Uno kuliko jila yeka ngwatela kukumishilamo ukalu kana, pamo kuvandaminako matoto ami achiunde tahi? Kutala nachipwa chamwaza kuseza mutu uze nangupihisa kumuchima tahi?’—Lushimbi lwamuMbimbiliya: Wavaka-Ngalesha 6:7.

Kolezezenu mwanenu. Sangejekenu mwanenu nge nasolola muchima wakulikanyisa. Mulwezenu ngwenu kachapwa chachashi kuliulanga vyuma vyosena mwasaka kulingako, oloze kulinga ngocho chasolola nge apwa wakujikiza. Mbimbiliya yahanjika ngwayo: “Nganomu yinapu nganda yikwechi kembwe yakupuzuka, mukiko mwanapu namutu uze mwahona kuunjisa matoto enyi.” (Vishimo 25:28) Tuyokutuyoku nawa, “muka-kushipwokela kukwata utenu nawahe kuhambakana chindume.”—Vishimo 16:32.

Vyuma mwatela kulinga. Hemenu viseke vize navinangula vanyike vasakulenga kanawa vyakulinga. Shimutwilenu vyakutalilaho vyamwaza nakuvilinga. Nge nachashiwa, kaha zachisenu vyuma vyakufwana nge chuma chamalengeso, chipwe jila yeka mangana vyuma namuhema vilovole nganyo. Mwatela kufwila kukafwa mwanenu atachikize ngwenyi kupwa namuchima wakulikanyisa chapwa chamwaza kuhambakana kulikanga.—Lushimbi lwamuMbimbiliya: Vishimo 29:11.

Pwenunga namuchima wakutalila chikoki. Mbimbiliya yahanjika ngwayo, “Mumuchima wakanyike mwatwama uleya.” (Vishimo 22:15) Ngachize, kamwatela kushinganyeka ngwenu mwanenu mwapwa namuchima wakulikanyisa mulikumbi lyangongoko. Mukanda vavuluka ngwavo, Teach Your Children Well wahanjika ngwawo: “Mulimo kana weji kumbatanga lwola lwalusuku, mwomwo lwola lumwe nahase kuzovoloka washi, chipwe nduma, chipwe kate kuzovoloka.” Oloze kukilikita chenu kacheshi kuya mumeyako. Mukanda kana wahanjika nawa ngwawo: “Nge kanyike mwapwa namuchima wakulikanyisa, kaha omu mwakapwa namyaka yakusemuka 12 keshi kukanwanga maundu akupendesa chipwe kulinga ujila omu mwakapwa namyaka 14 yakusemukako.”

^ par. 6 Mazu kana anafumu mumukanda wakwamba ngwavo: No: Why Kids—of All Ages—Need to Hear It and Ways Parents Can Say It.

^ par. 8 Mazu kana anafumu mumukanda wakwamba ngwavo, Too Much of a Good Thing—Raising Children of Character in an Indulgent Age.