OMU mwapwile muvanyike, vyuma muka mwalitomenene kulinga mukuyoya chenu? Pamo mwasakile kumbata chipwe kusomboka, chipwe kulinangulako mulimo umwe. Oloze lwola lumwe vyuma vize tuli nakusaka kavyeshi kulingiwako. Ukalu wakwiza mukukasumuka unahase kwalumuna vyuma tuli nakusaka kulinga. Omu mukiko chapwile kuli Anja, Delina naGregory.

  • Anja, wakuGermany vamuwanyine namusongo wakasa omu apwile namyaka yakusemuka 21. Oholyapwa katambukako, atwama kaha muzuvo.

  • Delina wakulifuchi lyaUnited States aviza musongo vavuluka ngwavo dystonia. Kaha nawa eji kulamanga vasongo jenyi vavitonji vatatu.

  • Gregory, wamulifuchi lyaCanada aviza musongo wakulizakamina.

Numba tuhu Anja, naDelina, naGregory vanamononga ukalu, oloze vanahasenga kupwa nangolo hakuyoya chavo. Mujila muka?

Mbimbiliya yahanjika ngwayo: “Kachi nge nauhomba halwola lwavihuli, kaha ngolo jove najikeha.” (Vishimo 24:10, kwinyikila chamwishi) Echi chalumbununa nge, muchima wenu unahase kumikafwa chipwe kumingisa muukalu. Nge namupwanga vakuhomba lwola lwosena, kaha kamweshi kuhasa kusakula kanawa vyakulinga vize navimikafwa mukuyoya chenuko. Oloze nge namupwanga vakuwahilila chamokomoko naukalu muli nakumona, kaha nachipwa chachashi kusakula kanawa vyakulinga.

Achitalenu omu echi chakafwile Anja, naDelina naGregory.