Bantu bonso mbasue kusomba muaba udi ditalala. Kukadi bidimu bia bungi bidi bamfumu ba bungi badienzeja bikole bua kujikija mvita ne kukebela bantu ditalala. Imue misangu batu bakebela bantu ditalala bua tshitupa tshîpi. Kadi bia dibungama, mvita ne bimvundu bitu bitua bipingana. Nekuikalaku kabidi ditalala pa buloba bujima anyi? Eyowa. Tuakulayi bua malu atudi mua kulonga kudi Yezu.

Tshienza Yezu

 Bible udi uleja tshikadi Yezu pa kuenza bua kuikale ditalala pa buloba bujima.

•   ‘Nebabikile Yezu ne: Mukalenge wa Ditalala. Bua kuvula kua bukokeshi buende ne bua ditalala, kakuakuikala ndekelu.’ (Yeshaya 9:6, 7) Bu mudi Yezu Mukalenge wa Bukalenge bua Nzambi, neavuije buloba muaba wa ditalala bua kashidi.

•   ‘Neasungile bapele badi badila balomba diambuluisha ne muntu yonso udi kayi ne mumuambuluishi.’ (Misambu 72:12-14) Yezu neakuate mudimu ne bukokeshi buende bua kujadika buakane bulelela pa buloba, kujikija mvita, malu a tshikisu, ne makenga.

•   “Tshisamba katshiakujudila tshisamba tshikuabu muele wa mvita, kabakulonga kabidi mvita nansha.” (Yeshaya 2:4) Mu bukokeshi bua Yezu, bantu bonso nebalonge mua kukeba ditalala pamutu pa kulonga mvita.

 Bua kumanya mua petesha Yezu bantu nsombelu wa ditalala kumpala eku ne tshiudi pebe mua kuenza bua kupeta nsombelu au, tangila katupa ka filme wa Bukalenge bua Nzambi ntshinyi?

Tshivua Yezu mulongeshe

 Malu avua Yezu mulongeshe adi ambuluisha bantu ba bungi bua kusomba mu ditalala nansha lelu eu. Mu Muyuki wa Yezu wa pa mukuna udi mumanyike bikole, Yezu wakalongesha mêyi manene adi ambuluisha bantu bua kusomba mu ditalala ne bakuabu matuku onso. Tuakulayi bua makese tshianana.

•   “Bakebi ba ditalala mba diakalenga.” (Matayi 5:9) Yezu uvua ukankamija bayidi bende bua kuepuka bilumbu ne kukeba ditalala.

•   “Anji lengejangana ne muanenu, pashishe upingane ne ufile dipa diebe.” (Matayi 5:23, 24) Yezu uvua wambila bantu bavua bamuteleja bua kuikala kujikija bilumbu ne lukasa. Wakabalongesha ne: kukeba ditalala ne bakuabu kudi kuambuluisha bua kuikala mu malanda mimpe ne Nzambi.

•   “Lekelayi kulumbuluishangana bua kabanulumbuluishi penu.” (Matayi 7:1) Yezu wakatudimuija bua katuikadi tukoleshila bakuabu malu anyi tukeba bua benza malu atudi tuetu katuyi mua kuenza to, bualu kuenza nanku kudi mua kukebesha bilumbu. Pamutu pa kuimanyina anu pa bilema bia bakuabu, Yezu wakalongesha bayidi bende bua ‘kutungunuka ne kubuikidilangana.’​—Luka 6:37.

 Pa buloba bujima, kudi bantu badi batumikila malongesha a Yezu nansha bobu basombele muaba udi malu a tshikisu ne mvita. Badi balonga mua kujikija bilumbu mu ditalala, kufuilangana luse, ne kunanga bakuabu nansha bobu babenzela malu mabi.

 Bua kumanya mudi malu avua Yezu mulongeshe mambuluishe bantu bua kuikala mu ditalala, bala tshiena-bualu tshia“Mua kuikala ne ditalala nansha mudiku mvita.”