Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

 NSHAPITA WA 18

Yezu udi utanta kadi Yone yeye udi ukepa

Yezu udi utanta kadi Yone yeye udi ukepa

MATAYI 4:12 MÂKO 6:17-20 LUKA 3:19, 20 YONE 3:22–4:3

  •   BAYIDI BA YEZU BADI BABATIZA BANTU

  • YONE MUBATIJI UDI MU BULOKO

Yezu ne bayidi bende badi bumbuka mu Yelushalema panyima pa bobu bamane kudia Pasaka mu muvu wa luya mu tshidimu tshia 30. Kadi kabena bapingana diakamue ku nzubu yabu mu Galela to. Badi baya mu Yudaya, mudibu babatiza bantu ba bungi. Yone Mubatiji udi wenza mudimu wa muomumue kukadi bu tshidimu tshijima, ne bamue bayidi bende batshidi nende, pamuapa mu tshibandabanda tshia Musulu wa Yadene.

Yezu kena ubatiza muntu nansha umue to, kadi mmuambile bayidi bende bua kubatiza bantu. Bua mpindieu, Yezu ne Yone bavua bayisha bena Yuda bavua banyingalale bua mpekatu yabu ya dishipa dia tshipungidi tshia Mikenji tshia Nzambi.—Bienzedi 19:4.

Kadi bayidi ba Yone bavua ne mukawu, bavua badiabakena kudiye bua Yezu, bamuambila ne: “Muntu [Yezu] unuvua nende . . . udi ubatizangana, ne bantu bonso badi baya kudiye.” (Yone 3:26) Kadi Yone kena ne mukawu to. Udi usanka bua malu adi Yezu wenza ne mmusue bua bayidi bende basanke pabu. Yone udi ubavuluija ne: “Nuenu bine nudi nunjadikila mumvua muambe ne: ‘Tshiena Kristo to, kadi bavua bantume kumpala kua yeye au.’” Udi umvuija bualu ebu ne tshilejilu mu mushindu uvuabu mua kumvua buonso buabu, wamba ne: “Muntu yonso udi ne mukaji wa kusela yeye ke musedianganyi. Kadi mulunda wa musedianganyi, padiye wimana nende ne umuteleja, udi ne disanka dipite bungi bua dîyi dia musedianganyi. Nunku disanka dianyi ndikumbane.”—Yone 3:28, 29.

Anu bu mulunda wa musedianganyi, Yone wakasanka ngondo ya bungi kumpala bua muvuaye mufikishe bayidi bende kudi Yezu. Bamue ba kudibu bakalonda Yezu ne bavua mua kuedibua manyi a nyuma muimpe mu kupita kua matuku. Yone mmusue kabidi bua bayidi bavuaye nabu aba balonde Yezu. Bushuwa, tshipatshila tshia Yone ntshia kulongoluela mudimu wa Kristo njila. Yone wakumvuija ne: “Yeye au udi ne bua kutungunuka ne kuvula, kadi meme ndi ne bua kutungunuka ne kukepa.”—Yone 3:30.

Yone mukuabu ukavua mutuadije kulonda Yezu, wakalua kufunda bua ntuadijilu wa Yezu ne bua mudimu udiye nawu mu lupandu lua bantu ne: “Muntu udi ufumina mu diulu udi ku mutu kua bakuabu bonso. . . . Tatu mmunange Muana ne mmufile bintu bionso mu bianza biende. Muntu udi uleja ditabuja kudi Muana udi ne muoyo wa tshiendelele; muntu udi ubenga kutumikila Muana kakumona muoyo, kadi tshiji tshikole tshia Nzambi tshidi tshishala kudiye.” (Yone 3:31, 35, 36) Ebu mbulelela bua nshindamenu budi bantu ne bua kumanya!

Katupa kakese panyima pa Yone Mubatiji mumane kuleja ne: mudimu uvuaye ukumbaja ne mudimu uvuaye wenza bivua ne bua kukepa, bakamukuata kudi mukalenge Helode. Helode mmuangate Helodiya, mukaji wa muanabu Filipo, mumuvuije mukajende. Padi Yone uleja Helode tshienzedi tshiende tshia masandi etshi patoke, udi umuelesha mu buloko. Pakumvua Yezu ne: mbakuate Yone, wakumbuka ne bayidi bende mu Yudaya, ‘baya mu Galela.’—Matayi 4:12; Mâko 1:14.