YONE 7:32-52

  •   BADI BATUMA BALAMI BUA KUKUATA YEZU

  • NIKODEMO UDI WAKUILA YEZU

Yezu utshivua anu mu Yelushalema bua Tshibilu tshia Nzubu ya ntenta (anyi tshia Bitanda). Uvua ne disanka bua muvua ‘bantu ba bungi ba mu musumba wa bantu bamuitabuja.’ Kadi bualu ebu kabuvua busankishe bamfumu ba bitendelelu to. Bakatuma balami bavua bu bampulushi ba bitendelelu bua kumukuata. (Yone 7:31, 32) Kadi Yezu kakabasokoma to.

Yezu wakatungunuka ne kulongesha patoke mu Yelushalema wamba ne: “Nengikale kabidi nenu bua tshitupa tshîpi kumpala kua meme kuya kudi Yeye uvua muntume. Nenunkebe, kadi kanuakumpeta, kanuena mua kulua muaba undi to.” (Yone 7:33, 34) Bena Yuda kabavua bumvue mêyi aa to, nunku bakambilangana ne: “Muntu eu mmusue kuya kuepi kutudi katuyi mua kumupeta? Ki mmusue kuya kudi bena Yuda badi batangalake munkatshi mua bena Greke ne kulongesha bena Greke to, ki mmuomu? Udi usua kuamba tshinyi padiye wamba ne: ‘Nenunkebe, kadi kanuakumpeta, ne kanuena mua kulua muaba undi’?” (Yone 7:35, 36) Yezu uvua wakula bua lufu luende ne dibishibua diende bua kuya mu diulu, ne baluishi bende kabavua mua kumulonda kuntu aku to.

Dituku dia muanda mutekete dia tshibilu didi dikumbana. Mu dinda dionso dia tshibilu, muakuidi kampanda uvua upongolola mâyi avuabu bangata mu dijiba dia Siloama bua apuekele kuinshi kua tshioshelu tshia ntempelo. Pamuapa Yezu wakela dîyi uvuluija bantu bua tshilele etshi, wamba ne: “Muntu yeye ne nyota, alue kundi, anue. Muntu yonso udi ungitabuja, anu bu mudi mufundu eu muambe: ‘Munda muende menemene nemupatuke misulu ya mâyi a muoyo ipueka.’”—Yone 7:37, 38.

Yezu uvua wakula bua tshivua mua kuenzeka pavua bayidi bende bedibua manyi a nyuma ne babikidibua bua kubuela mu mulongo bua kupeta muoyo mu diulu. Diedibua manyi edi diakenzeka panyima pa lufu lua Yezu. Kutuadijila mu dituku dia Pentekoste dia tshidimu tshiakalonda, misulu ya mâyi a muoyo yakatuadija kupueka pavua bayidi bavua bedibue manyi a nyuma bayisha bantu bulelela.

Bua dilongesha dia Yezu edi, bamue bakamba ne: “Eu udi bulelela Muprofete,” bakula pamuapa bua muprofete munene kupita Mose ukavuabu balaye. Bakuabu bavua bamba ne: “Eu udi Kristo.” Kadi banga bavua bamba ne: “Kristo kena ufumina mu Galela to, ki mmuomu? Mufundu kawena wamba ne: Kristo udi ufumina mu bana ba Davidi, ku Beteleheme, musoko uvua Davidi anyi?”—Yone 7:40-42.

Nunku musumba wa bantu wakatapuluka. Nansha muvua bamue bajinga bua bakuate Yezu, muntu nansha umue kavua mumukuate to. Pavua balami bapingane kudi bamfumu ba bitendelelu bianza bitupu, bamfumu ba bakuidi ne Bafalese bakebeja ne: “Bua tshinyi kanuena balue nende?” Balami bakandamuna ne: “Katshia muntu nansha umue katu muanji kuakula mushindu eu to.” Bamfumu ba bitendelelu bakafiika munda, kubasekabu ne kubapepeja bamba ne: “Nuenu penu kanuena bapambuishibue to, ki mmuomu? Mukokeshi nansha umue anyi Mufalese ki mmumuitabuje to, ki mmuomu? Kadi musumba wa bantu udi kawuyi mumanye Mikenji eu mbantu bedibue mulawu.”—Yone 7:45-49.

Bua bualu ebu, Nikodemo Mufalese ne muena ku Tshilumbuluidi tshinene wakapeta dikima dia kuakuila Yezu. Bidimu bitue ku bibidi ne tshitupa kumpala, Nikodemo uvua muye kudi Yezu butuku ne mumuitabuje. Mpindieu Nikodemo udi wamba ne: “Mikenji yetu kayena ilumbuluisha muntu anu padibu banji kumuteleja ne bamanye tshidiye wenza, ki mmuomu?” Bakamuandamuna mu mushindu mubi bamba ne: “Wewe pebe kuena ufumina mu Galela to, ki mmuomu? Kebulula, umone ne: kakuena muprofete wajulabu ufumina mu Galela to.”—Yone 7:51, 52.

Mifundu kayivua ileja buludiludi ne: muprofete uvua ne bua kupatukila mu Galela to. Kadi Dîyi dia Nzambi dikavua dileje mu mêyi a buprofete muvua Kristo ne bua kufuminamu diamba ne: “butoke bunene” buvua ne bua kumueneka mu “Galela wa bisamba.” (Yeshaya 9:1, 2; Matayi 4:13-17) Bualu bukuabu, anu mukavuabu bamanyishe, Yezu wakaledibua mu Beteleheme, ne uvua kankanunuina ka Davidi. Nansha muvua Bafalese mua kuikala bamanye bualu ebu, bobu ke bavua pamuapa batangalaje mashimi a bungi avua bantu nawu bua Yezu.