Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Yezu udi njila ne bulelela ne muoyo

 NSHAPITA WA 79

Bua tshinyi kabutu kadi kalua?

Bua tshinyi kabutu kadi kalua?

LUKA 13:1-21

  •   YEZU UDI UFILA DILONGESHA BUA NJIWU IBIDI YA LUFU IVUA MIENZEKE

  • BADI BONDOPA MAMU UVUA TSHIBOMBO DIA NSABATU

Yezu uvua mudienzeje misangu ya bungi bua kukankamija bantu bua kuikala mu malanda mimpe ne Nzambi. Mpunga mukuabu udi umueneka panyima pa muyuki wabu ne bantu bavua pambelu kua Mufalese.

Bamue ba kudibu badi bakula bua njiwu kampanda ya lufu. Badi bakula bua “bena Galela bavua [nguvena muena Lomo Ponsio] Pilato musambakaje mashi abu ne milambu yabu.” (Luka 13:1) Bavua basue kuamba tshinyi?

Pamuapa bena Galela aba ke bavuabu bashipe pavua bena Yuda ba bungi babenge muvua Pilato mutule makuta a mu tshibutshilu tshia ntempelo bua kuibaka munkoloji bua kufikisha mâyi mu Yelushalema. Pilato uvua mua kuikala muangate makuta ne dianyisha dia bantu bavua balombola malu mu ntempelo. Bantu bavua balonda muyuki wa njiwu eu bavua mua kuikala bela meji ne: dikenga edi divua mua kuikala dikuate bena Galela aba bualu bavua bapile bua bienzedi biabu bibi. Yezu wakabenga.

Wakebeja ne: “Nudi nuela meji ne: bena Galela abu bavua benji ba mpekatu banene kupita bena Galela bakuabu bonso bua muvua malu au mabakuate anyi?” Wakandamuna ne: tòo. Kadi wakenza mudimu ne bualu ebu bua kudimuija bena Yuda wamba ne: “Anu nuenu banyingalale bua mpekatu yenu, tshianana nebanubutule bonso muomumue.” (Luka 13:2, 3) Pashishe Yezu wakakula kabidi bua njiwu ivua ifuma ku dienzeka pamuapa anu dîba divuabu bibaka munkoloji au. Wakebeja ne:

“Bantu 18 bavua tshibumba tshia Siloama tshiupukile, tshibashipe, nudi nuela meji ne: bavua ne dipila dinene kupita bantu bakuabu bonso badi basombele mu Yelushalema anyi?” (Luka 13:4) Musumba wa bantu uvua mua kuikala muele meji ne: bantu abu bavua bafue bua amue malu abu mabi. Yezu wakabenga kabidi. Uvua mumanye ne: “tshikondo ne malu adi kaayi matekemena” bitu bienzeka ne pamuapa biobi ke bivua bikebeshe pabi njiwu ayi. (Muambi 9:11) Kadi bantu bavua ne bua kupeta dilongesha bua njiwu eyi. Yezu wakamba ne: “Anu nuenu banyingalale bua mpekatu yenu, tshianana nebanubutule bonso, anu muvuabu bababutule.” (Luka 13:5) Kadi mpindieu bua tshinyi udi wela kashonyi pa dilongesha edi?

Bualu bivua bipetangana ne muaba uvuaye mu mudimu wende wa diyisha, ne udi ufila tshilejilu tshia bualu ebu mushindu eu: “Muntu mukuabu uvua ne mutshi wa mfigi mukuna mu budimi buende bua tumuma tua mvinyo, wakalua kukebaku tumuma, kadi kakasangana nansha kamue. Ke yeye kuambila muena mudimu wa mu budimi bua tumuma tua mvinyo ne: ‘Kukadi bidimu bisatu bindi ndua kukeba tumuma ku mutshi wa mfigi eu, kadi tshiena nsangana nansha kamue to. Uwukose! Bua tshinyi udi ne bua kutungunuka ne kuatula buloba?’ Yeye wakamuandamuna ne: ‘Mfumu, wulekela kabidi tshidimu tshikuabu too ne pandi ngumbula kuinshi kuawu ne ngelaku tumvi tua nyama. Wowu mukuame tumuma mu matuku atshiluala, mbimpe; kadi wowu kawuyi mukuame, dîba adi uwukose.’”—Luka 13:6-9.

Munkatshi mua bidimu bipite pa bisatu, Yezu uvua udienzeja bua kukuna ditabuja mu mioyo ya bena Yuda. Kadi anu bena Yuda bakese patupu ke bakalua bayidi bende ne bavua bu bipeta bia mudimu wende. Nunku mu tshidimu tshinayi tshia mudimu wende, wakavudija bikole mudimu wende. Bivua anu bu ne: uvua umbula ne ufukisha mutshi wa mfigi wa bena Yuda bua kuyisha ne kulongesha mu Yudaya ne mu Peleya. Mbipeta kayi biakamueneka? Anu bena Yuda bakese ke bakamuteleja. Tshisamba tshionso mu kabujima tshiakabenga bua kunyingalala bua mibi yatshi ne kabutu nkatshindile.

Katupa kakese panyima mu dituku dia Nsabatu, biakamueneka patoke muvua bantu ba bungi babenge bua kumuteleja. Yezu uvua ulongesha mu nsunagoga kampanda. Ke kumonaye mamu kampanda uvua mukobame nyima munkatshi mua bidimu 18 bua demon uvua umutatshisha. Bu muvua Yezu mumumvuile luse, wakamuambila ne: “Mukaji, udi musuludibue ku butekete buebe.” (Luka 13:12) Yezu wakamutentekela bianza ne diakamue yeye kululama ne kutuadija kutumbisha Nzambi.

Bualu ebu buakafiikisha mulombodi wa nsunagoga tshiji, yeye kuamba ne: “Kudi matuku asambombo adi bantu ne bua kuenza mudimu; nunku nulue, banondope mu matuku au, kadi ki ndituku dia Nsabatu to.” (Luka 13:14) Mutangidi eu kavua mupange ne: Yezu uvua ne bukole bua kuondopa to, kadi uvua wamba muvua bantu benze bibi bua kulua kuondopibua dia Nsabatu! Yezu wakandamuna ne bualu bua meji ebu: “Nuenu bena lubombo, yonso wa kunudi katu usulula ngombe wende anyi mpunda wende ku tshikumbi, uya nende bua kumunuisha mâyi dituku dia Nsabatu anyi? Mukaji eu udi muana wa Abalahama, uvua Satana musuike bidimu 18, kavuaku ne bua kusuludibua ku buloko ebu dituku dia Nsabatu anyi?”—Luka 13:15, 16.

Baluishi bende bakumvua bundu, kadi bantu bakasanka bua malu a kukema avuabu bamone Yezu wenza. Nunku Yezu wakambulula mu Yudaya bilejilu bibidi bia mêyi a buprofete bivua biakula bua Bukalenge, bikavuaye muambe mu buatu pa mbuu wa Galela.—Matayi 13:31-33; Luka 13:18-21.