Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Yezu udi njila ne bulelela ne muoyo

 NSHAPITA WA 25

Udi uditeka pa muaba wa muena nsudi ne umuondopa

Udi uditeka pa muaba wa muena nsudi ne umuondopa

MATAYI 8:1-4 MÂKO 1:40-45 LUKA 5:12-16

  •   YEZU UDI WONDOPA MUENA NSUDI

Pavua Yezu ne bayidi bende banayi baye kuyisha mu ‘nsunagoga, mu Galela mujima,’ lumu lua malu a kukema avuaye wenza luakatangalaka bikole. (Mâko 1:39) Lumu lua malu avuaye muenze luakafika mu tshimenga kampanda muvua muntu usama disama dia nsudi. Munganga Luka wakumvuija muvua muntu au, wamba ne: uvua ne “nsudi ya bungi menemene.” (Luka 5:12) Pakadi disama dibi edi diye bikole, didi dinyanga bitupa bia mubidi wa muntu ku kakese ku kakese.

Muena nsudi eu uvua mu nsombelu wa kanyinganyinga kakole ne mmuenzejibue bua kusomba kule ne bantu. Bualu bukuabu, uvua ne bua kuikala wela mbila ne: “Ndi mukoya, ndi mukoya!” bua bantu bobu bikale muaba au kabasemenyi pabuipi nende bua disama kadilu kubambulukila. (Lewitiki 13:45, 46) Kadi ntshinyi tshivua muena nsudi eu muenze? Wakaya kudi Yezu, kutuaye mpala wende panshi, kumusengelelaye ne: “Mukalenge, wewe musue udi mua kundengejaku.”—Matayi 8:2.

Muntu eu uvua ne ditabuja dia dikema kudi Yezu! Wakenza luse bua disama divuaye nadi! Yezu wakenza tshinyi? Bu wewe muaba au, uvua mua kuenza tshinyi? Bu muvua Yezu uditeka pa muaba wa muntu eu, wakolola tshianza ne kumulenga. Yezu wakamuambila ne: “Ndi musue! Lengejibua.” (Matayi 8:3) Nansha muvuabi mua kukolela bamue bantu bua kuitaba bualu ebu, nsudi yakumbuka diakamue pambidi pa muntu uvua usama eu.

Kuenaku ne dijinga dikole dia kuikala ne mukalenge udi uditeka pa muaba wa bakuabu, udi ne bukole bu Yezu anyi? Mushindu uvua Yezu muenzele muena nsudi eu malu udi utujadikila ne: padiye ulua Mukalenge wa buloba bujima, mulayi wa mu Bible eu neukumbane: “Yeye neumvuile bapuekele ne bapele luse, ne yeye neapandishe mioyo ya bapele.” (Misambu 72:13) Bushuwa, dîba adi Yezu neakumbaje dijinga divuaye nadi mu muoyo wende dia kuambuluisha bantu bonso badi bakenga.

Vuluka ne: kumpala mene kua Yezu kuondopa muena nsudi eu, mudimu wende wa diyisha ukavua usankisha bantu bikole. Mpindieu bantu nebumvue lumu lua bualu bua dikema buvuaye muenze ebu. Kadi Yezu kavua musue bua bantu bamuitabuje anu bua malu avuabu bumvue ku matshi to. Uvua mumanye mulayi wa buprofete udi wamba ne: “kakuenza bua dîyi diende diumvuike mu musesu,” mmumue ne: mu mushindu udi ukemesha bantu to. (Yeshaya 42:1, 2) Bua bualu ebu, Yezu uvua muelele muena nsudi uvuaye ufuma ku diondopa eu mukenji ne: “Wamanya kuambidi muntu bualu ebu to, kadi ndaku, udileje kudi muakuidi, ufile dipa divua Mose muambe.”—Matayi 8:4.

Kadi anu muudi mua kuikala wela meji, muntu eu udi ne disanka dipite bungi bua mudibu bamuondope, upanga too ne mua kulama bualu buvua bufuma ku dienzeka. Wakaya wenda utangalaja lumu elu miaba yonso. Bualu ebu buvua bukoke ntema ya bantu bikole ne bubajule dijinga dia kumona bivua Yezu wenza. Bua bualu ebu Yezu kavua nansha mua kuendakana mu tshimenga bantu bamumone to, nunku wakasomba nkayende bua tshikondo kampanda miaba ivua kayiyi bantu. Nansha nanku, bantu ba mu nseke yonso bavua balua bua abalongeshe ne abondope.