Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

 NSHAPITA WA 39

Diakabi kudi tshipungu tshia bantu badi kabayi bateleja

Diakabi kudi tshipungu tshia bantu badi kabayi bateleja

MATAYI 11:16-30 LUKA 7:31-35

  •   YEZU UDI UPISHA BIMENGA KAMPANDA

  • UDI UPESHA BANTU DISULAKANA NE UBAKOLESHA

Yezu uvua wangata Yone Mubatiji ne mushinga wa bungi, kadi mmunyi muvua bantu ba bungi bamumona? Yezu wakamba ne: “Tshipungu tshia bantu etshi . . . tshidi bu bana batekete badi basombe mu bisalu, badi bela balunda babu badibu banaya nabu mbila, bamba ne: ‘Tuvua banuelele nshiba, kadi kanuvua baje maja to; tuvua bele kabobo ka muadi, kadi kanuvua baditute bua kanyinganyinga.’”—Matayi 11:16, 17.

Yezu uvua usua kuamba tshinyi? Wakatokesha tshivuaye muambe etshi ne: “Yone wakalua kayi udia, kayi unua, kadi bantu badi bamba ne: ‘Udi ne demon.’ Muana wa muntu wakalua udia, unua, kadi bantu badi bamba ne: ‘Monayi! Muntu mudiavi, udi mudifile ku dinua dia mvinyo, mulunda wa balambuishi ba bitadi ne benji ba mpekatu.’” (Matayi 11:18, 19) Ku lumue luseke, Yone uvua ne nsombelu mupepele bualu mMunazi, udikanda too ne bua kunua mvinyo, kadi tshipungu tshia bantu atshi tshivua tshiamba ne: udi ne demon. (Nomba 6:2, 3; Luka 1:15) Ku lukuabu luseke, Yezu uvua wenza malu bu bantu bonso. Uvua udia ne unua ne nkatshinkatshi, kadi bavua bamubanda muvuaye udia, unua upitshisha. Bidi bimueneka ne: mbikole bua kusankisha bantu.

Yezu wakafuanyikija tshipungu tshia bantu atshi ne bana bavua mu bisalu bavua babenga kuja maja pavua bana nabu babelela lushiba anyi babenga kunyingalala pavua bakuabu badila. Wakamba ne: “Nansha nanku, meji adi adileja makane ku bienzedi biawu.” (Matayi 11:16, 19) Eyowa, “bienzedi,” mmumue ne: tshijadiki tshivua Yone ne Yezu bafile, bivua bileja ne: malu avuabu bababanda nawu nga dishima.

Yezu mumane kuleja muvua tshipungu tshia bantu atshi katshiyi tshiteleja, wakatela tshimenga tshia Kolazina, tshia Betesaida, ne tshia Kapênuma, miaba ivuaye muenze malu a kukema, ubibipisha ku tshimue ku tshimue. Yezu wakamba ne: bu yeye muenze malu a kukema a nunku mu bimenga bia bena Foinike, tshia Tulo ne tshia Sidona, bivua mua kunyingalala bua mpekatu yabi. Wakatela kabidi tshimenga tshia Kapênuma, muvuaye musombele bua tshikondo kampanda. Nansha mu tshimenga etshi, bantu ba bungi kabavua bitabe to. Yezu wakamba bua tshimenga etshi ne: “Mu Dituku dia Dilumbuluisha, dinyoka dia Sodoma nedikale dipepele menemene kupita diebe.”—Matayi 11:24.

Pashishe Yezu wakatumbisha Tatu wende udi usokoka “bena meji ne bamanyi ba mukanda” malu malelela a mushinga a mu nyuma, kadi uabuluila bantu bapuekele bavua bu bana. (Matayi 11:25) Wakabikila bantu ba nunku ubambila ne: “Luayi kundi, nuenu bonso badi batata ne midimu mikole ne bambule majitu mabapite, nennupeshilule bukole. Ambulayi mutshi wanyi wa tshikokedi, nulonge malu kundi, bualu meme ndi mupole malu ne mupuekele mu muoyo, nunku nuenu nenupetulule bukole. Bualu mutshi wanyi wa tshikokedi mmuimpe ne bujitu buanyi mbupepele.”—Matayi 11:28-30.

Mmunyi muvua Yezu mupeshilule bantu bukole? Bamfumu ba bitendelelu mbambuishe bantu bujitu bua bilele biabu bivua bibakuate ku bupika, bu mudi mikenji ya Nsabatu ivuabu babakoleshile. Kadi Yezu wakabapeshilula bukole pavuaye ubalongesha bulelela bua Nzambi, ubumbusha ku bukoya bua bilele abi. Wakaleja kabidi mushindu wa kufila disulakana kudi bavua badiumvua bazaza kudi bukokeshi bua bamfumu ba tshididi ne kudi bavua badiumvua banemesha bujitu kudi mpekatu. Eyowa, Yezu wakabaleja muvuabu mua kubabuikidila mpekatu yabu ne muvuabu mua kuikala mu ditalala ne Nzambi.

Bantu bonso badi bitaba mutshi muimpe wa tshikokedi wa Yezu badi mua kudilambula kudi Nzambi ne kuenzela Tatu wetu wa mu diulu mudimu, Yeye udi uditeka pa muaba wa bakuabu ne muena luse. Kuenza malu aa ki nkuambula bujitu bunene to, bualu malu adi Nzambi utulomba kaena ne bujitu nansha bukese to.—1 Yone 5:3.