Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Yezu udi njila ne bulelela ne muoyo

 NSHAPITA WA 32

Ntshinyi tshidi mikenji mianyishe dituku dia Nsabatu?

Ntshinyi tshidi mikenji mianyishe dituku dia Nsabatu?

MATAYI 12:9-14 MÂKO 3:1-6 LUKA 6:6-11

  •   UDI WONDOPA TSHIANZA TSHIA MUNTU DIA NSABATU

Mu Nsabatu mukuabu, Yezu udi uya mu nsunagoga, pamuapa wa mu Galela. Muomu emu, udi upetamu muntu udi ne tshianza tshia balume tshiuminyine. (Luka 6:6) Bafundi ne Bafalese bakashala batangile Yezu bimpe. Bua tshinyi? Bavua baleje tshivua mu meji abu menemene pavuabu bamuebeje ne: “Mbianyishibue bua kuondopa dituku dia Nsabatu anyi?”—Matayi 12:10.

Bamfumu ba bitendelelu bena Yuda bavua bitaba ne: kuondopa muntu dituku dia Nsabatu nkuanyishibue anu pavuaku njiwu ya lufu. Tshilejilu, dia Nsabatu, mbikandikibue bua kuolola muntu mufuba mutshibuke anyi kusuika muaba udi mutenguluke, malu avua kaayi mua kukebesha lufu. Mbimueneke patoke ne: bafundi ne Bafalese kabavua bela Yezu lukonko elu bua muvuabu baditatshisha bua dikenga dia mupele eu ne muoyo mujima to. Bavua bakeba kupeta bualu bua kubuelela bua kupisha Yezu.

Kadi Yezu mmumanye ngelelu wabu wa meji mukonyangale. Udi ujingulula ne: badi ne mmuenenu mubi udi kayi wa mu mifundu wa tshidi kunyanga mukenji wa dikandika dienza dia mudimu dituku dia Nsabatu. (Ekesode 20:8-10) Bakadi kabidi bamubande bibi mushindu eu bua midimu yende mimpe. Mpindieu Yezu udi ulongolola tshialu bua kubatuisha padiye wambila muntu udi ne tshianza tshiuminyine eu ne: “Juka, luaku munkatshi emu.”—Mâko 3:3.

Yezu wakakudimuka kudi bafundi ne Bafalese, wamba ne: “Nuenu bikale ne mukoko umue ne mukoko au udi ukuluka mu tshina dituku dia Nsabatu, kudiku muntu wa munkatshi muenu wabenga kuwukuata ne kuwupatula anyi?” (Matayi 12:11) Mukoko udi bu makuta malamina mu tshintu, nanku kabavua mua kuwushiya mu tshina too ne dituku divua dilonda to, uvua mua kufua mu lupuolo alu ne bavua mua kujimija makuta. Nansha nanku, Mifundu idi yamba ne: “Muntu muakane udi utabalela bimuna biende.”—Nsumuinu 12:10.

Yezu wakatungunuka bua kuleja muvua malu aa apetangana wamba ne: “Kadi netuambe tshinyi bua muntu udi ne mushinga wa bungi kupita mukoko! Nunku, mbianyishibue bua kuenza bualu buimpe dituku dia Nsabatu.” (Matayi 12:12) Yezu kavua unyanga Nsabatu yeye muondope muntu eu to. Bamfumu ba bitendelelu aba bakapanga mua kuela ngelelu wa meji ne wa luse eu mpata. Kushalabu bapuwe.

Yezu udi ukudimuka utangila bantu mufiike munda, mumvue bibi bua ngelelu wabu wa meji mubi eu. Pashishe udi wambila muntu eu ne: “Olola tshianza tshiebe.” (Matayi 12:13) Padi muntu eu wolola tshianza tshiende tshivua tshiuminyine, tshidi tshiakana. Bualu ebu budi busankisha muntu eu, kadi ntshinyi tshidibu buenzela badi bakeba bua kukuata Yezu mu buteyi?

Pamutu pa Bafalese kusanka bua mudi tshianza tshia muntu eu tshiakane, bakapatuka ne kutuadijabu diakamue kuelela Yezu tshifufu “ne bena dia Helode bua kumushipa.” (Mâko 3:6) Mu tshisumbu tshia bena tshididi etshi muvua kabidi bena mu kasumbu ka malu a Nzambi kavuabu babikila ne: Basadoke. Kumpala, Basadoke ne Bafalese kabavua bapetangana to, kadi mpindieu mbadisuike pamue bua kuluisha Yezu.