Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Yezu udi njila ne bulelela ne muoyo

 NSHAPITA WA 59

Muana wa muntu nnganyi?

Muana wa muntu nnganyi?

MATAYI 16:13-27 MÂKO 8:22-38 LUKA 9:18-26

  •   YEZU UDI WONDOPA MPOFU

  • BADI BAPESHA PETELO NSAPI YA BUKALENGE

  • YEZU WAKADIANJILA KUMANYISHA LUFU LUENDE NE DIBISHIBUA DIENDE

Yezu ne bayidi bende badi bafika ku Betesaida. Ke bantu kutuadilabu Yezu mpofu kampanda, kumusengelelabu bua amulenge bua amuondope.

Pavua Yezu mukuate muntu au ku tshianza, wakaya nende pambelu pa tshimenga. Yezu mumane kutuila muntu eu mate mu mêsu, wakamuebeja ne: “Udi umona tshintu anyi?” Muntu au wakandamuna ne: “Ndi mmona bantu, kadi badi bu mitshi yenda yenda.” (Mâko 8:23, 24) Yezu wakateka bianza pa mêsu a muntu eu, ke yeye kumupingajilaye lumonu luende. Pashishe wakatuma muntu au kuende ukadi umona bimpe, kumuambilaye bua kabuedi mu musoko to.

Pashishe Yezu ne bayidi bende bakaya batangile ku nord kua buloba bua Kaisalia wa Filipoyi. Mmuaba mule udi mutantshi wa kilometre 40. Musoko eu udi pa mukuna wa bule bua metre 350 kuulu kua mbuu, muikale ne Mukuna wa Hêmona udi ne neje pa lusongo udi mubande ku nord-est. Pamuapa luendu elu luakabangata ndambu wa matuku.

Pakafikabu muaba kampanda mu njila, Yezu wakaya bua kusambila pa nkayende. Kutshivua kushale ngondo tshitema anyi dikumi bua Yezu kufua, nunku uvua usamisha mutu bikole bua bayidi bende. Bayidi ba bungi bavua bafuma ku dilekela kumulonda, ne bidi bimueneka ne: bakuabu bavua bapange tshia kuenza anyi batekete ku muoyo. Bavua mua kuikala badiebeja bua tshinyi uvua mubenge pavua bantu bajinge kumuteka mukalenge anyi bua tshinyi kavua muenze tshimanyinu kampanda bua kuleja bushuwa tshivuaye menemene.

Pavua bayidi bende bafike muaba uvua Yezu usambidila, wakabebeja ne: “Bantu badi bamba ne: Muana wa muntu nnganyi?” Bakandamuna ne: “Bamue badi bamba ne: Yone Mubatiji, bakuabu ne: Eliya, ne banga pabu ne: Yelemiya anyi umue wa ku baprofete.” Eyowa bantu bavua bela meji ne: Yezu uvua mua kuikala mu bulelela umue wa ku bantu abu mujuke ku lufu. Bua Yezu kulongolola ngelelu wa meji wa bayidi bende, wakabebeja ne: “Kadi nuenu, nudi nuamba ne: meme ndi nganyi?” Petelo wakandamuna ne lukasa luonso ne: “Wewe udi Kristo, Muana wa Nzambi udi ne muoyo.”—Matayi 16:13-16.

Yezu wakamba ne: Petelo uvua ne bua kusanka bu muvua Nzambi mumuleje bualu ebu, kuambaye kabidi ne: “Ndi nkuambila ne: wewe udi Petelo, ne pa dibue edi nengibakilapu tshisumbu tshianyi, biibi bia Lukita kabiakutshipita bukole to.” Yezu uvua usua kuamba ne: yeye nkayende neibake tshisumbu ne nansha Lukita kaluvua mua kulama bantu ba mu tshisumbu etshi bobu bashale ne lulamatu mu muoyo wabu pa buloba to. Wakalaya Petelo ne: “Nenkupeshe nsapi ya Bukalenge bua mu diulu.”—Matayi 16:18, 19.

Yezu kavua mupeshe Petelo muaba wa kumpala munkatshi mua bapostolo bende anyi mumuvuije tshishimikidi tshia tshisumbu to. Yezu nkayende ke dibue divuabu ne bua kuibakilapu tshisumbu tshiende. (1 Kolinto 3:11; Efeso 2:20) Kadi Petelo uvua ne bua kupeta nsapi isatu. Uvua ne bua kuikala ne diakalenga mu mushindu kampanda dia kunzuluila bisumbu bia bantu mpunga bua bibuele mu Bukalenge bua mu diulu.

Petelo uvua ne bua kukuata mudimu ne lusapi lua kumpala mu Pentekoste wa mu 33 B.B., bua kuleja bena Yuda ne bantu bavua bitabuje buena Yuda bavua banyingalale bua mpekatu yabu tshia kuenza bua kupeta lupandu. Uvua ne bua kuenza mudimu ne lusapi luibidi bua kupetesha bena Samalea bavua ne ditabuja mpunga wa kubuela mu Bukalenge bua Nzambi. Pashishe mu 36 B.B., Petelo uvua ne bua kukuata mudimu ne lusapi luisatu bua kualabaja mpunga au kudi bantu ba bisamba bia bende bavua kabayi batengula bu mudi Kônelio ne bantu bakuabu.—Bienzedi 2:37, 38; 8:14-17; 10:44-48.

Mu muyuki eu, bapostolo ba Yezu bakaditatshisha pavuaye mudianjile kubambila makenga ne lufu bivuaye ne bua kupeta mu Yelushalema. Bu muvua Petelo kayi mujingulule ne: Yezu uvua ne bua kubishibua ku lufu bua kuikala ne muoyo mu diulu, wakamubikila ku luseke ne kumubelaye ne dîsu dikole ne: “Mukalenge, diumvuilaku luse; bualu ebu kabuakukufikila nansha kakese.” Kadi Yezu wakamuela nyima ne kuambaye ne: “Pita panyima panyi, Satana! Wewe udi tshilenduishi kundi, bualu meji audi wela ki mmeji a Nzambi to, kadi nga bantu.”—Matayi 16:22, 23.

Yezu udi mpindieu ubikila bantu bakuabu bavua ku luseke lua bapostolo, kubumvuijaye ne: kabivua ne bua kuikala bipepele bua kulua muyidi wende to. Wakamba ne: “Biasua muntu kundonda, adibenge, ambule mutshi wende wa makenga ne atungunuke ne kundonda. Bualu muntu yonso udi musue kupandisha muoyo wende neawujimije, kadi muntu yonso udi ujimija muoyo wende bua bualu buanyi ne bua bualu bua lumu luimpe, neawupandishe.”—Mâko 8:34, 35.

Eyowa, bua bayidi ba Yezu kupeta dianyisha diende, bavua ne bua kuikala ne dikima ne kudipangisha amue malu. Yezu wakamba ne: “Muntu yonso udi umvua bundu bua bualu buanyi ne bua mêyi anyi mu tshipungu tshia bantu tshia masandi ne tshia mpekatu etshi, Muana wa muntu neumvue pende bundu bua bualu buende padiye ulua mu butumbi bua Tatu wende ne banjelu ba tshijila.” (Mâko 8:38) Eyowa, nunku palua Yezu “neafute muntu yonso bilondeshile bienzedi biende.”—Matayi 16:27.