Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Yezu udi njila ne bulelela ne muoyo

 NSHAPITA WA 41

Udi wenza bishima ne bukole bua nganyi?

Udi wenza bishima ne bukole bua nganyi?

MATAYI 12:22-32 MÂKO 3:19-30 LUKA 8:1-3

  •   DINYUNGULUKA DIA YEZU MUSANGU MUIBIDI BUA KUYISHA DIDI DITUADIJA

  • UDI WIPATA BADEMON NE UDIMUIJA BUA MPEKATU UDIBU KABAYI MUA KUBUIKIDILA

Katupa kakese Yezu mumane kuakula bua difuilangana luse kua Mufalese Simona, wakatuadija kunyunguluka musangu muibidi mu Galela bua kuyisha. Etshi tshivua tshidimu tshibidi tshivuaye uyisha, ne kavua wenza luendu nkayende to. Bapostolo 12 bavua nende, pamue ne bakaji bakuabu bavuaye ‘mumbushe nyuma mibi ne muondope mabedi.’ (Luka 8:2) Munkatshi muabu muvua Mariya wa ku Magadala, Suzana, ne Yoana muena bayende uvua muena mudimu wa mukalenge Helode Antipa.

Pavua bantu ba bungi bumvue bualu bua Yezu, dieleshangana mpata bua mudimu wende diakavula. Bualu ebu buvua bumueneke patoke pavuabu balue kudi Yezu ne muntu kampanda uvua ne demon, muikale mpofu kayi wakula, ne mumuondope. Muntu eu kavua kabidi ku bukokeshi bua demon to, udi umona ne wakula. Bantu badi bakema, bamba ne: “Eu kena mua kuikala Muana wa Davidi anyi?”—Matayi 12:23.

Misumbu ya bantu ivua miunguile ku nzubu kuvua Yezu mutudile mmipite bungi, ipangisha too ne Yezu ne bayidi bende bua kudia. Kadi ki mbantu bonso badi bela meji ne: Yezu ke “Muana wa Davidi” uvuabu balaye to. Bamue bafundi ne Bafalese mbalue bafumina ku Yelushalema, ki mbua kulonga malu kudi Yezu anyi bua kumuambuluisha to. Bavua bambila bantu ne: “Udi ne Belezebula,” ne uvua wenza mudimu ne “mfumu wa bademon.” (Mâko 3:22) Pavua balela ba Yezu bumvue dikokangana adi, bakalua bua kumukuata. Bua bualu kayi?

Musangu eu, bana babu ne Yezu bine kabavua bitaba ne: uvua Muana wa Nzambi to. (Yone 7:5) Yezu uvua umueneka bu uvua ujudija tshimvundu mu bantu eu kavua bu Yezu uvuabu bamanye pavuabu bakola nende mu Nazaleta to. Bakela meji ne: lungenyi luende luvua lusama, bamba ne: “Mmujimije lungenyi.”—Mâko 3:21.

Kadi malu avuaye muenze akajadika tshinyi? Yezu uvua ufuma ku diondopa muntu uvua ne demon, ukadi mpindieu umona ne wakula. Kakuvua muntu uvua mua kuvila bualu abu to. Nunku bafundi ne Bafalese bakakeba bua kunyangila Yezu lumu ne malu a dishima. Bakamba ne: “Muntu eu udi wipata bademon ku diambuluisha dia Belezebula, mfumu wa bademon.”—Matayi 12:24.

Yezu uvua mumanye meji avua bafundi ne Bafalese bela, ke bualu kayi wakamba ne: “Bukalenge buonso budi bupanduluke budi bubutuka, ne tshimenga tshionso anyi nzubu yonso udi mupanduluke kakushindama to. Bia muomumue, bikala Satana wipata Satana, mmupanduluke yeye nkayende; nunku, mmunyi muashindama bukalenge buende?”—Matayi 12:25, 26.

Eu ngelelu wa meji muimpe wa dikema! Bafalese bavua bamanye ne: bamue bena Yuda bavua bipata bademon. (Bienzedi 19:13) Nunku wakebeja ne: “Bingikala meme ngipata bademon ku diambuluisha dia Belezebula, kadi bana benu badi babipata ku diambuluisha dia nganyi?” Mu mêyi makuabu, malu avuabu bamubanda nawu mmabakumbanyine pabu. Pashishe Yezu wakabeleshisha kabidi meji, wamba ne: “Kadi bingikala ngipata bademon ku diambuluisha dia nyuma wa Nzambi, Bukalenge bua Nzambi mbumane kufika bushuwa kunudi.”—Matayi 12:27, 28.

Bua Yezu kuleja ne: dipata diende dia bademon ntshijadiki tshia muvuaye ne bukokeshi ku mutu kua Satana, wakamba ne: “Mmunyi mudi muntu mua kubuela mu nzubu mua muntu wa bukole, kunyenga bintu biende, bikalaye kayi muanji kusuika muntu wa bukole au? Dîba adi udi mua kupawula nzubu wende. Muntu yonso udi kayi ku luseke luanyi mmuluishi wanyi, muntu yonso udi kayi usangisha nanyi udi umuangalaja.” (Matayi 12:29, 30) Bafundi ne Bafalese bavua bushuwa baluishi ba Yezu, bakaleja muvuabu bena mudimu ba Satana. Bavua bamuangalaja bantu bavua ku luseke lua Muana wa Nzambi, uvua wenza malu ne diambuluisha dia Yehowa.

Yezu uvua udimuija baluishi bena dia Satana abu ne: “Nebafuile bana ba bantu luse bua malu onso, nansha bobu benze mpekatu ya mushindu kayi anyi bapende Nzambi bipendu bia mushindu kayi. Kadi muntu yonso udi upenda nyuma muimpe, kakufuidibua luse kashidi, kadi udi ne tshibawu tshia mpekatu wa tshiendelele.” (Mâko 3:28, 29) Ela meji tshivua bualu ebu mua kukebela bantu bavua bamba malu avua nyuma wa Nzambi wenza patoke ne: Satana ke uvua uenza!