Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Yezu udi njila ne bulelela ne muoyo

 NSHAPITA WA 48

Wenza bishima, kadi bamubenga too ne mu Nazaleta

Wenza bishima, kadi bamubenga too ne mu Nazaleta

MATAYI 9:27-34; 13:54-58 MÂKO 6:1-6

  • YEZU UDI WONDOPA MPOFU NE KAMAMA

  • BANTU BA MU NAZALETA BADI BAMUBENGA

Yezu mmuenze malu a bungi mu dituku edi. Panyima pa dipingana diende ufuma mu buloba bua Dekapoli, wakondopa mukaji uvua ne disama dia mashi apueka ne kubisha muana wa bakaji wa Yailo ku lufu. Kadi dituku ki ndianji kujika to. Pavua Yezu mumbuke kua Yailo, bampofu babidi badi bamulonda benda bela mbila ne: “Muana wa Davidi, tumvuilaku luse.”—Matayi 9:27.

Pavua bantu abu babikile Yezu ne: “Muana wa Davidi,” bavua baleja muvuabu bitabuje ne: Yezu ke mupianyi wa nkuasa wa Davidi, nanku udi Masiya. Yezu wakenza bu uvua kayi mumvue mbila yabu, pamuapa bua kumona ni badi basuminyina, kadi ke tshidibu benza. Padi Yezu ubuela mu nzubu kampanda, bantu babidi aba badi bamulonda too ne mu nzubu amu. Yezu udi ubebeja ne: “Nudi nuitabuja ne: ndi mua kuenza bualu ebu anyi?” Badi bandamuna ne dishindika dionso ne: “Eyowa Mukalenge.” Bua bualu ebu, Yezu udi ubalenga pa mêsu, wamba ne: “Binuenzekele bilondeshile ditabuja dienu.”—Matayi 9:28, 29.

Diakamue bakatuadija kumona! Anu bu mukavua Yezu muambile bantu bakuabu, udi ubakandika bua kabendeshi lumu lua tshivuaye muenze to. Kadi bu muvuabu ne disanka dipite bungi, bakalua kutangalaja lumu lua bualu buende bikole.

Pakaya bantu babidi abu, bantu bakabuela ne muntu mukuabu uvua kayi wakula bualu mmukuata kudi demon. Yezu wakipata demon au, ne muntu eu wakatuadija kuakula diakamue. Misumba ya bantu yakakatshila bua bualu ebu, yamba ne: “Katutu banji kumona bualu bua mushindu eu mu Isalele to.” Bafalese bavua pabu muaba eu. Kabena mua kuelesha bishima ebi mpata to, nunku badi bambulula kabidi bualu buvuabu babande nabu Yezu bua kuvuaye upetela bukole bua kuenza nabu mudimu, bamba ne: “Muntu eu udi wipata bademon ne bukole bua mfumu wa bademon.”—Matayi 9:33, 34.

Matuku makese pashishe, Yezu wakapingana mu tshimenga tshiabu tshia Nazaleta, mpindieu wakaya ne bayidi bende. Kukavua bu tshidimu tshijima, wakalongesha mu nsunagoga wa muaba eu. Bantu bavua banji kukema bua malu avuaye muambe, kadi pashishe bakalua kufiika munda bua malongesha ende ne kukebabu bua kumushipa. Mpindieu Yezu udi ukeba kabidi kuambuluisha bantu ba muaba uvuaye mukolele.

Mu dituku dia Nsabatu, wakapingana mu nsunagoga bua kulongesha. Bantu ba bungi bakakema, bafika ne ku diebeja ne: “Muntu eu mmupetele meji aa ne midimu ya bukole eyi penyi?” Badi bamba ne: “Eu ki mmuana wa muena mabaya anyi? Dîna dia mamuende ki m’Mariya anyi? Bana babu ba balume ki n’Yakobo ne Jozefe ne Simona ne Yudasa anyi? Bana babu ba bakaji bonso kabena munkatshi muetu emu anyi? Kadi nkuepi kudiye mupetele malu onso aa?”—Matayi 13:54-56.

Bantu bakamona ne: Yezu mmuntu anu bu muvua bantu bonso ba muaba au. Badi bela meji ne: ‘Yeye mmukole mu mêsu etu, kadi mmunyi mudiye mua kuikala Masiya?’ Ke bualu kayi, nansha muvuabu bamone bijadiki bionso, too ne meji a bungi adi Yezu nawu ne midimu ya bukole ivuaye wenza, badi bamubenga. Bu muvuabu bibidilangane ne nende, too ne balela bende badi balenduka bua bualu buende, bimusaka bua kuamba ne: “Muprofete katu utumbila mu buloba buabu ne mu nzubu muende to.”—Matayi 13:57.

Bushuwa, Yezu udi ukema bua dipangila diabu dia ditabuja. Nunku kena wenza tshishima nansha tshimue muaba eu to, “pa kumbusha bantu bakese bavua basama bavuaye mutentekele bianza, mubuondope.”—Mâko 6:5, 6.