Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Yezu udi njila ne bulelela ne muoyo

 NSHAPITA WA 95

Yezu ulongesha bua dishipa dia dibaka ne dinanga bua bana

Yezu ulongesha bua dishipa dia dibaka ne dinanga bua bana

MATAYI 19:1-15 MÂKO 10:1-16 LUKA 18:15-17

  •   YEZU ULEJA MUDI NZAMBI UMONA DISHIPA DIA DIBAKA

  • DIPA DIA BUJIKE

  • MUDIBI NE MUSHINGA BUA KUIKALA BU BANA

Yezu ne bayidi bende badi bumbuka mu Galela ne basambuka musulu wa Yadene ne bangata disangu dia ku sud baya batangile mu Peleya. Musangu wa ndekelu uvua Yezu mu Peleya uvua muambile Bafalese mutu Nzambi umona dishipa dia dibaka. (Luka 16:18) Mpindieu badi bajula tshilumbu tshimue atshi bua kumuteta.

Mose uvua mufunde ne: badi mua kuipata mukaji ku dibaka yeye muenze “bualu bubi.” (Dutelonome 24:1) Bantu bavua ne ngenyi mishilangane bua malu avua mua kuenza bua dibaka difue. Bamue bavua bela meji ne: divua mua kufua nansha bua tumalu tukese. Ke Bafalese kumuebeja ne: “Mbianyishibue bua mulume kushipa dibaka ne mukajende bua bualu kayi buonso anyi?”—Matayi 19:3.

Pamutu pa Yezu kuleja mmuenenu wa bantu, wakakula ne bumfumu buonso uleja muvua Nzambi muenze dibaka wamba ne: “Kanuena babale ne: uvua mubafuke ku tshibangidilu wakabafuka mulume ne mukaji, kuambaye ne: ‘Bua bualu ebu mulume neashiye tatuende ne mamuende, nealamate mukajende, ne bubidi buabu nebalue mubidi umue’ anyi? Nunku kabatshiena kabidi babidi to, kadi bakadi mubidi umue. Bua bualu ebu, muntu kapanduludi tshidi Nzambi musuike kaba kamue to.” (Matayi 19:4-6) Pavua Nzambi muenze dibaka dia Adama ne Eva, kavua mulongolole malu bua bobu kudishipa to.

Bafalese bakela Yezu mpata bamba ne: “Kadi, bua tshinyi Mose uvua muambe bua kumupesha mukanda wa dimuipata nawu ne kushipa nende dibaka?” (Matayi 19:7) Yezu wakabambila ne: “Bua mioyo yenu mipape, Mose wakanuanyishila bua nushipe dibaka ne bakaji benu, kadi katshia ku tshibangidilu kabivua nanku to.” (Matayi 19:8) “Tshibangidilu” tshivua dîba divua Nzambi muenze dibaka dia kumpala mu Edene, kadi katshivua mu matuku a Mose to.

Pashishe, Yezu wakaleja bulelela bua mushinga ebu wamba ne: “Ndi nnuambila ne: Muntu yonso udi ushipa dibaka ne mukajende kabuyi bua bualu bua masandi [mu tshiena Greke por·neiʹa], ne usela mukaji mukuabu udi wenda masandi.” (Matayi 19:9) Nunku bilondeshile Bible, dibaka didi mua kufua anu bua tshiendenda tshia masandi.

Biakafikisha bayidi ku diamba ne: “Bikala nsombelu wa mulume ne mukajende muikale nanku, ki mbimpe kusela to.” (Matayi 19:10) Bulelela, muntu udi ujinga kubuela mu dibaka udi ne bua kudimona bu tshintu tshia kashidi!

Yezu wakakula bua bujike umvuija ne: bamue mbalela batungu, mmumue ne: kabayi ne bukole bua kusangila to. Bakuabu mbavuija batungu, balue kabayi ne bukole bua kusangila to. Kadi, bamue badi bumbusha dijinga diabu dia kusangila. Badi benza nunku bua kutuishila mêsu bikole ku malu a Bukalenge. Yezu wakambila bantu bavua bamuteleja ne: “Muntu udi mua kuitaba bualu ebu [anyi bujike], abuitabe.”—Matayi 19:12.

Mpindieu, bantu bakatuadija kulua ne bana babu kudi Yezu. Kadi bayidi bende bakabanga kutandisha bantu pamuapa babenga bua kabamutatshishi to. Pakamona Yezu nanku biakamutonda ke yeye kubambila ne: “Lekelayi bana batekete balue kundi; kanukebi bua kubapangisha to, bualu Bukalenge bua Nzambi mbua badi bu bobu. Bulelela ndi nnuambila ne: Muntu yonso udi kayi wakidila Bukalenge bua Nzambi bu muana mutekete kakubuelamu nansha kakese.”—Mâko 10:14, 15; Luka 18:15.

Edi ndilongesha dimpe be! Bua tuetu kubuela mu Bukalenge bua Nzambi tudi ne bua kuikala bena bupuekele ne kudiakaja bua kulonga malu anu bu bana batekete. Yezu udi mpindieu uleja mudiye munange bana padiye ubambula mu maboko ne ubabenesha. Mmunange kabidi bikole muntu yonso udi “wakidila Bukalenge bua Nzambi bu muana mutekete.”—Luka 18:17.