LUKA 14:7-24

  •   DILONGESHA BUA BUDIPUEKESHI

  • BABIKILA BADI BALOMBA DILEKELELA

Yezu wakashala kua Mufalese yeye mumane kuondopa muntu uvua ne disama dia buwulawula. Yezu wakamona muvua bantu bakuabu bavuabu babikile basungula miaba mibandile ku mêsa a biakudia, ne wakababidila mpunga eu bua kufila dilongesha bua didipuekesha.

Yezu udi wamba ne: “Padi muntu ukubikila mu tshibilu tshia dibaka, kudiadiji muaba wa lumu lua bungi to. Pamuapa badi mua kuikala kabidi babikile muntu munene kukupita wewe. Nunku muntu uvua munubikile nuenu bonso babidi nealue, neakuambile ne: ‘Shila muntu eu muaba webe au.’ Dîba adi, neuye kusomba muaba mupuekele bikole ne bundu.”—Luka 14:8, 9.

Yezu wakalua kuamba ne: “Kadi padibu bakubikila, ndaku, udiadije muaba mupuekele bikole, nunku padi muntu uvua mukubikile ulua, neakuambile ne: ‘Mulunda wanyi, bandila ku mutu.’ Dîba adi, newikale ne bunême kumpala kua babikidibue nebe bonso.” Bualu ebu budi buleja malu a bungi kupita kuikala ne bukalanga. Yezu udi umvuija ne: “Bualu muntu yonso udi udibandisha, nebamupuekeshe, ne muntu yonso udi udipuekesha, nebamubandishe.” (Luka 14:10, 11) Bushuwa, uvua ukankamija bateleji bende bua kuikala ne budipuekeshi.

Pashishe Yezu udi ufila dilongesha dikuabu bua Mufalese uvua mumubikile, dia mua kufila biakudia bidi Nzambi wanyisha. Kuambaye ne: “Paudi ulongolola biakudia bia munda munya anyi bia dilolo, kubikidi balunda bebe anyi bana benu anyi balela bebe peshi bena mutumba nebe badi ne bubanji to. Tshianana, badi mua kukubikila pabu, nunku bualu ebu budi mua kulua difutu diebe. Kadi paudi ulongolola tshibilu, ubikile bapele, bantu badi batebuka, balema ne bampofu; nunku newikale wa diakalenga, bualu kabena ne tshintu tshia kukufuta. Bualu neufutshibue ku dibishibua dia bantu bakane.”—Luka 14:12-14.

Mbimpe bua kubikila balunda, balela anyi bena mutumba bua kudia nabu, ne Yezu kena wamba ne: mbibi bua kuenza nanku to. Kadi udi wela kashonyi pa ne: kupesha bantu badi bapangile biakudia bu mudi: bapele, balema anyi bampofu kudi kupetesha muntu masanka a bungi. Yezu wakaleja muntu uvua mumuakidile ne: “Neufutshibue ku dibishibua dia bantu bakane.” Muntu mukuabu uvuabu babikile pende udi ukumbaja ne: “Muntu udi udia mu Bukalenge bua Nzambi ngua diakalenga.” (Luka 14:15) Uvua mumone ne: bualu ebu buvua diakalenga dinene. Kadi bantu bonso kabavua ne dianyisha dia nanku to, ke Yezu kutungunuka ne tshilejilu wamba ne:

“Muntu mukuabu uvua mulongolole didia dinene dia dilolo, ne uvua mubikile bantu ba bungi. Wakatuma mupika wende . . . bua kuambila babikidibue ne: ‘Luayi, bualu bintu bionso bikadi bilongolola.’ Kadi buonso buabu bakatuadija kulomba dilekelela mushindu wa muomumue. Wa kumpala wakamuambila ne: ‘Mvua musumbe budimi, ndi ne bua kuya kubutangila; ndi nkulomba, umfuilaku luse.’ Mukuabu wakamba ne: ‘Mvua musumbe ngombe dikumi misuika ibidi ibidi ku tshikokedi, ndi nya kuyitangila; ndi nkulomba, umfuilaku luse.’ Munga wakamba pende ne: ‘Ndi mfuma ku disela, bua bualu ebu tshiena mua kulua to.’”—Luka 14:16-20.

Kabavua babinge bua kulomba dilekelela to. Mu bulelela muntu utu ukonkonona budimi anyi nyama kumpala kua kubisumba, nunku kupingana bua kubikonkonona pashishe katshivua bualu bua kuenza ne lukasa to. Muntu muisatu kena udilongolola bua kusela to. Ukavua musele, nunku kabivua ne bua kumupangisha bua kuitaba dibikila dia mushinga edi to. Pakumvua mfumuabu tubingila etu, wakambila mupika wende ne tshiji tshionso ne:

“Ndaku lukasa mu misesu minene ne mu tujila tukese tua mu tshimenga, ulue apa ne bapele ne bantu badi batebuka ne bampofu ne balema.” Mupika mumane kuenza nunku, kutshivua kushale muaba. Pashishe mfumu wakambila mupika wende kabidi ne: “Ndaku mu njila minene ne mu tujila tukese, ubenzeje bua balue kubuela, bua nzubu wanyi ikale muwule. Bualu ndi nnuambila ne: muntu nansha umue wa ku bantu bamvua mubikile kakulabula biakudia bianyi bia dilolo to.”—Luka 14:21-24.

Tshilejilu tshidi Yezu ufuma ku difila etshi tshidi tshileja mudi Yehowa Nzambi ne Yezu Kristo bapesha bantu dibikila bua bakumbane bua kupiana Bukalenge bua mu diulu. Bena Yuda, nangananga bamfumu ba bitendelelu, ke bantu ba kumpala bavuabu babikile. Ba bungi ba kudibu bakabenga dibikila divua Yezu mubapeshe mu mudimu wende wonso wa kuyisha. Kadi dibikila kadivua ne bua kuimanyina anu kudibu to. Yezu wakaleja patoke ne: mu matuku atshivua alua bantu bena bupuekele ba mu tshisamba tshia Yuda ne ba mu bisamba bikuabu bavua ne bua kupeta dibikila dibidi. Pashishe kuvua ne bua kuikala dibikila disatu ne dia ndekelu bua bantu bavua bena Yuda bamona bu bavua kabayi bakumbane ku mêsu kua Nzambi.—Bienzedi 10:28-48.

Bulelela, malu adi Yezu wamba adi bushuwa ajadika mêyi a muntu uvuabu babikile pende wakamba ne: “Muntu udi udia mu Bukalenge bua Nzambi ngua diakalenga.”