Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

 NSHAPITA WA 82

Mudimu wa Yezu wa diyisha mu Peleya

Mudimu wa Yezu wa diyisha mu Peleya

LUKA 13:22–14:6

  •   DIDIENZEJA BUA KUBUELA KU TSHIIBI TSHIBUMBAKANE

  • YEZU UDI NE BUA KUFUILA MU YELUSHALEMA

Yezu uvua ulongesha ne wondopa bantu mu Yudaya ne mu Yelushalema. Pashishe udi usabuka musulu wa Yadene bua kulongesha mu tshimenga ne mu tshimenga mu distrike dia Peleya. Kadi mu katupa kîpi uvua ne bua kupingana mu Yelushalema.

Patshivua Yezu mu Peleya, muntu mulume kampanda wakamuebeja ne: “Mukalenge, bantu badi bapandishibua mbakese anyi?” Muntu eu uvua mua kuikala mumanye muvua bamfumu ba bitendelelu bakonkangane bua kumanya ni mbantu ba bungi bavua ne bua kusungidibua anyi bakese. Yezu wakashintulula lukonko elu, kuakulaye bua tshivua bantu ne bua kuenza bua kusungidibua. Wakamba ne: “Dienzejayi ne bukole buonso bua kubuelela ku tshiibi tshibumbakane.” Eyowa, bidi bikengela kudienzeja anyi kuluangana bikole. Bua tshinyi? Yezu udi wamba ne: “Ba bungi nebakebe bua kubuela kadi kabakukokesha to.”—Luka 13:23, 24.

Bua kuleja mudi kudienzeja bikole ne mushinga, Yezu udi wamba ne: “Padi muena nzubu ujuka, ukanga tshiibi, nenuimane pambelu nukokola ku tshiibi, nuamba ne: ‘Mukalenge, tunzuluila.’ . . . Kadi neanuambile ne: ‘Tshiena mumanye kunudi bafume to. Umbukayi kundi, nuenu bonso benji ba malu adi kaayi makane!’”—Luka 13:25-27.

Bualu ebu budi buleja lutatu ludi nalu muntu udi kayi ulua kumpala kua dîba, mmumue ne: ulua pamuapa pa dîba didiye musue ne usangana bakanga tshiibi ne batue tshikuvu. Uvua ne bua kulua kumpala kua dîba, nansha muvuabi kabiyi bikumbane. Ke muvuabi nanku bua bantu ba bungi bavua mua kuikala bapete masanka pavua Yezu ubalongesha. Bakapangila bua kubabidila mpunga wa kuvuija ntendelelu mulelela bualu bua mushinga mu nsombelu wabu. Bantu ba bungi bavua Yezu muluile kabavua bitabe tshivua Nzambi mufile bua kupanda to. Yezu wakamba ne: ‘nebadile ne nebasumakaje mênu abu’ pabelabu pambelu. Kadi bantu badi ‘bafumina ku est ne ku ouest, ku nord ne ku sud,’ mmumue ne: mu bisamba bionso “nebadiadije ku mêsa mu Bukalenge bua Nzambi.”—Luka 13:28, 29.

Yezu wakamba ne: “Kudi bantu ba ndekelu [bu mudi bantu bavua kabayi bena Yuda ne bena Yuda bavuabu bamona kabayi ne mushinga] bikala ba kumpala, ne kudi bantu ba kumpala [bena Yuda bavuabu bangata ne mushinga bavua baditambisha bua muvuabu ndelanganyi ya Abalahama] bikala ba ndekelu.” (Luka 13:30) Dikala diabu “ba ndekelu” didi dileja ne: bantu badi kabayi ne dianyisha aba kabakuikala mu Bukalenge bua Nzambi to, nansha kakese.

Bamue Bafalese bakalua kudi Yezu bamudimuija ne: “Patuka, umbuka muaba eu, bualu Helode [Antipa] udi ukeba kukushipa.” Pamuapa mukalenge Helode ke uvua muendeshe lumu elu bua kunyemesha Yezu mu teritware au. Helode uvua mua kuikala utshina bua ne: mu mushindu kampanda kalu kubuelakana kabidi mu lufu lua muprofete mukuabu anu bu muvuabi bimuenzekele bua lufu lua Yone Mubatiji. Kadi Yezu wakambila Bafalese ne: “Ndayi nuambile mukenge au ne: ‘Tangila! ndi ngipata bademon, ngondopa bantu lelu ne malaba, ne dituku disatu nengikale nkadi mujikije.’” (Luka 13:31, 32) Padi Yezu ubikila Helode ne: “mukenge” udi mua kuikala wakula bua mutu mikenge midimuke. Kadi bantu bakuabu anyi Helode kabavua mua kusaka Yezu ku dienza malu kampanda to. Uvua ne bua kukumbaja mudimu uvua Tatuende mumupeshe, wenza nunku bilondeshile dîba divua Nzambi mumukosele, kabiyi bilondeshile dîba dia muntu to.

Yezu udi utungunuka ne luendu luende mutangile mu Yelushalema bualu anu muvuaye muambe ne: “Kabiena mua kuenzeka bua bashipele muprofete kukuabu, anu mu Yelushalema.” (Luka 13:33) Kakuvua mêyi a buprofete avua amba ne: Masiya uvua ne bua kufuila mu tshimenga atshi to, kadi bua tshinyi Yezu uvua wakula bua kufuila kuntu aku? Bualu Yelushalema uvua tshimenga tshikulu, muaba uvua bantu 71 ba ku Tshilumbuluidi Tshinene basombele ne mmuaba uvuabu balumbuluisha aba bonso bavuabu babanda ne: mbaprofete ba dishima. Bavua kabidi bafila milambu ya nyama muaba eu. Nunku Yezu uvua mumone ne: kabavua mua kumushipela muaba mukuabu to.

Yezu wakamba ne kanyinganyinga ne: “Yelushalema, Yelushalema, mushipi wa baprofete ne muashi wa badibu bamutumina mabue, mmisangu bungi munyi imvua musue kusangisha bana bebe bu mudi nzolo usangisha bana bende mu mapuapua ende! Kadi nuenu kanuvua basue to. Monayi! Nzubu wenu mmunulekeela.” (Luka 13:34, 35) Bu muvua tshisamba etshi tshibenge Muana wa Nzambi, nunku tshivua ne bua kupeta diakabi!

Kumpala kua Yezu kufika mu Yelushalema, mutangidi wa Bafalese wakamulomba bua aye kuende mu dia Nsabatu bua kudia. Bantu bavuabu babikile aba bakatangila bimpe bua kumona tshivua Yezu mua kuenza bua muntu uvua ne disama dia buwulawula (mmumue ne: mâyi avula bikole mu mubidi nangananga mu bibelu ne mu makasa) uvua muaba au. Yezu wakebeja Bafalese ne bamanyi ba Mikenji ne: “Mbianyishibue bua kuondopa dituku dia Nsabatu anyi ki mbianyishibue?”—Luka 14:3.

Muntu nansha umue kakandamuna to. Yezu wakuondopa muntu au ne pashishe kubebejaye ne: “Nnganyi wa kunudi, muanende wa balume anyi ngombe wende yeye mumate mu tshina, wabenga kumupatula diakamue dituku dia Nsabatu?” (Luka 14:5) Musangu eu kabidi kabakamuandamuna ku lukonko luende lua meji elu to.