Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Yezu udi njila ne bulelela ne muoyo

 NSHAPITA WA 93

Muana wa muntu neasokolodibue

Muana wa muntu neasokolodibue

LUKA 17:20-37

  •   BUKALENGE BUA NZAMBI BUDI MUNKATSHI MUABU

  • NTSHINYI TSHIENZEKA PIKALA YEZU NE BUA KUSOKOLODIBUA?

Yezu utshidi anu mu Samalea anyi mu Galela. Bafalese badi mpindieu bamuebeja bua dilua dia Bukalenge, budibu batekemene ne: nebulue ne ngoma ne biondo. Kadi udi wamba ne: “Bukalenge bua Nzambi kabuena bulua bantu babumone to; anyi bantu kabakuamba ne: ‘Tangilayi apa!’ peshi ne: ‘Kuaka!’ to. Bualu monayi! Bukalenge bua Nzambi budi munkatshi muenu.”—Luka 17:20, 21.

Bamue badi mua kuamba ne: Yezu udi wamba ne: Bukalenge budi bukokesha mu mioyo ya batendeledi ba Nzambi. Kadi kabiena nanku to, bualu Bukalenge bua Nzambi kabuvua mu mioyo ya Bafalese bavua Yezu wambila bualu ebu to. Kadi buvua munkatshi muabu bualu Yezu Mukalenge wa Bukalenge bua Nzambi uvuabu basungule uvua munkatshi muabu dîba adi.—Matayi 21:5.

Pamuapa pakavua Bafalese bumbuke, Yezu wakambila bayidi bende malu makuabu a bungi avua atangila dilua dia Bukalenge abu. Wakamba bua dikalaku diende mu Bukalenge budi ne bukole ne: “Matuku nealue anuajinga bua kumona dituku dimue dia ku matuku a Muana wa muntu, kadi kanuakudimona to.” (Luka 17:22) Yezu uvua uleja ne: Muana wa muntu neakokeshe mu Bukalenge mu matuku atshivua alua. Kumpala kua dîba adi kukumbana, bamue bayidi bavua mua kuikala badindile ne muoyo kuulu kuulu, kadi bavua ne bua kutungunuka ne kuindila too ne pavua dîba divua Nzambi mukose bua Muana wa muntu ne bua kulua dikumbana.

Yezu wakatungunuka ne: “Bantu nebanuambile ne: ‘Tangilayi kuaka!’ peshi ne: ‘Tangilayi apa!’ Kanupatuki anyi kanubalondi nansha. Bualu anu bu mutu mupenyi wa mvula welela ku luseke lumue lua diulu too ne ku luseke lukuabu lua diulu, ke muikala Muana wa muntu mu dituku diende.” (Luka 17:23, 24) Mmunyi muvua bayidi ba Yezu ne bua kukubibua bua kubenga kulonda bamasiya ba dishima? Yezu wakamba ne: dilua dia Masiya divua ne bua kuikala bu mupenyi uvua ne bua kumueneka mu muaba munene. Tshijadiki tshia dikalaku diende mu Bukalenge budi ne bukole netshimueneke patoke kudi bantu bonso.

Pashishe Yezu wakafuanyikija malu avua menzeke kale bua kuleja muikala bantu mua kuenza malu mu matuku atshilualua wamba ne: “Anu bu muvuabi bienzeke mu matuku a Noa, ke muikalabi mu matuku a Muana wa muntu . . . Bia muomumue, anu bu muvuabi bienzeke mu matuku a Lota: bavua badia, bavua banua, bavua basumba, bavua basumbisha, bavua bakuna, bavua bibaka. Kadi dituku divua Lota mupatuke mu Sodoma, kapia ne sufre biakaloka bifuma mu diulu, kubabutula bonso. Nebikale muomumue dituku adi padi Muana wa muntu usokolodibua.”—Luka 17:26-30.

Yezu kavua muambe ne: bavua babutule bantu ba mu matuku a Noa ne a Lota bualu bavua benza midimu itu bantu bonso benza bu mudi: kudia, kunua, kusumba, kupanyisha, kukuna ne kuibaka to. Noa ne Lota ne mêku abu bavua pabu benze amue a ku malu aa. Kadi bantu bakuabu bavua benza malu aa kabayi bateya ntema nansha mikese ku disua dia Nzambi to, ne bavua balengulule tshikondo tshivuabu. Nunku, Yezu uvua udimuija bayidi bende bua kutuma ntema ku disua dia Nzambi ne kuditumikila ne muoyo mujima. Muaba eu, uvua ubaleja mushindu wa bobu kukubibua, mmumue ne: mua kuikala ne muoyo pavua Nzambi ne bua kubutula bantu mu matuku atshilualua.

Bayidi bavua ne bua kuenza bua bintu bia mu bulongolodi buvua bubanyunguluke anyi ‘bintu bivua panyima’ kabibabueji mu ditanaji to. Yezu wakamba ne: “Dituku adi, muntu udi pa mutu pa nzubu kadi bintu biende bikale mu nzubu, katuluki bua kubiangata to, bia muomumue, muntu udi ku budimi kena ne bua kupingana ku bintu bidi panyima to. Vulukayi mukaji wa Lota.” (Luka 17:31, 32) Wakalua dikunji dia mukele.

Yezu wakatungunuka ne kuleja muikala nsombelu pikala Muana wa muntu ne bua kukokesha bu Mukalenge wamba ne: “Butuku abu bantu babidi nebikale pa bulalu bumue; nebangate umue, kadi nebashiye mukuabu.” (Luka 17:34) Nunku bamue nebapete lupandu, ne nebashiye bakuabu, mmumue ne: nebajimije mioyo yabu.

Bayidi bakamuebeja ne: “Mukalenge, nkuepi?” Yezu wakabandamuna ne: “Muaba wonso udi tshitalu, nyunyi ya mikanku neyidisangishapu kabidi.” (Luka 17:37) Eyowa, bamue nebikale bu nyunyi ya mikanku idi imona kule. Bayidi aba nebadisangishe kudi Kristo mulelela anyi Muana wa muntu. Mu matuku atshivua alua, Yezu uvua ne bua kupesha bayidi bende ba lulamatu bulelela budi bufila muoyo.