YONE 11:38-54

  •   DIBISHIBUA DIA LAZALO

  • BENA KU TSHILUMBULUIDI TSHINENE BADI BALONGOLOLA BUA KUSHIPA YEZU

Panyima pa Yezu mumane kutuilangana ne Mâta pashishe ne Mariya pabuipi ne Betania, bakaya ku lukita lua Lazalo. Luvua mu lubuebue luikale ne dibue dijika ku tshibuelelu. Yezu wakatuma dîyi ne: “Umbushayi dibue.” Mâta wakadiabakena bualu kavua mumanye tshivua Yezu usua kuenza to. Wakamuambila ne: “Mukalenge, udi ne bua kuikala ukadi ununka mpindieu, bualu kukadi kupite matuku anayi.” Kadi Yezu wakamuambila ne: “Tshivua mukuambile ne: wewe muitabuje neumone butumbi bua Nzambi anyi?”—Yone 11:39, 40.

Nunku bakumbusha dibue. Pashishe Yezu kubandisha mêsu ende muulu usambila ne: “Tatu, ndi nkuela tuasakidila bua muudi munteleje. Bulelela, mvua mumanye ne: utu anu unteleja; kadi ndi ngakula bua musumba wa bantu udi muimane muaba eu, bua bitabuje ne: wewe nguvua muntume.” Disambila divua Yezu muenze kumpala kua bantu divua dileje ne: uvua ne bua kuenza bualu kampanda ku bukole bua Nzambi. Pashishe Yezu wakela lubila ne dîyi dikole wamba ne: “Lazalo, patuka!” Nunku Lazalo wakapatuka mujingila tshilamba tshia kujiikangana natshi ku bianza ne ku makasa ne tshikuabu tshijingila ku mêsu kuende. Yezu wakabambila ne: “Mukutululayi, numulekele aye.”—Yone 11:41-44.

Bena Yuda ba bungi bavua balue kusamba Mariya ne Mâta bakamona tshishima etshi ne kuitabujabu Yezu. Kadi bakuabu bakaya kuambila Bafalese tshishima tshivua Yezu muenze etshi. Bafalese ne bamfumu ba bakuidi bakenza tshisangilu tshia Kabadi kanene ka bena Yuda. Muakuidi munene Kayifa uvua pende mu tshisangilu etshi. Bamue ba kudibu bakadiabakena ne: “Tudi ne bua kuenza tshinyi, bualu muntu eu udi wenza bimanyinu bia bungi? Tuetu bamulekele utungunuka nunku, bantu bonso nebamuitabuje, ne bena Lomo nebalue, nebangate muaba wetu ne tshisamba tshietu.” (Yone 11:47, 48) Nansha muvua bantu aba bumvue tshivuabu babambile kudi bantu bavua badimuene muvua Yezu ‘muenze bimanyinu bia bungi,’ kabakasanka bua tshivua Nzambi muenze ku butuangaji buende to. Bavua tshia kumpala baditatshisha bua mianzu yabu ne bukokeshi buabu.

Dibishibua dia Lazalo ku lufu divua bushuwa dipuwishe Basadoke bavua kabayi bitaba dibishibua dia bantu ku lufu. Ke Kayifa umue wa ku Basadoke kujuka ne kuamba ne: “Kanuena bamanye tshintu nansha tshimue to, ne kanuena numona ne: mbua diakalenga dienu bua muntu umue kufua bua bantu pamutu pa tshisamba tshijima kubutudibua.”—Yone 11:49, 50; Bienzedi 5:17; 23:8.

Nzambi wakasaka Kayifa bua kuamba bualu ebu bilondeshile mudimu uvuaye nawu, kadi ki mbilondeshile “yeye nkayende to.” Kayifa uvua usua kuamba ne: bavua ne bua kushipa Yezu bua kumupangisha bua katekeshi kabidi bukokeshi ne buenzeji bivua nabi bamfumu ba bitendelelu bena Yuda to. Mêyi a buprofete a Kayifa akajadika ne: Yezu uvua ne bua kufila tshintu tshia kupikula natshi bantu ku diambuluisha dia lufu luende, ki nganu bua bena Yuda, kadi mbua “bana ba Nzambi bavua batangalake” bonso.—Yone 11:51, 52.

Dijinga dia Kayifa dia kusaka bena ku Tshilumbuluidi tshinene bua kushipa Yezu diakakumbana. Nikodemo umue wa ku bena mu Kabadi kanene uvua mulunda wa Yezu, uvuaku mua kuela patoke malu avuabu balongolole bua kushipa Yezu anyi? Mu tshibilu kampanda, Yezu wakumbuka diakamue mu Yelushalema bua kafu kumpala kua dîba divua Nzambi mumukosele kadiyi dianji kukumbana.