Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Ulongeshe bana bebe

 DILONGESHA 8

Yoshiya uvua ne balunda bimpe

Yoshiya uvua ne balunda bimpe

Udi umona ne: mbikole bua kuenza malu adi makane anyi?— Bantu bavule batu bobu bamona nanku. Bible udi utuambila ne: bivua bikole menemene bua muana uvua ne dîna dia Yoshiya kuenzaye malu avua makane. Kadi uvua ne balunda bimpe bavua bamuambuluishe. Tuanji tumonabi malu makuabu a Yoshiya ne balunda bende.

Tatuende wa Yoshiya uvua Amona, mukalenge wa bena Yuda. Amona uvua muntu mubi be, uvua utendelela mpingu. Pakafuaye, muanende Yoshiya wakashala mukalenge wa bena Yuda. Kadi utshivua anu ne bidimu 8 patupu! Udi wela meji ne: Yoshiya uvua muntu mubi kupita tatuende anyi?— Tòo, yeye kavua nanku to!

Sefanya wakadimuija bena Yuda bua kubenga kutendelela mpingu

Nansha patshivua Yoshiya muana mukese, uvua anu musue kutumikila Yehowa. Ke pavuaye mudie bulunda anu ne bantu bavua banange Yehowa. Bobu abu bakambuluisha Yoshiya bua kuenza malu avua makane. Balunda ba Yoshiya abu bavua banganyi?

Umue wa kudibu n’Sefanya. Sefanya uvua muprofete uvua mudimuije bena Yuda ne: bobu batendelele mpingu, diakabi  divua mua kubakuata. Yoshiya wakumvua bivua Sefanya muambe, yeye kutendelela anu Yehowa pamutu pa kutendelela mpingu.

Yelemiya uvua pende mulunda mukuabu wa Yoshiya. Uvua mua kuikala muena mulongo ne Yoshiya ne bavua bakolele pamuapa miaba ivua midiangane mutumba. Bavua badie bulunda buimpe bua dikema buakafikisha too ne Yelemiya ku difunda musambu wa pa buawu wa kujinga nawu Yoshiya pavuaye mufue. Yelemiya ne Yoshiya bavua bambuluishangane bua kuenzabu malu makane ne bua kutumikila Yehowa.

Yoshiya ne Yelemiya bakambuluishangana

Tshilejilu tshia Yoshiya tshidi tshikulongeshaku tshinyi?— Nansha patshivua Yoshiya muana mukese, uvua anu musue kuenza malu avua makane. Uvua mumanye bimpe ne: uvua ne bua kudia bulunda anu ne bantu bavua banange Yehowa. Keba mua kudia bulunda anu ne bantu badi banange Yehowa bakuambuluisha bua kuenza malu makane!

Bala mvese eyi mu Bible webe