Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Ulongeshe bana bebe

 DILONGESHA 5

Samuele wakatungunuka ne kuenza malu makane

Samuele wakatungunuka ne kuenza malu makane

Kubangila anu patshivua Samuele muana mukese menemene, wakaya kusombela ku nzubu wa tshitendelelu, muaba uvua bantu baya bua kutendelela Yehowa; kuoku aku ke kuvuaye kabidi wenza mudimu. Kadi udi mumanye muakafika Samuele ku disombela ku nzubu wa tshitendelelu anyi? Tuanji tubangabi ne bualu bua Hana mamuende wa Samuele.

Matuku akavua mapite a bungi avua Hana kayi ulela nansha muvuaye ujinga muana ne muoyo mujima. Ke yeye kulomba Yehowa, umusengelela bua amuambuluishe. Hana kulaya Yehowa ne: meme mulele anu muana, nemmutume ku nzubu wa tshitendelelu bua ashale musombelaku, wenzaku mudimu. Yehowa kuteleja disambila diende, ke Hana kulela muana wa balume. Kumuinyikaye ne: Samuele. Mpindieu, anu muvua Hana mulaye amu, pakakumbaja Samuele bidimu bisatu anyi binayi, Hana wakaya nende ku nzubu wa tshitendelelu bua kutuadijaye kuenzelaku Nzambi mudimu.

Eli ke muakuidi munene uvua ku nzubu wa tshitendelelu aku. Bana bende babidi ba balume bavua benzaku pabu mudimu. Udi mumanye ne: nzubu wa tshitendelelu mmuaba wa Nzambi wa kumutendelelabu, nunku bantu bavua ne bua kuenzaku malu mimpe. Kadi bana ba Eli bavua bobu benzaku malu mabi matambe! Samuele uvua umona bionso bivuabu benza abi. Yeye pende uvuaku muenze malu mabi bu bana ba Eli anyi?— Tòo! Yeye wakatungunuka ne kuenza malu makane anu muvua baledi bende bamulongeshe.

Ambaku pebe: tshivua Eli ne bua kuikala muenzele bana bende babidi abu ntshinyi?— Si uvua ne bua kubanyoka. Kavua mua kubalekela batungunuka ne kuenza kabidi mudimu ku nzubu wa Nzambi to! Kadi Eli yeye kakabenzela nanku to, ke pakamufikila Yehowa munda, yeye ne bana bende babidi abu. Yehowa wakangata dipangadika dia kubanyoka.

Samuele wakamanyisha Eliya mukenji wa Yehowa

Butuku bukuabu pavua Samuele mulale tulu, wakumvua muntu umubikila ne: ‘Samuele!’ Yeye kuya lubilu kudi Eli, kadi Eli kumuambila ne: ‘Meme tshiena mukubikile to.’ Bualu ebu kuenzekabu misangu mikuabu ibidi. Panyima pa musangu muisatu, Eli wakambila Samuele ne: wewe mumvue kabidi dîyi dikubikila witabe ne: ‘Yehowa, ambaku, ndi mumvue.’ Ke Samuele kuenza anu nanku. Nunku Yehowa wakambila Samuele ne: ‘Wambile Eli  ne: ndi nnyoka ba mu dîku diende bua malu mabi adibu benze.’ Udi umona bishi? Bivua bipepele bua Samuele kumanyishaye Eli mukenji eu anyi?— Tòo, kabivua bipepele to. Kadi nansha muvua Samuele ne buôwa, wakenza tshivua Nzambi mumuambile bua kuenza. Mêyi a Yehowa au akakumbana. Bakashipa bana babidi ba Eli abu, Eli kufua pende.

Samuele udi tshilejilu tshimpe kutudi. Wakenza yeye malu avua makane nansha muvuaye umona bantu bakuabu benza malu mabi. Kadi wewe, newenze pebe bishi? Newikale bu Samuele, utungunuka ne kuenza malu makane anyi? Wewe muenze nanku, neusankishe Yehowa ne baledi bebe kabidi.

Bala mvese eyi mu Bible webe