Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Ulongeshe bana bebe

 DILONGESHA 4

Nsongakaji wakasankisha tatuende pamue ne Yehowa

Nsongakaji wakasankisha tatuende pamue ne Yehowa

Ntshinyi tshidi Yefeta ulaya Yehowa muaba eu?

Kabivua bipepele to, kadi muana wa Yefeta wakakumbaja dilaya dia

Udi mumone muana wa bakaji udi mu tshimfuanyi etshi anyi?— Mmuana wa muntu uvuabu babikila ne: Yefeta. Mukanda wa Nzambi ki mmutuleje dîna diende to, kadi tshitudi bamanye ntshia se: uvua musankishe tatuende ne Yehowa kabidi. Tuanji tumonabi malu adi amutangila yeye ne tatuende Yefeta.

Yefeta uvua muntu muimpe; uvua wangata kabidi dîba dia bungi bua kulongesha muanende wa bakaji malu a Yehowa. Uvua kabidi muntu wa makanda a bungi ne mulombodi muimpe wa bantu. Nunku, bena Isalele bakamulomba bua yeye kubalombola bua kuluishabu baluishi babu.

Yefeta wakasambila bua Nzambi amuambuluishe bua kutshimunaye mvita. Yefeta wakalaya Yehowa ne: meme mutshimune mvita, nenkulambule muntu yonso wapatuka mu nzubu muanyi wa kumpala bua kungakidila pandi mpingana kuanyi. Muntu au uvua  ne bua kushala musombele anu ku nzubu wa tshitendelelu wa Nzambi wenzelaku mudimu matuku ende onso a muoyo. Nzubu wa tshitendelelu au uvua muaba uvua bantu baya bua kutendelela Nzambi tshikondo atshi. Nunku, Yefeta wakatshimuna mvita ayi! Udi mumanye muntu wa kumpala uvua mupatuke mu nzubu bua kumuakidila pakapinganaye kuende anyi?—

Eyowa, mmuanende wa bakaji! Pende ke muana umuepele uvua nende Yefeta, mpindieu uvua ne dibanza dia kumutuma muaba wa kule. Bualu ebu buakabungamija Yefeta bikole. Pende si ukavua mupatule dîyi mulaye Nzambi! Diakamue, muanende wa bakaji au kumuambila ne: ‘Tatu, ukavua mumane kulaya Yehowa bualu, nanku mbimpe ubukumbaje.’

Ku tshidimu tshionso, balunda ba muana wa Yefeta bavua baya kumumona tatuende

Muana wa bakaji wa Yefeta wakumvua pende bibi. Ku nzubu wa tshitendelelu aku, kabavua mua kumusela to, ne kavua mua kulelaku bana to. Kadi wakatamba kujinga yeye bua kukumbaja dilaya dia tatuende ne kusankisha Yehowa. Abu ke bualu buvuaye mutambe kuangata ne mushinga mupite wa kusedibua anyi kulela bana. Nunku wakumbuka kuabu, yeye kuya kusombela ku nzubu wa tshitendelelu matuku ende onso a muoyo.

Buebe wewe, tshivuaye muenze atshi tshivuaku tshisankishe tatuende ne Yehowa anyi?— Eyowa, tshivua tshibasankishe! Wewe utumikila, kabidi munange ne Yehowa, neufuane muana wa bakaji wa Yefeta. Wewe pebe neusankishe baledi bebe ne Yehowa kabidi.