Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Ulongeshe bana bebe

 DILONGESHA 2

Lebeka uvua musue kusankisha Yehowa

Lebeka uvua musue kusankisha Yehowa

Lebeka mmukaji uvua munange Yehowa. Bayende diende uvua Izaka. Yeye pende uvua munange Yehowa. Kadi Lebeka bakapetangana ne Izaka mushindu kayi? Mmushindu kayi wakalejaye ne: uvua ujinga bua kusankisha Yehowa? Tuanji tumonabi malu makuabu adi amutangila.

Abalahama ne Sala ke bavua baledi ba Izaka. Bavua basombele mu ditunga dia Kanâna muvua benamu kabayi batendelela Yehowa. Kadi Abalahama uvua musue bua muanende Izaka kuselaye anu mukaji uvua utendelela Yehowa. Ke yeye kutuma mupika wende kampanda (pamuapa Eliezê) bua kukebela Izaka mukaji muaba uvuabu babikila ne: Halana, muaba uvua bamue ba ku balela ba Abalahama basombele.

Lebeka wakenza mudimu bikole bua kukebela tumelu mâyi

Eliezê wakaya ne bapika bakuabu ba Abalahama ku luendu alu. Luvua luendu lule lua dikema! Bakaya ne tumelu 10 tuambule biakudia ne bintu bia kufila bu kado. Kadi mmunyi muvua Eliezê mua kumanya mukaji uvuaye ne bua kusunguila Izaka? Pakafika Eliezê ne bapika bakuabu abu ku Halana, bakimana ku tshina tshia mâyi, bualu Eliezê uvua mumanye bimpe ne: kakuvua mua kuenza mutantshi bantu kabayi baluaku bua kusuna mâyi nansha. Ke yeye kusambila ulomba Yehowa ne: ‘Nsongakaji ungalomba mâyi, yeye mumpeshe meme ne tumelu tuanyi etu mâyi, nemmanye ne: au ke mukaji uudi wewe musungule.’

Pashishe nsongakaji au, Lebeka, kufikaye ku tshina tshia mâyi aku. Bible udi wamba ne: Lebeka uvua ne mubidi muimpe be! Ke Eliezê kumulombaye mâyi a kunua, mpindieu Lebeka kumuambila ne: ‘Mbimpe. Ndi nkupesha  wewe mâyi, ntuadila ne tumelu tuebe kabidi.’ Anji elabi meji! Patu tumelu ne nyota tutu tupuita mâyi bungi tshianana! Ke bualu kayi Lebeka uvua ne bua kubanda kupueka ku tshina tshia mâyi aku njila ne njila. Tangilabi mu tshimfuanyi etshi: udi mumone mudiye ufuangana ne mudimu anyi?— Eliezê wakakema bua mushindu uvua Yehowa mumvue disambila diende.

Eliezê wakapa Lebeka bintu bimpe bia bungi bia kado. Ke Lebeka kubikilaye Eliezê bua kuyaye yeye ne bena mudimu nende bakuabu ku ba Lebeka. Kuoku aku, Eliezê kumvuijaye tshivua Abalahama mumutuminaku ne muvua Yehowa mumvue disambila diende. Dîku dia ba Lebeka diakasanka bua kuselesha muanabu kudi Izaka.

Lebeka wakaya mu Kanâna yeye ne Eliezê, kuselanganabu ne Izaka

Buebe wewe, Lebeka uvuaku pende musue bua kuselanganabu ne Izaka anyi?— Lebeka uvua mumanye bimpe ne: Yehowa ke uvua mutume Eliezê kuabu aku. Nunku pakamuebejabu kudi ba mu dîku diabu ne: udi musue kuya ku Kanâna bua kuselangana ne Izaka anyi? Lebeka wakandamuna ne: ‘Eyowa, ndi musue kuya.’ Anu pinapu, kujukabu ne Eliezê kuyabu. Pakafikabu mu Kanâna, bakaselangana ne Izaka.

Bu muvua Lebeka muenze bualu buvua Yehowa musue bua enze, Yehowa wakamubenesha. Pakapita bidimu bia bungi, Yezu wakaledibua mu bankana ba Lebeka! Nanku wewe mufuane Lebeka musankishe Yehowa, yeye neakubeneshe pebe.

BALA MVESE EYI MU BIBLE WEBE