Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Ulongeshe bana bebe

 DILONGESHA 1

Bualu busokoka budi butusankisha bua kubumanya

Bualu busokoka budi butusankisha bua kubumanya

Muntu ukadiku mukuambile kabualu ka mu musokoko anyi?— * Bible udi wakula bua bualu kampanda busokoka bua wabu mushindu; batu babubikila ne: “Bualu busokoka bua tshijila.” Mbua tshijila bualu mbua kudi Nzambi. Kabidi badi babubikila ne: mbualu busokoka bualu kuonso eku bantu kabavua babumanye to. Too ne banjelu pabu bavua anu bakeba mua kubumanye bimpe. Udi pebe musue kumanya bualu busokoka abu anyi?—

Udi wela meji ne: banjelu bavua bakeba mua kumanya tshinyi?

Ku kale menemene, Nzambi wakafuka mulume ne mukaji ba kumpala. Mêna abu avua: Adama ne Eva. Nzambi wakabapesha lubanza lulengele lua kusombela, luvuabu babikile ne: budimi bua Edene. Bu Adama ne Eva batumikile Nzambi, nunku bobu ne bana bavuabu balela bavua mua kuikala bavuije buloba ebu bujima Mparadizu anu bu budimi bua Edene abu. Nunku eu batshivua mua kuikala anu basombe mu Mparadizu amu bua kashidi. Kadi udi mumanye tshivua Adama ne Eva benze bobu anyi?—

Adama ne Eva bakabenga kutumikila Nzambi, ke patudi tuetu lelu eu katuyi basombele petu mu mparadizu to. Kadi Nzambi mmuambe ne: nealengeje buloba ebu bimpe, nunku muntu yonso neikale ne muoyo wa kashidi ne disanka. Neafike ku dienza bualu ebu mushindu kayi? Katshia anu kuonso eku, bantu kabavua bamanye diandamuna dia lukonko elu to. Buvua bualu busokoka.

Pavua Yezu mulue pa buloba, wakalongesha bantu malu a bungi a bualu busokoka ebu. Wakamba ne: mbualu bua Bukalenge bua Nzambi. Yezu wakambila bantu bua kulomba bua Bukalenge abu bulue. Nebuvuije buloba ebu mparadizu mulengele kumona.

Kuenaku ne disanka dia kumanya bualu busokoka abu anyi?— Wamanya ne: anu bantu badi batumikila Yehowa ke bikala ne muoyo mu Mparadizu. Mukanda wa Nzambi udi ulonda miyiki ya bungi ya balume ne bakaji bavua batumikile Yehowa. Udi musue kubanya anyi?— Nanku tuanji tumonabi bamue ba kudibu ne mutudi petu mua kubafuana.

^ tshik. 3 Mu miyuki yonso idibu balonde eyi, neumone kamanyinu aka (—) ku ndekelu kua nkonko kampanda. Mmumue ne: au mmuaba muimpe wa wewe kuanji kupuwa bua kulekelaku muanebe afile diandamuna.