Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Ulongeshe bana bebe

 DILONGESHA 6

Davidi kavua ne buôwa nansha

Davidi kavua ne buôwa nansha

Pautu umvua buôwa utu wenza tshinyi?— Pamuapa si utu unyemena kudi papa anyi maman bua kukulamabu. Kadi kudi muntu mukuabu udi mua kukuambuluisha pebe. Udi ne bukole bupite bua bakuabu bonso. Udi mumumanye ne: nnganyi?— Mmuomu, n’Yehowa Nzambi. Tuakulabi bua nsongalume mukuabu udibu batele mu Bible, diende n’Davidi. Bu muvuaye mujadike bimpe ne: Yehowa uvua anu mua kumuambuluisha misangu yonso, kavua ne buôwa nansha.

Kubangila anu patshivua Davidi muana wa pambidi, baledi bende bavua bamulongeshe bua kunanga Yehowa. Dilongesha adi diakamuambuluisha bua kubenga kuikala ne buôwa nansha pavua malu kampanda avua atshingishangana amufikila. Davidi uvua mujadike ne: Yehowa uvua Mulunda wende, ne uvua anu mua kumuambuluisha. Dîba dikuabu, Davidi ulama mikoko, ntambue munene kuluaye kukuata mukoko umue, kuwambulaye ku mbanga yende. Udi mumanye tshiakenza Davidi anyi? Wakipatangana ne ntambue au, kumukuataye, bimueneka ne: wakamushipa amu ne bianza bietu ebi! Pashishe, pakalua nyama wa Urse kukuata kabidi mikoko, Davidi wakamushipa kabidi! Buebe wewe, nnganyi uvua mumuambuluishe bua kuenza nanku?— Mmuomu, n’Yehowa.

Kudi tshikondo tshivua Davidi mudileje muena muoyo mukole wa dikema! Bena Isalele bavua baluangana mvita ne bantu bavuabu babikila ne: bena Peleshete. Musalayi umue wa bena Peleshete uvua muntu mule wa dikema, muntu wa mpolondo! Dîna diende uvua Goliyata. Muntu wa mpolondo au uvua useka basalayi ba bena Isalele pamue ne Yehowa, ubapotela. Wakabunda basalayi ba bena Isalele bua kuyabu kudiye bua baluangane. Kadi bena Isalele bonso bavua batshina bibi bitambe bua kuluangana nende. Pakumvua Davidi bualu abu, wakambila Goliyata ne: ‘Meme ndi nkuluisha! Yehowa udi ungambuluisha, ndi nkutshimuna!’ Kuenaku umona ne: Davidi uvua ne muoyo mukole anyi?— Menemene, uvua muena muoyo mukole. Udi musue kumanya tshiakalua kuenzeka anyi?

Davidi wakangata ndundu wende wa kukupa nende mabue, kuangulaye ne nsoka itanu mifinunuke pambidi bimpe, ke kuyaye bua kuluangana ne muntu wa mpolondo au. Pavua Goliyata mumone Davidi, wakamuseka bikole! Kadi Davidi wakamuambila ne: ‘Udi wewe ulua kundi ne muele wa mvita, kadi meme ndi ndua kuudi aku mu dîna dia Yehowa!’ Ke Davidi kuela lusoka mu ndundu wende au, kuyaye lubilu mutangile kudi Goliyata, kulukupaye amu kudi  Goliyata buludiludi. Lusoka alu kuyalu kututa Goliyata anu pankatshi pa dîsu diende dia eku ne dia eku! Tshilumiana e kudikuma mu buloba, tshifue kujike! Ke buôwa kukuata bena Peleshete, kudielabu mbilu bonso. Muana mukese bu muvua Davidi amu, bukole bua kutshimuna muntu wa mpolondo wa buena au uvua mubupete munyi?— Yehowa nguvua mumuambuluishe; Yehowa uvua ne bukole bua bungi bupite ne bua muntu au!

Davidi kavua ne buôwa to, bualu uvua mumanye ne: Yehowa neamuambuluishe

Bualu bua Davidi ebu budi bukulongeshaku tshinyi?— Yehowa udi ne bukole bua bungi kupita bua muntu kayi yonso. Kabidi yeye mmulunda webe. Nanku dîba diumvua buôwa, wavuluka ne: Yehowa udi mua kukupesha muoyo mukole!

Bala mvese eyi mu Bible webe