Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

 LUKONKO LUA 8

Ntshinyi tshindi ne bua kumanya bua dikuatangana ku bukole bua kuenda masandi?

Ntshinyi tshindi ne bua kumanya bua dikuatangana ku bukole bua kuenda masandi?

BUA TSHINYI BIDI NE MUSHINGA?

Tshidimu tshionso etshi, batu bakuata bantu miliyo ya bungi ku bukole bua kuenda nabu masandi, nangananga bansonga.

NTSHINYI TSHIUDI MUA KUENZA?

Muntu uvua mubunde Annette wakamukupa panshi kumpala kua yeye kujingulula tshivua tshienzeka. Annette udi wamba ne: “Ngakenza muanyi muonso bua kumutshimuna. Ngakajinga bua kuela mbila, kadi dîyi kadivua dipatuka to. Ngakamusakila, kumusakila ne makasa, kumukuma bisusu ne kumuela nzadi. Pashishe, pangakumvua kele kambuela mu mubidi, bukole buanyi buonso buakajika.”

Bu wewe mu nsombelu wa buena eu, uvua mua kuenza tshinyi?

ANJI ELA MEJI!

Nansha wewe mudilongolole, pamuapa bakudimuije paudi upatuka pambelu butuku, malu mabi adi mua kukufikila. Bible udi wamba ne: ‘Bena lubilu lukole kabena bapita bakuabu mu kulumbila lubilu misangu yonso, badi ne ngenzelu muimpe kabatu bapeta diakalengele dionso; kadi buonso buabu badi ne bikondo bidi malu abatulukila.’—Muambi 9:11.

Anu bu Annette, mbakuate bamue bansonga ku bukole kudi bantu badibu kabayi bamanye bua kuenda nabu masandi. Bakuabu mbende nabu masandi kudi bantu badibu bamanye anyi mene kudi bena mu dîku diabu. Pavua Natalie ne bidimu dikumi, nsongalume wa pabuipi nabu wakamukuata ne kuenda nende masandi. Natalie udi wamba ne: “Mvua ne buôwa ne bundu, nunku tshivua muambile muntu bualu ebu pakenzekabu to.”

 KUENA NE BUALU TO

Annette utshidi udipisha bua tshivua tshimufikile. Udi wamba ne: “Ntshitu anu mvuluka malu avua mamfikile dilolo adi. Ntu ndiumvua anu bu ne: mvua ne bua kudienzeja bikole bua kumutshimuna. Kadi, pakantuaye kele, ngakapeta buôwa bua bungi. Tshivua ne tshikuabu tshia kuenza to, kadi ndi mmona ne: mvua ne bua kuenza bualu kampanda.”

Natalie udi pende ne lungenyi lua didipisha. Udi wamba ne: “Kabivua bimpe bua meme kudieyemena to. Baledi banyi bavua batuelele mukenji meme ne muakunyanyi bua kuikala pamue patudi tunaya pambelu, kadi tshivua muwutumikile to. Ndi mmona ne: mvua mupeteshe muena mutumba mpunga wa kungenzela bibi. Tshivua tshienzeke tshiakatonda bena mu dîku dietu, ne ndi mmona ne: meme ke udi mubakebele tunyinganyinga tua bungi. Bualu ebu budi buntatshisha bikole.”

Wewe udiumvua bu Annette anyi Natalie, manya ne: muntu udibu bende nende masandi ku bukole ki mmunyishe bualu abu to. Bamue batu bapepeja bualu ebu, bamba ne: ki mbibi bua nsongalume kuenza bualu bua nunku to, anyi ne: nsongakaji ke udi mukebangane. Kadi kakutu muntu utu wanyisha bua bende nende masandi ku bukole to. Bobu bakuenzele bualu bua nunku, kuena ne bualu to!

Bushuwa, kuamba patupu ne: “kuena ne bualu” nkupepele, kadi kuitaba mêyi aa kudi mua kuikala kukole. Bamue badi babenga kuamba tshidi tshibafikile ne badi bakenga ne lungenyi lua didipisha ne ngenyi mikuabu mibi. Kadi kupuwa kudi kuambuluisha nganyi? Wewe anyi muntu udi mukunyange? Udi ne bua kuenza bualu bukuabu.

AMBILA BANTU BUALU BUEBE

Bible udi utuambila ne: muntu muakane Yobo wakamba pavuaye ne kanyinganyinga kakole ne: ‘Nengambe dîyi mu kanyinganyinga ka mutshima wanyi.’ (Yobo 10:1) Bidi mua kukuambuluisha wewe muambile pebe muntu mukuabu. Kuambila muntu uudi weyemena kudi mua kukuambuluisha bua kupita bimpe ne tshidi tshikufikile ne kupeta disulakana.

Mushindu uudi udiumvua udi mua kukupita makanda. Kuenaku mua kukeba diambuluisha pa kuambila muntu mukuabu muudi udiumvua anyi?

Annette wakamona mudi kuenza nunku kuambuluisha. Udi wamba ne: “Ngakambila mulunda wanyi, ne yeye kunkankamija bua kuyukila ne bakulu babidi. Ndi ne disanka bua mumvua muenze nanku. Tuakayukila nabu misangu ya bungi ne bakangambila mêyi amvua nawu dijinga menemene bua kumvua, kunjadikilabu ne: tshivua ne tshilema tshimvua muenze mu bualu buvua bumfikile to. Kakuvua tshilema nansha tshimue tshimvua muenze to.”

Natalie wakambila baledi bende bua muvuabu bamunyange. Udi wamba ne: “Bakankolesha. Bakankankamija bua kubuambila bantu bakuabu, ne kuenza nunku kuakangambuluisha bua kumbusha dibungama ne kanyinganyinga bimvua nabi.”

Disambila diakakolesha kabidi Natalie. Udi wamba ne: “Kuyukila ne Nzambi kuakangambuluisha nangananga mu bikondo bimvua ngumvua binkolele bua kuambila muntu bualu bumvua nabu. Pantu nsambila, ntu mpeta bukole bua kuyukila ne bantu mudilekelele. Disambila ditu dimpetesha bupole ne ditalala.”

Udi pebe mua kumona ne: kudi ‘tshikondo tshia kuondopa.’ (Muambi 3:3) Tabalela mubidi webe ne lungenyi luebe. Ikisha mudibi bikengela. Bualu bua mushinga, eyemena Yehowa, Nzambi wa busambi buonso.—2 Kolinto 1:3, 4.

 WEWE MUKUMBANE BUA KUTANTSHILANGANA

Biwikala nsongakaji ne bakusaka bua kuenza malu mabi, ki mbibi bua kuamba ne muoyo mujima ne: “Kuenji nanku to!” anyi ne: “Umbusha tshianza tshiebe!” Kumvu buôwa bua ne: mubangila webe neakubenge to. Yeye mukubenge, ki mmulume udi mukukumbanyine to. Udi mukumbanyine mulume muimpe udi unemeka mubidi webe ne mêyi ebi.

NKONKO IDI ITANGILA DITATSHISHA MUNTU BUA KUENDA NENDE MASANDI

“Mu kalasa, bansongalume bavua bakoka mikaba yanyi ya nkanga mabele (soutien) ne bangamba mêyi a kumpuekesha nawu milongo bu mudi a ne: wewe mulale netu neudiumvue bimpe.”—Coretta.

Udi wela meji ne: nsongalume eyi ivuaku

  1. Imuelesha bilele anyi?

  2. Inaya ne majinga ende anyi?

  3. Imutatshisha bua kuenda nende masandi anyi?

“Mu bise, nsongalume mukuabu wakatuadija kungambila malu a busenji ne undenga bianza pambidi. Ngakakupa tshianza tshiende ne kumuipata muaba au. Wakantangila anu bu ne: mvua tshidingidingi.”—Candice.

Udi wela meji ne: ntshinyi tshivua nsongalume eu wenzela Candice?

  1. Uvuaku umuelesha bilele anyi?

  2. Uvua unaya ne majinga ende anyi?

  3. Uvua umutatshisha bua kuenda nende masandi anyi?

“Tshidimu tshishale, nsongalume kampanda wakatungunuka ne kungambila ne: uvua munnange ne uvua musue kupatuka nanyi nansha mumvua anu mbenga. Imue misangu uvua undaba tshianza ku diboko bua kuntekesha. Mvua mmuambila bua alekele, kadi kavua ulekela to. Dimue dituku, pamvua muiname nsuika nshinga ya bisabata, wakantuta tshianza ku mataku.”—Bethany.

Buebe wewe, nsongalume eu uvuaku

  1. Umuelesha bilele anyi?

  2. Unaya ne majinga ende anyi?

  3. Umutatshisha bua kuenda nende masandi anyi?

Diandamuna dia C ke didi dimpe bua nkonko yonso eyi.

Kutatshisha muntu bua kuenda nende masandi nkushilangane ne kunaya ne majinga ende anyi kumuelesha bilele ku tshinyi?

Ditatshisha muntu bua kuenda nende masandi mbualu budi muntu umue wenzela mukuabu. Ditu ditungunuka nansha padi udibu batatshisha wambila udi umutatshisha bua kulekela.

Ditatshisha muntu ndibi bikole. Didi mua kufikisha ku dienda nende masandi ku bukole.