Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Nkonko 10 idi bansonga badiela ne mandamuna ayi

 LUKONKO 6

Mmunyi mundi mua kukandamena buenzeji bubi bua bansonga nanyi?

Mmunyi mundi mua kukandamena buenzeji bubi bua bansonga nanyi?

BUA TSHINYI BIDI NE MUSHINGA?

Paudi uleja mmuenenu webe, neulombole nsombelu webe pamutu pa kulekela bakuabu bamulombola pa muaba webe.

NTSHINYI TSHIUDI MUA KUENZA?

Fuanyikija bualu ebu: Padi Brian umona balongi babu babidi balua kudiye, luya ludi lumutuka mu tshifu. Balongi aba bakadi bamuenzeje bua anue makanya misangu ibidi anu mu lumingu elu. Eu newikale musangu muisatu.

Mulongi wa kumpala udi wamba ne:

“Udi kabidi nkayebe? Indila nkuleje uudi mua kudia nende bulunda.”

Padiye utela muaku bulunda, udi uvinya dîsu ne wangata tshintu mu tshibombi, utshioluela Brian.

Brian udi umona makanya mu tshianza tshia mulongi wabu. Luya ludi lumutuka kabidi mu tshifu bikole.

Brian udi wamba ne: “Tòo, nkadi munuambile ne: tshiena . . .”

Mulongi muibidi udi umukosa ku dîyi wamba ne: “Diata buôwa!”

Brian udi wandamuna ne dikima ne: “Tshiena ne buôwa to.”

Mulongi muibidi udi wela Brian diboko, umuambila bitekete ne: “Angata’s.”

Mulongi wa kumpala udi woluela Brian makanya kumpala kuende ne umuambila ne dîyi dia panshi panshi ne: “Katuakuambila muntu to. Muntu nansha umue kakumanya to.”

Bu wewe muikale Brian, uvua mua kuenza tshinyi?

 ANJI ELA MEJI!

Balunda ba Brian mbelaku meji bua tshidibu benza anyi? Mbadiangatshilaku mapangadika anyi? Kabiena nanku to. Pa tshibidilu, batu balonda buenzeji bua bakuabu. Mbasue bua balunda babu babanyishe, nunku badi babalekela babambila tshia kuenza.

Bu wewe mu nsombelu wa nunku, mmunyi muuvua mua kuenza malu bua kukandamena buenzeji bubi bua bansonga nebe?

  1. DIANJILA KUDILONGOLOLA

    Bible udi wamba ne: ‘Muntu mudimuke udi utangila dikenga diamba kumukuata, udi usokoma; kadi batshimbakanyi badi bapitaku, badi bakengeshibua.’—Nsumuinu 22:3.

    Misangu ya bungi, udi mua kudianjila kumona lutatu ludi mua kukufikila. Tshilejilu, fuanyikija ne: udi umona balongi benu banua makanya. Wewe mudianjile kudilongolola, neutantamene lutatu elu.

  2. ELA MEJI

    Bible udi wamba ne: “Nuikale ne kondo ka muoyo kimpe.”—1 Petelo 3:16.

    Diebeja ne: ‘Nendiumvue munyi meme mutungunuke ne kuenda ne balongi aba?’ Bulelela, udi mua kubasankisha bua tshitupa tshîpi. Kadi neudiumvue munyi pashishe? Udi witaba bua kunyanga bumuntu buebe anu bua kusankisha balongi benu anyi?—Ekesode 23:2.

  3. ANGATA DIPANGADIKA

    Bible udi wamba ne: ‘Muena meji mmudimuke.’—Nsumuinu 14:16, NWT.

    Ndekelu wa bionso, netuangate mapangadika ne kuitaba bipeta biawu. Bible udi wakula bua bantu bu mudi Jozefe, Yobo ne Yezu bavua bangate mapangadika mimpe. Udi kabidi wakula bua bantu bu mudi Kayina, Esau ne Yudasa bavua bangate mapangadika mabi. wewe newenze tshinyi?

Bible udi wamba ne: ‘Wenze malu ne lulamatu.’ (Musambu 37:3NWT) Wewe mudianjile kuela meji ku bipeta bidi mua kupatuka ne mulongolole tshia kuenza, nebikale bipepele bua wewe kuamba tshiudi mupangadije, ne malu neende bimpe.

Kuikadi ne buôwa, kuena muenzejibue bua kuakula bia bungi to. Kubandamuna ne: TÒO ne muoyo mujima nkukumbane. Anyi bua kuleja ne: kuena mua kushintuluka, udi mua kuamba ne:

  • “Ngumbushayi mu binudi nuenza abi!”

  • “Tshitu ngenza malu a mushindu au to!”

  • “Tangilayi, si nutu bamanye ne: tshitu mbuelakana mu malu aa!”

Tshia mushinga nkuandamuna diakamue ne dishindika dionso. Wewe muenze nunku, bidi mua kukukemesha bua muikala bansonga nebe mua kulekela kukutatshisha!

 TSHIA KUENZA PADIBU BAKUSEKA

Wewe muitabe buenzeji bubi bua bansonga nebe, neulue bu tshiamu tshia robo tshidibu balombola

Newenze tshinyi bansonga nebe bobu bakuseka? Newenze tshinyi bobu bambe ne: “Udi utshina tshinyi? Udi ne buôwa anyi?” Manya ne: tuseku tua nunku mmushindu udibu bakusaka bua kuenza malu mabi. Newenze tshinyi? Udi ne ngenyi ibidi ya kusungula.

  • Udi mua kuitaba bua kukusekabu. (Kubandamuna ne: “Mmuomu, ndi ne buôwa!” Pashishe kubumvuija mu tshikoso tshiudi wambila nanku.)

  • Udi mua kubenga tshidibu bakuamba. Leja tshiudi ubengela ne enza bua kubeleshisha meji. (Udi mua kuamba ne: “Nutu nunua makanya! Pabi mvua ngela meji ne: nutu ne meji a bungi!”)

Bansonga nebe bobu batungunuke ne kukuseka, umbuka muaba au! Vuluka ne: paudi ushala muaba au, nebakutatshishe bikole. Paudi umbuka, udi uleja ne: kuena musue bua bantu bashintulule dipangadika diebe to.

Mu bulelela, neutuilangane anu ne buenzeji bubi bua bansonga nebe. Kadi udi mua kusungula tshiudi mua kuenza, kuleja mmuenenu webe ne kuenza tshiudi musungulule. Ndekelu wa bionso, wewe ke udi ne bua kuangata dipangadika.—Yoshua 24:15.