Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Nkonko 10 idi bansonga badiela ne mandamuna ayi

 LUKONKO 4

Mmunyi mundi mua kuakaja bilema bianyi?

Mmunyi mundi mua kuakaja bilema bianyi?

BUA TSHINYI BIDI NE MUSHINGA?

Kuitaba bilema biebe nekukuambuluishe bua kulua muntu mushindame ne wa kueyemena.

NTSHINYI TSHIUDI MUA KUENZA?

Fuanyikija bualu ebu: Pavua Tim unaya ne balunda bende, wakakupa ndundu, kuyaye kutayisha lumuenu lua mashinyi a muena mutumba.

Bu wewe muikale Tim, ntshinyi tshiuvua mua kuenza?

ANJI ELA MEJI!

UDI NE NGENYI ISATU YA KUSUNGULA:

  1. Kunyema.

  2. Kuela muntu mukuabu tshilumbu pambidi.

  3. Kuambila muena mutumba tshidi tshienzeke, ne kufuta tshiudi munyange.

Bidi mua kukufikila bua kusungula Lungenyi lua A. Kadi kudi tubingila tudi mua kukusaka bua kuitaba bilema biebe, nansha wewe munyange lumuenu anyi tshintu tshikuabu.

 TUBINGILA TUSATU BUA KUITABA BILEMA BIEBE

  1. Ke tshidi tshimpe bua kuenza.

    Bible udi wamba ne: “Tudi basue kuenda mu bululame mu malu onso.”—Ebelu 13:18.

  2. Bantu batu basue kufuila aba badi bitaba bilema biabu luse.

    Bible udi wamba ne: ‘Udi usokoka matomboka ende kena wikala ne diakalengele, kadi udi uatonda, ualekela, neafuidibue luse.’—Nsumuinu 28:13.

  3. Bualu bua mushinga budi ne: udi usankisha Nzambi.

    Bible udi wamba ne: ‘Yehowa udi ukina muntu muena malu a muinshimuinshi, kadi bulunda buende bushême budi kudi bena bululame.’—Nsumuinu 3:32NWT.

Pavua Karina ne bidimu 20, wakasokoka tatuende mukanda wa tshibawu uvuabu bamupeshe bua diendesha mashinyi bibi. Kadi bakalua anu kuwumona. Karina udi wamba ne: “Panyima pa tshidimu, papa wakamona mukanda au mu bintu bianyi muikale ne dîna dianyi. Biakankebela bilumbu bipite bungi!”

Ndilongesha kayi divuaye mupete? Karina udi wamba ne: “Kusokoka bilema kutu anu kunyanga malu bikole. Bitu anu bilua kumanyika.”

MALONGESHA A KUPETA KU BILEMA BIEBE

Bible udi wamba ne: “Misangu ya bungi tudi tuenza bilema buonso buetu.” (Yakobo 3:2MMM) Anu mutudi bamone, paudi witaba bilema biebe ne lukasa, udi uleja muudi ne budipuekeshi ne mushindame.

Bualu bukuabu nkulongela ku bilema biebe. Vera udi wamba ne: “Ntu mmona tshilema tshianyi tshionso bu mushindu wa kulonga malu kampanda pa kupatula dilongesha diangambuluisha bua kuakaja nsombelu wanyi ne kuenza malu mu mushindu mukuabu musangu udi ulonda.” Tumone muudi mua kuenza bualu ebu.

Udi wangata dikalu dia papa webe kadi udi uya kudinyanga. Ntshinyi tshiwenza pashishe?

  • Kubenga kuamba, wela meji ne: papa kakumanya.

  • Kuambila papa webe tshidi tshienzeke.

  • Kuambila papa webe tshidi tshienzeke, kadi kushiminyina muntu mukuabu.

Udi ubula diteta bualu kuvua mudilongele. Ntshinyi tshiwenza pashishe?

  • Kuamba ne: diteta divua dikole.

  • Kuitaba ne: udi mudifikishe nkayebe ku dibula.

  • Kuamba ne: mulongeshi udi nanyi bualu bukuabu.

Kutungunuka ne kuela meji ku bilema bia kale kudi bu kushala mutangile mu lumuenu lua mashinyi bua kumona bidi panyima eku wenda wendesha

 Mpindieu, ela meji bua nsombelu itudi tufuma ku ditela ne teta kuditeka pa muaba wa 1) papa webe ne wa 2) mulongeshi wenu. Mmunyi mudi papa webe anyi mulongeshi wenu mua kukumona wewe muitabe bilema biebe ne lukasa? Mmunyi mudibu mua kukumona wewe mubisokoke?

Mpindieu ela meji ku tshilema tshiudi muenze tshidimu tshishale ne andamuna nkonko eyi:

Ntshilema kayi tshiuvua muenze? Ntshinyi tshiuvua muenze bua kutshijikija?

  • Mvua mutshisokoke.

  • Mvua mushiminyine muntu mukuabu.

  • Mvua mutshitabe ne lukasa.

Biwikala kuvua mutshitabe, mmunyi muuvua mulue kudiumvua?

  • Musulakane: Mumone ne: bualu abu buajiki!

  • Mupile: Udilumbuluisha ne: mvua ne bua kuamba bulelela.

Ntshinyi tshiuvua mua kuenza bua kupita bimpe ne nsombelu au?

Ndilongesha kayi diuvua mupete ku tshilema tshiebe?

UDI WELA MEJI KAYI?

Bua tshinyi bamue bantu batu babenga kuitaba bilema biabu?

Bantu badi mua kukumona mushindu kayi wewe usokoka bilema biebe misangu yonso? Kadi badi mua kukumona mushindu kayi wewe witaba bilema biebe?—Luka 16:10.