Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Nuidikije ditabuja diabu

 NSHAPITA WA DIKUMI NE MUINAYI

Wakalonga mua kufuilangana luse

Wakalonga mua kufuilangana luse

1. Yona uvua ne bua kuenza luendu lua mushindu kayi? Mmunyi muakadiumvuaye bua kuvuaye uya?

YONA uvua mua kuikala mupete dîba dia bungi dia kuelangana meji. Uvua ne bua kuenza luendu ku makasa lua kilometre mipite pa 800, luendu elu luvua mua kumuangata ngondo mujima anyi kupita apu. Bua kuya, uvua ne bua kusungula njila ya bikoso anyi njila mile ivua kayiyi ya njiwu, pashishe kuasa luendu upitshila mu bibandabanda ne pa mikuna. Uvua mua kupitshila kumpenga kua tshipela tshinene tshia mu Sulia, kusabuka misulu ya mâyi minene bu mudi wa Pelata, ne kukeba muaba wa kutudila munkatshi mua bantu bavuaye kayi mumanye ba mu bimenga ne misoko ya mu Sulia, Mésopotamie ne Ashû. Pavua matuku enda apita, Yone wenda usemena pabuipi ne tshimenga tshia Niniwe, wakela meji a kuvuaye uya, kupetaye buôwa.

2. Mmunyi mukavua Yehowa mulongeshe Yona bua kuitaba mudimu uvuaye mumupeshe?

2 Kadi, Yona uvua mutuishibue ne: kavua mua kunyema mudimu eu to. Ke tshikavuaye mutete kuenza kumpala. Anu bu mutuvua balonge mu nshapita mushale, Yehowa wakalongesha Yona ne lutulu luonso ku diambuluisha dia tshipepele tshikole pa mbuu ne dimupandisha ne mushipa munene. Matuku asatu pashishe, mushipa wakaluka Yona ne muoyo ku mpata; mpindieu Yona kuluaye ne ditumikila ne didipuekesha kupita kumpala.—Yona, nshap. 1, 2.

3. Nngikadilu kayi uvua Yehowa muleje Yona? Bidi bijula lukonko kayi?

3 Bua musangu muibidi pavua Yehowa mutume Yona ku Ninewe, muprofete eu wakatumikila ne kuenza luendu lule elu mutangile ku Est. (Bala Yona 3:1-3.) Dilongesha divua Yehowa mupeshe Yona divuaku dishintulule meji ende menemene anyi? Tshilejilu, Yehowa wakamufuila luse pakamusungilaye  mu mâyi, kubenga kumunyoka bua buntomboji buende, kadi kumupesha mpunga muibidi bua kukumbajaye mudimu wende. Panyima pa malu aa onso, Yona uvuaku mulonge mua kufuila bakuabu luse anyi? Misangu ya bungi bitu bikole bua bantu bena mibi kulonga mua kufuilangana luse. Tumonayi dilongesha ditudi tupetela mu tshilejilu tshia Yona.

Bakitaba mukenji wa dilumbuluisha mu mushindu wa dikema

4, 5. Bua tshinyi Yehowa udi ubikila Ninewe ne: “musoko au munene”? Bualu ebu budi butulongesha tshinyi bua Yehowa?

4 Yona kavua mumvue bua tshinyi Ninewe uvua ne mushinga mukole ku mêsu kua Yehowa to. Bible udi wamba ne: ‘Nansha ku mêsu kua [Nzambi], tshimenga tshia Ninewe tshivua tshinene tshitambe.’ (Yona 3:3, MMM) Yehowa udi wamba misangu isatu mu mukanda wa Yona bua Ninewe ne: “musoko au munene.” (Yona 1:2; 3:2; 4:11) Bua tshinyi uvua musoko munene ku mêsu kua Yehowa?

5 Ninewe uvua umue wa ku misoko ya kale, ivua Nimeloda muibake panyima pa mvula wa kabutu. Uvua tshimenga tshinene anyi musoko munene uvua mua kuikala muenza ne misoko anyi bimenga  bikuabu munda muawu; bivua bikengela matuku asatu a luendu bua muntu kumbuka ku mikalu ne kufika ku mikalu mikuabu. (Gen. 10:11; Yona 3:3) Ninewe uvua musoko munene bikole, uvua ne ntempelo minene, bimanu binene ne nzubu mikuabu ya minene. Kadi ku mêsu kua Yehowa, ki mbintu ebi bivua bivuija tshimenga ne mushinga to. Bantu ke bavua ne mushinga kudiye. Tshikondo atshi Ninewe ke musoko uvua ne bantu ba bungi. Nansha muvua bantu benza malu mabi, Yehowa uvua uditatshisha bua bualu buabu. Mmunange muntu ne muntu, ne udi umona muntu yonso muikale ne mushindu wa kunyingalala ne kulonga mua kuenza malu mimpe.

Yona wakamona Ninewe bu musoko munene uvua muule tente ne malu mabi

6. a) Bua tshinyi Yona uvua mua kuikala mumvue buôwa bua bena Ninewe? (Bala mêyi adi kuinshi kua dibeji.) b) Ndilongesha kayi ditudi tupetela ku mudimu wa diyisha uvua Yona muenze?

6 Ndekelu wa bionso pakafika Yona mu Ninewe, uvua mua kuikala mumvue buôwa bua bungi pavuaye mumonamu bantu bapite pa 120000. * Wakenda dituku dijima mu musoko munene au kubuela too ne muaba uvua bantu ba bungi, imue misangu wenda ukeba muaba mukumbane wa kutuadijilaye kumanyisha mukenji wende. Mmunyi muvuaye mua kuyikila ne bantu abu? Uvuaku mulonge muakulu wa bena Ashû anyi? Peshi, Yehowa uvuaku mumupeshe bukole bua kuakula muakulu au mu tshishima anyi? Katuena bamanye to. Pamuapa Yona uvua mua kuikala muyishe mu muakulu wende wa ku dibele wa tshiena Ebelu, eku muntu mukuabu wenda ukudimuina bena Ninewe. Nansha bikale nanku anyi kabiyi nanku, mukenji wende uvua mupepele kadi kauvua pamuapa mua kusankisha bena Ninewe to. Mukenji eu uvua ne: ‘Papita matuku makumi anayi, nebabutule Ninewe.’ (Yona 3:4) Wakakula ne dikima misangu ne misangu. Pavuaye wenza nanku, uvua uleja muvuaye ne dikima ne ditabuja dikole; ngikadilu idi bena Kristo nayi dijinga bikole menemene lelu eu.

Mukenji wende uvua mupepele kadi kauvua pamuapa mua kusankisha bena Ninewe to

7, 8. a) Ntshinyi tshivua bena mu Ninewe benze bua kuleja ne: bavua bitabe mukenji wa Yona? b) Ntshinyi tshiakenza mfumu wa bena Ninewe pakumvuaye mukenji uvua Yona umanyisha?

7 Bena Ninewe bakateleja mukenji wa Yona. Imue misangu Yona wakela meji ne: bena Ninewe bavua mua kumvua tshiji ne kumuluisha. Kadi bualu bua dikema buakenzeka. Bantu bakamuteleja. Mêyi ende akamuangalaka ne lukasa luonso. Mu tshitupa tshîpi, musoko mujima wakatuadija kuakula bua mukenji wa dilumbuluisha uvua  muprofete Yona umanyisha. (Bala Yona 3:5.) Bantu bonso: bapele ne babanji, bantu ba bukole ne batekete, bakulumpe ne bana bakakudimuna mutshima. Bakajila biakudia. Lumu lua muvua bantu bakudimune mutshima luakafika ku matshi a mfumu ne lukasa luonso.

Yona uvua ne bua kuikala ne dikima ne ditabuja bua kuyisha mu Ninewe

8 Mfumu wakakudimuna pende mutshima pakumvuaye mukenji wa Yona. Wakumvua buôwa bua bungi, kujukaye mu nkuasa wa bukalenge, kumbushaye bilamba bia bumfumu; kuvualaye bilamba bikayabale bia muomumue ne bivua bantu bende bavuale, ‘kusomba [too ne] mu butu.’ Yeye ne ‘bantu bende banene,’ anyi tupita tuende bakela mukenji uvua ulomba bantu bonso ba mu musoko bua kujilabu biakudia. Mfumu wakatuma dîyi bua bantu bonso, too ne nyama payi, bavuale bilamba bikayabale. * Wakitaba ne didipuekesha dionso ne: bantu bende bavua bena tshibawu bua malu mabi ne tshikisu. Mukalenge wakaleja muvuaye mutekemene ne: Nzambi mulelela uvua mua kubafuila luse bua dinyingalala diabu. Wakamba ne: ‘Nzambi nealekele tshiji tshiende tshikole bua tuetu katufu.’—Yona 3:6-9.

9. Mmalu kayi adi bafundi bambe bua bena Ninewe? Bua tshinyi tudi tuamba ne: mbadishime?

9 Bamue bafundi badi belakana bamba ne: bena Ninewe kabavua mua kukudimuna mutshima ne lukasa luonso nunku to. Kadi bamanyi ba Bible badi bamba ne: dikudimuna dia mutshima dia mushindu eu divua tshibidilu tshia bantu ba tshikondo atshi bavua bena bitabataba. Tudi tuamba ne: bafundi aba mbadishime, bualu Yezu Kristo muine wakalua kuakula pashishe bua dikudimuka dia bena Ninewe. (Bala Matayi 12:41.) Yezu uvua mumanye bimpe tshivuaye wamba, bualu pavuaye mu diulu uvua mudimuene muvua malu au menzeke. (Yone 8:57, 58) Mbimpe tumanye ne: bantu badi mua kukudimuna mutshima nansha tuetu mua kubamona bu bantu bena malu mabi. Yehowa nkayende ke udi mua kumona bidi mu muoyo wa muntu.

Dishilangana didi pankatshi pa luse lua Nzambi ne malu makole a bantu

10, 11. a) Ntshinyi tshiakenza Yehowa bua muvua bena Ninewe bakudimune mutshima? b) Bua tshinyi tudi batuishibue ne: Yehowa kavua mutupakane mu dilumbuluisha diende?

10 Ntshinyi tshiakenza Yehowa bua muvua bena Ninewe bakudimune mutshima? Yona wakafunda ne: Nzambi wakamona  bienzedi biabu, bu muakalekelabu njila wabu mubi; ne Nzambi wakakudimuna mutshima wende bua muanda mukole wakambaye diambedi ne: Nembenzele; yeye kakawenza nansha.’—Yona 3:10.

11 Bidiku bisua kumvuija ne: Yehowa uvua mutupakane pavuaye mufundile bena Ninewe kabutu anyi? Tòo. Bible udi wamba ne: midimu ya Yehowa yonso idi miakane. (Bala Dutelonome 32:4.) Yehowa kavua kabidi mua kukuatshila bena Ninewe tshiji to. Wakatangila muvuabu bashintuluke, ke yeye kumona ne: dinyoka divuaye mubalongoluele kadivua kabidi dibakumbanyine to. Kuangataye dipangadika dia kubafuila luse.

12, 13. a) Mmunyi mudi Yehowa uleja ne: utu ufuila bantu luse, ubumvuila ne mmumanye mua kupita ne malu? b) Mukenji wa Yona kauvua wa dishima bua tshinyi?

12 Yehowa kena Nzambi wa malu makole, udi kayi uditatshisha bua bantu ne muena tshikisu bu mutu bamfumu ba bitendelelu balongesha to. Kadi, utu ufuila bantu luse, ubumvuila, ne mmumanye mua kupita ne malu bilondeshile nsombelu yabu. Padiye upangadija bua kunyoka bantu babi, udi wanji kubatumina baleji mpala bende badi pa buloba bua kubadimuija, bualu mmusue bua bantu babi bidikije bena Ninewe, mmumue ne: banyingalale ne balekele bienzedi biabu bibi. (Yeh. 33:11) Yehowa wakambila muprofete wende Yelemiya ne: Mu dîba dionso dindi ngamba dîyi dianyi bua tshisamba anyi bua bukalenge, bua kubijula ne bua kubitshibula; biakudimuna bantu ba mu tshisamba atshi tshingakuamba dîyi bualu buatshi mitshima yabu, meme panyi nenkudimune mutshima wanyi bua dikenga dingakelangana meji bua kubakengesha nadi.’—Yel. 18:7, 8.

Nzambi mmusue bua bantu babi bidikije bena Ninewe, mmumue ne: banyingalale ne balekele bienzedi biabu bibi

13 Mukenji uvua muprofete Yona umanyisha uvua wa dishima anyi? Too; bualu wakakumbaja kipatshila kawu ka kudimuija. Mukenji au uvua muimanyine pa malu mabi avua bena Ninewe, akaluabu kulekela pashishe. Bu bena Ninewe mua kupingana ku malu abu mabi, Nzambi uvua mua kubanyoka ne dinyoka dia muomumue adi. Ke tshiakalua kubenzekela menemene.—Sef. 2:13-15.

14. Yona wakenza tshinyi bua luse luvua Yehowa muleje bena Ninewe?

14 Yona wakenza tshinyi pakamonaye dibutuka kadiyi dienzeke mu tshikondo tshivuaye mutekemene? Bible udi wamba ne: “Muanda eu wakafikisha Yona munda bikole, ne yeye wakakuatshika tshiji.” (Yona 4:1) Yona wakenza too ne disambila diumvuika anu bu uvua ukanyina Wa Bukole Buonso. Yona wakaleja ne: uvua mua kuikala nansha mushale mu ditunga diabu dimulela. Wakamba mukavuaye mumanye ne: Yehowa kavua mua kunyoka bena Ninewe to, ke bua tshinyi wakanyema musangu wa kumpala mutangile ku Tashishi. Pashishe kulombaye bua kufua wamba ne: kufua kudi kupita kushala ne muoyo.—Bala Yona 4:2, 3.

15. a) Yona uvua mufiike munda ne mubungame bua ntshinyi? b) Yehowa wakamuenzela tshinyi?

 15 Tshivua tshinyingalaja Yona menemene ntshinyi? Katuena mua kumanya tshivuaye wela meji to, kadi tudi bamanye ne: Yona uvua mumanyishe dibutuka dia Ninewe kumpala kua bantu bonso abu. Bena Ninewe bakitaba tshivuaye muambe. Kadi, dibutuka kadiakalua. Uvuaku mutshine ne: bantu bavua mua kumuseka ne kumuangata bu muprofete wa dishima anyi? Nansha kabiyi nanku, kavua musanke bua muvua bantu bakudimune mutshima ne muvua Yehowa mubafuile luse to. Kadi, bidi bimueneka ne: wakafika munda, uditatshisha anu buende yeye nkayende, umona lumu luende lunyanguke. Nansha nanku, Yehowa Nzambi wa luse wakimanyina anu pa malu mimpe a muprofete eu. Pamutu pa kupesha Yona dinyoka bua muvuaye mupange kanemu, Yehowa wakamuela lukonko luimpe lua kumueleshisha nalu meji. Wakamuebeja ne: ‘Udi wenza bimpe paudi ukuata tshiji nunku anyi?’ (Yona 4:4) Yona uvuaku muandamune anyi? Bible ki muambe to.

16. Mmu malu kayi mudi bamue bikale ne muenenu mushilangane ne wa Nzambi? Tshilejilu tshia Yona tshidi tshitulongesha tshinyi?

16 Tudi mua kupesha Yona tshilema bua tshivuaye muenze, kadi tudi ne bua kuvuluka ne: bantu bena mibi batu imue misangu babenga kuanyisha malu adi Nzambi wenza. Bamue badi bamba ne: Yehowa uvua mua kuikala muenze bua dikenga kadikuatshi bantu, bakuabu ne: uvua ne bua kuikala mubutule muntu mubi diakamue, banga pabu ne: uvua mene mua kuikala mubutule ndongoluelu wa malu eu yonso ku kale aku. Tshilejilu tshia Yona tshidi tshituvuluija ne: padi mmuenenu wetu mushilangane ne wa Nzambi, bidi bikengela kuakaja wetu, ki nguende to.

Mushindu uvua Yehowa mulongeshe Yona

17, 18. a) Ntshinyi tshiakenza Yona pakumbukaye mu Ninewe? b) Tshishima tshia muonji wa tshilowalowa tshivua Yehowa muenze tshiakenzela Yona tshinyi?

17 Yona wakumbuka mu Ninewe ne kanyinganyinga kuonso, kuyaye ku Est, muaba uvua mikuna pamutu pa kupinganaye mu musoko wabu. Wakenza katanda, kusombamu, kushalaye muindile bua kumona tshivua ne bua kufikila Ninewe. Pamuapa uvua anu mutekemene bua babutule Ninewe. Muntu kayi luse! Mmunyi muvua Yehowa mua kumulongesha bua kufuilangana luse?

18 Munkatshi mua butuku, Yehowa wakamenesha muonji wa tshilowalowa (mudiantondo). Pakabika Yona wakamona muonji au muvuawu muimpe ne mabeji manene avua amupetesha ditalaji kupita katanda kavuaye muase. Wakasanka bikole. Bible udi wamba ne: “Yona wakatamba kusanka” bua tshilowalowa. Pamuapa wakamona ne: tshivua dibenesha dia Nzambi, ne Nzambi uvua mutshikoleshe mu tshishima bua kuleja ne: uvua mumuanyishe. Kadi, Yehowa kavua muenze nanku anu bua kumupetesha ditalaji ne kumumbusha  tshiji to. Uvua musue kulenga muoyo wende. Ke bualu kayi Nzambi wakenza tshishima tshikuabu. Wakatuma musanda bua kudia muonji awu ne kuwunyanga. Pashishe kutumaye ‘lupepele lua munanga lua ku Est’ too ne pakatuadija Yona ‘kupungila’ bua luya alu. Yona wakafiika kabidi munda bikole, kulombaye kabidi Yehowa ne: afue nansha kufua.—Yona 4:6-8.

19, 20. Yehowa wakeleshisha Yona meji bua muonji wa tshilowalowa mushindu kayi?

19 Yehowa wakakonka kabidi Yona ni uvua ne bua kuikala ne tshiji bualu muonji wa tshilowalowa uvua mûme. Pamutu pa kukudimuna mutshima, Yona wakadibingisha wamba ne: ‘Ndi ngenza bimpe bua kuikala natshi too ne ku lufu.’ Dîba diakakumbana bua Yehowa kupeshaye Yona dilongesha.—Yona 4:9.

Nzambi wakenza mudimu ne muonji wa tshilowalowa bua kulongesha Yona mua kufuilangana luse

20 Nzambi wakeleshisha Yona meji umuambila bua muvuaye unyingalala bua kûma kua muonji wa tshianana eu uvua mukole mukantshi mua butuku, uvuaye kayi nansha mukune anyi mukoleshe. Kumuambilaye pashishe ne: ‘Meme tshiakadi kunyingalala bua Ninewe, musoko au munene, mudi bantu binunu lukama ne makumi abidi badi kabayi mua kujingulula tshianza ne tshia balume ne  tshia bakaji, ne mudi bimuna bia bungi kabidi anyi?’—Yona 4:10, 11. *

21. a) Ntshilejilu kayi tshivua Yehowa mukuate natshi mudimu bua kupesha Yona dilongesha? b) Leja mudi muyuki wa Yona mua kutuambuluisha bua kudikonkonona.

21 Udi mumvue tshivua Yehowa musue kumvuija mu tshilejilu tshia tshilowalowa anyi? Yona kavua muenze bualu nansha bumue bua kukolesha muonji au to. Kadi, Yehowa ke uvua mupeshe bena Ninewe muoyo, ne yeye ke uvua ubalama anu bu mudiye wenzela bifukibua biende bionso bia pa buloba. Mmunyi muvua Yona mua kuangata muonji wa patupu ne mushinga wa bungi kupita mioyo ya bantu 120000, ne ya nyama yabu yonso? Kabivuaku nanku bualu Yona uvua wela meji anu buende yeye kayende anyi? Bulelela, Yona wakanyingalala bualu muonji au uvua umuambuluisha anu yeye. Uvua mumvue tshiji bua bena Ninewe bualu uvua ukeba kulama lumu luende yeye nkayende, ne ukeba bua bamumone muntu muimpe anyi? Muyuki wa Yona udi mua kutuambuluisha bua tuetu kukonkonona meji etu. Tuetu bonso tutu ne lungenyi lua budinangi elu. Tudi ne dianyisha dia bungi bua mudi Yehowa utulongesha ne lutulu luonso bua kutamba kuditatshisha bua bakuabu, kubumvuila luse anu bu yeye.

22. a) Mmunyi muvua mibelu ya meji ya Yehowa ya mua kufuilangana luse milenge Yona ku muoyo? b) Tudi tupeta dilongesha kayi?

22 Lukonko ludi ne: Yona wakapetaku dilongesha anyi? Mukanda wa Yona udi ujika ne lukonko lua Yehowa lutshidi luindile diandamuna. Bamue bafundi badi mua kuikala badiabakena mudi Yona kayi muandamune nansha kakese. Kadi mu bulelela, diandamuna diende didiku. Ke mukanda wende wowu muine. Kudi bijadiki bidi bileja ne: Yona ke udi mufunde mukanda udi ne dîna diende eu. Anji fuanyikijabi muprofete eu upingana kuabu, diakamue utuadija kufunda malu aa. Tutetabi kufuanyikija mu lungenyi: muntu mukulumpe wa meji, muntu wa didipuekesha, ukupa mutu unyingalala padiye wenda ufunda bilema biende, buntomboji buende, ne dibenga diende dia kufuila bakuabu luse. Bidi bimueneka ne: Yona uvua mupete dilongesha dinene mu mibelu ya meji ya Yehowa. Wakalonga mua kufuilangana luse. Kadi tuetu?—Bala Matayi 5:7.

^ tshik. 6 Badi batshinka ne: Mu matuku a Yona, Samaleya (tshimenga tshinene tshia bukalenge bua bisa dikumi bia Isalele) uvua mua kuikala ne bantu batue ku 20000 anyi 30000, pabi Ninewe uvua ne bantu bapite abu misangu inayi. Mu tshikondo tshivua tshimenga tshia Ninewe tshitumbe bikole, tshiotshi ke tshivua mua kuikala tshimenga tshivua ne bantu ba bungi pa buloba.

^ tshik. 8 Bualu ebu budi mua kumueneka bu bufuikakaja. Kadi bualu bua mushindu eu bukavua buenzeke bikondo bia kale. Mumanyi wa malu a kale muena Greke, Hérodote udi wamba ne: Pakafua mfumu wa basalayi uvuabu banange bikole, bena Pelasa ne nyama yabu, bakamudila bikole bu muvua bilele biabu.

^ tshik. 20 Mêyi a Nzambi aa adi aleja ne: bantu abu bavua anu bu bana, kabavua bamanye mua kutapulula dia balume ne dia bakaji pa bidi bitangila dimanya dia mikenji ya Nzambi.