Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Nuidikije ditabuja diabu

 NSHAPITA MUITANU

“Mukaji wa ngikadilu mimpe”

“Mukaji wa ngikadilu mimpe”

1, 2. a) Luta uvua wenza mudimu kayi? b) Mmalu kayi mimpe avua Luta mulonge mu Mikenji ya Nzambi ne kudi bantu bende?

LUTA wakatua binu mu bisumbu bia orge bivuaye muangule. Ku mêsu kutuadijaku kufiika mu madimi avua pamue ne Beteleme, bena mudimu kutuadijabu kupingana batangile ku tshiibi tshia tshimenga tshikese tshivua kuulu kua mukuna uvua pabuipi. Luta uvua mutshioke bikole bualu uvua muenze mudimu mukole katshia ku dinda. Kadi wakatungunuka amu ne kuwenza, kututaye orge ne mutshi bua kuyumbusha ku tumitshi tuayi. Nansha nanku, dituku adi divua dimpe kupita ne muvuaye muele meji.

2 Malu akatuadijaku kuenda bimpe bua mukaji mukamba eu anyi? Anu mutuvua bamone mu nshapita mushale, Luta uvua mulamate bikole Naomi, kuditshipaye bua kushala nende ne bua kuvuija Yehowa, Nzambi wa Naomi, Nzambi wende pende. Bantu bakaji babidi ba mu lufuila aba bakumbuka ku Moaba batangile ku Beteleme. Mu matuku makese, Luta kumanyaye ne: mu Mikenji ya Yehowa, bavua balongolole bua kuambuluisha bapele: benyi anyi bena Isalele. Mpindieu kumonaye ne: bamue batendeledi ba Yehowa bavua batumikila Mikenji eyi ne benzela bantu malu ne bulenga. Bualu ebu buakakolesha Luta ku muoyo.

3, 4. a) Boaza uvua mukankamije Luta mushindu kayi? b) Bu mudi tshikondo tshikole, mmunyi mudi tshilejilu tshia Luta mua kutuambuluisha?

3 Mu bantu abu muvua Boaza, muntu mubanji mukulakaje, muena madimi avua Luta uya bua kuangulula bia pa madimi. Dituku adi, wakamuenzela malu anu mutu tatu wenzela muanende. Luta uvua musanke mundamunda bua mêyi malenga avua Boaza mumutumbishe nawu bua muvuaye ukumbaja majinga a Naomi ne mukebe tshisokomenu muinshi mua mapuapua a Yehowa, Nzambi mulelela.—Bala Luta 2:11-14.

4 Kadi, Luta uvua mua kuikala udiebeja bua tshivua mua kumufikila matuku kumpala. Luta uvua muntu wa tshisamba tshikuabu, uvua mupele, kavua ne mulume, nansha muana, mmunyi muvuaye mua kukumbaja majinga ende ne a Naomi? Kuangulula bia pa madimi nkayaku kuvua mua kukumbana anyi? Nnganyi uvua mua kukumbaja majinga ende pavuaye mua kukulakaja? Bivua  bikumbane bua yeye kudiela nkonko eyi. Lelu eu mbikole bua kupeta makuta, ke bualu kayi bantu ba bungi badi badiela nkonko ya muomumue. Kulonga mushindu uvua ditabuja dia Luta dimuambuluishe mu ntatu ya nunku, nekutuambuluishe bua kumuidikija mu malu a bungi.

Dîku ntshinyi?

5, 6. a) Dituku divua Luta muye mu budimi bua Boaza divua dimpe bua tshinyi? b) Pavua Naomi mumone Luta, wakenza tshinyi?

5 Pavua Luta mujikije kututa ntete ne kuyisangisha kaba kamue, wakamona ne: bungi buayi buvua bu tshipiminu tshia épha anyi litre 22 ya orge. Dibuki diende divua ne kilo mitue ku 14. Kuyisuikaye pamuapa mu tshilamba, kuyambulaye mu mutu, kumata mu njila mutangile ku Beteleme, eku dîba dienda dibuela.—Luta 2:17.

6 Pavua Naomi mumone mukaji wa muanende uvuaye munange bikole mulue ne dibuki dinene dia orge, wakumvua disanka, pamuapa kukemaye bikole. Luta uvua mulue kabidi ne biakudia bivua bishale ku bivua Boaza mupeshe bena mudimu, ke bobu kubidia. Naomi kumuebejaye ne: ‘Wakupumbulula mpumbuluila kudi kunyi lelu? Wakuenza mudimu kudi kunyi? Muntu au wakukujingulula ikale biende ne disanka.’ (Luta 2:19) Naomi kavua mmushale mu ditanaji to, pavuaye mumone bunene bua dibuki divua Luta mulue nadi, wakamanya ne: kuvua anu muntu uvua mumuambuluishe.

7, 8. a) Naomi udi umona malu mimpe a Boaza bu adi afumina kudi nganyi? Bua tshinyi? b) Mmunyi muvua Luta muleje kabidi dinanga dia lulamatu kudi mamuenende?

7 Bubidi buabu kutuadijabu kuyukila, Luta wambila Naomi malu mimpe a Boaza. Kusankishabi Naomi, ke yeye kuamba ne: ‘Yehowa udi kayi ulekela kalolo kende kudi badi ne muoyo ne badi bafue amusankishe.’ (Luta 2:20) Udi umona malu mimpe a Boaza bu adi afumina kudi Yehowa, bualu Yehowa utu ukankamija batendeledi bende bua kuikala bapeshangana bintu, ubalaya difutu bua malu abu mimpe. *Bala Nsumuinu 19:17.

8 Naomi wakasengelela Luta bua itabe dilomba dia Boaza dia kuikala wangulula bia pa madimi ne dia kusomba ne bakaji batekete ba mu nzubu muende bua kabamupotedi kudi banowi. Luta kuitabaye mubelu eu. Kushalaye kabidi ‘musombe ne mamuenende.’ (Luta 2:22, 23, MMM) Bidi bileja kabidi mudiye amu ne ngikadilu wende munene wa dinanga dia lulamatu. Mpindieu  udiebeje ne: ndiku ngangata malanda anyi ne bena mu dîku dietu ne mushinga anyi? Ndiku mbambuluisha ne bidibu nabi dijinga anyi? Yehowa utu anu umona dinanga dia buena edi.

Tshilejilu tshia Luta ne Naomi tshidi tshituvuluija ne: tudi ne bua kuangata bena mu dîku dietu ne mushinga

9. Bilondeshile tshilejilu tshia Luta ne Naomi, dîku ntshinyi?

9 Tudi mua kuamba ne: Luta ne Naomi bavua benza dîku anyi? Mu imue miaba, batu bamba ne: bua “dîku” kuikalaku, kudi ne bua kuikala bantu bonso, mmumue ne: mulume, mukaji, muana wa balume, muana wa bakaji, bakaku ne bakuabu. Kadi batendeledi ba Yehowa bobu bunzulula mioyo yabu, badi mua kuikala ne disanka, bulenga ne dinanga nansha bobu mu ka dîku kakese menemene. Ke tshidi tshilejilu tshia Luta ne Naomi tshitulongesha. Nansha bena mu dîku dienu bobu ba bungi anyi bakese, utuku ubangata ne mushinga anyi? Yezu wakambila bayidi bende ne: nansha bena Kristo badi kabayi ne bana babu badi mua kubapetela mu tshisumbu.—Mâko 10:29, 30.

Bu muvua Luta wenzela bakuabu malu ne bulenga ne kanemu, bakamuanyisha bikole

‘Ngua mu tshiota tshietu’

10. Naomi uvua musue kuambuluisha Luta mushindu kayi?

10 Kutuadija ku ngondo muinayi (wa dinowa dia orge) too ne mu ngondo muisambombo (wa dinowa dia blé), Luta uvua anu uya kuangula bintu mu madimi a Boaza. Kakuyi mpata, pavua matuku enda apita, Naomi uvua wela meji bikole bua tshidiye mua kuenza bua mukaji wa muanende. Pavuabu mu Moaba, Naomi uvua mutuishibue ne: kavua mua kupetela Luta mulume mukuabu to. (Luta 1:11-13) Kadi mpindieu, udi utuadija kuela meji mushindu mukuabu. Kuambilaye Luta ne: ‘Muananyi, tshiena nkukebela muaba wa kuikishila anyi?’ (Luta 3:1) Tshikondo atshi, baledi bavua bakebela bana babu bantu ba kuselangana nabu, Luta ukavua mulue bu muana wa Naomi menemene. Mmusue kupetela Luta ‘muaba wa kuikishila,’ mbuena kuamba ne: kumupetela nzubu ne mulume bua kumulama. Kadi tshivua Naomi mua kuenza ntshinyi?

11, 12. a) Pavua Naomi mubikile Boaza ne: ‘wa mu tshiota tshietu,’ uvua wakula bua bualu kayi buvuabu balongolole? b) Luta uvua muenze tshinyi pavua mamuende muenu mumubele?

11 Musangu wa kumpala uvua Luta muakule bua Boaza, Naomi wakamba ne: ‘Muntu au mmulela wetu, wa mu tshiota tshietu.’ (Luta 2:20, MMM) Mêyi aa adi umvuija tshinyi? Mu Mikenji ya Nzambi, bavua balongolole bua kuambuluisha mêku avua ne dikenga bua bupele anyi bualu avua mafuishe. Pavua mukaji ulua mukamba kayi muanji kulela, uvua utamba kunyingalala bikole  bualu dîna dia bayende ne ndelanganyi yende ivua mua kujimina. Kadi, Mikenji ya Nzambi ivua yanyishila muanabu ne mulume bua kupiana mukaji au bua amulelele muana uvua mua kutungunuja dîna dia bayende ne kulama bintu bia dîku adi. *Dut. 25:5-7.

12 Naomi kumvuijaye Luta tshivuaye mulongolole bua kuenza. Fuanyikijabi mudi mukaji utshidi nsonga eu ukema padi mamuende muenu wenda wakula. Luta ki mmuanji kumanya bimpe Mikenji ya bena Isalele ne malu abu makuabu to. Nansha nanku, udi unemeka Naomi bikole, uteleja ne ntema tshionso tshidiye wamba. Mubelu udi Naomi upesha Luta udi umueneka bu udi mubi anyi wenza bundu peshi mene umupuekesha milongo. Kadi nansha nanku, Luta udi witaba, udipuekesha bikole wamba ne: “Malu onso audi ungambila nengenze.”—Luta 3:5.

13. Ndilongesha kayi ditudi tupeta ku tshilejilu tshia Luta padibu batubela kudi bantu bakole? (Bala kabidi Yobo 12:12.)

13 Imue misangu, bitu bikolela bansonga bua kuteleja mibelu ya bakulumpe anyi ya bantu badi bamanye malu a bungi. Badi bela meji ne: bakulumpe kabena bumvua menemene ntatu idi bansonga nayi to. Tshilejilu tshia Luta tshidi tshituvuluija ne: kuitaba lungenyi lua bantu bakole badi batunange ne badi batujingila diakalenga kudi mua kutupetesha masanka. (Bala Musambu wa 71:17, 18.) Kadi, mmubelu kayi uvua Naomi mupeshe Luta? Mubelu eu uvuaku mumuambuluishe menemene anyi?

 Ku muaba wa dishipuila

14. Muaba wa dishipuila uvua bishi? Bavua benzaku mudimu mushindu kayi?

14 Anu dilolo adi, Luta kuditua mu njila mukese mutangile ku tshishipuidi, mbuena kuamba ne: muaba mulandakane uvua babidime balua kushipuila ne kupepuila ntete yabu. Misangu ya bungi muaba eu uvua ku luseke kua mukuna anyi ku mutu kuawu, muaba uvua kapepe kikale kakole lua ku dilolo. Bua kusunguluja ntete ne bizubu biayi ne tumitshi, bena mudimu bavua bayela mulu ku diambuluisha dia bikasu anyi bi rato binene, babanga kuyela mulu, bizubu bivua bipepuka; bu muvua ntete ne bujitu, ivua yoyi imata panshi.

15, 16. a) Umvuija tshivua tshipitakane mu muaba wa dishipuila pavua Boaza mujikije mudimu. b) Mmunyi muvua Boaza mumanye ne: Luta uvua mulale ku makasa ende?

15 Luta uvua mutangidile pa bule muvua mudimu utua ku tshibungubungu ne mukavua butuku buila. Boaza uvua utangila muvuabu benza mudimu, mukavua ntete mushiki munene. Yeye mumane kudia ne disanka, kudiololaye ku luseke lua mushiki wa ntete au. Bidi bimueneka ne: ke muvua bantu benza tshikondo atshi, pamuapa bua bivi kabalu kuiba bintu. Luta uvua mumone muvua Boaza uya kulala. Dîba diakumbanyi bua kuenzaye tshivua Naomi mumuambile.

16 Luta udi ulua bitekete bitekete, muoyo ukuma lukasa lukasa. Udi umona ne: Boaza mmulale tulu tukole. Anu bu muvua Naomi mumuambile, udi uya too ne ku makasa ende, umbusha tshilamba tshivua tshibuikilaku, uladilaku. Pashishe, ushala muindile. Mutantshi e kupita. Luta udi udiambila ne: kadi kena ujuka  anyi? Ndekelu wa bionso, mundankulu, Boaza kutuadija kunyungakana. Udi uzakala bua mashika, udinana, udiolola, pamuapa bua kudibuikila kabidi ku makasa. Kadi umvua ne: ku makasa eku kudi muntu. Bible udi wamba ne: ‘Monayi, mukaji wakadi mulale ku makasa ende.’—Luta 3:8.

17. Bantu badi bamba ne: Luta uvua wambisha Boaza, mmalu kayi abidi adibu kabayi bamanye?

17 Boaza wakamuebeja ne: “Wewe udi nganyi?” Luta udi wandamuna, pamuapa ne dîyi dizakala ne: ‘Meme Luta, muenji webe wa mudimu; olola tshilamba tshiebe pambidi pa mukaji, muena mudimu webe, bualu bua wewe udi muena tshiota tshietu.’ (Luta 3:9) Bamue bumvuiji ba Bible ba lelu badi bamba ne: mêyi a Luta aa ne malu avuaye muenze adi aleja muvuaye ukeba bua Boaza amuangate balale nende, kadi kudi malu abidi adibu kabayi bamanye. Bua kumpala, Luta uvua muenze malu bilondeshile bilele bivuaku tshikondo atshi, bia bungi bia kudibi katuena babimanye to. Nanku kufuanyikija tshivua Luta muenze ne bundumba budiku lelu, nkubuejakaja malu. Buibidi, Boaza wakandamuna Luta mu mushindu udi uleja ne: tshivuaye muenze atshi tshivua tshimpe ne tshia kumuelela kalumbandi.

Luta kavua ne meji mabi pavuaye muye kudi Boaza to, kadi uvua ukeba disanka dia bakuabu

18. Boaza udi ukankamija Luta ne mêyi kayi? Mmisangu ibidi kayi ivua Luta muleje dinanga dia lulamatu?

18 Kakuyi mpata, Boaza udi wakula ne dîyi dimpe didi dikolesha Luta, wamba ne: ‘Muananyi, [Yehowa] akubeneshe! Mushindu eu muibidi uudi muleje bulamate buebe mmupite wa kumpala, bualu kuena mukebe bansongalume, bapele nansha babanji.’ (Luta 3:10, MMM) Eu ke musangu muibidi udi Luta uleja dinanga dia lulamatu. Wa kumpala mpavuaye mulonde Naomi mu Isalele, ne mukumbaje majinga ende. Boaza mmumanye ne: bua mukaji utshidi nsonga bu Luta, bivua bipepele bua yeye kukeba mulume utshivua nsonga, mubanji anyi mupele. Kadi Luta mmusue kuenzela, ki nganu Naomi nkayende malu mimpe to, kadi ne bayende kabidi; mmusue kutungunuja kabidi dîna dia bayende mu ditunga diabu. Ke bua tshinyi tudi tumvua tshivua tshisake Boaza bua kuanyisha lungenyi luvua nalu Luta lua kukeba disanka dia bakuabu.

19, 20. a) Boaza kena upiana Luta diakamue bua tshinyi? b) Mmushindu kayi uvua Boaza muenzele Luta malu mimpe, mulame kabidi lumu luende?

19 Boaza udi utungunuka, wamba ne: “Kutshinyi to, muananyi; muonso muudi wamba, nenkuenzele, bualu bena mu  tshimenga bonso mbamanye ne: udi mukaji wa ngikadilu mimpe.” (Luta 3: 11, MMM) Udi usanka bua kusela Luta; pamuapa kena utamba kukema padiye umuambila bua kumupiana. Kadi, Boaza mmuntu muimpe, kakuenza malu mudiye musue to. Udi wambila Luta ne: mu dîku dia bayende wa Naomi mudi mulela wa pabuipi menemene udi mua kumupiana. Neanji kuya bua kumonangana nende bua kumushila mpunga wa kusela Luta.

Luta ne Naomi bavua bambuluishangana ne bakankamijangana

20 Boaza udi umuambila bua kuanji kulala kabidi too ne patshiatshia bua kushishaye kupingana kumbelu, bantu kabayi bamumone. Mmusue kulama lumu luende ne lua Luta, bualu bantu bavua mua kuela meji ne: mbende nende. Luta udi ulala kabidi ku makasa ende, pamuapa mpindieu ne muoyo mutukije bua diandamuna dimpe dia Boaza. Pashishe, ku mêsu kutshivua kufiike, Luta wakajuka. Boaza kumuelela orge mikuabu ya bungi mu dibuki, yeye kupingana mu Beteleme.—Bala Luta 3:13-15.

21. Tshivua tshiambuluishe Luta bua kumumanyabu bu “mukaji wa ngikadilu mimpe” ntshinyi? Mmunyi mutudi mua kumuidikija?

21 Fuanyikijabi disanka didi Luta mua kuikala nadi pavua Boaza umuambila ne: bantu bonso mbamumanye mudiye “mukaji wa ngikadilu mimpe.” Bidi bimueneka ne: dijinga diende dia kumanya Yehowa ne dia kumuenzela mudimu divua dimuambuluishe bua kuikala ne lumu lua nunku. Uvua muenzele Naomi ne bena Isalele malu mimpe a bungi, muitabe bua kuibidilangana ne nsombelu ne bilele bivuaye kayi mumanye. Bua kuidikija Luta, tunemekayi bakuabu bikole, nansha bobu ne nsombelu anyi ne bilele bishilangane ne bietu. Kuenza nunku kudi kutuambuluisha bua kuikala petu ne lumu luimpe.

Muaba wa kuikishila bua Luta

22, 23. a) Bipiminu 6 bivua Boaza mupeshe Luta bivua mua kuikala ne diumvuija kayi? (Bala kabidi mêyi adi kuinshi kua dibeji.) b) Naomi udi ubela Luta bua kuenza tshinyi?

22 Padi Luta ufika kumbelu, Naomi udi umuebeja ne: ‘Wewe nnganyi, muananyi?’ Udi webeja nanku pamuapa bualu ku mêsu kutshidi kufiike, anyi bualu mmusue kabidi kumanya bikala Luta ni utshidi anu mukamba anyi ni ukadi mupete wa kumusela. Luta udi wambila Naomi diakamue malu onso avua mapitakane pankatshi pende ne Boaza. Udi uleja Naomi kabidi orge ivua Boaza mumuambile bua kumupesha. *Luta 3:16, 17.

23 Naomi udi ubela Luta bua kusomba ku nzubu dituku adi  mu ditalala, pamutu pa kuya kuangula bia pa madimi. Udi umuambila ne: ‘Muntu au kena wikisha too ne pajikijaye bualu lelu.’—Luta 3:18.

24, 25. a) Boaza uvua muntu muakane, uvua ukeba disanka dia bakuabu. Mushindu kayi? b) Luta uvua mupete disanka kayi?

24 Naomi ki mmudishime to. Boaza udi uya ku tshiibi tshia musoko, muaba utu bakulu ba musoko batamba kupetelangana, windila too ne padi mulela wa pabuipi ne bayende wa Naomi upitshilaku. Ku mêsu kua bantemu, Boaza udi ushila muntu eu mpunga bua kupianaye Luta. Kadi muntu eu udi ubenga, wamba ne: kuenza nunku kudi mua kunyanga bumpianyi buende yeye. Pashishe, Boaza udi wamba kumpala kua bantemu abu ne: udi mua kulua mupianyi, kusumba bintu bionso bia Elimeleke, bayende wa Naomi ukadi mufue, ne kusela Luta, mukaji wa Malona, muana wa Elimeleke. Boaza udi wamba ne: kuenza nunku kudi mua ‘kupingaja dîna dia mufue au ku bumpianyi buende.’ (Luta 4:1-10) Bulelela, Boaza mmuntu muakane, udi ukeba anu disanka dia bakuabu.

25 Boaza udi usela Luta. Bible udi wamba ne: ‘Yehowa kuambuluisha Luta; Luta kuimita difu, kulelaye muana wa balume.’ Bakaji ba mu Beteleme badi babenesha Naomi, batumbisha Luta bua mudiye ne mushinga kupita bana ba balume muanda mutekete. Muana wa Luta wakalua pende nkambua wa Mukalenge Davidi. (Luta 4:11-22, MMM) Davidi pende kulua nkambua wa Yezu Kristo.—Mat. 1:1. *

Yehowa wakabenesha Luta, kumupesha diakalenga dia kulua pende nkambua wa Masiya

26. Tshilejilu tshia Luta ne Naomi tshidi tshituvuluija tshinyi?

26 Bulelela, Yehowa wakabenesha Luta ne Naomi. Naomi ke wakakolesha muana wa Luta, bienze anu bu wende yeye menemene. Tshilejilu tshia bantu bakaji babidi aba tshidi tshituvuluija ne: Yehowa Nzambi udi umona bonso badi baditatshisha bua kukumbaja majinga a mêku abu ne bamuenzela mudimu ne muoyo umue pamue ne batendeledi bende bakuabu. Katu upanga kufuta batendeledi bende badi bamulate, bu mudi Boaza ne Naomi ne Luta to.

^ tshik. 7 Anu muvua Naomi muambe, kalolo ka Yehowa kadi bua badi ne muoyo ne bafue. Naomi mmufuishe bayende ne bana babidi. Luta mmufuishe pende bayende. Bulelela, bantu basatu aba bavua ne mushinga wa bungi kudi Naomi ne Luta. Bualu buimpe buonso buvuabu mua kuenzela Naomi ne Luta buvua anu bu buenzela balume abu bavua mua kujinga bua kuenzela bakaji babu malu mimpe.

^ tshik. 11 Bana babu ne mufue ba balume ke bavua ne bukenji bua kupiana mukaji, pashishe balela ba pabuipi ne mufue bavua pabu ne bukenji abu, anu muvuabi bua bumpianyi.—Nom. 27:5-11.

^ tshik. 22 Boaza udi upesha Luta bipiminu 6 bitudi katuyi bamanye bujitu buabi, pamuapa bua kuleja ne: padi matuku 6 a mudimu ajika, kutu dikisha dia Nsabatu; bia muomumue, pajika matuku 6 a mudimu wa Luta bu mukaji mukamba, neapete diakamue ‘dikisha’ didi difumina ku dikala kuende ne mulume. Bipiminu 6 (imue misangu bisensekeja bimpe) bivua kabidi mua kuikala bileja bintu bungi bukumbane buvua Luta mua kuambula.

^ tshik. 25 Luta ngumue wa ku bantu bakaji batanu badi Bible utela mu mulongo wa bankambua ba Yezu. Mukuabu ke Lahaba, mamuende wa Boaza. (Mat. 1:3, 5, 6, 16) Lahaba kavua pende muena Isalele to.