Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Nuidikije ditabuja diabu

 NSHAPITA MUISAMBOMBO

Wakenza disambila, kunzuluila Nzambi muoyo

Wakenza disambila, kunzuluila Nzambi muoyo

1, 2. a) Hana kavua ne disanka pavuaye ulongolola luendu bua tshinyi? b) Muyuki wa Hana udi utulongesha tshinyi?

HANA udi udilongolola bua kuenza luendu, kena usamisha mutu bua malu ende to. Tshidi ne bua kuikala tshikondo tshia disanka; bayende Elekana utu uya tshidimu tshionso ne dîku diende dijima ku ntenta wa kusambakena (anyi tabernakle) mu Shilo bua kutendelela. Yehowa uvua musue bua bikondo bia nunku bikale bia disanka. (Bala Dutelonome 16:15.) Kakuyi mpata, Hana uvua usanka ne mafesto a buena aa katshia ku buana buende. Kadi bidimu bidi panshi ebi, malu mmamukudimukile.

2 Mmukume dikasa dimpe bualu mmupete mulume udi mumunange. Kadi, Elekana udi ne mukaji mukuabu, diende Penina. Bidi bimueneka ne: Penina eu mmusue kutatshisha Hana. Penina mmulongolole too ne bua bibilu ebi bikale bikondo bia tunyinganyinga kudi Hana. Mushindu kayi? Kadi, mmunyi muvua ditabuja dia Hana dimuambuluishe bua kupita ne ntatu ivua imueneka mikole menemene? Biwikala ne ntatu idi mua kujimija disanka diebe, muyuki wa Hana udi mua kukukolesha bikole.

‘Mutshima webe udi unyingalala bua tshinyi?’

3, 4. Hana uvua ne ntatu ibidi minene kayi? Bua tshinyi lutatu luonso luvua lukole?

3 Bible udi uleja ntatu minene ibidi idi Hana mupete. Udi mua kutantamena lutatu lua kumpala, kadi bua luibidi, kakuena mushindu to. Lua kumpala, bayende uvua ne mukaji mukuabu. Mukaji eu uvua mukine Hana. Luibidi, kavua ulela to, uvua nkumba. Elu ke lutatu lukole bua mukaji yonso udi musue kulela. Kadi mu tshikondo tshia Hana, kubenga kulela kuvua kufila kanyinganyinga kakole. Bualu dîku dionso divua ditekemena bua kupeta muana uvua mua kutungunuja dîna dia tshiota tshiabu. Bavua bangata dibenga kulela bu bualu bubi menemene, bualu bua bundu.

4 Bu Penina kayiku, Hana uvua mua kupita bimpe ne lutatu elu. Kusela bakaji ba bungi ki nkuimpe to, bualu kudi kukebesha mukawu, ditandangana ne tunyinganyinga. Dibaka edi ndishilangane ne dibaka divua Nzambi muenze mu Edene, dibaka dia mulume  umue ne mukaji umue. (Gen. 2:24) Bible udi uleja ne: kusela bakaji ba bungi nkubi. Malu avua menzeke mu dîku dia Elekana adi aleja patoke ne: dibaka dia nunku ndibi.

5. Penina mmusue kukengesha Hana bua tshinyi? Mmunyi muvuaye umunyingalaja?

5 Elekana mmunange Hana bikole. Bilondeshile bilele bia bena Yuda, wakanji kusela Hana kumpala, e kulua kusela Penina kunyima kua bidimu. Nansha biobi nanku anyi kabiyi nanku, bu mudi Penina umvuila Hana mukawu wa bungi, wakapeta mishindu ya bungi ya kumukengesha. Udi udimona mupite Hana bualu udi ulela. Penina mmukaji wa dimiinu, udi udiangata ne mushinga wa bungi padiye ulela muanende yonso. Pamutu pa kumvuila Hana luse ne kumukolesha mu mikolo, yeye udi wimanyina pa lutatu luende alu bua kumutatshisha bikole. Bible udi wamba ne: Penina wakatamba kufiikisha Hana munda bua ‘kumunyingalaja.’ (1 Sam. 1:6) Penina udi wenza malu ku bukole. Udi upesha Hana kanyinganyinga.

Dibenga kulela dia Hana divua dimutonda bikole, Penina eku wenza muende muonso bua kumutondesha nsombelu

6, 7. a) Nansha mudi Elekana ukeba bua kukolesha Hana mu maboko, bua tshinyi Hana ki mmumuambile malu onso? b) Dibenga kulela dia Hana didiku dileja ne: Yehowa kavua mumunange anyi? Umvuija. (Bala mêyi adi kuinshi kua dibeji.)

6 Bidi bimueneka ne: dîba didibu benza luendu batangile ku Shilo tshidimu tshionso ke tshikondo tshitu Penina utatshisha Hana. Elekana udi upesha ‘bana ba Penina ba balume bonso ne bana ba bakaji’ bintu bia kulambulabu Yehowa. Kadi Hana bu mudiye kayi ne bana, udi umupesha anu bintu biende nkayende bia kulambula. Ke Penina kutuadija kuamba Hana malu, umuvuluija mudiye kayi ulela, udidisha Hana, nzala ivua nayi Hana ijika. Elekana udi umona mudi Hana unyingalala, kayi udia. Bua kumukolesha ku muoyo, udi umuebeja ne: ‘Hana, udi udidila tshinyi? Kuena udia bua tshinyi? Mutshima webe udi unyingalala bua tshinyi? Meme tshiena mupite bana ba balume dikumi kuudi, anyi?’—1 Sam. 1:4-8.

7 Katuena bamanye tshivuaye muenze ne Penina to, kadi Elekana mmumanye ne: Hana mmubungame bualu kena ulela. Kakuyi mpata, Hana udi wanyisha bikole mêyi a Elekana adi aleja mudiye mumunange. * Kadi Elekana ki mmuakule bua malu mabi a Penina to; Bible kena wamba pende ne: Hana uvua muambile Elekana malu avua Penina umuenzela to. Pamuapa mmumone ne: kuambila Elekana bidi Penina umuenzela  kudi mua kunyangakaja malu. Elekana udiku mua kushintulula malu menemene anyi? Tuseku tua Penina kudi Hana tudi mua kuvula anyi? Bana ba Penina ne bena mudimu bende badi pabu mua kubanga kuseka Hana anyi? Biobi nanku, Hana neikale mua kudiumvua anu bu muntu mulekelela kudi ba mu nzubu muende.

Pavuabu benzela Hana malu mabi kumbelu, uvua ukeba bua Yehowa amukoleshe

8. Padibu bakuenzela malu mabi, bua tshinyi kuvuluka ne: Yehowa udi Nzambi wa buakane kudi kukukolesha mu maboko?

8 Nansha Elekana mumanye anyi kayi mumanye meji mabi a Penina, Yehowa Nzambi yeye mmuamanye onso. Dîyi diende didi dileja bualu ebu patoke, nanku didi didimuija muntu yonso udi usanka bua kuenzelangana malu a lukinu ne mukawu nansha wowu amueneka bu makese. Ku lukuabu luseke, muntu wa ditalala ne udi kayi ukebangana bilumbu anu bu Hana akole ku muoyo, bualu Nzambi wa buakane utu ulongolola malu onso mu tshikondo tshiawu, ne mushindu udiye musue. (Bala Dutelonome 32:4.) Pamuapa Hana mmumanye pende ne: bidi nanku, bualu udi ulomba Yehowa diambuluisha.

‘Mutshima wende kauvua unyingalala kabidi’

9. Dipangadika dia Hana dia kuya ku Shilo nansha muvuaye mumanye tshivua mukenende mua kuenza didi ditulongesha tshinyi?

9 Mu dindadinda, bantu bonso badi kuulu kuulu; too ne bana badi badilongolola bua kuenza luendu. Dîku dinene edi didi dienza luendu lua kilometre mipite pa 30, bapitshila mu musoko wa tukunakuna wa Efelayima bua kuya ku Shilo. * Luendu luabu elu ludi mua kubangata dituku dimue anyi abidi ku makasa. Hana mmumanye tshienza mukenende. Nansha nanku, kena ushala kumbelu to. Nunku, mmushile batendeledi ba Nzambi ba lelu tshilejilu tshimpe: Ki mbimpe kulekela bienzedi bibi bia bakuabu bitupangisha mua kutendelela Nzambi nansha. Tuetu balekele kutendelela Nzambi, netupangile masanka adi atukolesha bua kutantamena ntatu.

10, 11. a) Hana udi uya ku ntenta wa kusambakena bua tshinyi? b) Leja muvua Hana munzuluile Tatu wende wa mu diulu muoyo?

10 Bobu bamane kuenza luendu lule dituku dijima mu njila ya mikuna ne bipepele, badi mpindieu pabuipi ne Shilo. Tshimenga tshidi kumpala kuabu pa kakuna kadi kanyunguluka kudi tu mikuna tule. Padibu basemena, Hana udi mua kuikala wela meji bikole bua tshidiye mua kuambila Yehowa. Diakamue padibu bafika, badi batuadija kudia. Padi mpunga umueneka diakamue, Hana udi ubashiya, uya mutangile ku ntenta wa kusambakena (anyi tabernakle). Muakuidi Munene Eli udiku, mmusombele lua ku tshiibi. Kadi Hana ki mmumumone to, bualu meji ende onso mmatuma ku disambila. Bua padiye ku ntenta, mmutuishibue ne: Nzambi neamuteleje.  Bikalaku kakuyi muntu mukuabu udi mua kumvua lutatu luende, Tatu wende wa mu diulu neamumvuile. Kanyinganyinga kadi kenda kavula mu muoyo, udi utuadija kudila.

11 Padiye udila, mubidi wende udi ukanka; Hana udi usambila Yehowa mundamunda. Mishiku yende idi yenda izakala padiye wambila Nzambi kanyinganyinga mu lungenyi luende. Udi usambila musangu mule, wambila Tatu wende yende yonso idi munda. Kadi kena wambila Yehowa anu bua kulela to. Hana mmusue kulomba Nzambi bua amubeneshe, kadi mmusue kabidi kupesha Nzambi tshidiye mua kukokesha. Ke bualu kayi udi uditshipa, wamba ne: yeye mulele muana wa balume, neamufile bua kuenzelaye Yehowa mudimu matuku ende onso a muoyo.—1 Sam. 1:9-11.

12. Anu mudi tshilejilu tshia Hana tshileja, tudi ne bua kuvuluka tshinyi bua disambila?

12 Nunku Hana mmushile batendeledi ba Nzambi bonso tshilejilu tshimpe bua disambila. Yehowa udi usengelela bantu bende bua bayikile nende ne muoyo mujima, kabayi belakana to, bamuleja ntatu yabu yonso anu mutu muana udi weyemena muledi wende udi mumunange mua kuenza. (Bala Musambu wa 62:8; 1 Tesalonike 5:17.) Nyuma wa Nzambi wakasaka mupostolo Petelo bua kufunda mêyi adi atukolesha aa: “Numupuile ntatu yenu yonso, bualu udi uditatshisha bua bualu buenu.”—1 Pet. 5:7.

13, 14. a) Mmunyi muvua Eli mubande Hana? b) Hana mmutushile tshilejilu kayi tshimpe tshia ditabuja bua muvuaye muandamune Eli?

13 Kadi tuetu bantu katutu tumvuila bakuabu anyi tuditeka pa muaba wabu bu mutu Yehowa wenza yeye to. Padi Hana usambila udila ne muadi, dîyi didi dimupapula. Ndia Eli, muakuidi munene; uvua mushale mumutangile. Udi webeja Hana ne: ‘Wewe neukuatshike maluvu musangu bule munyi? Umusha maluvu ebe.’ Eli mmumone mudi mishiku ne mubidi wa Hana uzakala ne mudiye bu mubungame. Pamutu pa kumuebeja bua kumanya tshidi tshimutonde, udi wela meji diakamue ne: mmukuatshike maluvu.—1 Sam. 1:12-14.

14 Hana udi ne kanyinganyinga kakole bua kumvua bamubanda kudi muntu uvua muakuidi munene. Kadi, mmutushile kabidi tshilejilu tshimpe tshia ditabuja. Kavua mulekele bilema bia bakuabu bimupangisha bua kutendelela Yehowa to. Udi wandamuna Eli ne kanemu konso, umumvuija lutatu luende. Eli udi umona ne: mmutupakane, ke kumuandamunaye pamuapa ne dîyi dimpe ne: ‘Ya biebe talala, Nzambi wa Isalele umvue biende kulomba kuwakumulomba.’—1 Sam. 1:15-17.

15, 16. a) Mmunyi muvua Hana mudiumvue pavuaye munzuluile Yehowa muoyo wende ne mumutendelele? b) Tudi mua kuenza tshinyi bua kulonda tshilejilu tshia Hana patudi ne tunyinganyinga?

15 Hana mumane kunzuluila Yehowa muoyo wende ne mumutendelele ku ntenta, wakadiumvua munyi? Bible udi wamba ne:  ‘Mukaji wakabika, wakaya mu njila wende, wakadia bidia; mutshima wende kawakadi unyingalala kabidi.’ (1 Sam. 1:18) Mukanda wa Mvidi Mukulu (Mishonyi) udi wowu wamba ne: ‘Kakaleja kabidi mpala wa dibungama.’ Hana udi udiumvua musulakane. Mbienze anu bu muangate bujitu bua tunyinganyinga tuende mubupuile pa makaya manene a muntu uvua ne bukole bupite buende, mbuena kuamba ne: a Tatu wende wa mu diulu. (Bala Musambu wa 55:22.) Kudiku bualu budi mua kupita Nzambi makanda anyi? Tòo; kabuvuaku to, kabuenaku to, ne kabuakuikalaku nansha!

16 Patudi ne tunyinganyinga, batekete mu mikolo anyi bashikile, mbimpe tulonde tshilejilu tshia Hana, tuambile eu udi Bible ubikila ne: ‘Muteleji wa masambila’ malu adi matutonde. (Mus. 65:2) Tuetu tuenza nanku ne ditabuja, kanyinganyinga ketu nekajike, ne netupete “ditalala dia Nzambi didi dipite dijingulula dionso dia malu.”—Filip. 4:6, 7.

‘Kakuena dibue dikuabu didi bu Nzambi wetu’

17, 18. a) Mmunyi muvua Elekana muleje ne: uvua muitabe mutshipu wa Hana? b) Penina uvua mupangile kabidi bua kuenzela Hana tshinyi?

17 Dituku didi dilonda mu dinda, Hana udi upingana ne Elekana ku ntenta. Imue misangu mmuambile bayende mutshipu ne dilomba divuaye muenze, bualu Mikenji ya Mose ivua yamba ne: mulume uvua ne bukenji bua kushipa mutshipu uvua mukajende muenze kakuyi dianyisha diende. (Nom. 30:10-15) Kadi Elekana uvua mulamate Nzambi, ki mmushipe mutshipu wa Hana to. Yeye ne Hana badi batendelela Yehowa pamue ku ntenta kumpala kua kupinganabu kumbelu.

18 Ndîba kayi menemene didi Penina umona ne: kena kabidi mua kutatshisha Hana? Bible kena uleja bualu ebu to, kadi padiye wamba ne: ‘Mutshima wende kauvua unyingalala kabidi,’ bidi bileja ne: Hana mmupete ditalala dia mu lungenyi katshia anu dîba adi. Nansha biobi nanku anyi kabiyi nanku, Penina wakamona diakamue ne: uvua muele bua tshiombe musabu. Bible ki mmutele kabidi dîna diende to.

19. Hana wakapeta masanka kayi? Mmunyi muvuaye muleje ne: uvua mumanye kuvuawu mafumine?

19 Padi ngondo yenda ipita, ditalala dia Hana didi dikudimuka, dilua disanka dinene. Mmupete difu! Nansha mudiye ne disanka, kena upua muoyo musangu nansha umue muaba udi dibenesha edi difumine to. Padiye ulela muana wa balume, udi umuinyika ne: Samuele. Samuele udi umvuija ne: “Dîna dia Nzambi,” pamuapa bua kuvuluka muvuaye mubikile dîna dia Nzambi. Tshidimu atshi, Hana kavua muye ne Elekana ne dîku dionso ku Shilo to. Wakashala kumbelu ne muana munkatshi mua bidimu bisatu, too ne pakalekela muana dibele. Pashishe udi upeta dikima bua dituku dikalaye mua kushiyangana ne muanende udiye munange eu.

20. Elekana ne Hana bavua bakumbaje mutshipu wabu mushindu kayi?

 20 Kushiyangana ne muanende eu kakuvua mua kuikala bualu butekete to. Kakuyi mpata, Hana mmumanye ne: nebalame Samuele bimpe ku Shilo, pamuapa kudi bakaji bavua benza mudimu ku ntenta. Kadi utshidi mupuekele bikole, mmamu kayi udi mua kushiyangana ne muanende nunku kayi umvua bibi? Nansha nanku, Hana ne Elekana badi baya ne muanabu eu kabayi badilakana, bikale ne dianyisha dia bungi kudi Nzambi. Badi bafila milambu mu nzubu wa Nzambi, baleja Samuele kudi Eli, bamuvuluija mutshipu uvua Hana muenze kukavua bidimu ndambu anu muaba eu.

Hana uvua mudivuije dibenesha dilelela kudi muanende

21. Leja mudi disambila dia Hana dileja bukole bua ditabuja diende. (Bala kabidi kazubu ka “Masambila abidi a dikema.”)

21 Hana wakenza disambila divua Nzambi muanyishe bua badifunde mu Dîyi diende. Wewe mubale mêyi ende adi mu 1 Samuele 2:1-10, neumone mudi tshiambilu tshionso tshileja ditabuja dikole divua nadi Hana. Udi utumbisha Yehowa bua mudiye wenza mudimu mu mushindu wa dikema ne bukole buende: mudiye ne bukole budi kabuyi kufuanyikija bua kupuekesha bena lutambishi milongo, bua kubenesha bakengi, bua kushipa ne bua kusungila muntu bua kafu to. Udi utumbisha Tatu wende bua mudiye munsantu, muakane ne mudiye ne lulamatu. Ke bualu kayi Hana uvua wambilamu bulelela, pakambaye ne: ‘Kakuena dibue dikuabu didi bu Nzambi wetu.’ Yehowa n’Nzambi wa kueyemena bikole, ne katu ushintuluka to, udi tshieyemenu kudi aba badibu bakengesha kadi badi bamulomba diambuluisha.

22, 23. a) Tshidi tshileja ne: Samuele uvua mumanye muvua baledi bende bamunange ntshinyi? b) Yehowa uvua mubeneshe kabidi Hana mushindu kayi?

22 Samuele utshidi muana, kadi udi ne diakalenga dinene dia kuikala ne mamu udi ne ditabuja dikole kudi Yehowa. Padi Samuele wenda ukola, nansha mudiye kayi ne mamuende pabuipi, kena udimona bu  muana mulekelela to. Tshidimu tshionso, Hana uvua uya ku Shilo utuadila Samuele muzabi uvua kauyi ne maboko bua kuenza nawu mudimu wa ku ntenta. Muzabi wonso uvuaye umutelela uvua tshijadiki tshia muvuaye mumunange ne umutabalela. (Bala 1 Samuele 2:19.) Anji fuanyikijabi mudi Hana uvuadika muanende muzabi mupiamupia, umuakajawu, ushala mumutangile ne dinanga dionso, umuambila mêyi malenga a kumukolesha nawu ku muoyo. Samuele mmutute dikasa dimpe bua kupeta mamu wa nunku; pakakolaye wakalua dibenesha kudi baledi bende ne kudi bena Isalele bonso.

23 Yehowa kavua mupue Hana muoyo to. Wakamubenesha, kulelaye bana bakuabu batanu. (1 Sam. 2:21) Pamuapa disanka dinene divua nadi Hana divua dia malanda mimpe avuaye mudie ne Tatu wende Yehowa, malanda avua enda akola pavua bidimu bienda bipita. Wewe pebe bu muudi widikija Hana, bikuenzekelaku pebe nanku.

^ tshik. 7 Nansha mudi Bible uleja ne: Yehowa uvua ‘mujike munda mua Hana’ bua kaledi, kakuena tshidi tshileja ne: Nzambi uvua mukine Hana to, bualu uvua mumulamate ne uvua udipuekesha. (1 Sam. 1:5) Imue misangu patu Nzambi ulekela malu enzeka bua tshikondo kampanda, Bible utu wamba ne: yeye ke udi muenze.

^ tshik. 9 Mbapete bule ebu bilondeshile lungenyi lua ne: tshimenga tshia Lama tshia ba Elekana ke tshimenga tshia Alimataya, mu matuku a Yezu.