Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Dîku diebe didi mua kupeta disanka

 TSHITUPA 6

Mudi bana bashintulula malu mu dibaka

Mudi bana bashintulula malu mu dibaka

‘Bana badi bumpianyi bua kudi Yehowa.’ —Musambu 127:3, NWT

Diledibua dia muana didi mua kuikala bualu bua disanka ne bujitu bukole kudi baledi bende. Bu baledi bapiabapia nebinukemeshe bua kumona ne: nudi nufila dîba dienu ne makanda enu ku ditabalela dia muanenu. Dibenga kulala ne didila dia muana bidi mua kunukebela lutatu mu dibaka. Wewe ne muena dibaka nebe nudi ne bua kushintulula amue malu bua kumona mua kutabalela muana ne kulama dibaka dienu. Mmunyi mudi mibelu ya mu Bible mua kunuambuluisha bua kupita bimpe ne ntatu eyi?

 1JINGULULAYI MUDI MUANA USHINTULULA NSOMBELU WENU

TSHIDI BIBLE WAMBA: “Dinanga didi ne lutulu ne buimpe.” Kabidi dinanga “kadiena didikebela anu masanka adi, kadiena dikuata tshiji lukasa.” (1 Kolinto 13:4, 5) Bu mudi mamu muledi mupiamupia, kakuyi mpata udi mua kutuma ntema yebe yonso ku ditabalela dia muanebe. Kadi bayebe udi mua kutuadija kumona bu ne: udi umulengulula, nunku kupu muoyo ne: udi pende dijinga ne dimutabalela diebe. Wewe ne lutulu ne buimpe, udi mua kumuambuluisha bua adimone ne mushinga ne adifile pende mu ditabalela dia muana.

“Nuenu balume, nutungunuke ne kusomba nabu bilondeshile dimanya.” (1 Petelo 3:7) Mbimpe umanye ne: mukajebe neadifile bikole ku ditabalela muana. Udi ne majitu mapiamapia ne udi mua kudiumvua mupungile, mutshioke anyi mubungame. Imue misangu udi mua kukufikila munda, kadi mbimpe kuikala ne lutulu bualu “muntu udi kayi ufika munda lukasa mmupite tshilobo.” (Nsumuinu 16:32, MMM) Ikala ne busunguluji ne pesha mukajebe diambuluisha didiye nadi dijinga.—Nsumuinu 14:29.

TSHIUDI MUA KUENZA:

  • Batatu: Ambuluisha mukajebe bua kutabalela muana nansha butuku. Kepesha mêba audi upitshisha mu dienza malu makuabu bua upitshishe mêba a bungi ne mukajebe ne muanebe

  • Bamamu: Padi bayebe ukulomba bua kukuambuluisha bua muana, itaba diambuluisha diende. Yeye kayi muenze mudimu au bimpe menemene, kumupepeji to, kadi muleje bimpe mushindu wa kuwenza

 2 KOLESHAYI MALANDA ENU

TSHIDI BIBLE WAMBA: “Nebalue mubidi umue.” (Genese 2:24) Nansha munudi ne muntu mupiamupia mu dîku dienu, ikala muvuluke ne: wewe ne muena dibaka nebe nudi anu “mubidi umue.” Enza muebe muonso bua kukolesha malanda enu.

Bantu bakaji batu basanka bikole padi babayabu babambuluisha ne babakolesha ku muoyo. Mêyi ebe a dianyisha adi mua kuikala bu “luondapu.” (Nsumuinu 12:18, NWT) Wewe mulume, leja mukajebe muudi mumunange ne muudi umuangata ne mushinga. Muela kalumbandi bua mushindu udiye utabalela dîku.—Nsumuinu 31:10, 28.

“Muntu yonso katungunuki ne kukeba anu diakalenga diende nkayende, kadi atungunuke ne kukeba dia mukuabu.” (1 Kolinto 10:24) Misangu yonso ikala wenzela muena dibaka nebe malu adi matambe buimpe. Bu munudi bena dibaka, kebayi dîba dia kuyukila, kuelangana kalumbandi ne kutelejangana umue ne mukuabu. Ikalayi nusankishangana mu tshikondo tshia disangila. Tangila majinga a muena dibaka nebe. Bible udi wamba ne: “Kanubengianganyi mu nzubu, anu nuenu bumvuangane.” (1 Kolinto 7:3-5) Nunku yukilayi bua bualu ebu bimpe menemene nuenu babidi. Lutulu luenu ne diumvuilangana nebikoleshe malanda enu.

TSHIUDI MUA KUENZA:

  • Kupu muoyo bua kukeba dîba dia nuenu kusomba anu babidi

  • Enzela muena dibaka nebe tumalu tudi tumusaka bua kudiumvuaye munangibue bu mudi: kumutumina mesaje anyi kumupesha ka tshintu kampanda

 3 LONGESHAYI MUANENU

TSHIDI BIBLE WAMBA: “Katshia ku buana buebe udi mumanye mifundu ya tshijila, idi mua kukuvuija muena meji bua kupeta lupandu.” (2 Timote 3:15) Longolola tshiudi mua kuenza bua kulongesha muanebe. Muana udi ne lungenyi lukumbane bua kulonga nansha kumpala kua yeye kuledibua. Nansha patshidiye mu difu, muanebe udi mua kumanya dîyi diebe ne kuenza malu bilondeshile muudi udiumvua. Mubadile malu nansha patshidiye muana menemene. Nansha yeye kayi umvua biudi ubala, bidi bimuambuluisha bua kunangaye dibala padiye ukola.

Muanebe udi nansha mua kumvua paudi wakula bua Nzambi. Enza bua ateleje paudi usambila Yehowa. (Dutelonome 11:19) Nansha panudi nunaya nende muambile bua bintu bidi Nzambi muenze. (Musambu 78:3, 4) Padi muanebe ukola, neamone muudi munange Yehowa ne nealonge pende mua kumunanga.

TSHIUDI MUA KUENZA:

  • Lomba nangananga meji kudi Nzambi bua kumona mua kulongesha muanebe

  • Ambuluila muanebe mêyi ne ngenyi ya mushinga bua kutuadijaye kulonga katshia ku buana