Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Dîku diebe didi mua kupeta disanka

 TSHITUPA 7

Mua kukolesha muanebe

Mua kukolesha muanebe

“Mêyi aa andi nkuambila lelu adi ne bua kuikala mu muoyo webe; ne udi ne bua kuabueja munda mua muanebe.”—Dutelonome 6:6, 7, NWT

Pavua Yehowa muenze dîku dia kumpala, uvua mupeshe baledi mudimu wa kukolesha bana. (Kolosayi 3:20) Baledi ke badi ne bujitu bua kulongesha bana bua banange Yehowa ne bikale bakulumpe bimpe. (2 Timote 1:5; 3:15) Udi kabidi mua kulonga tshidi mu mutshima wa muanebe. Bushuwa, tshilejilu tshiebe tshidi kabidi mua kubambuluisha bikole. Bua kulongesha muanebe Dîyi dia Yehowa, bidi bikengela wewe kuanji kudibueja mu mutshima webe.—Musambu 40:8.

 1 ENZA BUA BANA BEBE BIKALE BAYUKILA NEBE BIPEPELE

TSHIDI BIBLE WAMBA: Ikala ne “lukasa ku diteleja, ne lujoko ku diakula.” (Yakobo 1:19) Udi mua kuenza bua bana bebe bamone ne: mbipepele bua kuyukila nebe. Badi ne bua kumanya ne: utu pabuipi ne kubateleja padibu basua kukuambila bualu. Wewe muikale nabu mu ditalala bidi bibambuluisha bua kukuambilabu bualu bipepele. (Yakobo 3:18) Bobu bamanye ne: utu ne malu makole anyi kutu ubitaba lukasa, bidi mua kubakolela bua kukuambila malu bipepele. Ikala ne lutulu kudi bana bebe, ikala ubajadikila misangu yonso muudi mubanange.—Matayi 3:17; 1 Kolinto 8:1.

TSHIUDI MUA KUENZA:

  • Ikala pabuipi bua kuteleja bana bebe padibu bajinga kukuambila bualu

  • Ikala uyukila ne bana bebe misangu ne misangu, ki nganu padibu ne bualu to

2 TETA KUJINGULULA TSHIDIBU BASUE KUAMBA MENEMENE

TSHIDI BIBLE WAMBA: “Muntu udi uleja busunguluji mu tshilumbu neapite bimpe ne malu.” (Nsumuinu 16:20, NWT) Imue misangu, bidi bikengela kudienzeja bua kujingulula tshidi bana basue kuamba menemene mu bidibu bamba. Misangu ya bungi, bana batu banekesha ne malu anyi bamba malu mu mushindu udibi kabiyi bikengela. Bible udi wamba ne: ‘Biakudimuna muntu dîyi kayi muanji kuteleja matshi diambedi, bualu ebu budi bulua bupote.’ (Nsumuinu 18:13) Kabikutondi lukasa to.—Nsumuinu 19:11.

TSHIUDI MUA KUENZA:

  • Ikala mudisuike bua kubenga kukosa bana ku mêyi, nansha bobu bikale bakuambila bualu bua mushindu kayi

  • Teta kuvuluka muuvua udiumvua pauvua ne bidimu biabu, ne tshiuvua ujinga baledi bakuenzele

 3 LEJAYI BANA MUNUDI MU BUOBUMUE

TSHIDI BIBLE WAMBA: “Muananyi, teleja mubelu wa tatuebe, ne kubengi dilongesha dia mamuebe.” (Nsumuinu 1:8, NWT) Yehowa mmupeshe baledi bonso babidi bujitu bua kukolesha bana. Nudi ne bua kulongesha bana benu bua banunemeke ne banutumikile. (Efeso 6:1-3) Bana badi mua kujingulula bikala baledi babu kabayi “mu buobumue menemene mu meji.” (1 Kolinto 1:10) Nuenu kanuyi bapetangane mu bualu kampanda, bana kabajinguludi bualu ebu to, bualu budi mua kukepesha kanemu kadibu banupesha.

TSHIUDI MUA KUENZA:

  • Umvuanganayi bua mushindu wa kupesha bana dinyoka

  • Nuenu kanuyi bapetangane ne muena dibaka nebe bua mushindu wa kunyoka bana, teta kutabalela mmuenenu wende

 4 IKALAYI NE PROGRAME

TSHIDI BIBLE WAMBA: “Longesha muana wa balume njila udiye ne bua kulonda.” (Nsumuinu 22:6, NWT) Bana benu kabakukola bimpe mu mpukampuka to. Nudi ne bua kuikala ne programe wa kulongesha bana, ne kubuejamu kabidi programe wa mua kunyoka bana. (Musambu 127:4; Nsumuinu 29:17) Dinyoka kadiena diumvuija anu kututa to, kadi didi kabidi dileja kuambuluisha bana bua kumvua bua tshinyi nudi babelele mikenji kampanda. (Nsumuinu 28:7) Nubalongeshe kabidi mua kunanga Dîyi dia Yehowa ne kujingulula malu manene adimu. (Musambu 1:2) Kuenza nunku, nekubambuluishe bua kuikala ne kondo ka muoyo kimpe.—Ebelu 5:14.

TSHIUDI MUA KUENZA:

  • Ikalayi batuishibue ne: bana benu badi bamona Nzambi bu Muntu wetu wa bushuwa eu udibu mua kueyemena

  • Bambuluishayi bua bajingulule njiwu idi ifuma ku bikadilu bibi ne babiepuke, bu mudi njiwu idi ku Enternete ne ya dituilangana ne bantu ba bungi ku Enternete. Nubalongeshe bua bamanye mua kuepuka bantu badi basue kuenda nabu masandi ku bukole

“Longesha muana wa balume njila udiye ne bua kulonda”