Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Dîku diebe didi mua kupeta disanka

 TSHITUPA 2

Ikalayi ne lulamatu kudi umue ne mukuabu

Ikalayi ne lulamatu kudi umue ne mukuabu

“Muntu kapanduludi tshidi Nzambi mulamakaje kaba kamue.”—Mâko 10:9

Yehowa udi ulomba yonso wa kutudi bua ‘kunanga lulamatu.’ (Mika 6:8) Bualu ebu budi ne mushinga nangananga mu dibaka diebe, bualu nuenu kanuyi ne lulamatu, kanuakueyemenangana to. Bua dinanga kukola bimpe bikengela kueyemenangana.

Lelu eu, mu mabaka a bungi kamuena lulamatu to. Bua kulama dibaka diebe, udi ne bua kudisuika bua kuenza malu abidi aa:

TEKA DIBAKA DIEBE PA MUABA WA KUMPALA

TSHIDI BIBLE WAMBA: Keba “mua kumanya malu adi ne mushinga wa bungi.” (Filipoyi 1:10) Dibaka diebe mbumue bua ku malu adi ne mushinga mu nsombelu webe. Bikengela kuditeka pa muaba wa kumpala.

Yehowa mmusue bua udifile bikole kudi muena dibaka nebe ne nuikale ne ‘disanka mu nsombelu’ pamue. (Muambi 9:9) Yehowa udi uleja patoke ne: kuena ne bua kulengulula muena dibaka nebe to, kadi nudi ne bua kukeba mishindu ya nuenu kusankishangana. (1 Kolinto 10:24) Muena dibaka nebe adimone ne: udi nende dijinga ne udi umuangata ne mushinga.

TSHIUDI MUA KUENZA:

  • Ikala mutuishibue ne: misangu ne misangu utu upitshisha dîba pamue ne muena dibaka nebe, ne umuleja muudi mumunange ne muoyo mujima

  • Ikala wakula ne: “tuetu” pamutu pa “meme”

ULAME MUTSHIMA WEBE

TSHIDI BIBLE WAMBA: “Muntu yonso udi utungunuka ne kutangila mukaji mu mushindu wa kumvua dijinga dia kusangila nende, ukadi muende nende masandi mu muoyo wende.” (Matayi 5:28) Muntu yeye mutungunuke ne kuela meji a malu mabi, mmupange lulamatu kudi muena dibaka nende mu mushindu kampanda.

Yehowa udi wamba ne: udi ne bua kulama “mutshima webe.” (Nsumuinu 4:23; Yelemiya 17:9) Bua kuenza bualu ebu bimpe, udi ne bua kulama mêsu ebe. (Matayi 5:29, 30) Londa tshilejilu tshia Yobo uvua mudie tshipungidi ne mêsu ende bua kubenga kutangila mukaji mukuabu ne majinga mabi. (Yobo 31:1) Ikala mudisuike bua kubenga kutangila malu a porno. Angata dipangadika dia kubenga kuenzelangana malu a mananga ne muntu mukuabu udi kayi muena dibaka nebe to.

TSHIUDI MUA KUENZA:

  • Umvuija bantu bakuabu bimpe ne: udi ne lulamatu lukole kudi muena dibaka nebe

  • Umvua dijinga didi nadi muena dibaka nebe, ne kosa dipetangana dionso didi mua kunyingalaja muena dibaka nebe