Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bukalenge bua Nzambi budi bukokesha

 NSHAPITA 22

Bukalenge budi bukumbaja disua dia Nzambi pa buloba

Bukalenge budi bukumbaja disua dia Nzambi pa buloba

BUALU BUNENE BUDI MU NSHAPITA EU

Bukalenge budi bukumbaja malu onso adi Nzambi mulaye bua bantu ne buloba

1, 2. a) Bua tshinyi bidi misangu mikuabu mua kukola bua kumona Mparadizu bu bualu bulelela? b) Ntshinyi tshidi mua kutuambuluisha bua kukolesha ditabuja dietu mu milayi ya Nzambi?

MUANETU kampanda wa balume wa lulamatu mmufike mu bisangilu mutshioke panyima pa diyumbakana bikole dituku dijima. Mfumuende wa mudimu udi umutatshisha bikole bua kuenzaye mudimu mupite bungi, udi ne lutatu bua kukumbajila bena mu dîku diende majinga abu, ne usumpakana bua kusama kua mukajende. Padi musambu wa kumpala utuadija, udi umina kapepe utukija mioyo, ne disanka bua mudiye mu Nzubu wa Bukalenge ne bena Kristo nende. Musambu au ngua ditekemena dia muoyo mu Mparadizu; mêyi a musambu au adi amulomba bua atete kumona ditekemena adi mu lungenyi luende, adimone yeye muine mu Mparadizu amu. Mmusambu utuye yeye muine munange, nunku padiye uwimba pamue ne dîku diende, ditekemena didi dimujuka mu muoyo wende uvua ulubakana.

2 Ukadiku mumvue pebe nanku anyi? Ke mukadi ba bungi ba kutudi bumvue. Tshidibi, nsombelu wa mu bulongolodi bua kale ebu udi mua kukola, kutupangisha mua kumona Mparadizu utshilualua bu bualu bulelela. Tudi mu “bikondo bibi bidi bikole mua kupita nabi,” ne katuena mua kufuanyikija bulongolodi butudi lelu ne Mparadizu to. (2 Tim. 3:1) Ntshinyi tshiatuambuluisha bua kumona ne: tshitudi batekemene etshi ntshilelela? Ntshinyi tshidi tshituleja ne: Mu katupa kîpi emu, Bukalenge bua Nzambi bukadi pa kukokesha bukua bantu? Tuanji kukonkonona milayi mikese ya buprofete ya kudi Yehowa ivua bantu bende bamone mikumbane bikondo bia kalekale. Pashishe netumone mudi milayi ayi ne mikuabu idi mifuanangane nayi yenda ikumbana mu mushindu wa dikema lelu eu. Ku ndekelu, ditabuja dietu dimane kukola nanku, netuimanyine pa tshidi milayi ya buprofete eyi yumvuija bua matuku etu atshilualua.

Muvua Yehowa mukumbaje milayi yende kalekale

3. Ndilaya kayi diakakolesha bena Yuda bavua ku bupika mu Babilona?

3 Fuanyikijabi nsombelu uvua nende bena Yuda bavua ku bupika mu Babilona mu bidimu bia 500 kumpala kua Yezu. Ba bungi bavua bakolele mu bupika anu bu baledi babu, ne nsombelu uvua mukole. Bena Babilona bavua babaseka bua ditabuja divuabu nadi kudi Yehowa. (Mus. 137:1-3) Munkatshi mua makumi a bidimu, bena Yuda ba lulamatu bavua anu balamate ku ditekemena dilenga dia se: Yehowa uvua mulaye bua kusangisha  bantu bende tshia kabidi mu ditunga diabu. Yehowa wakamba ne: nsombelu uvua ne bua kuikala muimpe. Wakafuanyikija mene ditunga dia Yuda diasulula ne budimi bua Edene, mmumue ne: Mparadizu! (Bala Yeshaya 51:3.) Milayi eyi ivua milongolola bua kupesha bantu ba Nzambi dishindika, ibumbusha dielakana divua mua kuikala dilubakaja mioyo yabu. Mmushindu kayi? Tukonkononayi imue milayi misunguluke.

4. Mmunyi muvua Yehowa mupeteshe bena Yuda ditekemena dijalame dia kubakuba mu ditunga diabu?

4 Bukubi. Pavuabu bapingana, kabavua bapingana mu Mparadizu mulelela to, kadi mu ditunga dia kule divua dishale tshipela munkatshi mua bidimu 70, ditunga divua bamue ba kudibu kabayi banji kumona to. Nyama ya ntambue ivua mu matunga muvuabu bafundile Bible, nansha mbua ya dîtu, nkashama ne nyama mikuabu itu idiangana. Tatu wa dîku uvua mua kudiebeja ne: ‘Nenkube mukajanyi ne bana banyi ku njiwu mushindu kayi? Kadi mikoko yanyi ne ngombe?’ Muntu yonso uvua anu mua kusamisha mutu nanku. Kadi elabi meji bua tshivua Nzambi mulaye mu Yeshaya 11:6-9 ne mushindu uvuatshi mua kuikala tshikoleshe bantu! (Bala.) Yehowa wakabajadikila mu mêyi mimpe a kasala ne: uvua ne bua kubakuba bobu ne bimuna biabu. Ntambue uvua mua kudia bisonsa mu ngumvuilu wa se: kavua mua kudia bimuna bia bena Yuda nansha. Bena lulamatu kabavua ne tshia kutshina nyama itu idiangana ayi to. Yehowa uvua mulaye ne: uvua ne bua kukuba bantu bende mu ditunga diasulula dia Yuda, nansha mu bipela ne mu metu.—Yeh. 34:25.

5. Mmilayi kayi yakambuluisha bantu bakafuma mu bupika bua kuitaba ne: Yehowa uvua mua kubapa bintu bivule?

5 Divulangana dia bintu. Tatu wa dîku uvua mua kudiebeja kabidi ne: ‘Nenkokeshe bua kudisha dîku dianyi mu ditunga dituapingana adi anyi? Netusombele penyi? Nemuikale mudimu wa tuetu kuenza anyi? Wowu au newikale mupite midimu ya bupika idibu batukengesha nayi kudi bakatukuata ku bupika eyi anyi?’ Kadi nkonko yonso eyi kabidi Yehowa wakayandamuna ne meji mimpe ku diambuluisha dia milayi ya buprofete ivuaye mufile. Yehowa wakalaya ne: bantu bende bavua bamutumikila, mvula ivua ibafikila anu pa dîba diayi; nunku, buloba buvua ne bua kupatula biakudia “bia bungi.” (Yesh. 30:23) Bua nzubu ne mudimu muimpe, Yehowa wakalaya bantu bende ne: ‘Nebase nzubu, nebashikamamu; nebatentule mionji ya tumuma tua mvinyo mu madimi, nebadie tumuma tuayi. Kabena basa nzubu bua mukuabu abuelamu; kabena bakuna bintu bua mukuabu abidie.’ (Yesh. 65:21, 22) Bushuwa, nsombelu uvua mua kulengela kupita wa mu bupika muvuabu mu Babilona wa bantu bavua kabayi batendelela Nzambi. Kadi netuambe tshinyi bua bilumbu binene bia kumpala bivua bibafikishe ku diya mu bupika?

6. Mmasama kayi akavua nawu bantu ba Nzambi bidimu bia bungi kumpala? Kadi ntshinyi tshivua Yehowa mujadikile bakafuma mu bupika?

6 Malanda ne Nzambi. Bidimu bia bungi kumpala kua bantu ba Nzambi kuyabu mu bupika, malanda abu nende avua manyanguke. Yehowa wakambambila ku diambuluisha dia muprofete Yeshaya ne: ‘Mutu wonso udi usama, mutshima wonso udi mupungile.’ (Yesh. 1:5) Bavua bampofo ne bampudimatshi mu nyuma, bualu bavua batungunuka ne kubenga kuteleja mibelu ya Yehowa ne kukanga mêsu abu ku butoke buvuaye ubatumina. (Yesh. 6:10; Yel. 5:21; Yeh. 12:2) Bu malu au mua kufikila  bavua bafuma mu bupika, mbukubi kayi buvuabu mua kuikala nabu? Bavuaku anu mua kujimija dianyishibua kudi Yehowa anyi? Yehowa wakabalaya mu mêyi avua abakankamija aa ne: ‘Mu dituku adi badi ne mapapa nebumvue mêyi a mu mukanda, ne mêsu a bafofo neamone mu mufitu ne mu mîdima.’ (Yesh. 29:18) Bushuwa, Yehowa uvua ne bua kuondapa mu nyuma bantu bende bavuaye munyoke bavua banyingalale bua mibi yabu. Misangu yonso ivuabu mua kulonda dîyi diende ne kumutumikila, uvua mua kubapesha butoke ne mibelu ya mua kushala ne muoyo.

7. Milayi ivua Nzambi mulaye bantu bende mu bupika yakakumbana mushindu kayi? Bua tshinyi mbimpe dikumbana diayi adi dikoleshe ditabuja dietu?

7 Yehowa uvuaku mukumbaje milayi yende anyi? Tudi tupeta diandamuna mu bivua bienzeke kale. Wakakuba bena Yuda bavua bapingane mu ditunga diabu, kubavudijila bintu ne kubambuluisha mu nyuma. Tshilejilu, Yehowa wakabakuba kudi bisamba biena mutumba bivua bibapite ku bukole ne ku bungi. Nyama itu idiangana kayakajikija bimuna bia bena Yuda to. Bushuwa, bena Yuda abu bakamona anu dikumbana dikese dia milayi ya buprofete ya malu a mu Mparadizu ivua bantu bu mudi Yeshaya, Yelemiya, ne Yehezekele bafunde. Kadi dikumbana dia milayi divuabu bobu bamone adi divua dibasankishe bikole ne ke divuabu nadi dijinga tshikondo atshi. Patudi tuelangana meji a tshivua Yehowa muenzele bantu bende mu tshikondo atshi, ditabuja dietu didi dikola. Bikala dikumbana dikese dia kumpala dia milayi ya buprofete ayi dipeteshe bantu disanka, netuambe tshinyi bua dikumbana diayi dinene? Tumonayi tshikadi Yehowa mutuenzele lelu.

Muakatuadija Yehowa kukumbaja milayi yende matuku etu aa

8. Bantu ba Nzambi lelu badi basankila mu “buloba” anyi ditunga dia mushindu kayi?

8 Lelu, bantu ba Yehowa kabena benza tshisamba tshiena dîna anyi badisombele nkayabu mu ditunga kampanda to. Kadi bena Kristo bela manyi badi benza bobu tshisamba tshia mu nyuma, anyi “Isalele wa Nzambi.” (Gal. 6:16) Balunda babu ba mu “mikoko mikuabu” mbabuele nabu mu “buloba” anyi ditunga dia mu nyuma, mmumue ne: mu Mparadizu wa mu nyuma mudibu batendelela Yehowa Nzambi mu buobumue. Ntendelelu au ke wabu nsombelu mujima. (Yone 10:16; Yesh. 66:8) Kadi ‘mbuloba’ anyi ditunga dia mushindu kayi didi Yehowa mutupeshe? Mmparadizu wa mu nyuma. Milayi ya Nzambi bua nsombelu mulenga mufuanangane ne wa mu Edene mmikumbane mu nyuma mu mushindu wa dikema. Tumonayi bimue bilejilu.

9, 10. a) Mmunyi mudi mulayi wa mu Yeshaya 11:6-9 wenda ukumbana lelu? b) Ntshijadiki kayi tshidi tshileja ne: ditalala didi munkatshi mua bantu ba Nzambi?

9 Bukubi. Mu mulayi wa buprofete udi mu Yeshaya 11:6-9 mudi mêyi adi aleja diumvuangana ne ditalala pankatshi pa nyama ya tshisuku ne bantu ne nyama itubu bamuna. Mêyi au adiku apeta dikumbana diawu dia mu nyuma lelu anyi? Eyowa! Mvese wa 9 udi utuleja tshiafikisha nyama ya mushindu eu ku dibenga kuenzelangana kabidi bibi, wamba ne: ‘Bualu bua buloba nebuikale buwule tente ne kumanya kua Yehowa, bu mudi mâyi a mu mâyi manene abuikila miaba yawu yonso.’ “Kumanya kua Yehowa” kudi mua kushintulula bikadilu bia nyama anyi? Tòo, bantu ke batu bashintuluka padibu bafika ku dimanya Nzambi Mutambe Bunene ne balonga mua kuidikija bienzedi biende bia ditalala. Ke bualu kayi mu Mparadizu wetu wa mu  nyuma lelu, tudi tumona dikumbana dia mulayi eu mu mushindu udi wenza disanka. Mu bukokeshi bua Bukalenge, bayidi ba Kristo badi balonga mua kulekela luonji ne ngikadilu ya nyama, ne mua kusomba mu ditalala ne mu diumvuangana ne bena Kristo nabu.

10 Tshilejilu, mu mukanda eu, tudi bakule bua dibenga kubuelakana mu mvita ne mu malu a tshididi, tuetu kumona mvese idi ituambuluisha bua kumvua bualu ebu ne mukadibu bakengeshe bantu ba Nzambi padibu babenga kubuelakana mu malu aa. Kabienaku bikemesha bua kumona ne: nansha mu buloba budi buwule ne malu a tshikisu ebu, kudi “tshisamba” tshia bantu tshidi tshibenga kudibueja mu malu a tshikisu a mishindu yonso, nansha mioyo yabu mikale mu njiwu anyi? Bualu ebu ntshijadiki tshinene tshia ne: bushuwa bena dia Bukalenge bua Masiya badi mu ditalala dia buena divua Yeshaya muleje. Yezu wakaleja ne: bavua ne bua kumanyina bayidi bende ku dinanga divuabu ne bua kuikala nadi munkatshi muabu. (Yone 13:34, 35) Mu tshisumbu, Kristo udi ulongesha bena Kristo balelela bonso ku diambuluisha dia ‘mupika wa lulamatu udi mudimuke’ ne lutulu luonso bua kuikala mu ditalala ne dinanga, ne mua kuikala bena malu malenga.—Mat. 24:45-47.

11, 12. Nnzala ya mushindu kayi idi nayi bena panu lelu? Kadi Yehowa mmuvudijile bantu bende biakudia mushindu kayi?

11 Divulangana dia bintu. Bena panu badi bakenga ne nzala ya mu nyuma. Bible wakadimuija ne: ‘Mukalenge Yehowa udi wamba ne: Monayi, mu matuku alualua, nentume tshiyole pa buloba tshidi katshiyi bu tshiyole tshia biakudia, ne nyota idi  kayiyi bu nyota ya mâyi, kadi tshiyole tshia kumvua mêyi a Yehowa.’ (Amo. 8:11) Bena dia Bukalenge bua Nzambi badiku pabu bakenga ne nzala anyi? Yehowa wakalaya dishilangana pankatshi pa bantu bende ne pa baluishi bende ne: ‘Tangilayi, bantu banyi nebadie, kadi nuenu nenuikale ne nzala; tangilayi, bantu banyi nebanue, kadi nuenu nenuikale ne nyota; tangilayi, bantu banyi nebasanke, kadi nuenu nenufuishibue bundu.’ (Yesh. 65:13) Kutuku muanji kumona dikumbana dia mêyi aa anyi?

12 Biakudia bia mu nyuma bidi bitupuekela anu bu mâyi a musulu udi wenda udiundadiunda ne wondoka. Mikanda yetu ya malu a mu Bible, bande, filme, bisangilu bietu ne mpuilu, bintu bidibu bela mu site wetu wa Enternete; bionso ebi bidi munkatshi mua biakudia bia mu nyuma bidi bienda bipongoloka mu buloba ebu budi benamu bakenga ne nzala ya mu nyuma. (Yeh. 47:1-12; Yoe. 3:18) Kuenaku ne disanka bua kumona dikumbana dia milayi ya Yehowa idi itangila divulangana dia bintu mu nsombelu webe wa dituku dionso anyi? Utuku mutuishibue ne: utu ne tshibidilu tshia kudia ku mêsa a Yehowa anyi?

Bisumbu bietu bidi bituambuluisha bua kudia bimpe mu nyuma, bitukuba, ne bitulama mu malanda mimpe ne Nzambi

13. Mmunyi muudi mumone dikumbana dia mulayi wa Yehowa wa ditabala dia mêsu a bampofo ne dijikuka dia matshi a bampudimatshi?

13 Malanda ne Nzambi. Lelu eu masama a bumpofo ne bumpudimatshi bua mu nyuma mmatangalake bikole. (2 Kol. 4:4) Kadi Yezu udi wenda wondopa masama a mishindu yonso pa buloba bujima. Ukadiku mumone mêsu a bampofo matabale ne matshi a bampudimatshi majikuke anyi? Biwikala ukadi mumone bantu bafike ku dimanya dijalame dia bulelela bua mu Dîyi dia Nzambi, balekela mashimi a mu bitendelelu avua mafofomije mêsu abu ku bulelela ne mashipe matshi abu bua kaumvu bulelela, nanku ukadi mumone dikumbana dia mulayi eu: ‘Dituku adi badi ne mapapa nebumvue mêyi a mu mukanda, ne mêsu a bafofo neamone mu mufitu ne mu mîdima.’ (Yesh. 29:18) Pa buloba bujima, bantu binunu nkama ne nkama badi bapeta luondapu lua mu nyuma elu tshidimu tshionso. Muntu yonso udi wela Babilona Munene nyima ne ulua kutendelela netu mu Mparadizu wa mu nyuma udi tshijadiki tshinene tshia se: milayi ya Yehowa mmikumbane!

14. Ndielangana meji a tshijadiki kayi diakolesha ditabuja dietu?

14 Nshapita yonso wa mu mukanda eu udi ne bijadiki bikole bidi bileja ne: Kristo mmubueje bayidi bende mu Mparadizu mulelela wa mu nyuma mu matuku a ku nshikidilu aa. Tutungunukayi ne kuelangana meji a mishindu ya bungi itudi babeneshibue mu Mparadizu eu lelu. Patudi tuenza nanku, ditabuja dietu mu milayi ya Yehowa bua matuku atshilualua neditungunuke ne kukola.

“Bukalenge buebe bulue”

15. Ntshinyi tshidi tshitujadikila ne: buloba ebu nebulue Mparadizu?

15 Dijinga dia Yehowa ditu dia kuvuija buloba bujima Mparadizu. Wakateka Adama ne Eva mu budimi buvua Mparadizu, ne kubatuminaye dîyi bua kuwuja buloba ne bana babu ne kulama bifukibua bionso bivuamu. (Gen. 1:28) Kadi Adama ne Eva bakalonda Satana mu buntomboji buende, kufikishabu bana babu ku dipanga bupuangane, ku bubi, ne ku lufu. Nansha nanku, dijinga dia Nzambi ki ndishintuluke to. Pakadiye anu  mupatule mêyi mukana muende, atu anu misangu yonso akumbana onso. (Bala Yeshaya 55:10, 11.) Nunku, tuikale bajadike ne: tunkanunuina tua Adama ne Eva netuwuje buloba ebu ne netubukokeshe, tulama bifukibua bionso bia Yehowa bikala mu Mparadizu pa buloba bujima bimpe. Dîba adi, milayi ya nsombelu wa buena wa mu Mparadizu yakanjibu kulaya bena Yuda bavua mu bupika neyipete dikumbana diayi dia ndekelu! Tumonayi bilejilu bidi bilonda ebi.

16. Bible mmumvuije bukubi butuikala nabu mu Mparadizu mushindu kayi?

16 Bukubi. Ndekelu wa bionso, mêyi mimpe adi mu Yeshaya 11:6-9 neakumbane mu kabujima kawu nansha ku mubidi. Balume, bakaji, ne bana nebendakane pa buloba apa miaba yonso mu ditalala kakuyi njiwu to. Tshifukibua nansha tshimue katshiakubabunda to, nansha muntu anyi nyama. Anji elabi meji bua dîba diwikala umona buloba ebu bujima bu kuebe, bu muaba uudi mua kuowela mu misulu, mu majiba, ne mu mbuu; bu muaba uudi mua kukosolola pa mikuna, ne kutambakana mu mpata ya bisuku kakuyi tshidi tshikuenzela bibi! Kabidi kuakumvua buôwa nansha padi butuku buila. Mêyi a mu Yehezekele 34:25 neakumbane, bilua mene bipepele ne bua bantu ba Nzambi ‘kushikama talalaa mu tshipela ne kulala tulu muitu’ kakuyi bualu.

17. Ntshinyi tshidi mua kutushindikila ne: Yehowa neatukumbajile majinga ne bintu bivule pabanga Bukalenge kukokesha buloba bujima?

17 Divulangana dia bintu. Tetabi kumona mu meji tshikondo tshikala malu bu mudi bupele, ndilu mubi, biyole bia nzala, anyi ndongoluelu ya diambuluisha bakengi kabitshiyiku. Biakudia bipite bungi bia mu nyuma bidi bantu ba Nzambi nabi lelu ntshijadiki tshia ne: Mukalenge Masiya neadishe bantu bende mu mishindu yonso. Pavua Yezu pa buloba apa, wakaleja tshilejilu tshikese tshia mudiye mua kukumbaja milayi eyi, bualu wakadisha bantu binunu bavua ne nzala anu ne mampa makese ne mishipa mikese patupu. (Mat. 14:17, 18; 15:34-36; Mâko 8:19, 20) Pabanga Bukalenge bua Nzambi kukokesha buloba bujima, nekuikale dikumbana dilelela dia milayi ya buprofete ya buena eu: ‘Yeye neakutumine mvula bua maminu ebe audi ukuna mu buloba, ne bidia bia ku matete adi buloba budiundisha nebikale ne manyi, nebikale bia bungi. Mu dituku adi bimuna biebe nebidie mashinde mu madimi manene.’—Yesh. 30:23.

18, 19. a) Mulayi wa mu Yeshaya 65:20-22 udi ne diumvuija kayi kuudi wewe? b) Mmu ngumvuilu kayi muikala matuku etu “bu mudi matuku a muoyo wa mutshi”?

18 Bantu ba bungi lelu eu kabatu nansha bateta kuela meji a kuikala ne wabu muaba muimpe wa kusomba anyi a kuikala ne mudimu muimpe udi ubasankisha to. Mu ndongoluelu munyanguke eu, ba bungi mbamone ne: badi benza mudimu mukole wa mêba a bungi kadi kabayi nansha bapeta difutu dia nsongo didi mua kubambuluisha bobu anyi mêku abu to, eku babanji ne bena lukuka bapeta bobu bia bungi. Fuanyikijabi muikala malu pakumbana mulayi eu pa buloba bujima: ‘Nebase nzubu, nebashikamamu; nebatentule mionji ya tumuma tua mvinyo mu madimi, nebadie tumuma tuayi. Kabena basa nzubu bua mukuabu abuelamu; kabena bakuna bintu bua mukuabu abidie; bualu bua bu mudi matuku a muoyo wa mutshi mbu mudi matuku a bantu banyi, ne bantu bangakusungula nebasanke musangu mule mu mudimu wa bianza biabu.’—Yesh. 65:20-22.

19 Mêyi a ne: matuku etu neikale “bu mudi matuku a muoyo wa mutshi” adi umvuija tshinyi? Paudi wimana kuinshi kua  mutshi munene mule, welangana meji a bungi bua bidimu bikadiwu muenze muaba awu, imue misangu ni ukavuaku kumpala kua bakambua bebe kuledibua, kabienaku bikukemesha anyi? Udi mua kuela meji ne: bu wewe mua kushala anu ne dipanga bupuangane diudi nadi mpindieu, mutshi eu udi mua kushalaku too ne muwafua, utungunuka anu ne kuikalaku kakuyi lutatu, nansha wewe mumane kufua. Yehowa mmutuleje buimpe buende padiye mutujadikile ne: mu Mparadizu ulualua, matuku etu a muoyo neikale a bungi ne a ditalala! (Mus. 37:11, 29) Dituku nedilue dituikala mua kumona nansha mitshi ikadi milale bidimu bia bungi bu kasonsa kadi kalala matuku makese, katoloka kafua, kadi tuetu batungunuke anu ne muoyo wa tshiendelele!

20. Bena dia Bukalenge badi ne lulamatu nebafike ku dipeta makanda a mubidi mapuangane mushindu kayi?

20 Makanda a mubidi mapuangane. Lelu eu, masama ne lufu bidi bikuata muntu yonso. Mu mushindu kampanda tuetu bonso tudi tusama, tudi ne bubedi bua lufu budibu babikila ne: mpekatu. Buanga bumuepele budiku, mmulambu wa Kristo udi utupikula. (Lomo 3:23; 6:23) Mu Bukokeshi bua Bidimu Tshinunu, Yezu ne bakokesha nende nebenze bua mulambu eu wambuluishe bantu, benda bajimijila bena lulamatu malu onso adi mpekatu mikebele. Mêyi a tshiprofete a Yeshaya neakumbane mu kabujima kawu. Adi amba ne: ‘Muena musoko kena wamba ne: Ndi ne disama, bantu badi bashikamamu nebikale ne mibi yabu mijimijibue.’ (Yesh. 33:24) Fuanyikija tshikondo tshikala muntu nansha umue kayi mpofo, anyi mpudimatshi, anyi mulema. (Bala Yeshaya 35:5, 6.) Kakuena disama nansha dimue diapanga Yezu kuondopa to, nansha dia mubidi, dia mu lungenyi anyi dia kupampakana. Bena dia Bukalenge badi ne lulamatu nebikale ne makanda a mubidi mapuangane!

21. Tshiafikila lufu ntshinyi? Nku tshinyi kudi mulayi eu muikale busambi kuudi?

21 Kadi netuambe tshinyi bua lufu ludi lutukuaka bonso lua masama ludi tshipeta tshia bubi lutudi katuyi mua kuepuka? Au ke “muena lukuna [wetu] wa ndekelu,” muluishi udi bantu bonso bapange bupuangane bapangile mua kutshimuna mpindieu anyi mu matuku atshilualua. (1 Kol. 15:26) Kadi lufu mmuluishi udi utshinyisha Yehowa anyi? Tangila tshikavua Yeshaya muambe: ‘Yeye wakumina lufu tshiendelele; ne Mukalenge Yehowa neakupule binsonji ku mêsu kua bantu bonso.’ (Yesh. 25:8) Udiku umona tshikondo atshi mu lungenyi anyi? Kakuakuikala kabidi malu a dijiikangana, anyi nkita, anyi miadi ya tunyinganyinga nansha! Kadi bantu nebapuekeshe binsonji bia disanka pabakumbajila Yehowa dilaya diende dia kubisha bafue! (Bala Yeshaya 26:19.) Ndekelu wa bionso, mputa bungi tshianana ya kanyinganyinga ivua lufu lutape bantu neyume.

22. Ntshinyi tshienzeka pakumbaja Bukalenge bua Masiya disua dia Nzambi pa buloba?

22 Ku ndekelu kua Bidimu tshinunu, Bukalenge nebuikale bumane kukumbaja disua dia Nzambi pa buloba, nunku Kristo neapingajile Tatuende bukokeshi. (1 Kol. 15:25-28) Pikala bantu balue ndekelu wa bionso bapuangane, nebikale badilongolole bua kutantamena diteta dia ndekelu papatulabu Satana mu dijimba anyi dipangila bukole bua kuenza bualu. Ndekelu wa bionso Kristo neazaze nyoka mubi au ne bonso badi bamutua mu nyima. (Gen. 3:15; Buak. 20:3, 7-10) Kadi bonso bikala  balamate Yehowa ne dinanga dionso nebikale ne malu malenga a dikema kumpala kuabu. Kakuena pamuapa mêyi adi mua kumvuija bualu abu bimpe kupita adi mu tshiambilu kampanda tshia mu Bible aa to; nga mu mulayi eu a ne: bena lulamatu nebapete “budikadidi bua butumbi bua bana ba Nzambi.”— Lomo 8:21.

Bukalenge nebukumbaje milayi yonso ya Yehowa idi itangila bantu ne buloba

23, 24. a) Bua tshinyi milayi ya Nzambi neyikumbane bushuwa? b) Udi mudisuike bua kuenza tshinyi?

23 Milayi eyi ki mmalu a patupu adi bantu batekemena, bajinga, anyi balotakana to. Kadi milayi ya Yehowa neyikumbane bushuwa! Bua tshinyi tudi tuamba nanku? Vuluka mêyi a Yezu atuvua bakonkonone mu nshapita wa ntuadijilu wa mukanda eu. Wakalongesha bayidi bende bua kulomba Yehowa ne: “Bukalenge buebe bulue. Disua diebe dienzeke kabidi pa buloba muomumue ne mu diulu.” (Mat. 6:9, 10) Bukalenge bua Nzambi ki mbualu bufuikakaja mu meji to. Mbukalenge bulelela! Bukadi bukokesha mu diulu mpindieu. Kukadi bidimu lukama mpindieu bidi Bukalenge ebu bukumbaje milayi ya Yehowa mu mushindu utudi tudimuena ne etu abidi mu tshisumbu tshia bena Kristo. Nunku, tudi bashindike ne: milayi ya Yehowa yonso neikumbane palua Bukalenge bua Nzambi kukokesha buloba bujima!

24 Tudi bamanye ne: Bukalenge bua Nzambi nebulue. Tudi bamanye kabidi ne: dîyi dionso dia Yehowa divuaye mulaye nedikumbane. Mbua tshinyi? Bualu BUKALENGE BUA NZAMBI BUDI BUKOKESHA. Lukonko ludi yonso wa kutudi mua kudiela ndua ne: ‘Bukalenge ebu budiku bunkokesha meme anyi?’ Tudienzejayi ne bukole buetu buonso kutuadijila ku mpindieu bua kuikala ne nsombelu wa bena dia Bukalenge badi ne lulamatu bua bukokeshi buabu bupuangane budi kabuyi ne kansungasunga bumone mua kutuambuluisha kashidi ne tshiendelele!