Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bukalenge bua Nzambi budi bukokesha

 NSHAPITA 14

Balamate anu mbulamatadi wa Nzambi nkayende

Balamate anu mbulamatadi wa Nzambi nkayende

BUALU BUNENE BUDI MU NSHAPITA EU

Bu mudi bantu ba Nzambi balamate Bukalenge, badi babenga kubuelakana mu malu a pa buloba

1, 2. a) Ndîyi dinene kayi didi dilombola bayidi ba Yezu too ne lelu? b) Mmunyi muvua baluishi batete bua kututshimuna? Mbipeta kayi bidi bipatuke?

YEZU uvua kumpala kua Pilato, mulumbuluishi wa bukole wa tshisamba tshia bena Yuda, ne wakamba dîyi dinene didi dishale dilombola bayidi bende balelela too ne lelu. Wakamba ne: “Bukalenge buanyi ki mbua pa buloba ebu to. Bu bukalenge buanyi buikale bua pa buloba ebu, bantu banyi bavua mua kuluangana bua tshifidibu kudi bena Yuda to. Kadi bukalenge buanyi ki mbua panu apa to.” (Yone 18:36) Pilato wakashipesha Yezu, kadi ditshimuna edi divua anu bua katupa kîpi. Bakabisha Yezu ku lufu. Bamfumu ba bukalenge bua Lomo bavua ne bukole bakateta bua kujimija bayidi ba Kristo, kadi bakapangila. Bena Kristo bakamuangalaja mukenji wa Bukalenge miaba yonso ya tshikondo atshi.—Kolos. 1:23.

2 Panyima pa dijadikibua dia Bukalenge mu 1914, bimue bisumbu bia basalayi bia bukole bua bungi biende lumu biakateta bua kujimija bantu ba Nzambi. Kadi nansha tshimue katshiakakumbana to. Mbulamatadi ya bungi ne bisumbu bia malu a tshididi biakateta bua kutuenzeja ku bukole bua kubuela mu bimvundu biabu. Bakapangila bua kututapulula. Lelu, bena dia Bukalenge badi mu matunga pamue ne onso a pa buloba. Nansha nanku, tudi mu buobumue bulelela ne bana betu ba pa buloba bujima, badi kabayi babuekana nansha kakese mu malu a tshididi a pa buloba. Buobumue buetu budi tshijadiki tshinene tshia ne: Bukalenge bua Nzambi budi bukokesha ne tshia mudi Mukalenge Yezu Kristo utungunuka ne kulombola, kulengeja ne kukuba bantu bende. Netumone mushindu udiye muenze nunku, ne bimue bia ku bilumbu bia ku tubadi bidiye mutuambuluishe bua kutshimuna bidi bikolesha ditabuja dietu bu mutudi tutungunuka ne kushala ‘katuyi ba pa buloba.’—Yone 17:14.

Tshilumbu tshiakalua ne mushinga

3, 4. a) Mmalu kayi avua menzeke pavua Bukalenge buledibue? b) Bantu ba Nzambi bavua misangu yonso bumvue bimpe tshilumbu tshia kubenga kubuelakana mu malu a panu anyi? Umvuija.

3 Panyima pa diledibua dia Bukalenge, mvita yakenzeka mu diulu ne kuelabu Satana pa buloba. (Bala Buakabuluibua 12:7-10, 12.) Mvita yakenzeka kabidi pa buloba ivua mitete dipangadika dia bantu ba Nzambi. Bavua badisuike bua kulonda tshilejilu tshia Yezu ne kubenga kuikala ba pa buloba.  Kadi ku ntuadijilu, kabavua bumvue bimpe tshivua kubenga kubuelakana mu malu onso a tshididi kulomba to.

4 Tshilejilu, volime VI wa L’Aurore du Millénium * uvuabu bapatule mu 1904, wakakankamija bena Kristo bua kubenga kubuela mu mvita. Kadi bakalejamu ne: bobu bafundishe muena Kristo dîna bua kuya ku mvita, udi ne bua kudienzeja bua kuenza imue midimu idi kayiyi ilomba kuluangana mvita. Biobi kabiyi bikumbane ne bobu bamutume mu mvita, udi ne bua kuikala mushindike ne: ki mmushipe muntu to. Muanetu Herbert Senior wa mu Grande-Bretagne, uvua mutambule mu 1905 udi wakula bua nsombelu uvuaku tshikondo atshi wamba ne: “Kuvua tshibuejakaji tshia bungi munkatshi mua bena Kristo netu bualu, kakuvua mubelu mutoke uvua uleja bikalabi bivua bimpe bua kubuela mu tshiluilu bu musalayi kadi muikale wenza anu midimu idi kayiyi ya kuluangana mvita nansha.”

5. Mmunyi muvua Tshibumba tshia Nsentedi tshia dia 1 ngondo wa 9 wa 1915 tshituadije kuakaja ngumvuilu wetu?

5 Kadi, Tshibumba tshia Nsentedi tshia dia 1 ngondo wa 9 wa 1915 tshiakatuadija kuakaja ngumvuilu wetu mu tshilumbu etshi. Bua bidi bitangila malu avuabu bambe mu mukanda wa Étude des Écritures, tshiakamba ne: “Tudi tudiebeja bikala dibuela mu tshiluilu bua kuenza midimu idi kayiyi ilomba kuluangana mvita dishipa mikenji ya buena Kristo.” Kadi netuambe tshinyi bobu base muena Kristo tshingoma bualu mmubenge bua kuvuala nsukutu peshi kuenza midimu ya busalayi? Tshiena-bualu etshi tshiakaleja ne: “Bidiku bibi bua kuasabu muntu tshingoma bualu mmushale ne lulamatu kudi Mukalenge wa ditalala ne mubenge kushipa mikenji yende anyi? Peshi mbimpe kumuasabu padiye wenzela bakalenge ba pa buloba mudimu ne ubambuluisha mu mushindu kampanda eku upepeja malongesha a Mukalenge wetu wa mu diulu? Ku mishindu ya lufu ibidi eyi, mbimpe kusungula wa kumpala, mmumue ne: kusungula bua kufua bualu udi mulamate Mukalenge wetu wa mu diulu.” Pa kumbusha mêyi avua ne bukole aa, tshibejibeji etshi tshiakajikija tshiamba ne: “Katuena tuenzeja bantu bua kuenza tshitudi bambe etshi to. Tudi bafile lungenyi patupu.”

6. Tshilejilu tshia muanetu Herbert Senior tshidi tshikulongesha tshinyi?

6 Bamue bana betu bakamona ne: bivua bibi bua kubuela mu tshiluilu ne bavua badiakaje bua kutuilangana ne tshionso tshivua mua kubafikila. Herbert Senior utukadi batele wakamba ne: “Buanyi meme, kakuvua dishilangana pankatshi pa kutulula masashi ku matu [mudimu uvua kawuyi ulomba kuluangana] ne kuela mu tshingoma bua kuasa to.” (Luka 16:10) Bu muvua muanetu Senior mubenge kuenza midimu ya busalayi bua kondo kende ka muoyo, bakamuela mu buloko. Yeye ne bana betu bakuabu banayi bavua munkatshi mua bantu 16 bavua babenge midimu ya busalayi bua kondo kabu ka muoyo. Munkatshi muabu muvua bantu ba mu bitendelelu bikuabu bavua mu buloko bua Richmond mu Grande-Bretagne. Bakalua kubabikila ne: ba Richmond 16. Tshikondo kampanda, bakatuma mu musokoko Herbert ne bantu bakuabu bavua bangate dipangadika dia buena diende mu France, miaba ivua mvita. Kuoku aku, bakabakosela tshibawu tshia lufu. Bavua babateke mu mulongo bua kubasa tshingoma, kadi  kabakabashipa to. Pamutu pa kubashipa, bakabakosela buloko bua bidimu 10.

“Ngakafika ku dimona ne: bantu ba Nzambi bavua ne bua kuikala mu ditalala ne bantu bonso nansha mu tshikondo tshia mvita.”—Simon Kraker (Tangila tshikoso tshia 7)

7. Ku ntuadijilu kua Mvita mibidi ya buloba bujima, ntshinyi tshivua bantu ba Nzambi bafike ku dimona?

7 Mu tshikondo tshivua Mvita mibidi ya buloba bujima mituadije, bantu ba Yehowa mu tshibungi bakamanya bimpe tshivua kubenga kubuelakana mu mvita kumvuija ne tshivuabu ne bua kuenza bua kulonda tshilejilu tshia Yezu. (Mat. 26:51-53; Yone 17:14-16; 1 Pet. 2:21) Tshilejilu, Tshibumba tshia Nsentedi tshia dia 1 ngondo wa 11 wa 1939, tshivua ne tshiena-bualu tshia mushinga mukole tshia ne: “Kubenga kubuelakana mu mvita.” Tshiakamba ne: “Mukenji udi ne bua kulombola mpindieu bantu ba Yehowa badiye mudie nabu tshipungidi ngua kubenga kubuelakana nansha kakese mu bisamba bidi biluangana mvita.” Simon Kraker wakalua kuenza mudimu ku biro bietu bia pa buloba bujima ku Brooklyn wakamba bua tshiena-bualu etshi ne: “Ngakafika ku dimona ne: bantu ba Nzambi bavua ne bua kuikala mu ditalala ne bantu bonso nansha mu tshikondo tshia mvita.” Biakudia bia mu nyuma ebi bivua bifidibue pa dîba diabi ne bivua biambuluishe bua kulongolola bantu ba Nzambi ku buluishi bukole buvuabu mua kupeta bua muvuabu balamate Bukalenge.

Buluishi buenze bu “musulu”

8, 9. Mmunyi muvua mêyi a buprofete a Yone makumbane?

8 Mupostolo Yone wakamba mêyi a buprofete uleja ne: panyima pa diledibua dia Bukalenge mu 1914, dragon anyi Satana  Diabolo uvua ne bua kuteta bua kujimija bantu bavua batua Bukalenge bua Nzambi nyama ku mikolo pa kupatula musulu wa mu tshimfuanyi mukana muende. * (Bala Buakabuluibua 12:9, 15.) Mmunyi muvua mêyi a buprofete a Yone makumbane? Kumbukila mu bidimu bia 1920, bavua baluishe bikole bantu ba Nzambi. Anu bu bana betu bakuabu ba bungi bavua ku Nord kua Amerike mu Mvita mibidi ya buloba bujima, bakela muanetu Kraker mu buloko bua muvuaye mulamate Bukalenge bua Nzambi. Nunku mu tshikondo tshia mvita atshi, pa bantu basatu bavuabu bela mu maloko mu États-Unis bua dibenga kubuela mu mvita bua kondo kabu ka muoyo, bantu bapite pa babidi bavua Bantemu ba Yehowa.

9 Diabolo ne bena diende bavua bajinga kunyanga lulamatu lua bena dia Bukalenge miaba yonso ivuabu. Mu Afrike, ku Mputu ne mu États-Unis, bavua baya nabu ku tubadi ne ku bilumbuluidi. Bu muvuabu badisuike bua kubenga kubuelakana mu malu a mvita, bavua babele mu buloko, babakume ne babatape mputa pambidi. Mu Allemange, bakakengesha bantu ba Nzambi bikole bualu bavua babenga bua kuamba ne: “Heil Hitler” peshi kutua mvita nyama ku mikolo. Badi batshinka ne: bavua bele bantu batue ku 6 000 mu buloko mu tshikondo tshia bena Nazi, ne Bantemu bapite pa 1600 ba mu Allemagne ne ba miaba mikuabu bakafua mu bianza bia bantu bavua babakengesha. Nansha nanku, Diabolo wakapangila bua kuenzela bantu ba Nzambi bualu bubi buvua mua kushala kashidi.—Mâko 8:34, 35.

“Buloba” budi bumina “musulu”

10. “Buloba” budi buleja tshinyi? Mmunyi mudibu buakuile bantu ba Nzambi?

10 Mulayi wa buprofete uvua mupostolo Yone mufunde uvua muleje ne: “buloba,” mmumue ne: bisumbu bia mu bulongolodi ebu ne bamue bantu ba bukole bavua ne lungenyi luimpe bavua mua kumina “musulu” wa dikengeshibua, nunku bambuluisha bantu ba Nzambi. Mmunyi muvua mulayi wa buprofete eu mukumbane? Mu makumi a bidimu akalonda Mvita mibidi ya buloba bujima, “buloba” buvua misangu ya bungi butue ku tshia bena dia Bukalenge bua Masiya bavua ne lulamatu. (Bala Buakabuluibua 12:16.) Tshilejilu, tubadi tua bungi tuvua ne bukole tuvua tukuba manême a Bantemu ba Yehowa a kubenga midimu ya busalayi ne kubenga bua kuenza bilele bia buena ditunga pavuabu babalomba bua kubienza. Kumpala, tukonkonone imue mishindu ya ditshimuna idi Yehowa mupeshe bantu bende mu tshilumbu tshia dienza midimu ya busalayi.—Mus. 68:20.

11, 12. Mbilumbu kayi bivua muanetu Sicurella ne Thlimmenos bapete? Ntshipeta kayi tshiakapatuka?

11 États-Unis. Bavua bakoleshe Anthony Sicurella kudi baledi Bantemu. Wakatambula pavuaye ne bidimu 15. Pakakumbajaye bidimu 21, wakaya kudifundisha ku biro bivua bibueja bantu mu mudimu wa busalayi bu muena mudimu wa Nzambi. Bidimu bibidi pashishe, mu 1950, wakenza dilomba dikuabu bua bamufunde bu muntu udi ubenga kubuela mu mvita bua kondo kende ka muoyo. Nansha muvua biro bia lunketu kabiyi bimone bualu bubi mu dilomba diende, Tshibambalu tshia dikosa bilumbu tshiakabenga dilomba diende. Panyima pa muanetu  Sicurella mumane kulumbulula misangu ne misangu, Kabadi kakulu ka mu États-Unis kakapeta tshilumbu tshiende ne kushipaku dipangadika divua kabadi kashadile kangate ne kubingishaku muanetu Sicurella. Dipangadika edi diakambuluisha bua kukosa bilumbu bia bena mu États-Unis bavua babenga kuya mu busalayi bua kondo kabu ka muoyo.

12 Grèce. Mu 1983, bavua bakuate Iakovos Thlimmenos bua dibenga kuvuala nsukutu ne kumukoselabu tshibawu tshia buloko. Pakapatukaye, wakafunda mukanda ulomba bua kuenza mudimu wa dilama makuta, kadi bakabenga dilomba diende bualu ukavua mupete tshilumbu ku kabadi. Wakaya ne tshilumbu etshi ku kabadi, kadi tubadi tua mu Grèce tuakamupisha. Nunku wakaya ne tshilumbu tshiende mu Kabadi kanene ka manême a bantu ka ku Mputu. Mu 2000, tshibambalu tshinene tshia Kabadi aka tshivua tshienza ne bandumbulula 17 bakakosa tshilumbu bamubingisha, bualu ebu buakambuluisha bua kukosa bilumbu bivua bitangila kansungasunga. Kumpala kua kukosabu tshilumbu etshi, mêna a bana betu bapite pa 3 500 ba mu Grèce avua ku tubadi bualu bakavua babuele mu maloko musangu kampanda bua dibenga kubuelakana mu mvita. Panyima pa dipangadika dimpe edi, ditunga dia Grèce diakela mukenji wa kukupula mêna a bana betu ku liste ivua ku tubadi. Pavuabu bashintulule mêyi makulu a ditunga dia Grèce, bakapingaja kabidi mukenji mukuabu uvua upesha bena mu Grèce bonso bukenji bua kuenza midimu ivua kayiyi ya busalayi mukenji ukavuabu bumbushe ndambu wa bidimu kumpala.

“Kumpala kua kubuela mu nzubu wa tshilumbuluidi, ngakasambila Yehowa bikole, meme kumvua muvuaye mumpeshe ditalala.”—Ivailo Stefanov (Tangila tshikoso tshia 13)

13, 14. Mmalongesha kayi atudi mua kupeta mu tshilumbu tshia Ivailo Stefanov ne tshia Vahan Bayatyan?

13 Bulgarie. Mu 1994, Ivailo Stefanov uvua ne bidimu 19 pavuabu bamufunde dîna ku busalayi. Wakabenga bua kubuela mu tshiluilu peshi kuenza midimu ya busalayi ivua kayiyi ilomba kuluangana ivuabu balombola kudi basalayi. Bakamukosela tshibawu tshia buloko bua ngondo 18, kadi wakabenga dipangadika edi, muimanyine pa bunême buvuaye nabu bua kulonda kondo ka muoyo. Ndekelu wa bionso, tshilumbu tshiende tshiakafika ku Kabadi kanene ka manême a bantu ka ku Mputu. Mu 2001, kumpala kua kulumbuluishabu muanetu Stefanov, mbulamatadi wa mu Bulgarie wakela mukenji uvua ukosa tshilumbu tshiende mu buimpe. Mbulamatadi wakabuikidila muanetu Stefanov ne bena mu Bulgarie bonso bavua bajinga kuenza midimu mikuabu ivua kayiyi ya busalayi. *

14 Arménie. Mu 2001, Vahan Bayatyan wakakumbaja bidimu bia kubuela mu busalayi. * Wakaleja muvua kondo kende ka muoyo kakayi kamuitabila bua kuenza mudimu wa busalayi, kadi kabadi nansha kamue ka mu ditunga kakakamubingisha to. Mu ngondo wa 9 wa 2002, wakabuela mu buloko bua bidimu bibidi ne tshitupa, kadi bakamupatula panyima pa ngondo 10 ne tshitupa. Mu tshikondo atshi, wakaya ne tshilumbu tshiende ku Kabadi kanene ka manême a bantu ka ku Mputu, Kabadi aka kakamuteleja. Kadi mu dia 27 ngondo wa 10 wa 2009, Kabadi aka kakamupisha paku. Dipangadika edi diakafikisha bana betu ba mu Arménie bavua ne tshilumbu tshia buena etshi ku didimona bu bashikile. Kadi, Tshibambalu tshinene  tshia Kabadi aku tshiakatangilula tshilumbu etshi. Mu dia 7 ngondo wa 7 wa 2011, Kabadi kakabingisha Vahan Bayatyan. Eu uvua musangu wa kumpala uvua Kabadi kanene ka manême a bantu ka ku Mputu kafike ku ditaba ne: muntu udi ubenga kuenza busalayi bua kondo kende ka muoyo kimanyine pa ditabuja dia tshitendelelu tshiende, badi ne bua kukuba bunême bua budikadidi budiye nabu bua kuleja mmuenenu, bua kuenza malu bilondeshile kondo ka muoyo ne bua mu malu a ntendelelu. Dipangadika edi diakakuba manême a Bantemu ba Yehowa ne a bantu miliyo nkama ya bungi ba mu matunga adi enza Tshipangu tshia ku Mputu. *

Mbapatule bana betu ba mu Arménie mu buloko panyima pa dipangadika dia Kabadi kanene ka manême a bantu ka ku Mputu bua bukenji bua bantu bua kubenga kubuela mu busalayi bua bualu bua ditabuja diabu

Dienza bilele bia buena ditunga

15. Bua tshinyi bantu ba Yehowa batu babenga bua kuenza bilele bia buena ditunga?

15 Bantu ba Yehowa badi bashala balamate Bukalenge bua Masiya padibu babenga kuenza midimu ya busalayi ne babenga ne kanemu bua kuenza bilele bia buena ditunga. Nangananga katshia Mvita mibidi ya buloba bujima yabudika, lungenyi lua buena muetu ndutangalake pa buloba bujima. Mbalombe bena muabu ba mu matunga a bungi bua kutshipa tshieleka  bua kuleja mudibu balamate ditunga diabu pa kuenza dilaya, kuimba musambu wa ditunga peshi kukukuila dibendele dia ditunga. Kadi tuetu tudi balamate Yehowa ne muoyo mujima. (Ekes. 20:4, 5) Kuenza nunku nkutukebele musulu wa ntatu. Nansha nanku, Yehowa mmuenze kabidi mudimu ne “buloba” bua kuminabu imue ya ku ntatu eyi. Tumone imue ya ku mishindu ya ditshimuna minene itudi bapete kudi Yehowa mu tshilumbu etshi ku diambuluisha dia Kristo.—Mus. 3:8.

16, 17. Ntshilumbu kayi tshivua Lillian ne William Gobitas bapete? Tshilumbu tshiabu tshidi tshikulongesha tshinyi?

16 États-Unis. Mu 1940, bantu 8 pa 9 ba ku Kabadi kakulu ka mu États-Unis bakapisha Bantemu ba Yehowa mu tshilumbu tshivuabu babikila ne: Tshilumbu pankatshi pa Gobitis ne tshilongelu tshia mu Minersville. Lillian Gobitas * uvua ne bidimu 12 ne muanabu William uvua ne bidimu 10 bavua basue kushala balamate Yehowa, nunku bakabenga bua kukukuila dibendele peshi kuambulula mutshipu wa dilamata ditunga. Nunku, bakabipata mu tshilongelu. Tshilumbu tshiabu tshiakafika ku Kabadi kakulu, Kabadi kakaleja ne: tshivua tshilongelu tshienze tshivua tshipetangana ne mêyi makulu a ditunga bualu tshivua tshikebesha “buobumue bua ditunga.” Dipangadika edi diakela esanse mu mudilu. Bakipata Bantemu batshivua bana mu bilongelu, Bantemu bakavua bakulumpe bakajimija midimu yabu, ne bakakengesha Bantemu ba bungi kudi bisumbu bia bantu. Mukanda wa L’éclat de notre pays (Angl.) wakaleja ne: “Buluishi buvua Bantemu bapete kumbukila mu 1941 too ne mu 1943 buvua lutatu lukole luvua kaluyi mua kuitabijibua mu malu a ntendelelu luvua luenzeke mu Amerike mu bidimu bia 1900.”

17 Baluishi ba Nzambi bavua batshimune anu bua tshitupa tshîpi. Mu 1943, Kabadi kakulu kakakonkonona tshilumbu tshikuabu tshivua tshifuanangane ne tshia Gobitis. Batu batshibikila ne: Tshilumbu pankatshi pa Barnette ne tshilongelu tshia ku Ouest wa Virginie. Bua musangu eu Bantemu ba Yehowa badi batshimuna ku Kabadi kakulu. Uvua musangu wa kumpala bua mu États-Unis uvua Kabadi kakulu kakose tshilumbu tshimue mu mishindu mishilangane mu lupolu luîpi. Panyima pa dipangadika edi, buluishi buvua bantu ba Yehowa bapeta mu États-Unis buakakepela bikole. Dipangadika edi diakambuluisha kabidi bua kukolesha bukenji buvua nabu bena mu États-Unis bonso.

18, 19. Pablo Barros uvua muambe ne: tshivua tshimuambuluishe bua kushala mukole ntshinyi? Mmunyi mudi batendeledi ba Yehowa bakuabu mua kuidikija tshilejilu tshiende?

18 Argentine. Bavua bipate Pablo uvua ne bidimu 8 ne Hugo Barros uvua ne bidimu 7 mu kalasa mu 1976 bualu bavua babenge bua kuenza mikiya itubu benza bua kubandisha dibendele. Musangu kampanda, mamu uvua mulombodi wa tshilongelu wakasakila Pablo ne kumukuma tshintu ku mutu. Wakindija bana babidi aba munda mua dîba dijima pakapatuka kalasa ujinga bua kubenzeja bua kuenzabu bilele bia buena ditunga. Pablo udi uvuluka diteta edi wamba ne: “Bu Yehowa kayi mungambuluishe, tshivua mua kukumbana bua kutantamena buluishi buvua mua kunyanga lulamatu luanyi to.”

19 Pakafika tshilumbu etshi ku kabadi, nzuji wakitaba dipangadika dia tshilongelu dia kuipata Pablo ne Hugo. Kadi bakaya  ne tshilumbu tshiabu ku Kabadi kakulu ka mu Argentine. Mu 1979, kabadi aka kakashintulula dipangadika dia ku kabadi kashadile kamba ne: “Dinyoka dia [kuipatangana mu kalasa] divua dibengangana ne bukenji bua mu mêyi makulu a ditunga bua kulonga (Kanungu ka 14) ne mudimu udi nawu ditunga wa kulongeshisha bana tulasa tupuekele (Kanungu 5).” Ditshimuna edi diakambuluisha Bantemu bavua bana batue ku 1000. Bakalekela kuipata bana mu tulasa, ne bakuabu bu mudi Pablo ne Hugo, bakabapingaja mu tulasa.

Bantemu bana ba bungi bavua bashale ne lulamatu mu diteta

20, 21. Mmunyi mudi tshilumbu tshia Roel ne Emily Embralinag tshikoleshe ditabuja diebe?

20 Philippines. Mu 1990, bavua bipate Roel Embralinag * uvua ne bidimu 9 ne muanabu wa bakaji Emily uvua ne bidimu 10, pamue ne balongi bakuabu bavua Bantemu batue ku 66 mu tshilongelu bua muvuabu babenge kukukuila dibendele. Leonardo, tatuende wa Roel ne Emily wakateta kuelesha bamfumu ba tshilongelu meji, kadi kabakamumvuila to. Pavua tshilumbu tshienda tshikola, Leonardo wakaya ne tshilumbu ku Kabadi kakulu. Kavua ne makuta nansha ndumbulula uvua mua kumuimanyina to. Bena mu dîku edi bakasambila Yehowa bikole bua abalombole. Mu tshikondo tshionso atshi, bavua  baseka bana ne babapenda. Leonardo wakamona ne: kavua mua kutshimuna to, bualu kavua ne dimanya dia malu a bandumbulula to.

21 Malu akashintuluka pavua Felino Ganal, ndumbulula uvua kumpala wenza mudimu mu tshimue tshia ku bibambalu bia bandumbulula tshivua tshiende lumu muimanyine dîku edi. Mu tshikondo atshi, muanetu Ganal ukavua mumbuke mu tshibambalu tshivuaye wenza mudimu atshi ne ukavua mulue Ntemu wa Yehowa. Pakafika tshilumbu ku Kabadi kakulu, Kabadi kakangata dipangadika dia kubingisha Bantemu ne kushipaku mapangadika a kuipata bana. Kabidi, bantu bavua bakeba kunyanga lulamatu lua bantu ba Nzambi bakapangila.

Dibenga kubuelakana mu malu a tshididi didi difikisha ku buobumue

22, 23. a) Bua tshinyi tudi bafike ku ditshimuna ku tubadi bilumbu bia bungi binene? b) Bu mutudi mu dîku dia bana betu ba pa buloba bujima badi mu ditalala, bualu ebu budi butujadikila tshinyi?

22 Bua tshinyi bantu ba Yehowa mbatshimune bilumbu binene bia bungi ku tubadi? Kabatu batuambuluisha kudi bena tshididi to. Kadi, mu ditunga ne ditunga, ku kabadi ne kabadi, banzuji ba meji mimpe mbatukube kudi baluishi ba muoyo mubi ne mbafike ku diela diakamue mikenji mikuabu mu mêyi makulu a ditunga. Kakuyi mpata, Kristo muambuluishe malu atudi benze ne muetu muonso bua kutshimuna bilumbu ebi. (Bala Buakabuluibua 6:2.) Bua tshinyi tutu tuluangana mvita eyi? Dijinga dietu ki ndia kuakaja mikenji ya matunga to, kadi tshipatshila tshietu ntshia kutungunuka ne kuenzela Mukalenge wetu Yezu Kristo mudimu kakuyi tshipumbishi.—Bien. 4:29.

23 Mukalenge wetu Yezu Kristo mmubeneshe malu adi bayidi bende ba pa buloba benza ne muoyo mujima bua kubenga kubuelakana mu malu a panu nansha mudibu mu bulongolodi budi butapulula kudi bisumbu bia malu a tshididi ne buwule tente ne lukinu. Satana mmuenze muende muonso bua kututapulula ne kututshimuna, kadi mmupangile. Bukalenge mbusangishe bantu miliyo ya bungi badi babenga bua ‘kuyila lungenyi lua kuluangana mvita kabidi.’ Dikala dietu mu dîku dia bana betu ba pa buloba bujima badi mu ditalala ntshishima; bualu ebu budi tshijadiki tshitambe bunene tshia mudi Bukalenge bua Nzambi bukokesha.—Yesh. 2:4.

^ tshik. 4 Bavua babikila kabidi volime eu ne: La Nouvelle Création. Bakalua kubikila mukanda wa L’Aurore du Millénium ne: Étude des Écritures.

^ tshik. 8 Bua kumanya malu a bungi a mulayi wa buprofete eu, bala mukanda wa Buakabuluibua—Nkomenu wabu munene ukadi pabuipi! nshapita wa 27, dibeji dia 184-186.

^ tshik. 13 Dipangadika divuabu bangate divua kabidi dilomba mbulamatadi wa mu Bulgarie bua kupesha bantu bavua babenga kuenza busalayi bua kondo kabu ka muoyo midimu ya tshianana.

^ tshik. 14 Bua kumanya muyuki eu mujima, bala Tshibumba tshia Nsentedi tshia dia 1/11/2012 dibeji dia 29-31 (Mfual.).

^ tshik. 14 Mu bule bua bidimu 20, mbulamatadi wa mu Armenie uvua muele Bantemu bavua bana bapite pa 450 mu buloko. Bakapatula muntu wa ndekelu wa ku bantu aba mu buloko mu ngondo wa 11 wa 2013.

^ tshik. 16 Bavua bafunde dîna diende dia mu dîku ne tshilema mu mikanda ya ku kabadi.

^ tshik. 20 Bavua bafunde dîna diende dia mu dîku ne tshilema mu mikanda ya ku kabadi ne: Ebralinag.