Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

TSHISAKIDILA

Yezu utu muledibue mu ngondo wa dikumi ne muibidi anyi?

Yezu utu muledibue mu ngondo wa dikumi ne muibidi anyi?

BIBLE kêna utuambila dituku diakalelabu Yezu to. Tshidibi, udi utuambila malu adi aleja ne: Yezu katu muledibue mu ngondo wa dikumi ne muibidi to.

Tangila mutu malu mu Betelehema mu ngondo wa dikumi ne muibidi. Kuvua mashika ne mvula ya bungi mu ngondo wa bena Yuda wa Chislev (udi umvuangana ne wetu ngondo wa dikumi ne umue too ne wa dikumi ne muibidi). Ngondo uvua umulonda wa Tebeth (wa dikumi ne muibidi too ne wa kumpala) ke ngondo wa mashika makole ku yonso, neje uvua uloka imue misangu pa miaba ivua mitumbuke. Kadi tumonayi mpindieu tshidi Bible wamba pa mushindu uvua pambelu mu Betelehema.

Ezela (umue wa ku bafundi ba Bible) udi wamba ne: ngondo wa Chislev uvua mumanyike bua mashika ne mvula. Tshilejilu, padi Ezela ujikija kuleja muvua bantu badisangishe mu Yelushalema ‘mu dituku dia makumi abidi dia ngondo wa tshitema [Chislev],’ udi wamba ne: bantu bavua ‘bazakala bua mvula munene.’ Bantu bavua balue mu Yelushalema bobu nkayabu bakamba ne: ‘Etshi ntshikondo tshia mvula ya bungi, katuena mua kuimana pambelu to.’ (Ezela 10:9, 13; Yelemiya 36:22) Nunku mu ngondo wetu wa dikumi ne muibidi, balami ba mikoko bavua mu Betelehema ne misoko ya pa mpenga kabavua mua kushala pambelu bobu ne mikoko yabu butuku to!

Balami ne mikoko yabu

Balami ba mikoko ne bimuna biabu bavua pambelu butuku buakalelabu Yezu

Pabi Bible udi wamba ne: balami bavua ne mikoko yabu mu mpata butuku buakalelabu Yezu. Luka (mufundi mukuabu wa Bible) udi wamba ne: pakaledibua Yezu, balami ba mikoko bavua pamue ne Betelehema ‘bavua balale mu mpata balama mikoko yabu.’ (Luka 2:8-12) Bible udi wamba ne: balami ba mikoko bavua balale pambelu, kabavua benda bendakana mu munya to. Bavua ne mikoko yabu mu mpata butuku. Malu aa adi umvuangana ne mashika makole ne mvula ya bungi ya mu Betelehema ya mu ngondo wa dikumi ne muibidi anyi? Tòo. Nunku malu avua menzeke pakalelabu Yezu adi aleja ne: kavua muledibue mu ngondo wetu wa dikumi ne muibidi eu to.*

Bible udi utuleja bimpe dituku diakafua Yezu, kadi anu malu makese bua dituku diakamulelabu. Bualu ebu budi butuvuluija mêyi a Mukalenge Solomo aa: ‘Dîna dimpe didi dipita manyi a mushinga mukole buakane, dituku dia lufu ndipite dia kuledibua bulengele.’ (Muambi 7:1) Ke bualu kayi kabiena bitukemesha padi Bible utuambila malu a bungi adi atangila mudimu ne lufu lua Yezu kadi eku utuambila anu malu makese pa diledibua diende.


*  Udi mua kupeta makuabu malu mu mukanda wa Comment raisonner à partir des Écritures mu dibeji dia 162-164, mupatula kudi Bantemu ba Yehowa.

← Tangila nshapita