Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

NSHAPITA WA DIKUMI NE MUISAMBOMBO

Ushale mulamate tshitendelelu tshilelela

Ushale mulamate tshitendelelu tshilelela

Bible utu ulongesha tshinyi bua ditendelela ne bimfuanyi ne ditendelela bakishi?

Mmunyi mutu bena Kristo bamona mafesto a bitendelelu?

Mmunyi muudi mua kumvuija bakuabu malongesha a tshitendelelu tshienu ne bukalanga?

FUANYIKIJA ne: mbanyange muaba unudi basombele. Muntu kampanda mmuimanshe bintu bibi bidi binyange kapepa, ne mpindieu mioyo yenu idi mu njiwu. Newenze tshinyi? Kakuyi mpata, neumuke muaba au kuoku mushindu. Kadi nansha wewe mumane kunyema, newikale anu udiela lukonko elu: ‘Nkadi mupete disama anyi?’

2 Nsombelu wa muomumue udiku pa bidi bitangila bitendelelu bia dishima. Bible utu ulongesha ne: bitendelelu ebi mbinyanga kudi malongesha ne bilele bibi. (2 Kolinto 6:17) Ke bua tshinyi mbimpe upatuke mu “Babulona Munene,” nsangilu wa bitendelelu bionso bia dishima. (Buakabuluibua 18:2, 4) Ukadi mupatukamu anyi? Biwikala ukadi mupatukamu, udi wa kuela kalumbandi. Kadi kutapuluka ne ntendelelu wa dishima anyi kupatukamu ki nkukumbane to, bualu udi anu ne bua kudiebeja ne: ‘Ntshidiku ne malu kampanda a mu tshitendelelu tshia dishima anyi?’ Tangila bimue bilejilu.

BIMFUANYI NE DITENDELELA BAKISHI

Mishindu ya ntendelelu pa buloba

3 Bamue bantu badi ne bimfuanyi anyi ne tushete tua bishadile bia bansantu mu nzubu yabu kukadi bidimu bia bungi. Udi pebe nabi anyi? Wewe nabi, udi mua kumvua bibi paudi usambila Nzambi kuyi nabi to. Udi nansha mua kuikala mubisue bikole. Kadi Nzambi ke udi uleja mutudi ne bua kumutendelela. Bible utu ulongesha ne: Nzambi katu musue tumutendelele ne bimfuanyi to. (Ekesode 20:4, 5; Musambu 115:4-8; Yeshaya 42:8; 1 Yone 5:21) Nunku udi mua kulamata ntendelelu mulelela paudi wimansha anyi wosha bintu bionso bidi mu diumvuangana ne bitendelelu bia dishima. Ubimone anu bu mutu Yehowa ubimona ne: ‘mbintu bibi.’—Dutelonome 27:15.

4 Mu bitendelelu bia bungi batu batendelela bakishi. Kumpala kua kulonga Bible, bamue bavua bamanye ne: bafue badi ne muoyo muaba kampanda ne kabidi badi mua kuambuluisha anyi kuenzela badi ne muoyo bibi. Pamuapa uvua wenza muebe muonso bua kubenga kufiikisha bafue munda. Kadi anu muuvua mulonge mu Nshapita 6, bafue kabena ne muoyo muaba nansha umue to. Nunku, kukeba kuyukila nabu kakuena ne mushinga to. Malu atu amueneka bu adi afumina kudi bafue adi mu bulelela afumina kudi bademon. Ke bualu kayi Yehowa wakakandika bena Isalele bua kuyukila ne bafue anyi bua kubuelakana mu malu a mîdima.—Dutelonome 18:10-12.

5 Biwikala uvua utendelela ne bimfuanyi anyi utendelela bakishi kumpala, udi ne bua kuenza tshinyi? Ubale ne welele meji pa mvese ya mu Bible idi ileja mutu Yehowa umona bintu ebi. Ikala usambila Yehowa dituku dionso bua dijinga diebe dia kushala mu tshitendelelu tshilelela ne umulombe bua akuambuluishe bua wikale wela meji anu bu yeye.—Yeshaya 55:9.

BENA KRISTO BA KUMPALA KABAVUA BENZA NOWELE TO

6 Mafesto a bitendelelu bia dishima adi mua kunyanga ntendelelu wa muntu. Tuangate tshilejilu tshia Nowele. Batu bamba ne: Nowele ndifesto dia diledibua dia Yezu Kristo, ne bitendelelu bitu bidiamba mudibi bia bena Kristo pa kuamba bionso bitu bienza difesto edi. Pabi, kakuena tshidi tshileja ne: bayidi ba Yezu ba kumpala bavua benza difesto edi to. Mukanda kampanda udi wamba ne: “Munkatshi mua bidimu nkama ibidi biakalonda diledibua dia Kristo, kakuvua muntu uvua mumanye dituku divuaye muledibue ne anu bantu bakese ke bavua bakeba “kudimanya mene.”—Sacred Origins of Profound Things.

7 Nansha bu bayidi ba Yezu bamanye dituku divuabu bamulele, kabavua mua kudisekelela to. Bua tshinyi? Bualu bilondeshile mukanda mukuabu, bena Kristo ba kumpala “bavua bamona kusekelela dituku dia diledibua dia muntu bu tshilele tshia bampangano.” (The World Book Encyclopedia) Bible udi utela anu mafesto a dituku dia diledibua a bamfumu babidi bavua kabayi batendelela Yehowa. (Genese 40:20; Mâko 6:21) Bampangano bavua kabidi basekelela matuku a diledibua dia nzambi yabu. Tshilejilu, bena Lomo bavua basekelela diledibua dia nzambi-mukaji Diana mu dituku dia 24 ngondo muitanu, ne mu dia 25 bavua basekelela diledibua dia nzambi-dîba Apollo. Nunku, bampangano ke bavua basekelela matuku a diledibua, ki mbena Kristo to.

8 Kudi bualu bukuabu buvua bena Kristo ba kumpala kabayi basekelela diledibua dia Yezu. Bayidi bende bavua mua kuikala bamanye ne: disekelela matuku a diledibua divua dipetangana ne bitabataba. Tshilejilu, bena Greke ne bena Lomo ba bungi ba kale bavua bitaba ne: kutu nyuma kampanda utuku dîba didibu balela muntu yonso ne utu ulama muntu eu mu matuku ende onso a muoyo. Munga mukanda udi wamba ne: “Nyuma eu uvua mu diumvuangana kampanda ne nzambi uvua muledibue mu dituku dia muomumue ne muntu au.” (The Lore of Birthdays) Kakuyi mpata, Yehowa kavua mua kuanyisha tshilele tshivua tshisuikakaja Yezu ne bitabataba to. (Yeshaya 65:11, 12) Kadi mmunyi muakafika bantu ba bungi ku dienza Nowele?

NTUADIJILU WA NOWELE

9 Bantu bakatuadija kusekelela Nowele mu dituku dia 25 ngondo wa dikumi ne muibidi anu bidimu nkama ya bungi kunyima kua lufu lua Yezu. Kadi adi kadivua dituku divuabu balele Yezu to, bualu bidi bimueneka ne: wakaledibua mu ngondo wa dikumi.* Kadi bua tshinyi bakasungula dituku dia 25 ngondo wa dikumi ne muibidi? Pamuapa bamue bantu bakalua kudiamba pashishe muvuabu bena Kristo “bakajinga ne: dituku edi dipetangane ne dituku dia difesto dia bena Lomo” dia diledibua dia dîba. (The New Encyclopædia Britannica) Mu muvu wa hiver (tshikondo tshia mashika makole), pavua dîba kadiyi dituma luya lukumbane, bampangano bavua benza imue mikiya bua kutuadijadi kutuma luya ne bukenke. Bavua bela meji ne: dîba divua dituadija kualukila ku luendu lule mu dia 25 ngondo wa dikumi ne muibidi. Bua kusaka bampangano ku dikudimuna mitshima, bamfumu ba bitendelelu bakangata difesto edi ne kutetabu kudivuija bu dia “bena Kristo.”#

10 Bantu bakavua bamanye mudi Nowele mufumine kudi bampangano kukadi bidimu bia bungi. Tshilejilu, bakakandika disekelela Nowele mu ditunga dia Angleterre ne bimue bitupa bia mu États-Unis mu bidimu bia 1600 bualu kadivua mu Bible to. Muntu yonso uvua upumbisha ku mudimu dituku dia Nowele uvua upeta dinyoka kampanda. Kadi matuku makese pashishe, bilele bia kale biakapingana ne bikuabu biakaledibua. Nowele wakalua kabidi disanka dinene ne utshidi anu nunku mu matunga a bungi. Kadi bu mudi Nowele mufumine mu bitendelelu bia dishima, aba badi basue kusankisha Nzambi kabatu benza difesto edi anyi makuabu adi afumina kudi bampangano to.%

NTUADIJILU UDI NE BUALU ANYI?

Udi mua kuela mbombo uudi muangule mu butshiafu mukana anyi?

Mbombo mu nkoloji wa mâyi mabi

11 Bamue bantu batu bitaba ne: mafesto bu mudi Nowele nga bampangano, kadi batu bela meji ne: ki mbibi bua kuasekelela to. Bulelela, bantu ba bungi kabatu bela meji ku ntendelelu wa dishima patubu benza mafesto to. Mafesto aa atu kabidi apesha bena mu mêku mushindu wa kukolesha dinanga diabu. Ke muutu umona pebe anyi? Bikalabi nanku, dinanga dia bena mu dîku dienu ke didi dienza ne: bikukolele bua kulamata tshitendelelu tshilelela, ki ndinanga dia tshitendelelu tshia dishima to. Tshidibi, umanye ne: Yehowa ke wakenza dîku ne mmusue bua wikale umvuangana ne balela bebe. (Efeso 3:14, 15) Kadi udi mua kukolesha malanda aa mu mushindu udi Nzambi wanyisha. Mupostolo Paulo wakafunda bua bualu budi ne bua kuikala bua mushinga nunku: “Nusunguluje tshidi tshilengelela Mfumu.”—Efeso 5:10, MMM.

12 Pamuapa udi umona ne: ntuadijilu wa mafesto kêna upetangana ne mushindu udibu baenza lelu to. Kadi ntuadijilu udi ne bualu anyi? Eyowa! Angata tshilejilu: Fuanyikija ne: udi umona mbombo mu butshiafu. Neumuangule bua kuela mukana anyi? Tòo, bualu udi ne manyanu. Anu bu mbombo eu, mafesto adi mua kumueneka mimpe, kadi mmangatshila miaba ya bukoya. Bua wewe kushala mulamate tshitendelelu tshilelela, udi ne bua kumona malu anu bu muprofete Yeshaya, wakambila batendeledi balelela ne: ‘Kanulengi tshintu tshidi tshibipa!’—Yeshaya 52:11.

TUIKALE NE BUSUNGULUJI KUMPALA KUA BANTU

13 Udi mua kupeta bilumbu paudi wangata dipangadika dia kubenga kuenza mafesto aa. Tshilejilu, bena mudimu nebe badi mua kudiebeja tshiudi kuyi ubuelela mu mafesto adibu benza. Bobu bakupeshe tshintu bua Nowele, newenze tshinyi? Mbibi bua kutshiangata anyi? Kadi newenze tshinyi bikala bayebe anyi mukajebe kayi muena kuitabuja nebe? Newenze tshinyi bua bana bebe kabamonyi ne: badi bapangila tshintu tshia mushinga bualu kabena benza mafesto aa?

14 Mbimpe kuikala ne busunguluji bua kumanya tshia kuenza mu nsombelu yonso eyi. Muntu yeye mukujingile difesto dilenga mu lupitapita, udi mua kumuela tuasakidila tshianana. Kadi ela meji ne: mmuntu unudi bibidilangane nende anyi mmuena mudimu nebe. Apu udi mua kusakidila mêyi makuabu. Tshidibi, wikale ne bukalanga. Bible udi utubela ne: ‘Mêyi enu ikale ne ngasa misangu yonso, matue bu luepu, bua nuenu numanye mua kuandamuna muntu ne muntu dîyi.’ (Kolosai 4:6) Wikale amu ne kanemu kudi bakuabu. Wikale ne bukalanga paudi umvuija muntu tshiudi kuyi wenzela mafesto aa. Umumvuije bimpe ne: kutu ubenga dipeshangana bintu anyi mafesto to, kadi utu musue kuenza malu aa matuku makuabu.

15 Newenze tshinyi bikala muntu ukupesha tshintu? Nebilondeshile nsombelu. Muntu eu udi mua kuamba ne: “Ndi mumanye ne: kutu usekelela difesto edi to. Kadi, ndi musue kukupesha tshintu etshi.” Udi mua kudiambila ne: kuitaba tshintu etshi kakuena muomumue ne kuenza difesto nansha. Kadi bikala muntu eu kayi mumanye malongesha a tshitendelelu tshienu, udi mua kumuambila ne: kutu wenza difesto adi to. Bidi mua kuleja tshiudi witabila tshintu atshi kadi kuyi upeshangana pebe bintu dituku adi to. Tshidibi, ki mbimpe kuitaba tshintu tshidibu bakupesha ne lungenyi lua kuleja ne: kuena ulonda malongesha enu anyi udi mua kushipa mikenji yenu anu bua kupeta tshintu kampanda.

NEWENZE TSHINYI KUMPALA KUA BALELA BEBE?

16 Newenze tshinyi bikala bena mu dîku dienu kabayi mu tshitendelelu tshimue nebe? Ikala kabidi ne bukalanga. Kuikadi ukokangana nabu bua tshilele anyi difesto dionso didibu benza to. Kadi unemeke mmuenenu wabu, anu muudi musue bua banemeke webe. (Matayo 7:12) Kuenji tshintu tshidi mua kukubuejakaja mu difesto adi to. Ikala ne nkatshinkatshi padiku malu adi kaayi umvuangana menemene ne difesto edi to. Wikale wenza muebe muonso bua kushala amu ne kondo ka muoyo kimpe.—1 Timote 1:18, 19.

17 Newenze tshinyi bua bana bebe kabamonyi ne: batu bapangila bintu bia mushinga padibu kabayi benza mafesto adi Bible kayi wanyisha? Bidi bilondeshila malu anutu nuenza munkatshi mua tshidimu. Bamue baledi batu balongolola bikondo bia kupesha bana babu bintu. Kadi bintu bitambe bulenga biudi mua kupesha bana bebe ndîba diebe ne dinanga diebe.

USHALE MULAMATE TSHITENDELELU TSHILELELA

Bena dîku batendelela Nzambi

Kushala mulamate tshitendelelu tshilelela nekukupeteshe masanka a bungi be!

18 Udi ne bua kulekela tshitendelelu tshia dishima ne kubuela mu tshilelela bua kusankisha Nzambi. Kulamata tshitendelelu tshilelela kudi kulomba tshinyi? Bible udi wamba ne: ‘Tudielelangane meji muntu ne muntu bua kuenzejangana ku dinanga ne ku dienza dia bienzedi bimpe, katuyi tulekela bietu didisangisha dietu pamue, bu mudi tshilele tshia bakuabu, kadi tukoleshangana mitshima, tutamba kuenza nunku bualu bua nudi numona dituku dia Mukalenge disemena pabuipi.’ (Ebelu 10:24, 25) Bisangilu bia bena Kristo mmushindu mulenga wa kutendelela Nzambi bu mudiye musue. (Musambu 22:22; 122:1) Mu bisangilu ebi mudi ‘disambangana’ pankatshi pa bena Kristo balelela.—Lomo 1:12.

19 Mushindu mukuabu uudi mua kushala mulamate tshitendelelu tshilelela nkuambila bakuabu malu a mu Bible audi ulonga ne Bantemu ba Yehowa. Bualu bantu ba bungi badi “batua mikemu ne badila” bua malu mabi atu enzeka pa buloba lelu’eu. (Yehezekele 9:4, MMM) Udi mua kuikala mumanye bamue bantu badi batua mikemu ne badila nunku. Bua tshinyi kuenaku mua kubaleja ditekemena didi Bible ufila bua matuku atshilualua? Paudi udisangisha ne Bena Kristo balelela ne wambila bakuabu malu malenga audi mulonge mu Bible, neumone ne: dinanga dia malu a mu bitendelelu bia dishima diutshidi nadi nedijike ku kakese ku kakese. Wikale mushindike ne: wewe mushala mulamate tshitendelelu tshilelela newikale ne masanka a bungi.—Malaki 3:10.

TSHITU BIBLE ULONGESHA

  • Mu tshitendelelu tshilelela kamutu ditendelela ne bimfuanyi anyi ditendelela bakishi to.—Ekesode 20:4, 5; Dutelonome 18:10-12.
  • Ki mbimpe kubuela mu mafesto adi mafumine kudi bampangano to.—Efeso 5:10.
  • Bena Kristo balelela batu ne bukalanga patubu bumvuija bakuabu malongesha abu.—Kolosai 4:6.

*  Bala Tshisakidila.

#  Difesto dia Satirnale divua padi dienzeje bua basungule dituku dia 25 ngondo wa dikumi ne muibidi. Bavua benza difesto edi bua kusekelela nzambi wa madimi wa bena Lomo mu dia 17 too ne mu dia 24 ngondo wa dikumi ne muibidi. Mu difesto edi bavua badia, banua, basanka ne bapeshangana bintu.

%  Bua kumanya mudi bena Kristo bamona mafesto makuabu, ubale Tshisakidila.


Nkonko ya dilonga

1, 2. Ndukonko kayi luudi ne bua kudiela wewe mumane kupatuka mu tshitendelelu tshia dishima? Udi wela meji ne: kudiela lukonko elu kudi ne mushinga bua tshinyi?

3. (a) Bible utu wamba tshinyi bua ditendelela ne bimfuanyi? Bua tshinyi bidi mua kukolela bakuabu bua kuitaba mmuenenu wa Yehowa? (b) Udi ne bua kuenza tshinyi ne bintu bionso bidi mu diumvuangana ne bitendelelu bia dishima?

4. (a) Mmunyi mutudi bamanye ne: ditendelela bakishi ndibi? (b) Bua tshinyi Yehowa wakakandika bena Isalele bua kubuelakana mu malu a mîdima?

5. Udi ne bua kuenza tshinyi biwikala uvua utendelela ne bimfuanyi anyi utendelela bakishi kumpala?

6, 7. (a) Batu bamba ne: Nowele ndifesto dia tshinyi? Bayidi ba kumpala ba Yezu bavua badienza anyi? (b) Mu tshikondo tshia bayidi ba Yezu ba kumpala, mbanganyi bavua benza mafesto a matuku a diledibua?

8. Umvuija dipetangana didi pankatshi pa disekelela matuku a diledibua ne bitabataba.

9. Mmunyi muakafikabu ku diangata dituku dia 25 ngondo wa dikumi ne muibidi bu dituku dia diledibua dia Yezu?

10. Bua tshinyi bantu bakuabu kabavua benza Nowele ku kale?

11. Bua tshinyi bantu bakuabu batu benza mafesto? Kadi ntshinyi tshidi ne mushinga mukole?

12. Leja bua tshinyi tudi ne bua kulekela bilele ne mafesto adi afumina miaba mibi.

13. Udi mua kupeta ntatu kayi paudi kuyi ubuela mu mafesto kampanda?

14, 15. Udi mua kuenza tshinyi bikala muntu ukujingila difesto dilenga anyi ukupesha tshintu dituku adi?

16. Mmunyi muudi mua kuikala ne bukalanga mu tshilumbu tshia mafesto?

17. Mmunyi muudi mua kuambuluisha bana bebe bua kabamonyi ne: batu bapangila bintu bia mushinga padibu kabayi benza mafesto kampanda?

18. Mmunyi mudi dibuela mu bisangilu bia bena Kristo mua kukuambuluisha bua kulamata tshitendelelu tshilelela?

19. Bua tshinyi mbimpe kuambila bakuabu malu audi mulonge mu Bible?