Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

NSHAPITA WA DIKUMI NE MUIBIDI

Tuikalayi ne nsombelu udi usankisha Nzambi

Tuikalayi ne nsombelu udi usankisha Nzambi

Mmunyi muudi mua kulua mulunda wa Nzambi?

Mmunyi mudi dielesha mpata dia Satana dia bukenji bua Yehowa bua kukokesha dikutangila pebe?

Mmalu kayi atu abungamija Yehowa?

Mmunyi muudi mua kuikala ne nsombelu udi usankisha Nzambi?

MMUNTU wa mushindu kayi uudi mua kusungula bu mulunda? Kakuyi mpata, udi mua kujinga kusomba ne muntu udi umona malu bu wewe. Udi kabidi mua kusungula muntu udi ne ngikadilu milenga.

2 Kutuadija ku kale, Nzambi utu usungula bamue bantu bua kuikalabu balunda bende banene. Tshilejilu, Yehowa wakabikila Abalahama ne: mulunda wanyi. (Yeshaya 41:8; Yakobo 2:23) Nzambi wakabikila Davidi ne: ‘muntu udi mutshima wanyi musue’ bualu Davidi uvua wenza malu avuaye musue. (Bienzedi 13:22) Yehowa uvua kabidi wangata Danyele bu ‘muntu munangibue bikole.’—Danyele 9:23.

3 Bua tshinyi Yehowa wakasungula Abalahama, Davidi ne Danyele bua kuluabu balunda bende? Tangila tshiakambilaye Abalahama: ‘Wewe wakatumikila dîyi dianyi.’ (Genese 22:18) Nunku Yehowa utu udia bulunda anu ne bantu badi batumikila dîyi diende ne budipuekeshi buonso. Ke bualu kayi wakambila bena Isalele ne: ‘Umvuayi dîyi dianyi, nunku nengikale Nzambi wenu, nuenu nenuikale bantu banyi.’ (Yelemiya 7:23) Wewe utumikila pebe Yehowa, neulue mulunda wende!

YEHOWA UTU WAMBULUISHA BALUNDA BENDE

4 Tangila masanka audi upeta paudi ulua mulunda wa Nzambi. Bible udi wamba ne: Yehowa utu ukeba mua ‘kuleja bukole buende kudi bantu badi ne mitshima miakane kudiye.’ (2 Kulondolola 16:9) Mmunyi mudi Yehowa mua kukuleja bukole buende? Tudi tubala umue wa ku mishindu eyi mu Musambu wa 32:8 ne: ‘Meme Yehowa nenkuyishe lungenyi, nenkuleje njila uudi ne bua kuendela, nenkupe meji patshidi dîsu dianyi kuudi.’

5 Mêyi malenga aa adi aleja mutu Yehowa ukutabalela. Neakuleje njila wa kulonda ne neakulame paudi umulonda. Nzambi mmusue kukuambuluisha bua utantamene ntatu ne mateta audi upeta. (Musambu 55:22) Nunku, wewe usadila Yehowa ne muoyo mujima, newikale ne dieyemena anu bu dia mufundi wa Misambu wakamba ne: ‘Ngakuteka Yehowa kumpala kuanyi misangu yonso; bualu bua yeye udi ku tshianza tshianyi tshia balume, tshiena nyungishibua.’ (Musambu 16:8; 63:8) Bushuwa, Yehowa neakuambuluishe bua wikale ne nsombelu udi umusankisha. Kadi, anu muudi mumanye, kudi muluishi wa Nzambi udi musue kukupangisha bua kuikala ne nsombelu eu.

SATANA UDI UBANDA BANTU

6Nshapita wa 11 uvua mumvuije muvua Satana Diabolo muele bumfumu bua Nzambi mpata. Satana wakaleja ne: Yehowa Nzambi mmuena dishima ne kabidi mmuntu mubi bualu kavua mupeshe Adama ne Eva budikadidi bua kudisunguila tshivua tshimpe ne tshivua tshibi to. Pakamana Adama ne Eva kuenza bibi ne pakavulangana bana babu, Satana wakela mpata pa tshivua tshisaka bantu bua kuenzela Nzambi mudimu. Wakamba ne: “Bantu kabena basadila Nzambi bualu mbamunange to. Meme mupete mushindu, ndi mua kubapambuisha bonso.” Muyuki wa Yobo udi uleja ne: ke muvua Satana wela meji. Kadi Yobo uvua nganyi? Mêyi akamba Satana avua amutangila mushindu kayi?

7 Yobo uvua ne muoyo kukadi bidimu bu 3600. Uvua muntu muimpe, bualu Yehowa wakamba ne: ‘Kakuena muntu mukuabu bu yeye pa buloba; bu mudiye muntu wa mutshima mutoke ne wa malu makane, udi utshina Nzambi ne udi wepuka malu mabi.’ (Yobo 1:8) Bulelela, Yobo uvua usankisha Nzambi.

8 Satana wakela mpata pa tshivua tshisaka Yobo bua kuenzela Nzambi mudimu. Wakambila Yehowa ne: ‘Wewe kuakunyunguluka Yobo ne nzubu wende ne bintu biende bionso ne bulami buebe anyi? Wewe wakuvudijila mudimu wa bianza biende disanka, ne bimuna biende biakuvulangana pa buloba. Kadi mpindieu olola tshianza tshiebe, lenga bintu bionso bidiye nabi, ne yeye neakudiule ku mêsu kuebe.’—Yobo 1:10, 11.

9 Nunku Satana wakaleja ne: Yobo uvua wenzela Nzambi mudimu anu bua bintu bivuaye mumupeshe. Wakamba kabidi ne: bu bobu batete Yobo, uvua mua kuela Nzambi nyima. Yehowa wakenza tshinyi bua tshivua Satana muambe etshi? Bu muvua tshilumbu tshitangila lulamatu lua Yobo, Yehowa wakalekela bua Satana atete Yobo. Mu diteta edi, Yobo uvua ne bua kuleja patoke ni uvua munange Nzambi anyi kavua mumunange.

BADI BATETA YOBO

10 Satana wakateta Yobo mu mishindu ya bungi. Bakiba bimuna bia bungi bia Yobo ne bakashipa bikuabu. Bakashipa bena mudimu bende ba bungi. Wakapeta lutatu lua mfranga. Pashishe tshipepele tshiakashipa bana bende. Nansha muvua malu makole aa mamukuate, ‘Yobo kakenza bibi, kakabanda Nzambi ne: Udi wenza bibi.’—Yobo 1:22.

Yehowa wakafuta Yobo bua lulamatu luende

Nzambi wakafuta Yobo bua muvuaye mushale anu mumulamate

11 Satana kakimanyina apu to. Wakela meji ne: bu muvua Yobo kayi mulekele Nzambi pakajimijaye bintu, bena mudimu ne bana, uvua mua kumulekela bu disama mua kumukuata. Yehowa wakalekela Satana wasa Yobo disama dibi ditambe. Kadi nansha disama edi kadiakafikisha Yobo ku dilekela Nzambi to. Wakamba ne dishindika dionso ne: ‘Too ne pangafua, tshiena ngitabuja bua mutshima wanyi mutoke umuke kundi.’—Yobo 27:5.

12 Yobo kavua mumanye ne: Satana ke uvua umukengesha to. Bu muvua Yobo kayi mumanye muvua Diabolo muluishe bumfumu bua Yehowa, wakela meji ne: Nzambi ke uvua umukengesha. (Yobo 6:4; 16:11-14) Nansha nanku, Yobo wakashala anu mulamate Yehowa. Lulamatu luende luakaleja patoke ne: Satana wakashima pakambaye ne: uvua wenzela Nzambi mudimu anu bua bintu bivuaye nabi.

13 Lulamatu lua Yobo luakambuluisha Yehowa bua kuandamuna ku dimuyobola dia Satana. Bulelela, Yobo uvua mulunda wa Yehowa Nzambi, ne Yehowa wakamufuta bua lulamatu luende.—Yobo 42:12-17.

MUDI TSHILUMBU ETSHI TSHIKUTANGILA

14 Tshilumbu tshia lulamatu kudi Nzambi tshivua Satana mujule katshivua tshitangila anu Yobo nkayende to. Tshidi tshikutangila pebe. Tudi tubimona patoke mu Nsumuinu 27:11, mudi Yehowa wamba ne: ‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’ Mêyi aa mafunda bidimu bia bungi kunyima kua lufu lua Yobo adi aleja ne: Satana utshivua uluisha Nzambi ne ushiminyina basadidi bende malu. Nunku, paudi ne nsombelu udi usankisha Yehowa, udi umuambuluisha bua kuandamunaye ku diyobola dia Satana ne udi usankisha mutshima wende. Udi udiumvua bishi bua bualu ebu? Kabienaku bikusankisha bua kuambuluisha Nzambi bua kuandamunaye Satana, nansha mudibi mua kukulomba bua kushintulula amue malu mu nsombelu webe anyi?

15 Tangila tshivua Satana muambe: ‘Bulelela, bionso bidi muntu nabi yeye neabifile bua kusungila muoyo wende.’ (Yobo 2:4) Pakamba Satana ne: “muntu,” uvua musue kuleja ne: kavua ubanda anu Yobo to, kadi uvua ubanda bantu bonso. Ntshilumbu tshinene. Satana mmuele lulamatu luebe kudi Nzambi mpata. Mmusue kukumona utombokela Nzambi ne ulekela nsombelu webe muimpe padi ntatu ikukuata. Mmunyi mutuye wenza nunku?

16 Anu mutuvua bamone mu Nshapita wa 10, Satana utu ne mishindu ya bungi ituye upambuisha nayi bantu. Tshia kumpala, utu uluishangana ‘bu nyama wa ntambue udi ukungula, ukeba bantu ba kudiaye.’ (1 Petelo 5:8) Nunku tudi mua kumona buluishi bua Satana padi balunda, balela anyi bantu bakuabu batuluisha patudi tulonga Bible ne tutumikila bitudi tulonga.* ( Yone 15:19, 20) Tshibidi, Satana ‘utu udiandamuna bu muanjelu wa munya.’ (2 Kolinto 11:14) Diabolo utu wenza mudimu muinshimuinshi bua kukudinga ne kukupangisha bua kuikala ne nsombelu udi usankisha Nzambi. Udi kabidi mua kukutekesha mu maboko, pamuapa ukusaka bua umone ne: kuakukumbaja malu adi Nzambi ukulomba to. (Nsumuinu 24:10) Nansha Satana wenza mudimu bu ‘nyama wa ntambue udi ukungula’ anyi bu ‘muanjelu wa munya,’ udi ne tshilumbu anu tshimue: Udi wamba ne: paudi upeta ntatu ne mateta, neulekele kuenzela Nzambi mudimu. Ntshinyi tshiudi mua kuenza bua kuleja lulamatu luebe kudi Yehowa anu bu Yobo?

TUTUMIKILAYI MIKENJI YA YEHOWA

17 Udi mua kukandamena buluishi bua Satana wewe utumikila mikenji ya Nzambi. Bidi biumvuija tshinyi? Bible udi wamba ne: “Sua Yehowa, Nzambi webe, ne mutshima webe wonso, ne muoyo webe wonso, ne bukole buebe buonso.” (Dutelonome 6:5) Padi dinanga diebe dia Nzambi didiunda, neujinge kuenza malu adiye ukulomba. Mupostolo Yone wakafunda ne: ‘Bua edi ndinanga dia Nzambi, bua tuetu tutumikile mikenji yende.’ Wewe munange Yehowa ne muoyo webe mujima, neumone ne: ‘mikenji yende kayena ikunemena bujitu’ to.—1 Yone 5:3.

18 Mmikenji kayi idi Yehowa muele? Imue ya kudiyi idi ilomba bua kulekela bikadilu bibi. Tshilejilu, tangila kazubu kadi ne tshiena-bualu etshi: “Lekela malu adi Yehowa mukine.” Mu kazubu aka mudi malu adi Bible ukandika. Paudi utapa dîsu bua musangu wa kumpala, amue malu kaena amueneka bu mabi to. Kadi paudi welangana meji pa mvese idibu bafile, neumone ne: mikenji ya Yehowa nya meji. Kushintulula bikadilu kudi mua kukukolela bikole kupita bionso biukadi muenze. Tshidibi, muntu udi ne nsombelu udi usankisha Nzambi neapete diakalenga ne disanka. (Yeshaya 48:17, 18) Udi mua kupeta nsombelu eu. Kadi mmunyi mutudi bamanye ne: udi mua kumupeta?

LEKELA MALU ADI YEHOWA MUKINE

Ba bandi babidi
Muntu mulume ne mukajende banua makanya
Nsongakaji wiba
  • Dishipangana.—Ekesode 20:13; 21:22, 23.
  • Tshiendenda.—Lewitiki 20:10, 13, 15, 16; Lomo 1:24, 26, 27, 32; 1 Kolinto 6:9, 10.
  • Malu a mîdima.—Dutelonome 18:9-13; 1 Kolinto 10:21, 22; Galatia 5:20, 21.
  • Ditendelela dia mpingu.—1 Kolinto 10:14.
  • Dikuatshika dia maluvu.—1 Kolinto 5:11.
  • Buivi.—Lewitiki 6:2, 4; Efeso 4:28.
  • Dishima.—Nsumuinu 6:16, 19; Kolosai 3:9; Buakabuluibua 22:15.
  • Lukuka.—1 Kolinto 5:11.
  • Tshikisu.—Musambu 11:5; Nsumuinu 22:24, 25; Malaki 2:16; Galatia 5:20, 21.
  • Buakulavi.—Lewitiki 19:16; Efeso 5:4; Kolosai 3:8.
  • Dienza mudimu bibi ne mashi.—Genese 9:4; Bienzedi 15:20, 28, 29.
  • Kubenga kukuatshisha bena mu dîku ne bidibu nabi dijinga.—1 Timote 5:8.
  • Kubuelakana mu mvita anyi mu malu a tshididi.—Yeshaya 2:4; Yone 6:15; 17:16.
  • Dinua makanya anyi bintu bia muomumue.—Mâko 15:23; 2 Kolinto 7:1.

19 Yehowa katu utulomba malu atudi katuyi mua kukokesha bua kuenza to. (Dutelonome 30:11-14) Mmumanye bukole ne mateketa etu kutupita tuetu bine. (Musambu 103:14) Yehowa udi kabidi mua kutupesha bukole bua kumutumikila. Mupostolo Paulo wakafunda ne: ‘Nzambi udi mua kueyemenyibua, ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye neanuenzele njila wa kupandukila, bua nuenu numanye mua kutantamana mu diteta.’ (1 Kolinto 10:13) Bua kukuambuluisha bua kutantamana, Yehowa udi mua kukupesha nansha ‘bukole bua pa buabu.’ (2 Kolinto 4:7, MML) Bu mukavua Paulo mutantamene mateta a bungi, wakafika ku diamba ne: ‘Ndi mumanye mua kuenza malu onso mu Mukalenge udi unkolesha.’—Filipoi 4:13.

TUIKALAYI NE NGIKADILU IDI ISANKISHA NZAMBI

20 Kusankisha Yehowa kakuena kumvuija anu kulekela malu adiye mukine to. Udi kabidi ne bua kunanga malu adiye munange. (Lomo 12:9) Kutuku musue kusomba ne bantu badi bamona malu muomumue nebe anyi? Ke mutu Yehowa pende musue. Nunku, ulonge mua kunanga malu adi Yehowa munange. Amue a kudiwu adi mu Musambu wa 15:1-5, mudibu bakula bua bantu batu Nzambi wangata bu balunda bende. Balunda ba Yehowa batu ne ngikadilu idi Bible ubikila ne: “mamuma a nyuma.” Amue a ku mamuma aa ke: ‘dinanga, disanka, ditalala, lutulu, bulenga, buimpe, ditabuja, budipuekeshi, kudikanda.’—Galatia 5:22, 23.

21 Kuikala ne tshibidilu tshia kubala Bible ne kumulonga nekukuambuluishe bua kupeta ngikadilu idi Nzambi munange. Kulonga malu adi Nzambi ukulomba nekukuambuluishe kabidi bua kuikala ne lungenyi lua buena lua Nzambi. (Yeshaya 30:20, 21) Paudi ukolesha dinanga diebe dia Yehowa, neujinge kuikala ne nsombelu udi umusankisha.

22 Bidi bikengela wenze muebe muonso bua kuikala ne nsombelu udi usankisha Yehowa. Bible udi ufuanyikija dishintulula nsombelu webe ne divula bumuntu bua kale bua kuvuala bumuntu bupiabupia. (Kolosai 3:9, 10) Tangila tshiakamba mufundi wa Misambu bua mikenji ya Yehowa: “Kuyilonda nkupeta diakalenga.” (Musambu 19:12, MMV [19:11]) Wewe pebe neumone ne: nsombelu udi usankisha Nzambi neakupeteshe diakalenga. Wewe wenza nunku, newandamune ku dibanda dia Satana ne neusankishe mutshima wa Yehowa!

TSHITU BIBLE ULONGESHA

  • Udi mua kulua mulunda wa Nzambi paudi umutumikila.—Yakobo 2:23.
  • Satana mmuela lulamatu lua bantu kudi Nzambi mpata.—Yobo 1:8, 10, 11; 2:4; Nsumuinu 27:11.
  • Tudi ne bua kulekela malu adi kaayi asankisha Nzambi.—1 Kolinto 6:9, 10.
  • Tudi tusankisha Yehowa patudi tukina malu adiye mukine ne tunanga adiye munange.—Lomo 12:9.

*  Kabiena biumvuija ne: Satana ke utu utuma bantu bonso badi bakuluisha to. Tshidibi, Yeye ke nzambi wa tshikondo etshi ne bena panu bonso badi ku bukokeshi buende. (2 Kolinto 4:4; 1 Yone 5:19) Nunku tumanye ne: kuikala ne nsombelu udi usankisha Nzambi kakuakusankisha bantu bonso to, ne bamue nebatuluishe.


Nkonko ya dilonga

1, 2. Tela bamue bantu bavua Yehowa musungule bu balunda bende banene.

3. Bua tshinyi Yehowa utu usungula bantu bakuabu bua kuluabu balunda bende?

4, 5. Mmunyi mutu Yehowa uleja bukole buende kudi basadidi bende?

6. Ntshinyi tshiakamba Satana bua bantu?

7, 8. (a) Ntshinyi tshivua tshisunguluje Yobo ne bantu ba tshikondo tshiende? (b) Mmunyi muvua Satana muele mpata pa tshivua tshisaka Yobo bua kuenzela Nzambi mudimu?

9. Yehowa wakenza tshinyi bua tshivua Satana muambe? Bua tshinyi wakenza nanku?

10. Mmateta kayi akapeta Yobo? Ntshinyi tshiakenzaye?

11. (a) Mbualu kayi buibidi buvua Satana muambe bua Yobo? Yehowa wakenza tshinyi? (b) Yobo wakenza tshinyi pakasamaye bikole?

12. Lulamatu lua Yobo luakaleja tshinyi pa bidi bitangila dimubanda dia Satana?

13. Ntshinyi tshiakenzeka bualu Yobo uvua ne lulamatu kudi Nzambi?

14, 15. Bua tshinyi tudi tuamba ne: Satana uvua mubande Yobo ne tuetu bonso?

16. (a) Mmunyi mutu Satana upambuisha bantu? (b) Mmunyi mudiye mua kukupambuisha?

17. Ntshinyi nangananga tshidi ne bua kutusaka bua kutumikila mikenji ya Yehowa?

18, 19. (a) Tela imue mikenji ya Yehowa. (Bala kazubu kadi.) (b) Mmunyi mutudi bamanye ne: Nzambi kêna utulomba malu adi matupite bukole?

20. Nngikadilu kayi idi isankisha Nzambi iudi ne bua kuikala nayi? Bua tshinyi idi ne mushinga?

21. Ntshinyi tshiakuambuluisha bua kuikala ne ngikadilu idi isankisha Nzambi?

22. Kuikala ne nsombelu udi usankisha Nzambi kudi kukufikisha ku dienza tshinyi?