Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

TSHISAKIDILA

Tudi ne bua kuenza mafesto adi mamanyike anyi?

Tudi ne bua kuenza mafesto adi mamanyike anyi?

MAFESTO a lelu adi mamanyike (a bitendelelu ne a tshianana) kaatu mangatshila mu Bible to. Kadi mmafumine kuepi? Wewe ne mushindu wa kubala mikanda mikuabu, neukeme bua kumanya kutu mafesto atubu benza mu ditunga dienu mafumine. Tuangatabi amue a kudiwu.

Pasaka. Mukanda kampanda udi wamba ne: “Kakuena muaba nansha umue mu Dipungila Dipiadipia udibu benza Pasaka to.” (The Encyclopædia Britannica) Kadi Pasaka eu wakatuadija bishi? Mmufumine mu ntendelelu wa bampangano. Nansha mutubu bamba ne: badi benza Pasaka bua kuvuluka dibika dia Yezu ku lufu, malu atubu benza mu tshikondo tshia Pasaka kaatu a mu Buena-Kristo to. Tshilejilu, mukanda mukuabu udi wamba bua “tululu tua Pasaka” tudi tumanyike bikole ne: “Tululu tutu tshimanyinu tshia bampangano ne nangananga tshia lulelu.”—The Catholic Encyclopedia.

Bunane. Dituku ne malu atubu benza dia Bunane kabitu mushindu umue miaba yonso to. Mukanda kampanda udi uleja kuakafumina difesto edi nunku: “Mfumu wa bena Lomo Jules César wakateka dituku dia 1 dia Tshiongo [Janvier] bu Dituku dia Kumpala dia Tshidimu mu 46 K.B.B. Divua dituku divua bena Lomo bateke bua Janus, nzambi wa biibi binene ne bikese ne wa ntuadijilu. Dîna dia Janvier ndifumine ku dîna dia Janus, nzambi eu uvua ne mpala ibidi: umue mutangile kumpala mukuabu mutangile kunyima.” (The World Book Encyclopedia) Nunku, difesto dia Bunane ndifumine ku malu a bampangano.

Halloween. Mukanda kampanda udi wamba ne: “Bilele bia Halloween bidi bifumina ku bilele bia ba Druide [bakuidi ba kale bena Celte] ba kumpala kua diledibua dia Kristo. Bena Celte bavua ne nzambi ibidi minene: nzambi dîba ne nzambi wa bafue…, bavua benza difesto dia nzambi wa bafue eu mu dituku dia 1 dia ngondo wa dikumi ne umue, bualu Tshidimu Tshipiatshipia tshia bena Celte tshivua tshibanga dituku edi. Difesto edi diakabuela ku kakese ku kakese mu bilele bia bena Kristo.”—The Encyclopedia Americana.

Makuabu mafesto adi mamanyike. Kakuena mushindu wa kuakula bua mafesto onso atu enzeka pa buloba to. Tshidibi, Yehowa kêna wanyisha difesto dionso didi ditumbisha muntu anyi tshisumbu kampanda tshienza kudi bantu to. (Yelemiya 17:5-7; Bienzedi 10:25, 26) Kupu muoyo kabidi ne: mushindu wakatuadija difesto dionso dia malu a nzambi ke udi wenza ne: disankishe anyi dibungamije Nzambi. (Yeshaya 52:11; Buakabuluibua 18:4) Mikenji ya mu Bible idi mu Nshapita wa 16 idi mua kukuleja mudi Nzambi umona dienza mafesto adi kaayi a bena nzambi adi matangalake.

← Tangila nshapita