Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

NSHAPITA MUITANU

Tshia-bupikudi ndipa ditambe bunene dia Nzambi

Tshia-bupikudi ndipa ditambe bunene dia Nzambi

Tshia-bupikudi ntshinyi?

Bakatshifuta mushindu kayi?

Tshidi mua kukuenzela tshinyi?

Mmunyi muudi mua kuleja dianyisha bua tshia-bupikudi?

NDIPA kayi ditambe bunene diutu mupete? Bua dipa kuikala dinene, kadiena amu ne bua kuikala tshintu tshia makuta a bungi to. Kadi dipa dinene ng’edi didi dikusankisha anyi dikumbaja dijinga diebe kampanda dinene.

2 Ku bintu bionso biudi musue kupeta, kudi tshintu tshimue tshidi tshipite bulenga. Ntshintu tshidi Nzambi mupeshe bantu. Yehowa mmutupeshe bintu bia bungi, kadi tshintu tshidi tshipite bionso, mmulambu wa tshia-bupikudi wa Muanende Yezu Kristo. (Matayo 20:28) Nshapita eu neatuleje mudi tshia-bupikudi tshipite bintu bikuabu bionso ku mushinga, bualu tshidi mua kukupesha masanka kaayi kuamba ne kukumbaja majinga ebe manene. Bushuwa, tshia-bupikudi ke mushindu mutambe bunene udi Yehowa uleja mudiye mukunange.

TSHIA-BUPIKUDI NTSHINYI?

3 Mu mêyi makese, tshia-bupikudi mmushindu udi Yehowa upikula nawu bantu ku bubi ne lufu. (Efeso 1:7) Bua tuetu kumvua dilongesha dia mu Bible edi, bidi bikengela kuvuluka tshivua tshienzeke mu budimi bua Edene. Wewe mumanye tshivua Adama mujimije pakadiaye tshimuma tshivua Nzambi mukandike, neumvue bimpe bua tshinyi tshia-bupikudi tshidi ne mushinga mukole kutudi.

4 Yehowa wakafuka Adama ne tshintu tshia mushinga mukole menemene, tshintu atshi tshivua muoyo mupuangane. Mbuena kuamba ne: Adama uvua ne mubidi ne lungenyi kabiyi kalema, kavua mua kusama, kukulakaja anyi kufua to. Uvua kabidi ne malanda mashême ne Yehowa. Bible udi wamba ne: Adama uvua “muana wa Nzambi.” (Luka 3:38) Nunku uvua ne malanda makole ne Yehowa Nzambi anu bu mutu muana ne tatuende. Yehowa uvua uyukila nende, umupesha midimu mimpe ya kuenza ne umuambila tshivuaye ne bua kuenza.—Genese 1:28-30; 2:16, 17.

5 Nzambi uvua mufuke Adama mu ‘tshimfuanyi tshiende.’ (Genese 1:27) Kabiena biumvuija ne: Adama uvua mufuanangane ne Nzambi ku mubidi to. Anu bu mutuvua balonge mu Nshapita wa 1, Yehowa katu umueneka to, udi nyuma. (Yone 4:24) Katu ne mubidi wa mashi ne mâyi to. Adama uvua mufukibue mu tshimfuanyi tshia Nzambi mu ngumvuilu wa ne: uvua ne ngikadilu ya Nzambi bu mudi: dinanga, meji, buakane ne bukole. Adama uvua kabidi bu Tatuende Yehowa bualu uvua ne bukokeshi bua kudisunguila malu: ntshintu tshia mushinga mukole be! Nunku Adama kavua bu tshiamu tshidi mua kuenza malu anu mudibu batshilongolole bua kuenza to. Kadi yeye uvua mua kudiangatshila mapangadika, kudisunguila tshivua tshimpe ne tshibi. Bu yeye musungule bua kutumikila Nzambi uvua mua kusomba kashidi mu Mparadizu pa buloba.

6 Nunku, pakabenga Adama kutumikila Nzambi ne bobu kumufundila tshibawu tshia lufu, uvua mujimije tshintu tshia mushinga mukole be! Wakajimija muoyo mupuangane ne masanka a bungi. (Genese 3:17-19) Diakabi, Adama wakajimijila too ne bana bende muoyo mulenga eu. Bible udi wamba ne: ‘Bu muakalua bubi pa buloba bualu bua muntu umue, ne bu muakalua lufu bua bubi abu, nunku lufu luakafika kudi bantu bonso, bua bonso bakenza malu mabi.’ (Lomo 5:12) Eyowa, tuetu bonso tudi bapiane bubi kudi Adama. Ke bualu kayi Bible udi wamba ne: ‘wakadipana,’ kupana kabidi ne bana bende ku bupika bua bubi ne lufu. (Lomo 7:14) Kakuvua tshia kuenza tshikuabu bua Adama ne Eva to, bualu bakabenga kutumikila Nzambi ku bukole. Kadi netuambe tshinyi bua bana babu bonso?

7 Diakalenga, Yehowa wakalua kuambuluisha bantu ne tshia-bupikudi. Tshia-bupikudi tshitu tshinyi? Tshitu tshiumvuija bintu bibidi. Tshia kumpala, tshia-bupikudi mmushinga utubu bafuta bua kulekesha muntu anyi kupikula tshintu, bu mudi mushinga utubu bafuta bua kulekesha muntu uvuabu bakuate mu mvita. Tshibidi, tshia-bupikudi mmushinga utu mukumbanangane ne wa tshintu kampanda, bu mudi mushinga utubu bafuta bua muntu uvuabu bakebele njiwu anyi bintu bivuabu banyange. Tshilejilu, padi muntu ukebesha njiwu, utu ufuta makuta bua bintu bionso bidi binyanguke anyi ufuta bintu bikuabu bia muomumue.

8 Mmunyi muvuabu mua kufuta bintu bionso bia mushinga mukole bivua Adama mutunyangile tuetu bonso ne kutupatula mu bupika bua bubi ne lufu? Tumonayi mpindieu tshivua Yehowa mufute ne tshiditshi mua kutuenzela.

MUSHINDU WAKAFUTA YEHOWA TSHIA-BUPIKUDI

9 Bu muvua muoyo mupuangane wa bantu mujimine, muoyo wa bantu bapange bupuangane kauvua mua kuupikula to. (Musambu 49:7, 8) Bivua bikengela tshia-bupikudi tshiakanangane ne mushinga wa muoyo uvua mujimine. Bualu ebu budi bumvuangana ne mukenji wa buakane udi mu Dîyi dia Nzambi. Mukenji eu udi wamba ne: “muoyo ku muoyo.” (Dutelonome 19:21) Kadi ntshinyi tshivua mua kukumbanangana ne mushinga wa muoyo mupuangane uvua Adama mujimije? Mukuabu muoyo wa muntu mupuangane ke tshia-bupikudi tshivua tshiakanangane.—1 Timote 2:6.

Yezu ufua bu mulambu wa kukuula nawu bantu

Yehowa wakafila Muanende umuepele mulela bu tshia-bupikudi bua bualu buetu

10 Yehowa wakafuta tshia-bupikudi mushindu kayi? Wakatuma umue wa ku bana bende bapuangane ba mu diulu pa buloba. Kadi kakatuma muana yonso tshianana to. Wakatuma muana uvuaye munange bikole, Muanende umuepele mulela. (1 Yone 4:9, 10) Muana eu wakitaba bua kumuka mu diulu. (Filipoi 2:7) Anu bu mutukadi bamone, Yehowa wakenza tshishima, wakela muoyo wa Muana eu mu difu dia Mariya. Yezu wakaledibua mupuangane ku diambuluisha dia nyuma wa Nzambi, kavua ku bupika bua bubi nansha.—Luka 1:35.

11 Kadi mmunyi mudi muntu umue mua kuikala tshia-bupikudi bua bantu ba bungi? Amba tung, mmunyi muakafika bantu ba bungi ku dikala benji ba malu mabi? Wavuluka ne: Adama wakajimija muoyo mupuangane pakenzaye bubi. Nunku, kavua mua kusambulujila bana bende muoyo mupuangane to; wakabasambulujila anu bubi ne lufu. Yezu uvua ne muoyo mupuangane, kavua muenze bubi nansha bumue to. Bible udi umubikila ne: ‘Adama wa ku nshikidilu.’ (1 Kolinto 15:45) Mbienze anu bu ne: Yezu wakangata muaba wa Adama bua kutupandisha. Pakafila Yezu muoyo wende mupuangane pa kutumikila Nzambi mu malu onso, wakafuta tshivua Adama mujimije. Ke muakapeteshaye bana ba Adama ditekemena nunku.—Lomo 5:19; 1 Kolinto 15:21, 22.

12 Bible udi uleja muvua Yezu mukenge kumpala kua kufuaye. Bakamuela mfimbu mibi, kumupopela ku mutshi ne kupungaye ne lufu pa mutshi wa makenga. (Yone 19:1, 16-18, 30; Tshisakidila) Bua tshinyi Yezu uvua ne bua kukenga bikole nunku? Netumone mu mukanda eu muvua Satana muambe ne: kakuena muntu udi mua kushala mulamate Yehowa padiye mu makenga to. Pakashala Yezu ne lulamatu nansha mu makenga, wakapesha Satana diandamuna dimpe ditambe. Yezu wakaleja ne: muntu mupuangane muikale ne bukokeshi bua kudisunguila malu, udi mua kushala ne lulamatu lukole kudi Nzambi nansha Diabolo umuenza tshinyi. Yehowa wakasanka bikole bua lulamatu lua Muanende munanga eu!—Nsumuinu 27:11.

13 Bakafuta tshia-bupikudi mushindu kayi? Mu dituku dia 14 dia ngondo wa bena Yuda wa Nisana mu tshidimu tshia 33 bikondo bietu ebi, Nzambi wakalekela bashipa Muanende mupuangane uvua kayi ne bubi. Ke muakalambula Yezu muoyo wende mupuangane ‘musangu umue bua kashidi.’ (Ebelu 10:10) Yehowa wakajula Yezu ku lufu ne mubidi wa nyuma kunyima kua matuku asatu. Yezu wakaya mu diulu bua kulambula mushinga wa muoyo wende mupuangane uvuaye mufile bu tshia-bupikudi bua kupikula bana ba Adama. (Ebelu 9:24) Yehowa wakitaba mushinga wa mulambu wa Yezu bu tshia-bupikudi tshivua tshikengedibua bua kupikula bantu ku bubi ne lufu.—Lomo 3:23, 24.

TSHIDI TSHIA-BUPIKUDI MUA KUKUENZELA

14 Nansha mutudi bena mibi, tudi mua kupeta masanka mapite bungi ku diambuluisha dia tshia-bupikudi. Tumonayi mpindieu amue a ku masanka atudi mua kupeta lelu ne matuku adi kumpala bua dipa ditambe bunene dia Nzambi edi.

15Dibuikidila dia mibi. Bitu bitukolela bua kuenza malu mimpe bualu tudi bapange bupuangane. Tuetu bonso tutu tuenza bibi mu mêyi ne mu bienzedi. Kadi badi mua ‘kutujimijila mibi yetu’ ku diambuluisha dia mulambu wa tshia-bupikudi wa Yezu. (Kolosai 1:13, 14) Kadi bua bobu kutubuikidila mibi yetu, tudi ne bua kunyingalala ne muoyo umue. Tudi kabidi ne bua kulomba Yehowa bua atufuile luse ku diambuluisha dia mulambu wa Muanende.—1 Yone 1:8, 9.

16Kondo ka muoyo kimpe ku mêsu kua Nzambi. Kondo ka muoyo kadi kalumbuluisha muntu kadi mua kumufikisha ku dipanga ditekemena anyi ku didimona kayi ne mushinga. Kadi ku diambuluisha dia tshia-bupikudi, Yehowa udi utupesha ne dinanga dionso mushindu wa kumutendelela ne kondo ka muoyo kimpe nansha mutudi bapange bupuangane. (Ebelu 9:13, 14) Bualu ebu budi butupesha dikima dia kuakula ne Yehowa, dia kusambila katuyi tutshina. (Ebelu 4:14-16) Kondo ka muoyo kimpe kadi kutupetesha ditalala, diditua mushinga ne disanka.

17Ditekemena dia muoyo wa tshiendelele pa buloba bukudimuna mparadizu. Lomo 6:23 udi wamba ne: “Difutu dia bubi ndufu.” Mvese eu udi wamba kabidi ne: ‘Kadi dipa dia luse dia Nzambi mmuoyo wa tshiendelele mu Yezu Kristo Mukalenge wetu.’ Tukavua bakule bua masanka ikala mu Mparadizu mu Nshapita 3. (Buakabuluibua 21:3, 4) Masanka onso aa ne muoyo wa kashidi nebilue anu bualu Yezu wakatufuila. Tudi ne bua kuikala ne dianyisha bua tshia-bupikudi bua tuetu kupeta malu malenga aa.

MMUSHINDU KAYI UUDI MUA KULEJA DIANYISHA?

18 Bua tshinyi tudi ne bua kuikala ne dianyisha dia bungi kudi Yehowa bua tshia-bupikudi? Tshilejilu, padi muntu ujimija dîba, bukole ne makuta ende bua kutupesha tshintu, tshintu etshi tshidi tshilua ne mushinga wa bungi kutudi. Bitu bitulenga kabidi ku muoyo bikole patudi tumona ne: muntu eu mmutupeshe tshintu etshi bualu mmutunange. Bia muomumue, tshia-bupikudi ntshintu tshidi ne mushinga kupita bintu bionso, bualu Nzambi wakadikengesha bikole bua kutupeshatshi. Yone 3:16 udi wamba ne: ‘Nzambi wakatamba kusua ba pa buloba, yeye wakabapa Muanende umuepele mulela.’ Tshia-bupikudi mmushindu mutambe yonso utudi tumona mudi Nzambi mutunange. Tshidi kabidi tshituleja mudi Yezu mutunange, bualu wakitaba bua kutufuila. (Yone 15:13) Nunku, tshia-bupikudi tshidi tshituleja ne: Yehowa ne Muanende mbanange muntu yonso.—Galatia 2:20.

19 Kadi mmunyi muudi mua kuleja ne: udi ne dianyisha bua tshia-bupikudi? Tshia kumpala, uditatshishe bua kumanya Yehowa bimpe, bua mudiye mutupeshe tshia-bupikudi. (Yone 17:3) Wewe ulonga Bible ku diambuluisha dia mukanda eu, neumanye Yehowa bimpe. Paudi umumanya bimpe, udi ulua kumunanga bikole. Dinanga edi nedikusake bua kuenza malu adi amusankisha.—1 Yone 5:3.

Nsongakaji ubala Bible

Kukeba bua kumanya Yehowa bimpe mmushindu utudi mua kuleja ne: tudi ne dianyisha bua tshia-bupikudi

20Leja ne: udi witabuja mulambu wa tshia-bupikudi wa Yezu. Yezu nkayende wakamba ne: ‘Udi witabuja Muana udi ne muoyo wa tshiendelele.’ (Yone 3:36) Kadi mmunyi mutudi mua kuleja ne: tudi tuitabuja Yezu? Ditabuja dia nunku kabatu badileja anu ku mêyi to, bualu Yakobo 2:26 udi wamba ne: ‘Ditabuja didi kadiyi ne bienzedi didi difue.’ (MMM) Nunku, ditabuja dilelela ditu dimuenekela ku “bienzedi.” Umue mushindu utudi mua kuleja mutudi tuitabuja Yezu nkuenza muetu muonso bua kumuidikija ku malu atudi tuamba ne atudi tuenza.—Yone 13:15.

21Ubuele mu tshibilu tshia Didia dia Mukalenge tshitu tshienzeka musangu umue ku tshidimu. Butuku bua dituku dia 14 dia ngondo wa Nisana mu tshidimu tshia 33 bikondo bietu ebi, Yezu wakabanjija tshibilu tshinene tshidi Bible ubikila ne: ‘Didia dia Mukalenge.’ (1 Kolinto 11:20; Matayo 26:26-28) Batu babikila kabidi tshibilu etshi ne: Tshivulukilu tshia lufu lua Kristo. Yezu wakenza tshibilu etshi bua kuvuluija bapostolo bende ne bantu bonso bavua mua kulua bayidi bende ne: pakafuaye (muikale muntu mupuangane), wakafila muoyo wende bu tshia-bupikudi. Yezu wakamba ne: tungunukayi ne ‘kuenza nunku bua kumvuluka.’ (Luka 22:19) Patudi tubuela mu Tshivulukilu, tudi tuleja dianyisha dietu bua tshia-bupikudi ne tudi tuvuluka mudi Yehowa ne Yezu batunange bikole.*

22 Kakuyi mpata, tshia-bupikudi ntshintu tshia mushinga mukole menemene tshidi Yehowa mutupeshe. (2 Kolinto 9:14, 15) Tshia-bupikudi etshi tshidi kabidi mua kuambuluisha too ne bafue. Nshapita 6 ne wa 7 neyumvuije bualu ebu.

TSHITU BIBLE ULONGESHA

  • Yehowa udi upikula bantu ku bubi ne lufu ku diambuluisha dia tshia-bupikudi.—Efeso 1:7.
  • Yehowa wakafila tshia-bupikudi pakatumaye Muanende umuepele mulela pa buloba bua kutufuilaye.—1 Yone 4:9, 10.
  • Tshia-bupikudi tshidi tshituambuluisha bua Nzambi kutubuikidilaye mibi, tuetu kupeta kondo ka muoyo kimpe ne ditekemena dia kupeta muoyo wa tshiendelele.—1 Yone 1:8, 9.
  • Tudi tuleja mutudi tuanyisha tshia-bupikudi patudi tukeba kumanya Yehowa bimpe, patudi tuitabuja mulambu wa Yezu wa tshia-bupikudi ne patudi tubuela mu Didia dia Mukalenge.—Yone 3:16.

*  Udi mua kumanya malu makuabu pa Didia dia Mukalenge mu Tshisakidila.


Nkonko ya dilonga

1, 2. (a) Ndîba kayi didi tshintu mua kuikala ne mushinga kuudi? (b) Bua tshinyi tudi mua kuamba ne: tshia-bupikudi ke tshintu tshia mushinga mukole tshiudi mupete?

3. Tshia-bupikudi ntshinyi? Bua kumanya bimpe mushinga watshi, tudi ne bua kuanji kumanya tshinyi?

4. Adama uvua munyi pavuaye ne muoyo mupuangane?

5. Padi Bible wamba ne: bakafuka Adama mu ‘tshimfuanyi tshia Nzambi’ bidi biumvuija tshinyi?

6. Adama wakajimija tshinyi pakabengaye kutumikila Nzambi? Bana bende bakapeta tshinyi?

7, 8. Tshia-bupikudi tshitu tshiumvuija bintu kayi bibidi?

9. Bivua bikengela tshia-bupikudi tshia mushindu kayi?

10. Mmunyi muakafuta Yehowa tshia-bupikudi?

11. Mmunyi muvua muntu umue mua kulua tshia-bupikudi bua bantu ba bungi?

12. Makenga a Yezu akaleja tshinyi?

13. Mmunyi muakafutabu tshia-bupikudi?

14, 15. Tudi ne bua kuenza tshinyi bua bobu ‘kutujimijila mibi yetu’?

16. Ntshinyi tshidi tshituambuluisha bua kutendelela Nzambi ne kondo ka muoyo kimpe? Kondo ka muoyo kimpe kadi mua kutupetesha tshinyi?

17. Mmasanka kayi atudi mua kupeta bualu Yezu wakatufuila?

18. Bua tshinyi tudi ne bua kuikala ne dianyisha bua tshia-bupikudi?

19, 20. Mmishindu kayi iudi mua kuleja ne: udi ne dianyisha bua tshia-bupikudi?

21, 22. (a) Bua tshinyi tudi ne bua kubuela mu Didia dia Mukalenge? (b) Ntshinyi tshiumvuijabu mu Nshapita 6 ne wa 7?