Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

Ke tshivua Nzambi musue anyi?

Ke tshivua Nzambi musue anyi?

WEWE mubale tshikandakanda kayi tshionso, mutangile televizion anyi muteleje tshisanji, kudi anu malu a terorisme anyi tshinyangu, malu a mvita ne makuabu a tshikisu. Nansha wewe kabidi udi mua kuikala ne yebe ntatu. Tshilejilu, udi mua kuikala usama anyi mufuishe. Nunku, udi mua kudiumvua anu bu Yobo, wakafika too ne ku diamba ne: “makenga mmampite.”—Yobo 10:15, MMM.

Udi mua kudiebeja ne:

  • Ke malu avua Nzambi musue buanyi meme ne bua bantu bakuabu anyi?
  • Nkuepi kundi mua kupeta diambuluisha bua kuluangana bimpe ne ntatu yanyi eyi?
  • Ditalala nedilueku pa buloba apa anyi?

Bible udi wandamuna nkonko eyi bimpe.

BIBLE UDI ULONGESHA NE: NZAMBI NEENZE MALU ADI ALONDA AA PA BULOBA.

Muntu mukulakaje ulua nsonga kabidi

‘Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’—Buakabuluibua 21:4


Muana wa bakaji uvua mulema utuadija kunyema lubilu kabidi

‘Muntu mulema neatumpike bu ngulungu.’—Yeshaya 35:6


Mpofu ubanga kumona kabidi

‘Mêsu a mufofo neatabale.’—Yeshaya 35:5


Muntu mukaji usanka padiye umona muntu uvuaye mumanye ujuka ku lufu

‘Bonso badi mu nkita [ ya tshivulukilu] nebajuke.’ —Yone 5:28, 29


Muana wa balume uvua usama umvua bimpe

‘Muena musoko kêna wamba ne: Ndi nsama.’—Yeshaya 33:24


Budimu bua biakudia

‘Biakudia nebivulangane pa buloba.’—Musambu 72:16, MMM


MALU ADI BIBLE ULONGESHA NEAKUAMBULUISHE

Bantu babidi balonga Bible

Kubengi diakamue malu adi mu mabeji abidi adi kumpala aa, wela meji ne: mmafumine mu lungenyi lua bantu to. Nzambi mmulaye bua kuenza malu aa. Bible udi umvuija mushindu waenzaye.

Kadi Bible udi utuambuluisha mu mishindu ya bungi. Udi mua kukuambuluisha bua kuikala ne nsombelu mulenga menemene nansha lelu’eu. Anji vulukabi ntatu ne makenga audi nawu. Tshilejilu, udi mua kuikala mupangile mfranga, udi ne bilumbu mu dîku, masama anyi madilu. Bible udi mua kukuleja mua kupita bimpe ne ntatu eyi ne udi mua kukuambuluisha bualu udi wandamuna bimpe nkonko bu mudi idi ilonda eyi:

  • Tutu tukenga bua tshinyi?
  • Mmunyi mutudi mua kupita bimpe ne ntatu?
  • Mmunyi mutudi mua kusomba bilenga mu dîku?
  • Patu muntu ufua utu uya penyi?
  • Netupetanganaku kabidi ne balela betu bakadi bafue anyi?
  • Tshidi mua kutuleja ne: Nzambi neakumbaje malu adiye mulaye ntshinyi?

Bu muudi ubala mukanda eu, bidi bileja ne: udi musue kumanya tshidi Bible ulongesha. Mukanda eu neukuambuluishe bikole. Bikoso bidi ne nkonko yabi kuinshi kua dibeji. Bantu ba bungi batu basanka bua kulonga Bible ne Bantemu ba Yehowa mu nkonko ne mandamuna. Tudi tuela meji ne: wewe pebe neusanke bua kulonga Bible mushindu eu. Tudi tulomba Nzambi bua akubeneshe mu dilonga diebe dia malu atu Bible nkayende ulongesha!

IBIDILANGANA NE BIBLE WEBE

Bible

BIBLE mmuenza ne mikanda 66. Bua kukupepejila malu, mikanda eyi mmikosolola mu nshapita ne mu mvese. Padibu bafila mvese mu mukanda eu, nomba wa kumpala udi ulua panyima pa dîna dia mukanda udi uleja nshapita ne udi ulonda udi uleja mvese. Tshilejilu: “2 Timote 3:16” udi umvuija mukanda muibidi wa Timote, nshapita 3, mvese wa 16.

Wewe ukeba mvese idibu bafile mu mukanda eu, newibidilangane ne Bible lukasa. Bua tshinyi kubenga mene kuenza programe wa kubala Bible dituku dionso? Wewe ubala nshapita isatu anyi itanu tshianana dituku dionso, udi mua kujikija kubala Bible mujima mu tshidimu tshimue.