Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

TSHISAKIDILA

Didia dia Mukalenge ntshibilu tshidi tshitumbisha Nzambi

Didia dia Mukalenge ntshibilu tshidi tshitumbisha Nzambi

BADI balomba bena Kristo bua kuenza Tshivulukilu tshia lufu lua Yezu. Batu babikila kabidi Tshivulukilu etshi ne: ‘Didia dia Mukalenge.’ (1 Kolinto 11:20) Tshidi ne mushinga kayi? Ntshia kuenza dîba kayi ne mushindu kayi?

Yezu Kristo wakabanjija tshibilu etshi butuku bua tshibilu tshia bena Yuda tshia Pasaka, mu tshidimu tshia 33. Bavua basekelela Pasaka anu musangu umue ku tshidimu, mu dia 14 ngondo wa bena Yuda wa Nisana. Bidi bimueneka ne: bena Yuda bavua bindila dituku dia mu muvu wa printemps ditu butuku bunenga mêba 12 ne munya mêba 12 bua kumanya dituku dia Pasaka. Ngondo uvua ubala pamue ne dituku edi ke uvua mbangilu wa ngondo wa Nisana. Pasaka uvua ulua kuenzeka matuku 14 pashishe, kunyima kua dîba dimane kubuela.

Yezu wakadia Pasaka ne bapostolo bende bonso, pashishe pakapatuka Yudasa Isakaliote, wakabanjija Didia dia Mukalenge. Tshibilu etshi tshiakapingana pamutu pa tshibilu tshia Pasaka wa bena Yuda ne nunku ntshia kuenza anu musangu umue ku tshidimu.

Mukanda wa Matayo udi wamba ne: “Yezu kuangata diampa, kudibenesha, kuditshibula, kupaye balongi bende ne: ‘Angatayi nudie, etshi mmubidi wanyi.’ Pashishe kuangataye dikopo, kuanyisha [Nzambi], kubapadio wamba ne: ‘Nuayi bonso buenu; bualu etshi mmashi anyi a Tshiovo tshipiatshipia, apueka bua ba bungi bua kubajimijila mibi yabo.’”—Matayo 26:26-28, MMM.

Bamue batu bela meji ne: Yezu wakandamuna diampa kuluadi mubidi wende ne mvinyo kuluaye mashi ende. Pabi, mubidi wa Yezu uvua amu mujima pakabanyaye diampa edi. Bapostolo ba Yezu bakadia mubidi wende ne kunua mashi ende anyi? Tòo, bualu atshi nkudia muntu ne mikenji ya Nzambi idi ikandika bualu ebu. (Genese 9:3, 4; Lewitiki 17:10) Bilondeshile Luka 22:20, Yezu wakamba ne: ‘Lupanza elu ludi dipungila dipiadipia dia mu mashi anyi akunumatshishilabu panshi.’ Lupanza alu luvua ‘dipungila dipiadipia’ dietu diena dîna edi anyi? Nansha kakese! Bualu tshipungidi ndiumvuangana, ki ntshintu tshidibu mua kulenga ne bianza to.

Diampa ne mvinyo

Nunku, diampa ne mvinyo mbimanyinu patupu. Diampa didi tshimanyinu tshia mubidi kauyi kalema wa Yezu. Kristo wakenza tshibilu etshi ne diampa dia ku a Pasaka avua mashale. Mampa au kabavua baela luevene anyi levire nansha mukese to. (Ekesode 12:8) Bible utu wakula bua levire bu tshimanyinu tshia bubi anyi dinyanguka. Nanku, diampa edi divua tshimanyinu tshia mubidi kauyi kalema uvua Yezu mufile. Kauvua ne bubi to.—Matayo 16:11, 12; 1 Kolinto 5:6, 7; 1 Petelo 2:22; 1 Yone 2:1, 2.

Mvinyo mukunze udi tshimanyinu tshia mashi a Yezu. Mashi aa ke akabanjija tshipungidi tshipiatshipia. Yezu wakamba ne: uvua mupuekeshe mashi ende bua ‘kujimija mibi’ ya bantu. Nunku Nzambi udi mua kuangata bantu bu badi kabayi ne mibi ne udi mua kudia nabu tshipungidi tshipiatshipia. (Ebelu 9:14; 10:16, 17) Tshipungidi etshi ke tshidi tshienza bua bena Kristo ba lulamatu 144000 kuyabu mu diulu. Nebikale bakalenge ne bakuidi bua kuenzela bantu malu mimpe.—Genese 22:18; Yelemiya 31:31-33; 1 Petelo 2:9; Buakabuluibua 5:9, 10; 14:1-3.

Mbanganyi badi ne bua kudia diampa ne kunua mvinyo? Bidi bimueneka patoke ne: anu bena mu tshipungidi tshipiatshipia, badi ne ditekemena dia kuya mu diulu. Nyuma wa Nzambi nkayende udi utuisha bantu aba ne: nebikale bakalenge mu diulu. (Lomo 8:16) Bantu aba badi kabidi mu tshipungidi tshia Bukalenge ne Yezu.—Luka 22:29.

Kadi netuambe tshinyi bua aba badi ne ditekemena dia kuikala ne muoyo wa tshiendelele mu Mparadizu pa buloba? Badi batumikila dîyi dia Yezu, balua mu Didia dia Mukalenge ne kanemu konso, kadi ki mbua kudia anyi kunua tshintu to. Bantemu ba Yehowa batu benza Didia dia Mukalenge musangu umue ku tshidimu tshionso padi dîba dibuela mu dituku dia 14 ngondo wa Nisana. Nansha mudi bantu anu binunu bikese bamba mudibu ne ditekemena dia kuya mu diulu, tshibilu etshi tshidi ne mushinga wa bungi bua bena Kristo bonso. Ntshikondo tshitu bena Kristo bonso belangana meji pa dinanga dikole ditambe didi nadi Yehowa Nzambi ne Yezu Kristo.—Yone 3:16.

← Tangila nshapita