Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

NSHAPITA WA MUANDA MUKULU

Bukalenge bua Nzambi ntshinyi?

Bukalenge bua Nzambi ntshinyi?

Bible utu wamba tshinyi bua Bukalenge bua Nzambi?

Bukalenge bua Nzambi nebuenze tshinyi?

Ndîba kayi diakumbaja Bukalenge ebu disua dia Nzambi pa buloba?

BANTU ba bungi mbamanye disambila dia Tatu wetu. Ndisambila dinene dia tshilejilu divua Yezu nkayende mulongeshe. Ndisambila dia mushinga mukole bualu malu asatu a kumpala adimu adi atuleja tshitu Bible nkayende ulongesha.

2 Yezu wakamba ne: “Kadi nuenu nusambile nenku: Tatu wetu udi mu diulu, Dina diebe ditumbe; Bumfumu buebe bufike, biudi musue bienzeke pa buloba bu mudibio bienzeka mu diulu.” (Matayo 6:9-13, MMM) Malu asatu aa adi umvuija tshinyi?

3 Tukadi balonge bia bungi pa dîna dia Nzambi. Tukadi kabidi balonge bikese pa disua dia Nzambi: tshikadiye muenze ne tshialuaye kuenzela bantu. Kadi pavua Yezu wamba ne: “Bumfumu buebe bufike,” uvua wakula bua tshintu kayi? Bumfumu anyi Bukalenge bua Nzambi ntshinyi? Mmunyi mualuabu kutumbisha dîna dia Nzambi anyi kudivuija dia tshijila? Ndiumvuangana kayi didi pankatshi pa Bukalenge ebu ne dienzeka dia disua dia Nzambi?

BUKALENGE BUA NZAMBI NTSHINYI?

4 Bukalenge bua Nzambi mmbulamatadi muenza kudi Yehowa Nzambi muikale ne Mfumu musungula kudi Nzambi yeye nkayende. Nnganyi udi Mfumu wa Bukalenge bua Nzambi? Yezu Kristo. Yezu udi Mfumu mupite bamfumu ba pa buloba bonso; ke bualu kayi badi bamubikila ne: ‘Mukalenge wa bakalenge ne Mfumu wa bamfumu.’ (1 Timote 6:15) Udi ne bukole bua kuenzela bantu malu mimpe matambe kupita bamfumu bonso ba pa buloba.

5 Bukalenge bua Nzambi nebuikale busombele penyi? Anji amba tung, Yezu udi penyi lelu? Uvuluke muuvua mulonge ne: bakamushipa ne wakabika ku lufu. Matuku makese panyima, wakabanda mu diulu. (Bienzedi 2:33) Nunku, Bukalenge bua Nzambi mbusombele mu diulu. Ke bualu kayi Bible udi ububikila kabidi ne: ‘Bukalenge bua mu diulu.’ (2 Timote 4:18) Kadi nansha mudibu mu diulu, nebukokeshe pa buloba.—Buakabuluibua 11:15.

6 Bua tshinyi Yezu mmushilangane ne bamfumu bakuabu? Tshia kumpala, bualu kakufua to. Padi Bible ufuanyikija Yezu ne bamfumu ba pa buloba, udi umubikila ne: ‘Yeye udi kayi mua kufua, udi wikala mu munya udi bantu kabayi bamanye mua kufika kudiye.’ (1 Timote 6:16) Nunku, malu mimpe onso enza Yezu neashale kashidi. Neenze malu malenga a bungi manene.

7 Tangila tshidi Bible wamba bua Yezu: ‘Nyuma wa Yehowa neashikame pambidi pende, nyuma wa meji ne wa kujingulula kua malu, nyuma udi umukuatshisha ne meji ne bukole, nyuma wa kumanya Yehowa ne wa kumunemeka. Disanka diende nedikale mu dinemeka diende dia Yehowa. Kêna ulumbulula bilumbu anu bua malu adi mêsu ende amona, kêna ubikosa anu bua malu adi matshi ende umvua; kadi nealumbuluishe bapele ne buakane, neakose bilumbu bia badi ne kalolo pa buloba ne kulumbulula kuakane; neakume buloba ne tshibonge tshia mukana muende, neashipe bantu babi ku mupuya wa ku mishiku yende.’ (Yeshaya 11:2-4) Mvese eu udi uleja ne: Yezu neikale Mfumu muakane ne wa luse. Udi musue mfumu wa mushindu eu anyi?

8 Tshibidi, Yezu kakukokesha nkayende to. Neakokeshe ne bantu bakuabu. Tshilejilu, mupostolo Paulo wakambila Timote ne: ‘Bituikala tuditantamika, netukokeshe nende kabidi.’ (2 Timote 2:12) Nunku, Paulo ne Timote ne bantu bakuabu ba lulamatu badibu basungule kudi Nzambi nebakokeshe ne Yezu mu Bukalenge bua mu diulu. Kadi bantu aba nebikale banga?

9 Anu bu mudibu baleje mu Nshapita wa 7, mupostolo Yone wakamona mu tshikena-kumona ‘Muana wa Mukoko [ Yezu Kristo] muimane pa Mukuna wa Siona [dikala mu muanzu wa bumfumu mu diulu], ne bantu binunu lukama ne makumi anayi ne binayi bavua nende, bikale ne dîna diende, ne dîna dia Tatuende, mafunda pa mpala pabu.’ Bantu 144000 aba mbanganyi? Yone nkayende udi utuambila ne: ‘Aba mbantu badi balonda Muana wa Mukoko kuonso kudiye uya. Bobu bakasumbibua munkatshi mua bantu, bua kuikala mamuma a kupuola diambedi kudi Nzambi ne kudi Muana wa Mukoko.’ (Buakabuluibua 14:1, 4) Bantu aba mbayidi ba lulamatu ba Yezu basungula bua kukokesha nende mu diulu. Padibu babika ku lufu bua kuya mu diulu, ‘badi ne bua kukokesha pa buloba’ pamue ne Yezu. (Buakabuluibua 5:10) Katshia ku matuku a bapostolo, Nzambi udi usungula bena Kristo ba lulamatu bua kukumbaja bungi bua bantu 144000.

10 Kuteka Yezu ne bantu 144000 bua kukokeshabu, mbualu buimpe be! Tshia kumpala, Yezu mmumanye tshidi kuikala muntu ne tshidi kukenga kumvuija. Paulo wakamba ne: Yezu kêna muakuidi munene ‘udi kayi mumanye mua kukenga netu mu matekete etu, kadi wakateyibua mu malu onso muomumue atudi tuteyibua nawu, kayi ne bubi.’ (Ebelu 4:15; 5:8) Tshibidi, bantu bakokesha nende mbakenge ne mbatantamene pabu ntatu pa buloba. Dipanga bupuangane ne masama a mishindu yonso mbibatatshishe kabidi. Nenku, nebumvue kakuyi mpata ntatu ya bantu!

BUKALENGE BUA NZAMBI NEBUENZE TSHINYI?

11 Pakambila Yezu bayidi bende bua kusambila bua Bukalenge bua Nzambi bulue, wakabambila kabidi bua kulomba bua disua dia Nzambi dienzeke ‘pa buloba bu mudidi dienzeka mu diulu.’ Nzambi udi mu diulu ne banjelu bende ba lulamatu batu benza anu disua diende. Kadi mu Nshapita 3, tuvua balonge ne: muanjelu mukuabu wakalekela kuenza disua dia Nzambi ne kufikishaye Adama ne Eva ku dienza bubi. Nshapita wa 10 neatuleje malu makuabu adi Bible wamba bua muanjelu mubi eu Satana Diabolo. Satana ne bakuabu banjelu bakitaba bua kumulonda (badibu babikila ne: bademon) bakanji kushala mu diulu bua tshikondo kampanda. Nanku tshikondo atshi, ki mbonso bavua mu diulu bavua benza disua dia Nzambi to. Kadi malu avua ne bua kushintuluka pavua Bukalenge bua Nzambi ne bua kuledibua. Yezu Kristo Mukalenge uvuabu bafuma ku diteka mu nkuasa uvua ne bua kuela Satana mvita.—Buakabuluibua 12:7-9.

12 Mulayi udi ulonda eu udi uleja tshivua ne bua kuenzeka: ‘Ngakumvua dîyi dikole mu diulu, diamba ne: Katataka lupandu ne bukole ne bukalenge bia Nzambi wetu ne bukokeshi bua Kristo wende bialu; bualu bua mubandi wa bana betu ba mu Kristo, udi ubabanda kumpala kua Nzambi wetu munya ne butuku udi wedibua panshi.’ (Buakabuluibua 12:10) Udi mumone malu manene abidi adi mu mvese eu anyi? Tshia kumpala, Bukalenge budi buledibua ne Yezu ku mutu kuabu. Tshibidi, badi bimansha Satana pa buloba.

13 Malu abidi aa akapatula bipeta kayi? Tudi tumona tshiakenzeka mu diulu mu mêyi aa: ‘Nunku, sankayi bienu, muulu ne nuenu badi bashikamamu.’ (Buakabuluibua 12:12) Eyowa, banjelu ba lulamatu badi basanka bualu bantu bonso badi mu diulu badi benza disua dia Yehowa bualu Satana ne bademon bende mbumukamu. Mu diulu mudi ditalala anu pa diodi. Disua dia Nzambi didi dienzeka mu diulu mpindieu.

14 Kadi netuambe tshinyi bua buloba? Bible udi wamba ne: ‘Mulawu wikale pa buloba, ne kudi mâyi manene, bualu bua diabolo wakupueka kunudi, muikale ne tshiji tshikole, mumanye ne: Udi ne musangu muipi.’ (Buakabuluibua 12:12) Satana mmufiike munda bualu mbamuipate mu diulu ne bualu nkumushadile anu matuku makese. Bu mudiye ne tshiji, udi ukebesha ‘mulawu’ anyi makenga pa buloba. Netuakule bia bungi bua makenga aa mu nshapita udi ulonda. Kadi bu mutudi bamanye muanda eu, tudi mua kudiebeja ne: Mmunyi mudi Bukalenge ebu mua kuenzeja disua dia Nzambi pa buloba?

15 Vuluka tshitu Nzambi mulongolole bua buloba. Ke tshiuvua mulonge mu Nshapita 3. Nzambi wakaleja mu budimi bua Edene ne: mmusue bua buloba bulue mparadizu muule tente ne bantu bakane badi kabayi bafua to. Kadi Satana wakafikisha Adama ne Eva ku dienza bubi, ke tshiakapingaja dikumbana dia disua dia Nzambi kunyima, kadi kaditu dishintuluke to. Yehowa utshitu anu musue bua ‘bantu bakane bapiane buloba ne basombepu tshiendelele.’ (Musambu 37:29) Bukalenge bua Nzambi ke buenza bualu ebu. Mushindu kayi?

Pakipatabu Satana ne bademon bende mu diulu, makenga akalua pa buloba. Makenga aa neajike mu katupa kîpi emu

Mvita, dishipangana ne nzala

16 Tangilabi mulayi udi mu Danyele 2:44. Tudi tubalamu ne: ‘Mu matuku a bakalenge abu Nzambi wa mu diulu neajadike bukalenge bukuabu budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa onso bitupa bitupa, nebuabutule, ne buobu nebujalame tshiendelele.’ Mvese eu udi utuambila tshinyi pa Bukalenge bua Nzambi?

17 Tshia kumpala, mvese eu udi utuleja ne: Bukalenge bua Nzambi buvua ne bua kutuadija midimu yabu ‘mu matuku a bakalenge abu’ anyi pikala makalenge makuabu mikalaku. Tshibidi, udi wamba ne: Bukalenge ebu nebushale kashidi. Kabakubutshimuna bua kubupinganabu kudi mbulamatadi mukuabu nansha. Tshisatu, nekuenzeke mvita pankatshi pa Bukalenge bua Nzambi ne mbulamatadi ya pa buloba. Kadi Bukalenge bua Nzambi nebutshimune. Buobu ke buashala mbulamatadi umuepele wa pa buloba. Eu ke mbulamatadi mulenga utu bantu kabayi banji kupeta!

18 Bible udi ne malu a bungi adi atangila mvita ya katshi ku dînu pankatshi pa Bukalenge bua Nzambi ne mbulamatadi ya bantu. Tshilejilu, utu ulongesha ne: padi nshikidilu wenda usemena, nyuma mibi neyimuangalaje mashimi bua kudinga ‘bakalenge ba pa buloba bujima.’ Bua tshinyi? ‘Bua kubasangisha ku mvita ya dituku dinene dia Nzambi Wa-Bukole-Buonso.’ Nebasangishe bamfumu ba pa buloba aba mu ‘muaba udibu babikila mu muaku wa tshiena-Ebelu ne: Har-Magedone.’ (Buakabuluibua 16:14, 16) Bilondeshile mvese ibidi eyi, badi babikila mvita minene yenzeka pankatshi pa mbulamatadi ya bantu ne Bukalenge bua Nzambi ne: Har-magedone (anyi Armagedone).

19 Bukalenge bua Nzambi nebuenze tshinyi ku diambuluisha dia mvita ya Armagedone? Utshidi uvuluka tshidi Nzambi musue kuenza ne buloba anyi? Yehowa Nzambi uvua musue ne: buloba bulue Mparadizu muule tente ne bantu bakane kabayi kalema ne bikale bamutendelela. Kadi bua tshinyi bualu ebu kabuena mua kuenzeka lelu? Tshia kumpala, tudi benji ba mibi, ne tudi tusama ne tufua. Kadi tuvua balonge mu Nshapita 5 ne: Yezu uvua mutufuile bua tupete muoyo wa tshiendelele. Imue misangu utshidi uvuluka mêyi a Yezu aa: ‘Bualu bua Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’—Yone 3:16.

20 Tshibidi, bantu ba bungi batu benza malu mabi. Tshilejilu, batu bashima, bibila ne benda bundumba. Kabatu basue kuenza disua dia Nzambi to. Bantu badi benza malu mabi nebafue mu mvita ya Nzambi ya Armagedone. (Musambu 37:10) Tshisatu, mbulamatadi idiku lelu kayena yambila bantu bua kuenza disua dia Nzambi to. Mivule ya kudiyi kayena ne bukokeshi bukole to, idi ikengesha bantu anyi mmibi. Bible udi wamba patoke ne: ‘Bantu badi ne bumfumu badi bakengesha bantu nabu.’—Muambi 8:9, MMV.

21 Kunyima kua Armagedone, bantu bonso nebikale mu mbulamatadi umuepele muimpe: Bukalenge bua Nzambi. Mbulamatadi eu neenze disua dia Nzambi ne nealue ne masanka a bungi be! Tshilejilu, neakuate Satana ne bademon bende. (Buakabuluibua 20:1-3) Nebenze mudimu ne mushinga wa mulambu wa Yezu bua bantu kabasami ne kabafu kabidi to, bua bikale ne muoyo wa kashidi. (Buakabuluibua 22:1-3) Buloba nebulue mparadizu. Nunku mbulamatadi eu neenze bua disua dia Nzambi kuenzekadi pa buloba bu mudidi dienzeka mu diulu. Mbuena kuamba tshinyi? Mbuena kuamba ne: ndekelu wa bionso, muntu yonso mu Bukalenge bua Nzambi neatumbishe dîna dia Yehowa.

NDÎBA KAYI DIENZA BUKALENGE BUA NZAMBI MALU AA?

22 Bidi bimueneka patoke ne: pakambila Yezu bayidi bende bua kusambila ne: ‘Bukalenge buebe bulue,’ Bukalenge abu kabuvua buanji kulua to. Buakalua diakamue pakabanda Yezu mu diulu anyi? Tòo, bualu Petelo ne Paulo bakamba panyima pa Yezu mumane kubika ku lufu ne: mulayi wa mu Musambu wa 110:1 eu wakamukumbanyina: ‘Yehowa udi wambila mukalenge wanyi ne: Ushikame ku tshianza tshianyi tshia balume too ne pangavuija badi nebe lukuna ditanda dia muinshi mua makasa ebe.’ (Bienzedi 2:32-35; Ebelu 10:12, 13) Eyowa, kuvua tshikondo tshia kuindila.

Mu Bukalenge bua Nzambi, disua dia Nzambi nedienzeke pa buloba bu mudidi dienzeka mu diulu

Dîba dibuela lua ku mbuu

23 Kadi uvua ne bua kuindila mutantshi bule kayi? Ku ndekelu kua bidimu bia 1800, balongi ba Bible ba muoyo umue bakamona ne: tshikondo atshi tshivua tshijika mu tshidimu tshia 1914. (Bala Tshisakidila bua kumanya malu adi atangila tshidimu etshi.) Malu adi enzeka pa buloba katshia ku 1914 adi aleja muvua balongi ba Bible abu bambilamu. Dikumbana dia milayi ya mu Bible didi dileja ne: Kristo wakalua Mfumu mu 1914 ne Bukalenge bua Nzambi buakabanga kukokesha tshidimu atshi. Nenku, tudi mu ‘matuku mabadika’ adi mashadile Satana. (Buakabuluibua 12:12, MMM; Musambu 110:2) Tudi mua kuamba ne dishindika dionso ne: Bukalenge bua Nzambi bukadi pa kuenzeja disua dia Nzambi pa buloba. Bualu ebu budiku bukusankisha anyi? Udiku mutuishibue ne: nebuenzeke anyi? Nshapita udi ulonda neakuleje ne: Bible utu ulongesha bushuwa malu aa.

TSHITU BIBLE ULONGESHA

  • Bukalenge bua Nzambi mmbulamatadi wa mu diulu; Yezu Kristo ke udi Mfumu ne bantu 144000 bangatshila pa buloba nebakokeshe nende.—Buakabuluibua 14:1, 4.
  • Bukalenge bua Nzambi buakatuadija kukokesha mu 1914, ne bakipata Satana mu diulu ne kumuela pa buloba mu tshidimu atshi.—Buakabuluibua 12:9.
  • Bukalenge bua Nzambi bukadi pa kubutula mbulamatadi ya bantu bua kuenza buloba ebu mparadizu.—Buakabuluibua 16:14, 16.

Nkonko ya dilonga

1. Ndisambila kayi dinene dituakonkonona?

2. Mmalu kayi asatu avua Yezu mulongeshe bayidi bende bua kulomba?

3. Mmalu kayi atudi ne bua kumanya pa Bukalenge bua Nzambi?

4. Bukalenge bua Nzambi ntshinyi? Nnganyi udi Mfumu wa Bukalenge ebu?

5. Bukalenge bua Nzambi mbusombele penyi? Nebukokeshe penyi?

6, 7. Bua tshinyi Yezu mmushilangane ne bamfumu bakuabu?

8. Mbanganyi bakokesha ne Yezu?

9. Mbantu bungi kayi bakokesha pamue ne Yezu? Ndîba kayi diakatuadija Nzambi kusungula bantu aba?

10. Bua tshinyi kuteka Yezu ne bantu 144000 bua kukokeshabu mbualu buimpe?

11. Bua tshinyi Yezu wakambila bayidi bende bua kusambila bua disua dia Nzambi kuenzekadi pa buloba bu mudidi dienzeka mu diulu?

12. Tela malu abidi manene adi mu Buakabuluibua 12:10.

13. Pakipatabu Satana mu diulu, tshiakenzeka ntshinyi?

14. Bu mudi Satana muipata mu diulu, ntshinyi tshidi tshienzeka pa buloba?

15. Nzambi mmulongolole tshinyi bua buloba?

16, 17. Danyele 2:44 udi utuambila tshinyi pa Bukalenge bua Nzambi?

18. Mmunyi mutubu babikila mvita minene yenzeka pankatshi pa Bukalenge bua Nzambi ne mbulamatadi ya bantu?

19, 20. Bua tshinyi disua dia Nzambi kadiena dienzeka lelu pa buloba?

21. Mmunyi muenzeja Bukalenge bua mu diulu disua dia Nzambi pa buloba?

22. Bua tshinyi tudi tuamba ne: Bukalenge bua Nzambi kabuakalua patshivua Yezu pa buloba anyi diakamue pakayaye mu diulu?

23. (a) Bukalenge bua Nzambi buakaledibua dîba kayi? (b) Nshapita udi ulonda neakule pa malu kayi?

Manya malu makuabu

PROGRAME WA DILONGA DIA BIBLE

Bua tshinyi kulonga Bible?

Bible mmuambuluishe bantu ba bungi pa buloba bujima bua kupeta mandamuna a nkonko ya mushinga idi itangila muoyo wetu. Udiku musue pebe kupeta mandamuna aa anyi?